15 NOEMI KU RUTI
E juda n̈utru na mumentus difisil
NOEMI pasa kasabi tras di n̈utru. Oca ku fomi garandi tenba na Israel, si omi disidi sai di Belen ku si familia i bai pa tera di Moabi. Un dia omi di Noemi muri, i disal el son ku si dus fiju na un tera stranjeru. Mas tardi si dus fiju bin kasa minjeris moabita ku ka ta adora Jeova. Serka di 10 anu dipus, un kasabi garandi kontisi: Si dus fiju muri! Nin e ka teneba inda fiju. Asin, Noemi ka pirdi so si omi, ma tambi si dus fiju, i ka teneba nin speransa di tene netu.
Suma i sinti di kuma i ka tene ja mas nada, i disidi riba si tera, Belen. Pa fasi es bias i na leba serka di un semana. Ruti ku Orpa minjeris di si fiju, sai ku el pa bai pa Belen. Ma, Noemi ka mistiba pa e disa se tera ku se familias. Talves i pensaba di kuma i ka na sedu bon pa e bai ku el pa Israel, pabia e pudi bin ka oca kin ku na kasa elis i tene fiju. Noemi ka pensa so na si kabesa, i pidi Ruti ku Orpa pa e riba pa kaus di se mames. Noemi seduba koraẑosu. I staba dispostu pa kontinua bias el son. Orpa cora, ma dipus i riba. Ruti cora tambi, ma i fika ku Noemi.
Ruti fala Noemi: “Ka bu ngodan pa N riba, . . . nunde ku bu bai, la ku N na bai; nunde ku bu mora, la ku N na mora. Bu pobu na sedu ña pobu; bu Deus na sedu ña Deus. Nunde ku bu muri, la ku N na muri, la ku N na nteradu nel.” Es minjer fiel i koraẑosu disidi adora Jeova suma Noemi.
Dus minjer tenba ku nguenta dur di pirdi algin ke ama na mortu. Ma e konsoladu oca ke riba pa povu di Jeova.
Asin Ruti bai ku Noemi pa Israel, i disa si familia, si kultura ku deusis di Moabi. Oca ke ciga Belen, alguns minjeris fika dimiradu pabia e oja kuma rostu ku manera di Noemi muda, pabia di anus di kansera ku difikuldadis ki pasa. I splika elis di kuma Jeova tira tudu ki tene, i disal ku kasabi i ku mon limpu. Talves palabra di Noemi pudiba pui Ruti sinti mal, pabia i disa tudu pa judal. Ma Biblia ka konta si kontra Ruti paña raiba del o i jusia ku el. En ves di kila, Ruti kumsa ku bai kuji restu di kebur na lugaris ku staba pertu, pa ranja di kume pa relis dus.
Boaz un omi riku ku sedu fiju di Raabi, ku teneba manga di lugaris, nota di kuma Ruti staba na tarbaja risu na kau di kebur. Boaz seduba un servu fiel di Jeova, i buska sibi kin ki Ruti. I obi di kuma Ruti ta tarbaja risu pa juda Noemi. I ngaba Ruti manera ki konfia na Jeova Deus pa i kuida del ku Noemi. Boaz mistiba proteẑil, pa kila i da si omis ordi pa ka e ŝatial.
Ki dia di noti, oca ku Noemi obi aserka di bondadi ku Boaz mostra, i fika kontenti dimas. Sera ki Boaz na sedu omi di Ruti? Boaz seduba familia di omi di Noemi, Elimeleki. I lei di Deus fala di kuma, ora ku un minjer sedu viuva ma i pudi inda padi, i tene diritu di kasa ku un familia tokadu di si omi ku muri. Des manera, i na pudi tene fiju na nomi di si omi, asin jorson di si omi ku si yardansa na manti na familia. (Lei 25:5, 6) Dipus di un tempu, Noemi splika Ruti ke ki i dibi di fasi.
Ruti seta fasi ke ku Noemi falal, nin si kontra ke ki falal parsi strañu tambi i pudi fika ku medu. Na fuska-fuska, i bai pa kau di kebur, nunde ku omis normalmenti ta durmi pertu di maraduras di kusas ke kebra. Ruti bai ketu nunde ku Boaz dita, i diskubril pe i dita la. Oca Boaz korda, di manera umildi Ruti lembrantal di lei di Deus i kuma ki ta aplika nel. Es omi bondosu pudiba nota di kuma Ruti staba ku kudadi. Boaz ngaba Ruti pa si koraẑen ku amor fiel ki mostra pa Jeova i pa Noemi. Dipus i falal i sta dispostu pa kasal. Ma antis, i pirsisa di bai jubi si i pusivel.
Mansin di ki dia, Boaz bai pa porton di prasa di Belen pa papia ku garandis i pa fasi tudu kusas diritu. I kasa Ruti. Ku tempu, Ruti padi un fiju macu. Noemi gostaba ciu di si netu, Obedi. I na jorson des mininu ku rei Davi bin nel, tambi la ku Mesias bin nel sekulus mas tardi! (Mat 1:5, 6, 16) Ku bondadi Jeova paga Noemi ku Ruti pa manera ke nguenta kasabi ku koraẑen!
Lei es storia na Biblia:
Ruti 1-4
Pa kombersa del:
Di kal maneras ku Noemi ku Ruti mostra koraẑen?
Fasi piskisa pa ntindi minjor
1. Pabia ku lei di Deus aserka di disa pobris kuji restus ku disadu na ora di kebur seduba bon dimas? (ia-T paẑina 39 paragrafu 23, nota bas di paẑina) A
Diseñu A
Diseñu A
2. Pabia ku no pudi fala di kuma Ruti ka bai nunde Boaz ki di noti pa tene relason seksual kel? (ia-T paẑina 47 paragrafu 17 ku 18)
3. Manera ku Boaz coma Ruti “ña fiju” ke ku kila ta nsinanu aserka del? (w16.11-T paẑina 3 paragrafu 4 te 6)
4. Diferenti di omi ku Biblia coma di ermon, kuma ku Boaz mostra di kuma i ka pensa so na si kabesa oca ki konkorda kasa ku Ruti? (w23.03 paẑina 14) B
Diseñu B
Pensa na kuma di aplika es lisons
Si no tene purblema finanseru, pabia ki na sedu bon kopia Ruti, i sedu algin ku ta tarbaja risu i ku ta kontenti ku kualker ajuda ki risibi? C
Foto C
Oca ku Noemi staba disanimadu, Ruti judal nguenta. Ke ku no aprindi di Noemi aserka di seta ku umildadi ajuda di utrus? Ke ku no aprindi di Ruti aserka di nkoraẑa utrus?
Di kal utru maneras ku bu pudi kopia koraẑen di Noemi ku Ruti?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Noemi ku Ruti ora ke resusitadu?
Aprindi mas
Kal lisons aserka di amor fiel ku no pudi aprindi na livru di Ruti, i kuma ku no pudi aplika elis?
“Bo kontinua mostra amor fiel pa n̈utru” (w21.11-TPO paẑina 8 te 13)
Usa diseñus basiadu na storias di Biblia pa juda bu fijus imaẑina kusas ku kontisi nes storia.