8 JOSÉ
I risisti tentason
OCA José seduba joven, si pape Jakó ku si Deus Jeova gostaba ciu del, i e ta tratalba di manera spesial. Ma es ka signifika di kuma José teneba un vida fasil. En ves di kila, si ermons odialba. Suma Jakó trata José di un manera special, si ermons kumsa ku nveẑal i sedu mau ku el. Oca ku Jeova pui José pa i suña un suñu ku na mostra di kuma, un dia si familia na mborka si dianti, odiu di si ermons mas aumenta.
Oca ku José teneba serka di 17 anu, Jakó mandal pa un kau lunju pa bai sibi kuma ku si ermons sta, i pirsisaba di fasi manga di dias pa ciga la. Oca ki ciga, si ermons staba ku raiba e atakal, dipus e botal na un koba. E ka sinti pena del, e disprezal oca i na cora pa pidi sakur. Apesar di kuma e kombinaba pa matal, ma e bin disidi bindil pa komersiantis ku staba na pasa. Mas tardi, si ermons bai ngana Jakó, e konvensil di kuma un limaria di matu mata José, si fiju ki gosta ciu del. Ma na bardadi, José lebadu lunju pa sul na Ejitu, nunde ki bindidu suma skravu pa Potifar, un ofisial di guvernu di Faraó.
I pudiba sedu fasil pa José pirdi speransa. En ves di kila, i mostra koraẑen i tarbaja risu. E ku manda Biblia fala: “SIÑOR staba ku José.” Jeova fasi pa José sai ben na tudu ki na fasi. Potifar ntregal tudu ki teneba.
Ma, un purblema garandi staba pa kontisi. “José seduba rapas bonitu ku teneba bon forma di kurpu”, i minjer di Potifar notaba des, pa kila i ka sukundi si sintimentu. Te mesmu i falal: “Bin dita ku mi.” Ke ku José na fasi? Si familia staba lunju del. I seduba un skravu, si dunu pudi fasi kel ke ki i misti. Ku sertesa, es minjer teneba puder di torna vida di José difisil. Sera ki José na seta dita ku es minjer, o i na tene koraẑen di nega?
José sibiba di kuma minjer di si patron pudi torna si vida difisil, kuma ki konsigi nega oca ki pidil pa i dita ku el?
Biblia da resposta: “I nega”. José fala minjer di Potifar di kuma i ka na trai konfiansa di si omi, ku ntregal tudu kusas. Ma ke propi ku mas pui José nega i es palabras ki fala: “Kuma ku N na fasi e mal garandi, N peka kontra Deus?” Amor ku José tene pa si Pape, Jeova, dal koraẑen di nega logu-logu dita ku ki minjer. Ma minjer di Potifar ka disisti. I fika i na nsisti ku el “kada dia”. Un dia, oca ku nin utrus kriadus di kasa ka staba pertu, i pega José na si ropa i dipus i falal: “Bin dita ku mi”! José kapli i kuri. Ma minjer fika ku si kamisa. Mas tardi, i mostra Potifar kamisa i dipus i falal di kuma José tenta bafal. Potifar paña raiba mal, i manda pa pui José na prison.
Gosi José sta na un prison sukuru. Duranti un tempu, i pudu korenti na pe ku feru na garganti. (Sal 105:17, 18) José pudiba fasilmenti pirdi speransa. Sera ki Jeova bandonal? Nau! I José nunka pirdi konfiansa na si Deus. I tarbaja risu na prison, i Jeova bensual. Nin i ka tarda, i dadu responsabilidadi garandi na prison. I kontinua nguenta ku koraẑen konformi anus na pasa.
Jeova kontinua usa José pabia di si fe ku koraẑen. Ku tempu, Deus pui pa Faraó tene dus suñu ku na mostra ke ku na bin kontisi na futuru, i fasi pa José pudi splika ki suñus. José fala rei di kuma ki suñus signifika seti anu di fartura i dipus i na bin seti anu di fomi. Faraó fika dimiradu, i kuji José pa i purpara nason pa ki fomi ku na bin. I pui pa José sedu sugundu algin ku mas tene puder dipus del. Pabia des, José konsigi salva ejipsius di fomi, tambi salva si propi familia. Oca si ermons bin ranja kumida na Ejitu, sin sibi, e mborka dianti di se ermonsiñu, José. Suñu ku Jeova fasi pa José tene ocalba mas joven, kumpri. Ma si ermons mostra tambi di kuma, ku tempu e bin muda, gosi e sedu bon jintis. Se ermon ke odiaba, salva elis juntu ku se pape, ku futuru nason di Israel. I konsigi fasi es pabia i mostra koraẑen i kontinua manti si fe na Jeova.
Lei es storia na Biblia:
Kumsada kapitulu 37, 39, 41-45
Pa kombersa del:
Di kal maneras ku José mostra koraẑen?
Fasi piskisa pa ntindi minjor
1. Ke ku ta mostra di kuma storia di vida di José na Ejitu i bardadi? (g-T 11/10 paẑina 15 paragrafu 2)
2. Kuma ku José sibiba di kuma Jeova na konsidera adulteriu suma “mal garandi”? (Kum 39:9; w22.08 paẑina 26 paragrafu 2)
3. Pabia ku Jeova pirmiti pa José sedu purmeru ministru na Ejitu? (w96-T 1/5 paẑina 11 paragrafu 4) A
Diseñu A
4. Ke ku ta mostra di kuma, José kontinua tene fe forti na Jeova mesmu oca ki teneba 110 anu? (Kum 50:25, 26; w07-T 1/6 paẑina 28 paragrafu 10 ku 11) B
Diseñu B
Pensa na kuma di aplika es lisons
Manera ku José trata si ermons, ke ki ta nsinau aserka di kuma ku bu dibi di reaẑi ora ku un ermon o irma tratau mal? (Kum 45:4, 5; 50:19-21)
Mesmu oca José staba lunju di se kau i seduba fiel pa Jeova. Kuma ku si isemplu pudi judanu . . .
ora ku no sta na skola? C
Foto C
ora ku no sta na bias? D
Foto D
ora ku no na usa telemovel o utru apareliu eletroniku? E
Foto E
Kuma ku bu pudi kopia koraẑen di José?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta José ora ki resusitadu?
Aprindi mas
Apesar di kuma Jeova ka proteẑi José di provasons, ma i judal nguenta elis. Jubi kuma ku Jeova pudi judau tambi.
“Jeova sta na judau pa tudu kuriu diritu” (w23.01 paẑina 14 te 19)
Kuma ku mininus pudi kopia José ora ku utrus na trata elis mal?