Kuma ku no pudi torna no fe mas forti na purmesa ku Jeova fasi di nobu mundu?

1-2. Ke ku no pirsisa di fasi nkuantu no na pera nobu mundu?

NO NA gardisi ciu pa purmesa ku Jeova fasi di muda es mundu pa nobu mundu justu. (2 Ped 3:13) Apesar di kuma no ka sibi kal tempu ku ki nobu mundu na bin, kusas ku sta na pasa na mundu ta mostra di kuma, no ka na pera pa manga di tempu. — Mat 24:32-34, 36; At 1:7.

² Nkuantu ki dia ka ciga, i ka mporta kantu tempu ku no sta na sirbi Jeova, anos tudu no pirsisa di torna no fe mas forti nes purmesa. Pabia di ke? Pabia nin si no tene fe forti, i pudi torna fraku. Na bardadi, apostolu Paulu fala kuma falta di fe i “pekadu ku ta lestu ku maranu”. (Anos ku pui letras karegadu ku italiku; Eb 12:1) Pa ka no fe torna fraku, no pirsisa sempri di pensa ciu na kusas ku ta mostra di kuma, i ka na tarda nobu mundu na bin. — Eb. 11:1.

3. Ke ku no na fala del nes studu?

³ Nes studu, no na fala di tris kusa ku no pudi fasi, pa torna no fe mas forti na purmesa ku Jeova fasi di nobu mundu: (1) Pensa fundu na resgati, (2) pensa na puder di Jeova, i (3) fasi kusas ku na pertusinu mas di Jeova. Dipus no na oja kuma ku mensaẑen ku Jeova fala Abakuk ta torna no fe mas forti. Ma antis di kila, no na fala di situasons ku no pudi pasa gosi, ki i na pirsis tene fe forti na purmesa di nobu mundu ku na bin.

SITUASONS KI I NA PIRSIS TENE FE FORTI

4. Kal disisons ki i na pirsis tene fe forti?

⁴ Kada dia no ta toma disisons ki i na pirsis tene fe forti. Pur isemplu, no ta toma disisons aserka di no kumpañerasku, divirtimentu, edukason, kasamenti, fijus ku tarbaju. I na sedu bon si no punta no kabesa: ‘Sera ki ña disisons ta mostra di kuma N tene sertesa di ki es mundu ka na fika pa tudu tempu, i ka na tarda i na bin torkiadu pa nobu mundu di Deus? O sera ki ña disisons ta influensiadu pa jintis ku ta vivi suma si mortu i fin di tudu?’ (Mat 6:19, 20; Luk 12:16-21) No na toma minjor disisons, si no torna no fe mas forti di kuma nobu mundu pertu.

5-6. Pabia ku no pirsisa di fe forti na tempus difisil? Bu pudi da isemplu.

⁵ Anos tambi no ta pasa situasons difisil nunde ku no pirsisa di fe forti. I pudi sedu pirsigison, purblema di saudi gravi o utru kusa ku pudi disanimanu. Na kumsada, no pudi pensa kuma no pudi nguenta es situason difisil. Ma manga di bias, purblemas suma esis ta tarda pa kaba, pa kila, no pirsisa di fe forti pa pudi nguenta i kontinua sirbi Jeova ku kontentamentu. — Rom 12:12; 1 Ped 1:6, 7.

⁶ Ora ku no sta na pasa situason difisil no pudi pensa di kuma nobu mundu di Jeova ka na ciga di bin. Sera ki es signifika kuma no fe i fraku? Nau, i ka kila. Jubi un isemplu. Si cuba na cubi pa manga di semanas, no pudi pensa di kuma sol ka na ciga di sai. Ma sol bin sai. Di mesmu manera, ora ku no disanima ciu, no pudi pensa kuma nobu mundu ka na ciga di bin. Si no fe sedu forti, no na sibi di kuma purmesas di Deus na bin kumpri. (Sal 94:3, 14, 15; Eb 6:17-19) Ku es konfiansa, no pudi kontinua pui adorason di Jeova na purmeru lugar na no vida.

7. Kal manera di pensa ku no dibi di ivita?

⁷ No pirsisa tambi di fe forti pa pudi fasi tarbaju di pregason. Manga di jintis ku no ta prega ta pensa di kuma, “Bon Noba” aserka di nobu mundu ku Deus na tisi ka na ciga di bin. (Mat 24:14; Eze 33:32) No dibi di toma kuidadu pa ka duvida nunka di kusas ku Jeova ta nsinanu, suma ku es jintis ta duvida. Pa ka kila kontisi, no dibi di kontinua torna no fe mas forti. No jubi gosi tris kusa ku pudi judanu fasi kila.

