Un karta ku pudi judanu kontinua sedu fiel te na fin

1-2. (a) Kal ku seduba situason na Judeia kontra apostolu Paulu skirbi karta pa Ebreus? (b) Kuma kes karta nspiradu juda elis ciu?

DIPUS di mortu di Jesus, kristons ku moraba na Jerusalen ku Judeia pasaba manga di situasons difisil. Puku tempu dipus ku kongregason kriston formadu, i tenba un pirsigison garandi kontra elis. (At 8:1) Dipus, serka di 20 anu mas tardi, e sufri pabia di fomi ku koitadesa. (At 11:​27-30) Ma, serka di 61 EK, kristons ka pirsigidu ciu suma ke na bin pirsigidu mas tardi. Na ki tempu, Jeova nspira apostolu Paulu pa i skirbi elis un karta ku na juda elis ciu.

² Karta pa Ebreus cigaba na bon mumentu, pabia pas ku kristons teneba ka na tarda. Paulu da bon konsijus ku na juda ki kristons nguenta situasons difisil ke na bin pasa, nin i ka na tarda. Distruison di Jerusalen ku Jesus falaba del staba pertu. (Luk 21:20) Na bardadi, nin Paulu nin kristons na Judeia ka sibiba kal tempu izatu ku Jerusalen na kabadu ku el. Ma, es kristons pudi usa tempu ku sobra pa aumenta se fe ku se firmesa, pa pudi sta purparadu. — Eb 10:25; 12:​1, 2.

3. Pabia ku kristons aos dibi di interesa ciu ku karta pa Ebreus?

³ I ka na tarda, no na bin pasa un foronta mas garandi di ki kil ku kristons ebreu pasaba. (Mat 24:21; Apok 16:​14, 16) No jubi alguns konsijus ku Jeova da pa juda ki kristons i ku pudi judanu tambi.

“NO BAI DIANTI”

4. Kal mudansas garandi ku ka seduba fasil ku Judeus ku sedu kristons tenba di fasi? (Jubi tambi diseñu.)

⁴ Judeus ku seduba kristons teneba mudansas garandi pa fasi i ku ka seduba fasil. Pa un tempu, judeus seduba povu ku Jeova kuji. Pa manga di anus, Jerusalen seduba un kau importanti dimas. Rei ku ta mandaba la, ta representa Jeova. Tambi jintis ku mistiba adora Jeova, ta fasil na templu na Jerusalen. Tudu judeus fiel ta sigiba Lei di Moisés ku se ŝefis riliẑiosu ta splikaba. E teneba regras aserka di ke ke na kume, di bota fanadu i di kuma ke dibi di trata kilis ku ka sedu judeus. Ma, dipus ku Jesus muri, Jeova ka ta seta gosi sakrifisius ku ta fasiduba na templu. Asin, i ka sedu fasil pa judeus ku torna kristons muda se manera di adora Deus. (Eb 10:​1, 4, 10) I seduba difisil pa kristons, te mesmu pa kilis ku seduba maduru suma apostolu Pedru, adapta kes mudansas. (At 10:​9-14; Gal 2:​11-14) Pabia di kusas ke fia nel gosi, es kristons pirsigidu pa ŝefis riliẑiosu judeus.

5. Kal dus grupu ku staba kontra kristons?

⁵ Dus grupu di jintis staba kontra kristons ebreu. Ŝefis riliẑiosu judeu ta pirsigiba kristons ebreu, pabia e bandona riliẑion judaiku. Tambi, alguns ku ta fala di kuma e sedu kristons, ta nsisti pa kristons sigi Lei di Moisés, talves pa ka pudi pirsigidu. (Gal 6:12) Ke ku pudi juda kristons pa e kontinua sedu fiel pa Jeova?

