“Bo sedu fasiduris di kil ku palabra fala”

1-2. Ke ku ta pui servus di Deus sedu filis? (Tiagu 1:​22-25)

JEOVA ku si Fiju ki ama ciu misti pa no sedu filis. Skirbidur di Salmu 119:2 fala sin: “Sortiadu i kilis ku obdisi si nsinamentus, e buskal ku tudu se korson.” Jesus danu tambi es garantia: ‘Sortiadu i kilis ku ta obi palabra di Deus, e ta fasi suma ki fala.’ — Luk 11:28.

² Suma servus di Jeova, anos i jintis filis. Pabia? Pabia di manga di rason, ma mas importanti i pabia di kuma no ta lei Palabra di Deus kada dia i no ta sforsa pa aplika ke ku no aprindi. — Lei Tiagu 1:​22-25.

3. Kal benefisius ku no ta tene ora ku no aplika ke ku no lei na Palabra di Deus?

³ I ten manga di benefisius ku no ta tene ora ku no “sedu fasiduris di kil ku palabra fala.” Purmeru, no sibi di kuma i kusa mas importanti pa no pudi kontenta Jeova. Sibi es ta fasinu sedu filis. (Ekl 12:13) Ora ku no pui na pratika ke ku no lei na Palabra nspiradu di Deus, no ta minjoria no vida di familia i no ta tene amisadi forti ku ermons i ku irmas di kongregason. I pudi sedu ki abo propi, bu oja es na bu vida. Alen di kila, no ta ivita di manga di purblemas ku kilis ku ka ta sirbi Jeova ta tene. Sin duvida, no konkorda ku ke ku rei Davi fala. Dipus ki fala di lei, ordis, ku julgamentus di Jeova na un kantiga, i kabanta ku es palabras: “Kil ku ta obdisi elis i ten garandi purbitu.” — Sal 19:​7-11.

4. Pabia ku utrora i ta difisil aplika ke ku no lei na Palabra di Deus?

⁴ Pa aplika ke ku no ta lei na Palabra di Deus, no pirsisa di lei i studa Biblia pa pudi ntindi ke ku Jeova misti pa no fasi. Ma na bardadi, utrora i ta difisil pabia di manga di kusas ku no ta tene pa fasi. Pa kila, no dibi di ranja tempu pa fasil. No jubi alguns ideias ku pudi judanu ba ta lei Biblia kada dia. No na oja tambi ke ku pudi judanu pensa na ke ku no lei, i oja kuma ku no pudi aplika na no vida ke ku no aprindi.

RANJA TEMPU PA LEI PALABRA DI DEUS

5. Kal ki alguns kusas ku ta tomanu manga di tempu?

⁵ Manga di servus di Jeova ta sta sempri okupadu. No ta pasa manga di tempu na kuida di asuntus ku Biblia fala di kuma i importanti. Pur isemplu, manga di nos ta tarbaja pa pudi sustenta si kabesa ku si familia. (1 Tim 5:8) Manga di ermons o irmas ta kuida di se familia ku sta duenti o ku tene idadi. Anos tudu no pirsisa di kuida di no propi saudi, i es ta toma manga di tempu. Alen des, no tene tambi kusas importanti ku no ta fasi na kongregason. Un des kusas importanti, i fasi no minjor na tarbaju di pregason di bon noba. Ku tudu es responsabilidadi ku bu tene, nunde ku bu na sai ku tempu pa lei Biblia kada dia, pensa fundu na ke ku bu lei i aplika ke ku bu aprindi?

6. Ke ku bu pudi fasi pa bu leitura di Biblia sedu un kusa importanti? (Jubi tambi foto.)

⁶ Leitura di Biblia i un di ‘kusas mas bon’ pa nos, suma servus di Jeova, pa kila, no ka dibi di fika sin fasil. (Fil 1:10) Purmeru salmu fala sin aserka di omi filis: “I ta kontenti ku lei di SIÑOR, i ta pensa nel di dia ku di noti.” (Sal 1:​1, 2) Na bardadi, es signifika di kuma no dibi di ranja tempu pa lei Biblia. Kal ki minjor ora pa lei Biblia? I ta dipindi di kada kin. Ma ke ki importanti, i pa no kuji un ora ku na pirmitinu ba ta lei Biblia kada dia. Un ermon comadu Victor fala sin: “N gosta di fasi ña leitura di Biblia parmaña. I bardadi di kuma, N ka gosta di lanta sedu, ma parmaña i ta ten puku kusas ku pudi disvia ña atenson. Ña menti ta sta kalmu i ta sedu mas fasil pa N konsentra.” Sera ki bu situason i mesmu ku es ermon? Punta bu kabesa: ‘Pa mi, kal ki minjor ora pa N fasi ña leitura di Biblia?’