PENSA FUNDU NA RESGATI

8-9. Kuma ku pensa fundu na resgati pudi torna no fe mas forti?

⁸ Un manera di torna no fe mas forti i pensa fundu na resgati. Resgati i garantia di kuma purmesas di Deus na bin kumpri. Ora ku no pensa fundu na motivu ku pui Jeova da resgati i kuma ku kila kustal, no fe na purmesa di Deus di vida ku ka ta kaba na un mundu minjor ta torna mas forti, i no ta tene sertesa di kuma i na kumpri. Pabia ku no pudi fala kila?

⁹ Ke ku resgati kusta Jeova? Jeova manda si uniku Fiju ki ama, si amigu intimu, di seu pa i padidu suma un omi perfeitu. Oca i staba na Tera, Jesus nguenta tudu tipu di situason difisil. Dipus i sufri, i muri un mortu tristi. Es i un pres garandi ku Jeova paga! No Deus ku amanu, nunka ka na disa pa si Fiju sufri i muri so pa no pudi tene un vida minjor pa puku tempu. (Jon 3:16; 1 Ped 1:18, 19) Suma i paga un pres garandi, Jeova na bin pui pa no vivi pa sempri na nobu mundu.

PENSA NA PUDER DI JEOVA

10. Di akordu ku Efésius 3:20, ke ku Jeova pudi fasi?

¹⁰ Sugundu kusa ku pudi torna no fe mas forti, i pensa na puder di Jeova. I tene puder di kumpri tudu purmesas ki fasi. Aos, manga di jintis ta pensa di kuma no ka pudi tene vida ku ka ta kaba na nobu mundu. Ma Jeova sempri ta purmiti kusas ku pekaduris nunka ka pudi fasi. I pudi fasi kila, pabia el i Deus ku ten tudu puder. (Jo 42:2; Mar 10:27) Sera ki no dibi di spera pa i fasi purmesas simplis? — Lei Efésius 3:20.

11. Da isemplu di un di purmesas garandi ku Deus fasi. (Jubi kuadru “Alguns purmesas garandi ku kumpri.”)

¹¹ Jubi alguns kusas ku parsi sedu impusivel ku Jeova purmiti pa si povu na pasadu. I fala Abraon ku Sara kuma e na tene fiju na se bejisa. (Kum 17:15-17) Tambi i fala Abraon kuma si jorson na dadu tera di Kanaan. Duranti manga di anus, jorson di Abraon, ku sedu israelitas, seduba skravus na Ejitu, i parsiba di kuma es purmesa nunka ka na kumpri. Ma, i kila ku bin sedu. Dipus, Jeova fala pa Isabel, ku sedu Elizabeti, di kuma i na tene un fiju, mesmu pa manera ki beju. Jeova fala tambi Maria, un virẑen, di kuma i na padi si Fiju. Es na kumpri purmesa ku Jeova fasi manga di anus atras na jardin di Eden! — Kum 3:15.

12. Kal garantia ku Josué 23:14 ku Isaias 55:10, 11 danu aserka di puder di Jeova?

¹² Ora ku no pensa na tudu purmesas ku Jeova fasi i kuma ki kumpri elis, no ta ntindi di kuma i tene puder garandi. Asin, no fe na si purmesa di nobu mundu na torna mas forti. (Lei Josué 23:14; Isaias 55:10, 11.) Es ta lebanu pa sta mas purparadu pa juda utrus ntindi di kuma purmesa di nobu mundu i ka un suñu o imaẑinason. Jeova propi ku fala sin, aserka di nobu seu ku nobu tera: “E palabra i bardadi, i di fiansa.” — Apok 21:1, 5.

FASI KUSAS KU NA PERTUSIU MAS DI JEOVA

13. Kuma ku runions di kongregason pudi torna no fe mas forti? Bu pudi splika.

¹³ Terseru kusa ku pudi torna no fe mas forti i fasi kusas ku na pertusinu mas di Jeova. Pur isemplu, jubi kuma ku no pudi benefisia di no runions di kongregason. Anna, ku pasa manga di anus na sirbi na diferentis tipu di sirvisu di tempu kompletu, fala sin: “Runions judan manti ña fe forti. Nin si orador ka pudi nsina diritu o i ka fala nada nobu, sempri N na obi un kusa ku na judan ntindi minjor un bardadi di Biblia, i kila ta torna ña fe mas forti.”b No fe pudi torna tambi mas forti, ora ku no sukuta kumentarius di kilis ku sta na runion. — Rom 1:11, 12; 10:17.