6. Ke ku Paulu fala pa si ermons fasi? (Ebreus 5:14–6:1)

⁶ Na si karta pa Ebreus, Paulu fala si ermons pa e studa i pensa fundu na Palabra di Deus. (Lei Ebreus 5:14–6:1.) Paulu usa Skrituras Ebraiku pa splika pabia ku manera ku kristons ta adora Jeova, i mas minjor di ki manera ku judeus ta adoralba.a Paulu nkoraẑa kristons pa e kunsi bardadi i pa e ntindil diritu, asin e na pudi sibi kal ki nsinus falsu i nega elis.

7. Kal situasons difisil ku no ta pasa aos?

⁷ Suma kristons ebreu, aos tambi no ta nfrenta jintis ku ta spalia informason o ideias ku sta kontra normas justu di Jeova. I ten jintis ku ta fala di kuma, Tustumuñas di Jeova mau, pabia e ta sigi leis di Biblia aserka di seksu. Manera ku jintis ta pensa, sta na lunjusi kada bias mas di manera di pensa di Jeova. (Dit 17:15) Pa kila, no dibi di aumenta no kapasidadi di rapada i nega ideias ku kilis ku sta kontra nos ta usa pa tenta disanimanu, o te mesmu disvianu. — Eb 13:9.

8. Ke ku na judanu kontinua sedu kristons maduru?

⁸ No dibi di sigi konsiju ku Paulu da pa kristons ebreu, di kontinua sedu kristons maduru. Es signifika di kuma no pirsisa di studa Biblia diritu, pa pudi kunsi minjor Jeova ku si manera di pensa. No pirsisa di kontinua fasi es, mesmu dipus di dedikason ku batismu. I ka mporta kantu tempu ku no sta na bardadi, anos tudu no dibi di lei i studa Palabra di Deus sempri. (Sal 1:2) Paulu fala kristons ebreu di kuma e pirsisa di tene fe. Studa Biblia sempri na judanu aumenta no fe. — Eb 11:​1, 6.

NO TENE FE KU NA JUDANU “NGAÑA SALBASON”

9. Pabia ku kristons pirsisa di tene fe forti?

⁹ Kristons ebreu pirsisaba di tene fe forti ku na juda elis salba, ora ku foronta ciga na Judeia. (Eb 10:​37-39) Jesus fala si sigiduris pa e kuri pa montañas, ora ke oja tropas da volta di Jerusalen. Si konsiju ta aplika pa tudu kristons, i ka mporta si e mora dentru di sidadi di Jerusalen o na utru ladu di Judeia. (Luk 21:​20-24) Na ki tempu, ora ku jintis atakadu pa tropas, e kustuma bai buska proteson na sidadi ku muradu, suma Jerusalen. I ka fasiba sintidu kuri pa montañas, pa kila, e pirsisaba di tene fe forti pa fasil.

10. Ke ku kristons ta fasi ora ke tene fe forti? (Ebreus 13:17)

¹⁰ Kristons ebreu na pirsisa tambi di konfia na kilis ku Jesus ta usaba pa orienta kongregason. Talves kilis ku ta toma diantera daba orientason diretu, aserka di kal mumentu ke dibi di fusi i kuma ke pudi fasil. (Lei Ebreus 13:17.) Palabra gregu ku usadu na Ebreus 13:17 pa “bo obdisi”, ta mostra di kuma algin sta konvensidu di kuma i na obdisi, pabia i konfia na kin ku sta na da orientason. Es i mas di ki obdisi kin ku na da orientason, so pabia di kuma i dadu otridadi di fasil. Pa kila, kristons ebreu pirsisa di aprindi konfia na kilis ku ta toma diantera antis di dia di foronta kumsa. Si kristons ta obdisi kilis ku ta toma diantera na tempu ki ka ten purblema, i na sedu mas fasil obdisi elis ora ke bin tene purblema.

