6 REBEKA
I bai pa un tera ki ka kunsi
REBEKA bin pa fonti ku si puti na ombra. Sol staba kuas pa noti, ora ciga pa kata yagu pa jintis di kasa. Ku sertesa i kustumaba fasi es tarbaju kada dia. Ma e bias i notaba di kuma, i tenba un grupu di omis stranẑeru ku se kamelus pertu di fonti! Nin ku sin, ku koraẑen i bai pa fonti i kata yagu i inci si puti.
Oca ki i yalsa si puti pa karga pa bai pa kasa, un omi garandi ku staba na ki grupu kuri si tras i falal: “Disan pa N bibi un bokadiñu di yagu di bu puti.” Rebeka ka dispreza es stranẑeru, i mostra bondadi pa elis tudu. I rianta si puti pisadu i falal: “Ñu pudi bibi,” i dipus i jingi si puti i judal pa i bibi.
Ma Rebeka ka kaba so la. I mostra bondadi garandi oca ki fala i na kata yagu pa da di bibi pa 10 kamelus di ki stranẑerus. Es omi garandi stranẑeru fika dimiradu manera ki oja es bajuda bonita na inci si puti, i na kuri i na bai i na bin, i na kambia nunde ku es limarias garandi na bibi nel, e bibi tok e farta. Dipus omi puntal el i fiju di kin, i si kontra e pudi durmi na kasa di si pape. Rebeka fala elis di kuma i ten kau di durmi na kau di si pape, tambi e pudi tene kusas di kume pa se limarias.
Rebeka ka sibiba kuma i Jeova ku fasi pa es kusas kontisi. I pudi sedu di kuma es omi garandi i Eliezer, un servu di konfiansa ku bin di lunju. Manga di semanas antis, si mestri, Abraon falal pa i bai pa un tera lunju pa bai buska un minjer pa si fiju Isaki, si erderu. Abraon falal di kuma ki bajuda dibi di sedu di un familia ku ta adora Jeova. Pa kila Eliezer pidi Jeova pa i bensual. I pidil pa i judal oja un bon bajuda pa Isaki ku na mostra bondadi. I es bondadi propi ku Rebeka mostra!
Rebeka ka nega juda es omis ku nunka i ciga di kunsi, es mostra koraẑen ki teneba. Es bondadi ku Rebeka mostra i ka kusasiñu. I bardadi di kuma ki tempu diferenti ku di nos aos. Aos manga di jintis sedu “salvás, ku ka ten amor pa kil ki bon.” (2 Tim 3:1, 3) Mesmu asin, na ki tempu, pa un joven mostra es tipu di bondadi pa un stranẑeru i un kusa di dimira. Sin duvida i pirsisaba di mostra koraẑen garandi. Si koraẑen ka para li.
Dipus de ciga kasa, Rebeka kaba pa sibi pabia ku ki omis bin di tera lunju. Pape di Rebeka Betuel ku si ermon Labon kumbida Eliezer pa i kume ku elis. Ma i ka seta kume nkuantu i ka konta elis ke ku cigantal la. I konta kuma ku Jeova judal oja Rebeka. Betuel ku Labon nota di kuma Jeova ku judal e fala: ‘E kusa i bin di Jeova.’
Ora ku Rebeka sibi di kuma i vontadi di Deus pa i sai di se kasa i bai lunju pa kasa ku un omi ku nunka i ciga di kunsi, ke ki na fasi?
Ke ku Rebeka na fasi? Abraon sibiba di kuma talves bajuda ka na misti bin ku Eliezer pa Kanaan. Parsi di kuma Rebeka pudiba disidi si i na bai o nau. Oca ku sol mansi, Eliezer punta si i pudi bai janan ku Rebeka. Familia di Rebeka punta Rebeka si misti bai janan ku el. I ruspundi elis: “N na bai.” I staba dispostu pa disa se kau ku si familia pa bai lunju, talves nunka i ka na oja elis mas. Ke ku manda i mostra es koraẑen? I pudi sedu ki, Rebeka oja di kuma es i vontadi di Jeova pa rel.
Dipus di semanas di bias na kamelu, e ciga na kampu di Abraon na Kanaan. Nkuantu sol na noti, Rebeka oja un omi na yanda el so na kampu i na pensa fundu. Ki omi i Isaki. I teneba 40 anu, i un omi amorosu. Na ki mumentu i fasiba ja tris anu ku si mame Sara muri, nin ku sin, i staba inda ku dur di pirdi si mame. Oca Rebeka diskubri di kuma ki omi i Isaki, i toma si veu i kubri rostu pa mostra di kuma i setal suma si omi. Sera ki Rebeka na sedu un minjer amorosu pa Isaki i apoial suma ŝef di familia? Sera ki i na tene koraẑen pa fasi es tarbaju importanti ku Jeova dal? Biblia mostra di kuma i seduba un bon minjer pa Isaki. Disna di kumsada di se kasamenti, Isaki oja Rebeka suma un prenda ku Jeova dal. Es palabras konfirma kila: ‘Isaki amal. Asin i konsoladu dipus di mortu di si mame.’
Lei es storia na Biblia:
Kumsada 24:1-67; 25:20
Pa kombersa del:
Di kal maneras ku Rebeka mostra koraẑen?
Fasi piskisa pa ntindi minjor
1. Ke ku ka na sedu ja pusivel pa Eliezer oca ku Abraon tene fiju, ma ke ku mostra di kuma i ka fika ku nveẑa? (Kum 15:2-4; 24:12; w97-T 1/1 paẑina 30 paragrafu 2)
2. Pabia ku Abraon misti pa Rebeka bin pa Kanaan en ves di Isaki bai pa tera di ba Rebeka? (w97-T 1/1 paẑina 30 paragrafu 3)
3. Kal ku seduba signifikadu di prendas ku Rebeka ku si familia dadu? (it-T “Rebeca” paragrafu 4)
4. Konta kuma ku bias ku Rebeka fasi di Aran te kasa di Isaki na Negebi seduba. (wp16.3-T paẑina 15 paragrafu 1) A
www.LifeintheHolyLand.com
Foto A: Na pasadu manga di jinti ta viviba na Negebi tambi i teneba kau nunde ku manga di limarias ku Abraon teneba ta kume nel
Pensa na kuma di aplika es lisons
Ke ku no pudi aprindi di Abraon, Rebeka, ku Isaki aserka di kuji kin ku no na kasa kel? (Kum 24:2, 3; 27:46–28:1)
Rebeka seduba un algin tarbajadur, bon, i ku ta mostra rispitu pa utrus. Di kal maneras ku irmas pudi kopial? B
Foto B
Kuma ku bu pudi kopia koraẑen di Rebeka na bu vida?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Rebeka ora ki resusitadu?
Aprindi mas
Jubi kuma ku Rebeka kontinua mostra koraẑen suma un minjer i mame fiel.
“Rebeka — Un minjer tarbajadur ku medi Deus” (w04-T 15/4 paẑina 8 te 11)
Kal lisons ku mininus pudi aprindi di Rebeka?
“Bons maneras di sedu di Rebeka” (Artigus di site “Atividades com Figuras”)