14. Kuma ku pregason ta torna no fe mas forti?

¹⁴ No ta torna tambi no fe mas forti, ora ku no ta partisipa na pregason. (Eb 10:23) Barbara, ku sirbi Jeova pa mas di 70 anu, fala sin: “Sempri N ta oja tarbaju di pregason suma un kusa ku ta torna fe mas forti. Mas N na papia ku utrus aserka di purmesas bonitu di Jeova, mas ña fe ta torna ativu i forti.”

15. Kuma ku studu pesual ta torna no fe mas forti? (Jubi tambi diseñus.)

¹⁵ I ten utru kusa ku ta torna no fe mas forti: Studu pesual. Susan fala di kuma, ke ku ta judal i fasi un programa di kal ora ki dibi di studa. I fala sin: “Na dumingu, N ta studa Sintinela ku na studadu na semana ku na bin. Na sugunda ku tersa, N ta purpara runion di semana. I dias ku sobra, N ta fasi studu pesual.” Manti un programa regular di studu, juda Susan kontinua aumenta si fe. Irene, un irma ku sirbiba pa manga di anu na sedi mundial, oja di kuma studa profesia di Biblia torna si fe mas forti. I fala sin: “Pa mi, i interesanti dimas manera ku Jeova kumpri si profesias mesmu na kusas mas pikininu.”c

“DI SERTESA I NA BIN”

16. Pabia ku garantia ku Jeova da pa Abakuk tene signifikadu pa nos aos? (Ebreus 10:36, 37)

¹⁶ Alguns servus di Jeova sta ja na pera fin de mundu pa manga di tempu. Pa pekaduris, tempu ku Jeova na kumpri si purmesa pudi parsi kuma i na tarda. Ma, Jeova sibi kuma ku si servus ta sinti. I garanti profeta Abakuk di kuma: “Vison i ka pa gosi, ma i pa un tempu markadu. Si tempu na ciga, i ka na maina. Si i tarda, peral, pabia di sertesa i na bin, i ka na tarda.” (Aba 2:3) Sera ki Deus da es garantia so pa Abakuk? O sera ki palabras di Jeova tene signifikadu pa nos aos? Jeova orienta apostolu Paulu pa i aplika es palabras pa kristons ku na pera nobu mundu ku vontadi garandi. (Lei Ebreus 10:36, 37.) Pa kila, no pudi tene sertesa di kuma, mesmu si no pensa di kuma purmesa di Jeova salvanu na tarda pa kumpri, “di sertesa i na bin, i ka na tarda”!

17. Kuma ku un irma aplika konsiju ku Jeova da Abakuk?

¹⁷ Manga di servus di Jeova aplika konsiju ki da Abakuk di ‘kontinua pera’. Alguns delis fasil pa manga di anus. Pur isemplu, Louise kumsa sirbi Jeova na 1939. I fala sin: “Na ki tempu, N pensaba kuma Armajedon na bin antis di N kaba liseu. Kila ka bin sedu. Pa manga di anus, lei storias di Biblia aserka di jintis ku pera pa Jeova kumpri si purmesas, judanba pera pa Jeova kumpri si purmesas. N lei storia aserka di Noe, Abraon, José ku utrus ku dibi di pera manga di tempu antis di risibi pagamentu ku Jeova purmiti. Fia sempri di kuma purmesas di Jeova na bin kumpri judanba juntu ku utrus sta konvensidu di kuma nobu mundu pertu.” Manga di jintis ku na sirbi Jeova pa manga di tempu konkorda ku es!

18. Kuma ku jubi kusas ku Jeova kumpu ta torna no fe mas forti na nobu mundu ku na bin?

¹⁸ I bardadi di kuma nobu mundu ka ciga inda. Ma pensa na kusas ku ten, suma strelas, arvuris, limarias ku no kumpañeris pekadur. Ningin ka duvida di kuma tudu ki kusas ten, mesmu manera ke ka cigaba di ten na un tempu. Gosi es kusas ten pabia Jeova kumpu elis. (Kum 1:1, 26, 27) No Deus tambi purmiti di kuma i na tisi nobu mundu. I na bin kumpri es purmesa. Na nobu mundu jintis na bin tene vida ku ka ta kaba ku saudi perfeitu. No pudi tene sertesa di kuma nobu mundu na bin, na tempu ku Deus marka. — Isa 65:17; Apok 21:3, 4.

19. Kuma ku bu pudi torna bu fe mas forti?

¹⁹ Nkuantu ki dia ka ciga, fasi tudu ku bu pudi pa torna bu fe mas forti. Sempri gardisi pa resgati. Jubi puder di Jeova. Fasi kusas ku na pertusiu mas di Jeova. Si bu fasi kila, bu pudi sta entri “kilis ku na risibi kil ku Deus purmiti, pabia di se fe ku pasensa.” — Eb 6:11, 12; Rom 5:5.