11. Pabia ku tene fe forti i importanti pa kristons aos?

¹¹ No pirsisa tambi di tene fe suma kristons ebreu. No sta na vivi na tempu nunde ku maioria di jintis ka ta fia di kuma, fin des mundu pertu. Te mesmu e ta gozanu pabia no fia na fin des mundu. (2 Ped 3:​3, 4) Tambi, Biblia danu alguns informasons aserka di ke ku na kontisi na garandi tribulason, ma i ten manga di kusas ku no ka sibi. No pirsisa di tene fe forti di kuma, fin des mundu na ciga na ora sertu. Tambi no pirsisa di sta konvensidu di kuma, Jeova na kuida di nos na ki tempu. — Aba 2:3.

12. Ke ku na judanu salba na garandi tribulason?

¹² Tambi, no dibi di aumenta no fe na meiu ku Jeova sta na usa pa gianu aos, ku sedu, “servu jiru, di fiansa”. (Mat 24:45) Ora ku garandi tribulason kumsa, no pudi risibi orientasons diretu ku na salba no vida, suma ku talves kristons ebreu risibiba orientasons diretu, oca ku tropas Romanu da volta di Jerusalen. Gosi ki tempu di aumenta no konfiansa na orientason ku no ta risibi di kilis ku ta toma diantera na organizason di Jeova. Si desdi gosi no ka konfia nelis i obdisi se orientasons, i na sedu difisil fasil na garandi tribulason.

13. Pabia ki importanti sigi konsiju ku sta na Ebreus 13:5?

¹³ Nkuantu kristons ebreu staba na pera sinal pa kuri, e pirsisaba tambi kontinua leba un vida simplis i nega “faimadesa di diñeru.” (Lei Ebreus 13:5.) Alguns delis pasaba fomi ku koitadesa. (Eb 10:​32-34) Mesmu manera ke staba dispostu pa nguenta situasons difisil pabia di bon noba, talves alguns delis kumsa ku buska manga di diñeru pa pudi tene suguransa. Ma, diñeru ka na salba se vida ora ku Jerusalen na kabadu ku el. (Tiagu 5:3) Na bardadi, i pudiba sedu mas difisil pa un algin kuri, disa si kasa ku kusas ki tene, si ama kusas material.

14. Kuma ku tene fe forti pudi afeta no disisons aserka di kusas material?

¹⁴ Si no tene fe forti di kuma, Jeova na kaba kes mundu mau nin i ka na tarda, no ka na pensa di kuma, tene manga di diñeru ku kusas material, i kusa mas importanti. Na bardadi, jintis “na bota se prata na rua” pabia e na nota di kuma, “nin se prata nin se uru ka na pudi libra elis na dia di raiba di SIÑOR.” (Eze 7:19) En ves di konsentra na buska manga di diñeru, no pirsisa di toma disisons ku na judanu kuida di no kabesa ku no familia i ku na pirmitinu sirbi Jeova. Es nklui ivita tentason di tene dibidas ku ka pirsis, o gasta manga di tempu pa kuida di kusas ku no tene. Tambi no dibi di kuida pa no ka gosta ciu dimas di kusas material ku no tene. (Mat 6:​19, 24) Nkuantu no mas na pertusi di fin des mundu, no fe pudi testadu si kontra no na konfia na Jeova o na kusas ku no tene.

“BO PIRSISA DI FIRMESA”

15. Pabia ku kristons ebreu pirsisa di firmesa?

¹⁵ Kristons ebreu pirsisa di firmesa na se sirvisu pa Jeova, pabia di situasons difisil ku na bin piora. (Eb 10:36) Alguns pasaba pirsigison duru, ma manga delis ka pasal. Pa kila, Paulu lembranta elis pa e sta purparadu pa utrus pirsigison i pa e sedu fiel te na mortu, suma Jesus. (Eb 12:4) Manga di judeus staba ku raiba i e seduba violentu, pabia manga di jintis sta na torna kristons. Alguns anus antis di skirbi karta pa ebreus, manga di jintis ataka Paulu kontra i staba na prega na Jerusalen. Mas di 40 judeus “fasi un juramentu, e fala e ka na kume nada, e ka na bibi, tementi e ka mata Paulu.” (At 22:22; 23:​12-14) Mesmu manera ke odiadu i e pirsigidu, es kristons pirsisaba di kontinua junta pa adora Jeova, prega bon noba i manti se fe forti.

