Kuma ku no adorason pudi kontenta Deus?

Suma ku no ojaba ja na lison ku pasa, i ka tudu riliẑions ku ta kontenta Deus. Ma no pudi adora no Kriadur di un manera ku na kontental. Kal “koldadi riliẑion” ku ta kontenta Deus? (Tiagu 1:27) Jubi ke ku Biblia sina aserka des.

1. Kuma ku no pudi aprindi adora Deus di manera ki misti?

No pudi aprindi es atraves di Biblia. Jesus fala Deus: “Bu palabra i bardadi.” (Jon 17:17) Alguns riliẑions ta nega bardadi ku sta na Palabra nspiradu di Deus, ku sedu Biblia. E ta torkial ku nsinus i ku kustumus di pekaduris. Ma Jeova ka ta kontenti ku kilis ku “nega mandamentu di Deus”. (Lei Markus 7:9.) Ma pa utru ladu, no ta kontenta si korson ora ku no sigi orientasons ki da na Biblia.

2. Kuma ku no dibi di adora Jeova?

Suma no Kriadur, Jeova meresi pa no adoral el son. (Apokalipsi 4:11) Es signifika el son ku no dibi di ama i adora, sin usa imaẑen o statua. — Lei Isaias 42:8.

No adorason pa Jeova dibi di sedu “dedikadu son pa el, pa kontental.” (Romanus 12:1) Es signifika kuma no pirsisa di obdisi si leis. Pur izemplu, kilis ku ama Jeova, e na ama i sigi leis ki da aserka di kasamenti. E ta nega pratikas suma fuma tabaku o sigaru, drogas i mau usu di bibidas alkoliku.a

3. Ke ku manda no dibi di adora Jeova juntu ku no ermons na fe?

No runions di kada semana ta danu opurtunidadi di ‘ngaba Jeova . . . na juntamentu di pobu.’ (Salmu 111:1, 2) Un di maneras ku no ta fasi kila i di kanta pa ngaba Deus. (Lei Salmu 104:33.) Jeova falanu pa no mati runions pabia i amanu, i sibi kuma kila na judanu pa no tene un vida filis pa sempri. Ora ku no sta juntu na runion no ta nkoraẑa n̈utru.

APRINDI MAS

4. No ka dibi di usa imaẑens na no adorason

VIDEO: Sera ki Deus ta Seta pa Usa Imaẑens na Adorason? (3:26)

• Na tempus bibliku, ke ku akontisi oca ku alguns jintis ku fasi parti di povu di Deus tenta usa imaẑens pa adoral?

Alguns jintis ta usa imaẑens na se adorason pa pudi pertusi di Deus. Ma sera ki fasi kila, ka na pui Deus lunjusi delis? Lei Saida 20:4-6 ku Salmu 106:35, 36, dipus bo kombersa aserka des purguntas:

• Kal imaẑens ku bu oja jintis ta usa na se adorason?

• Kuma ku Jeova ta sinti aserka di usu di imaẑens?

• Kuma ku bu ta sinti aserka di usa imaẑens?

5. Si no adora so Jeova no na sta livri di ideias falsu

VIDEO: Bardadi libertal (5:16)

Lei Salmu 91:14, dipus bo kombersa aserka des purgunta:

• Ke ku Jeova pirmiti fasi pa nos ora, ku no mostra kuma no amal i adoral el son?

6. No ta adora Deus na runions di kongregason

No ta ngaba Jeova, nkoraẑa n̈utru, ora ku no na kanta i da komentarius na runions. Lei Salmu 22:22, dipus bo kombersa aserka des purguntas:

• Bu gosta di obi komentarius na runions?

• Sera ki bu gosta di purpara pa da komentariu?

7. Jeova ta kontenti ora ku no na konta utrus ke ku no aprindi

I tene manga di maneras ku no pudi konta utrus bardadis ku sta na Biblia. Lei Salmu 9:1 ku 34:1, dipus bo kombersa aserka des purgunta:

• Kal kusa ku bu aprindi na Biblia ku bu gostaba di konta utrus?

RUSUMU

No ta kontenta no Kriadur ora ku no na adoral el son, ora ku no na ngabal na runions di kongregason, i ora ku no konta utrus ke ku no aprindi.

Rekapitulason

• Kuma ku no pudi aprindi adora Deus di manera ki misti?

• Ke ku manda no dibi di adora so Jeova?

• Ke ku manda no dibi di adora juntu ku kilis ku misti kontenta Deus?

TENE MAS INFORMASON

Na storia “N ka sedu mas skravu di idulus”, lei pa sibi kuma ku un minjer fika livri di adora idulus.

“Biblia ta muda vida di jintis” (Sintinela di 1 di juliu di 2011)

Jubi kuma ku un Joven benefisia di mati runions mesmu oca ki seduba difisil pa rel.

Jeova Kuida di Mi (3:07)

Manga di jintis ta pensa kuma krus i simbulu di riliẑion kriston, Ma sera ki no dibi di usal na no adorason?

“Ke ku Manda Tustumuñas di Jeova ka ta Usa Krus na se Adorason?” (Artigu na internet)