PENSA NA KE KU BU LEI

7-8. Ke ku pudi tujinu apruveita diritu di no leitura di Biblia? Bu pudi da isemplu.

⁷ I bardadi di kuma no pudi lei manga di kusas, ma sin benefisia delis. Sera ki bu ciga di lei un kusa i puku tempu dipus bu ka lembra di nada? Es ta kontisi ku anos tudu. Es tambi pudi kontisi ku no leitura di Biblia. Talves bu fiksa objetivu di kantu kapitulus ku bu na ba ta lei kada dia. Es i un bon kusa. No dibi di fiksa objetivus i sforsa yangasa elis. (1 Kor 9:26) Ma, si no misti apruveita diritu di no leitura di Biblia, no dibi di fasi mas di ki so leil.

⁸ Pensa nes isemplu: Plantas pirsisa di yagu di cuba pa e pudi kirsi. Ma si cuba cubi ciu dimas na puku tempu, i na ten manga di yagu na con. Ora ku cuba cubi ciu dimas, yagu ka na konsigi yentra na con i nin plantas ka na apruveita del. Con pirsisa di tempu pa cupa yagu di cuba ku kai, dipus pa plantas pudi apruveita del. Di mesmu manera, no dibi di ivita lei Biblia rapidu dimas tok no ka na pudi tene tempu di pensa na ke ku no lei, lembra del i aplikal na no vida. — Tiagu 1:24.

9. Ke ku no dibi di fasi si no nota di kuma no ta lei Biblia rapidu dimas?

⁹ Sera ki bu ciga ja di lei Biblia rapidu dimas? Ke ku bu dibi di fasi? Ka bu lei rapidu dimas. Fasi sforsu di pensa na ke ku bu sta na lei o ke ku bu kaba di lei. I ka na sedu difisil. Bu pudi disidi aumenta tempu ku bu ta pasa na studa, pa bu pudi tene tempu di pensa fundu na ke ku bu studa. O bu pudi rapati kuantidadi di versikulus ku bu ta lei, i usa ki tempu ku sobra pa pensa na ke ku bu lei. Victor ku faladuba del, fala sin: “N manti ña leitura di Biblia kurtu, utrora N ta lei un kapitulu. Suma N ta lei parmaña sedu, kila ta judan pensa na ke ku N lei, duranti dia.” Bu pudi disidi kuantidadi di versikulus o kapitulus ku bu na lei, ma mas importanti i pa bu lei di un manera ku na pirmitiu pensa na ke ku bu lei. — Sal 119:97; Jubi kuadru “Purguntas pa pensa nel.”

10. Da un isemplu di kuma ku bu pudi aplika ke ku bu na aprindi. (1 Tesalonisensis 5:​17, 18)

¹⁰ I ka mporta kal mumentu ku bu ta lei Biblia, o kantu tempu ku bu ta usa pa fasil, buska sempri manera di aplika ke ku bu lei. Ora ku bu na lei un parti di Palabra di Deus, punta bu kabesa: ‘Kuma ku N pudi aplika es informason gosi o na futuru?’ Imaẑina kuma na bu leitura di Biblia bu sta na 1 Tesalonisensis 5:​17, 18. (Lei.) Dipus di lei es dus versikulu, bu pudi para i pensa na kantu bias ku bu ta ora, i si kontra bu ta fasi orason fundu. Tambi bu pudi pensa na kusas ku bu pudi gardisi Deus pa rel. Talves bu pudi disidi kuji tris kusas ku bu na gardisi Jeova pa rel. Nin si bu pasa so alguns minutu na pensa na ke ku bu aprindi na Biblia, kila na judau ntindi Palabra di Deus i fasi ke ki i fala. Imaẑina benefisiu ku bu na tene si bu sigi es isemplu ku faladu del li, ora ku bu na lei Biblia kada dia! Na bardadi, bu na sedu fasidur di kil ku palabra fala. Ma ke gora, si bu tene manga di pontus pa tarbaja?

FIKSA OBJETIVUS KU BU PUDI YANGASA

11. Pabia ku utrora bu pudi sinti disanimadu? Bu pudi da un isemplu.

¹¹ Utrora bu pudi sinti disanimadu, si na bu leitura di Biblia bu nota di kuma i ten manga di pontus ku bu pirsisa di minjoria. Pensa nes isemplu: Imaẑina kuma na sugunda-fera, bu leitura di Biblia nklui konsiju di ka fasi skuju di jintis. (Tiagu 2:​1-8) Bu nota di kuma, bu pudi minjoria na manera ku bu ta trata utrus i bu disidi fasi alguns mudansas. Es i un bon kusa! Dipus na tersa-fera, bu lei un parti ku na papia di importansia di kontrola ke ku bu ta papia. (Tiagu 3:​1-12) Bu nota di kuma, un bias bu ka papia di un bon manera o bu papia kusas ku ka ta nkoraẑa utrus. Asin, bu disidi di kuma bu na ba ta papia kusas ku na nkoraẑa utrus. Bu leitura di Biblia di kuarta-fera, tene un avisu di ka fasi amisadi ku mundu. (Tiagu 4:​4-12) Bu nota di kuma bu pirsisa di kuji diritu kusas ku bu ta jubi, ku bu ta lei i ku bu ta sukuta. Na kinta-fera bu pudi sinti disanimadu, pabia bu nota di kuma bu tene manga di pontus pa tarbaja.

