LISON 55
Apoia bu kongregason
Na mundu ntidu, milyons di jintis ta adora Jeova ku kontentamentu na manga di kongregasons. E ta da balur pa instruson ku orientason ke ta risibi, e ta fasi sforsu pa apoia kongregason di manga di manera. Sera ki i asin ku bu ta sinti ku bu kongregason?
1. Di kal maneras ku bu pudi usa bu tempu ku inerẑia pa apoia kongregason?
Anos tudu no pudi juda na kongregason. Pur izemplu, na bu kongregason sera ki i ten alguns ku tene idadi avansadu o ku sta duenti? Sera ki bu pudi juda elis pa e bai mati runions? O sera ki bu pudi juda elis di manera pratiku, suma fasi fera o fasi tarbaju di kasa? (Lei Tiagu 1:27.) No pudi juda tambi na limpa Salon di Renu i mantil na un bon kondison. Ningin ka ta obrigadu pa fasi es kusas. Amor pa Deus ku no ermons ta lebanu “na pursenta di bon vontadi”. — Salmu 110:3.
Kilis ku batisa suma Tustumuñas di Jeova pudi apoia kongregason di utru manera. Ermons ku kualifika na sintidu spiritual pudi sirbi suma servus ministerial, i ku tempu, suma ansions. Tantu ermons suma irmas pudi sedu ativu na apoia tarbaju di pregason i sirbi suma pionerus. Alguns Tustumuñas di Jeova pudi apoia na kumpu kaus di adorason, i munda pa un zona nunde ku un kongregason pirsisa di ajuda.
2. Kuma ku no pudi usa no diñeru ku kusas ku no tene pa apoia kongregason?
No pudi ‘da gloria pa SIÑOR ku no rikesa’. (Ditus 3:9) No ta kontenti di kontribui ku no diñeru ku utrus kusas ku no tene pa apoia no kongregason ku tarbaju di pregason na mundu ntidu. (Lei 2 Koríntius 9:7.) No ofertas tambi ta usadu pa da ajuda umanitariu. Manga delis ta disidi sempri ‘pui aparti se ofertas’. (Lei 1 Koríntius 16:2.) No pudi pui no oferta na kaŝas di kontribuisons ku ta sta na no kau di adorason o fasi oferta atraves di internet na donate.jw.org. Jeova danu opurtunidadi di no mostra no amor pa rel pa manera ku no ta disidi usa no diñeru ku kusas ku no tene.
APRINDI MAS
Jubi alguns maneras ku bu pudi apoia kongregason.
3. No pudi usa no diñeru ku kusas ku no tene
Jeova ku Jesus ama kilis ku ta da ku kontentamentu. Pur izemplu, Jesus ngaba un viuva koitadi ku fasi sforsu pa da oferta. Lei Lukas 21:1-4, dipus bo kombersa aserka des purguntas:
Sera ki no pirsisa di fasi ofertas garandi pa pudi kontenta Jeova?
Kuma ku Jeova ku Jesus ta sinti ora ku no da ofertas di tudu korson?
Aprindi kuma ku no ofertas ta usadu, mostra VIDEO. Dipus bo kombersa aserka des purgunta:
Kuma ku no ofertas ta usadu pa juda kongregasons na mundu ntidu?
4. No pudi sta pruntu pa juda
Na tempus bibliku, adoraduris di Jeova ta tarbaja ku animu pa manti se kaus di adorason na un bon kondison. Ma fasi es, i mas di ki so da diñeru. Lei 2 Kronikas 34:9-11, dipus bo kombersa aserka des purgunta:
Kuma ku kada israelita ta juda pa kuida di kasa di Jeova o kau di adorason?
Pa jubi kuma ku Tustumuñas di Jeova ta sigi es izemplu ku sta na Biblia, mostra VIDEO. Dipus bo kombersa aserka des purguntas:
Ke ku manda i importanti manti no Salon di Renu limpu i na un bon kondison?
Kal ki alguns maneras ku bu pudi juda?
5. Ermons pudi fasi sforsu pa tene mas responsabilidadis
Biblia nkoraẑa omis kristons pa sforsa pa fasi tudu ke pudi pa apoia kongregason. Pa jubi un izemplu di kila, mostra VIDEO. Dipus bo kombersa aserka des purgunta:
Na video, kuma ku Pedru sforsa pa apoia mas kongregason?
Biblia splika kal ki kualifikasons pa ermons ku na sirbi suma servus ministerial i ansions. Lei 1 Timótiu 3:1-13, dipus bo kombersa aserka des purguntas:
Ke ku ermons dibi di fasi se misti sedu servus ministerial ku ansions?
Ke ku se familias dibi di fasi? — Jubi versikulu 4 ku 11.
Ora ku ermons sta na sforsa pa yangasa es kualifikasons, kuma ku kila ta benefisia tudu jintis na kongregason?
ALGIN PUDI PUNTA: “Nunde ku Tustumuñas di Jeova ta sai ku diñeru pa fasi se tarbaju?”
Kuma ku bu na ruspundi?
RUSUMU
Jeova ta apresia ciu no sforsu, pa apoia kongregason ku no tempu, inerẑia, diñeru ku kusas ku no tene.
Rekapitulason
Kuma ku no pudi usa no tempu ku inerẑia pa apoia kongregason?
Kuma ku no pudi usa no diñeru ku kusas ku no tene pa apoia kongregason?
Di kal maneras ku bu misti apoia kongregason?
TENE MAS INFORMASON
Jubi ke ku manda Deus ka ta pidi mas si servus pa da dizimu.
Biblia da alguns responsabilidadis pa omis batisadu. Ma ke gora si un minjer batisadu pirsisa di kuida des responsabilidadis?
“Prinsipiu di otridadi na kongregason” (Sintinela di Fevereru di 2021)
Jubi kuma ku no tarbaju ta finansiadu di un manera diferenti dimas di utrus organizasons riliẑiosu.
“Kuma ku Tarbaju di Tustumuñas di Jeova ta Finansiadu?” (Artigu na internet)