16. Kuma ku karta pa Ebreus pudi judanu oja pirsigison di un bon manera? (Ebreus 12:7)

¹⁶ Ke ku pudi juda kristons ebreu nguenta pirsigison ke staba na pasa? Paulu sibiba di kuma e pirsisa di oja pirsigison ke staba na pasa, di un bon manera. I splika elis di kuma, Deus pudi usa pirsigison ku kristons ta pasa pa forma elis. (Lei Ebreus 12:7.) Es formason pudi juda un algin tene i minjoria maneras di sedu ku na kontenta Jeova. Si kristons ebreu konsentra na bon rusultadu di ki pirsigison, i na sedu mas fasil pa e nguenta. — Eb 12:11.

17. Ke ku Paulu aprindi aserka di nguenta pirsigison?

¹⁷ Paulu fala kristons ebreu pa e sedu koraẑosu i pa ka e disisti ora ke na pasa pirsigison. Apostolu Paulu pudiba da bon konsiju aserka di nguenta pirsigison. Paulu sibiba kuma ku kristons ta tratadu mal, pabia antis i ta pirsigiba elis. Tambi i sibiba kuma di nguenta pirsigison. Alen di kila, i pasa pa diferenti tipus di pirsigison dipus ki torna kriston. (2 Kor 11:​23-25) Pa kila, Paulu pudiba papia ku konfiansa aserka di ke ki pirsis fasi pa manti firmi. I lembranta es kristons di kuma ora ke na nguenta pirsigison, e ka dibi di konfia na se kabesa, ma na Jeova. Asin, Paulu pudi fala ku tudu konfiansa: “Siñor i ña Judadur; N ka na medi.” — Eb 13:6.

18. Ke ku na kontisi ku nos tudu na futuru, i kuma ku no pudi purpara?

¹⁸ Alguns di no ermons sta na nguenta pirsigison nes mumentu. No pudi mostra no amor pa relis, ora ku no na ora pa relis. Tambi no pudi juda elis, ora ku no da elis kusas ke pirsisa del. (Eb 10:33) Ma, Biblia konta di manera klaru di kuma, “tudu kil ku misti vivi un vida puru na Kristu Jesus i ten ku sufri pirsigison.” (2 Tim 3:12) Pa kila, anos tudu no pirsisa di purpara pa tempus difisil ku na bin. No dibi di konfia na Jeova di tudu no korson i tene sertesa di kuma, i na judanu nguenta kualker purblema ku no pudi pasa. Na tempu sertu, i na kaba ku purblema ku tudu si servus fiel ta pasa. — 2 Tes 1:​7, 8.

19. Ke ku no pudi fasi pa purpara pa garandi tribulason? (Jubi tambi diseñu.)

¹⁹ Sin duvida, karta pa Ebreus juda kristons di purmeru sekulu, pa e purpara pa foronta ke na bin pasa. Paulu konsija si ermons pa e studa i ntindi diritu Palabra di Deus. Fasi es na juda elis sibi i nega nsinus ku pudi torna se fe fraku. I nkoraẑa elis pa e aumenta se fe, asin e na pudi sigi logu orientason di Jesus i di kilis ku ta toma diantera na kongregason. Tambi i juda kristons nkara pirsigison di un bon manera, i ojal suma oportunidadi di sedu formadu pa se Pape ku ta mostra amor, asin e ta tene firmesa. Anos tambi no dibi di aplika es konsiju di Biblia. Asin, no na konsigi nguenta di manera fiel te na fin. — Eb 3:14.