12. Pabia ku bu ka dibi di sinti disanimadu, si na bu leitura di Biblia bu nota di kuma bu pirsisa di fasi mudansas? (Jubi tambi nota bas di paẑina.)

¹² Ka bu disanima si bu nota di kuma bu tene manga di kusas pa minjoria. Es ta mostra di kuma bu tene un bon korson. Un algin umildi i sinseru, ta lei Biblia ku objetivu di oja un kusa ki pirsisa di minjoria.a Lembra tambi di kuma, “naturesa nobu” i un kusa ku no dibi di kontinua sforsa pa tene. (Kol 3:10) Ke ku na judau kontinua sedu fasidur di kil ku palabra fala?

13. Kuma ku bu pudi fiksa alguns objetivu ku bu pudi yangasa? (Jubi tambi fotos.)

¹³ En ves di tenta aplika di un bias tudu ke ku bu aprindi, fiksa alguns objetivu ku bu pudi yangasa. (Dit 11:2) Tenta fasi es: Fasi un lista di pontus ku bu pirsisa di minjoria, i dipus kuji un o dus pontus ku bu na kumsa ku el, i disa ki utrus pa bin tarbaja dipus. Nunde ku bu dibi di kumsa?

14. Kal objetivus ku bu pudi kumsa ku el?

¹⁴ Bu pudi disidi kumsa ku un objetivu ku na sedu mas fasil pa bu yangasa. O bu pudi kumsa ku tarbaja un pontu ku bu oja kuma bu mas na pirsisa di minjoria nel. Dipus ku bu sibi kal objetivu ku bu na tarbaja, fasi piskisa na no publikasons. Bu pudi usa Índice das Publicações da Torre de Vigia o Gia di Piskisa pa Tustumuñas di Jeova. Ora aserka di bu objetivu, pidi Jeova pa i dau “diseẑu ku puder” o forsa di aẑi. (Fil 2:13) Dipus, pui na pratika ke ku bu aprindi. Ora ku bu oja kuma bu sta na tarbaja ben bu purmeru objetivu, kila talves na dau mas vontadi di tarbaja utru objetivu. Ora ku bu oja di kuma bu konsigi fasi un mudansa o minjoria na mostra un manera di sedu, bu na sinti mas vontadi di kontinua fasi mudansa. Tambi i na sedu ma fasil pa bu fasi utru mudansas.

DISA PALABRA DI DEUS ‘TARBAJA NA BO’

15. ‘Ke ku pui povu di Jeova sedu diferenti di manga di utrus ku ta lei Biblia? (1 Tesalonisensis 2:13)

¹⁵ Alguns jintis ta fala di kuma e lei ja Biblia manga di bias. Ma sera ki na bardadi e fia na Biblia? Sera ki e ta aplika na se vida ke ku Biblia fala? Nau, maioria di jintis ka ta sigi konsiju di Biblia. E diferenti ciu ku povu di Jeova! Suma kristons di purmeru sekulu, no seta Biblia “suma palabra di Deus, ku na bardadi i sedu.” Alen di kila, no ta fasi tudu ku no pudi pa disal tarbaja na no vida, ku sedu, aplika ke ki fala. — Lei 1 Tesalonisensis 2:13.

16. Ke ku pudi judanu sedu fasiduris di kil ku Palabra fala?

¹⁶ I ka tudu ora ki fasil lei i aplika ke ku Palabra di Deus fala. I pudi sedu difisil ranja tempu pa lei. O no pudi lei Biblia rapidu dimas sin tira tempu pa pensa na ke ku no lei. O no pudi fika disanimadu pabia di manga di mudansas ku no ten di fasi. I ka mporta kal difikuldadi ku bu pudi tene, bu pudi vensil ku ajuda di Jeova. Pa anos tudu no sta disididu pa seta ajuda di Jeova, asin no ka na sedu so obiduris, ma fasiduris di kil ku Palabra fala. Na bardadi, konformi no na lei Palabra di Deus, asin tambi ku no na sedu mas filis na no vida. — Tiagu 1:25.