Surpresas garandi ku lisons ku N aprindi di sirbi Jeova

Ña papes sai di Stonia na Sugundu Gera Mundial e bai pa Almaña, nunde ku N padidu. Dipus ku N padidu, e kumsa ku purpara pa bai pa Kanada. No purmeru kasa pertu di Ottawa, na Kanada, seduba un kau pikininu, tambi no ta kriaba galiñas la. No seduba koitadi dimas, ma pelu menus no teneba ovus pa matabicu.

Un dia, Tustumuñas di Jeova lei Apokalipsi 21:3, 4 pa ña mame. I sinti tokadu pa ke ki aprindi i kumsa ku cora. Ña pape ku ña mame kontinua studa Biblia, i dipus di puku tempu e staba pruntu pa batismu.

Ña pape ku ña mame ka obiba inglis diritu, ma e ta pegaba tesu na sirbi Jeova. Kuas kada sabadu, mesmu dipus ki tarbaja risu tudu noti na un fabrika nunde ku nikel ta ribidu, na Sudbury, Ontariu, ña pape ta leban ku ña irma Silvia pa pregason. Tambi kada semana no ta studa Sintinela na familia. Ña pape ku ña mame judan tene amor pa Deus. Pa kila, N disidi dedika ña vida pa Jeova na 1956, ocan ku des anu. Kada bias ku N pensa kuma ke ama Jeova, kila ta nkoraẑan pa N kontinua sirbil.

Oca N kaba liseu, N kumsa ku lunjusi na ña sirvisu pa Jeova. N pensaba di kuma si N sedu pioneru, nunka N ka na ciga di tene diñeru sufisienti pa viaẑa pa utrus teras suma ku N mistiba. N oca tarbaju na un radiu suma DJ (dijei), tarbaju ku N gostaba ciu del. Ma, N ta tarbaja di noti, pa kila N ta faltaba runions, tambi N ta ndiantaba ku kilis ku ka ama Deus. Dipus, ña konsiensia trenadu pa Biblia pun pa N fasi mudansas.

N munda pa Oshawa na Ontariu. La, N kunsi Ray Norman, si irma Lesli ku utrus pionerus. Elis tudu e risibin diritu. N nota kuma ke sedu filis, i kila judan pensa na ke ku N misti fasi na ña vida. E nkoraẑan pa N sedu pioneru, i N kumsa sirvisu na Setembru di 1966. N seduba filis, i N kontentiba ku vida ku N ta leba. Ma, i staba pa kontisi alguns surpresas ku na muda ña vida.

ORA KU JEOVA KUMBIDAU PA FASI UN KUSA, TENTA FASIL

Oca N staba inda na liseu, N prenŝi pitison pa sirbi na Betel di Toronto, na Kanada. Dipus, oca N sedu pioneru, N kumbidadu pa sirbi na Betel pa kuatru anu. Ma na bardadi, N gostaba di Lesli, i mediba di kuma si N seta es konviti, N pudi ka ojalba mas. Dipus di ora risu manga di bias, N disidi sirbi na Betel, ma N sta tristi di dispidi Lesli.

Na Betel N tarbaja na kau di laba ropa, dipus N bin tarbaja suma sekretariu. Na mesmu tempu, Lesli sedu pionera spesial na Gatineau, na Kebek. Manga di bias, N ta puntaba ke ki staba na fasi, i si kontra N toma bon disison. Dipus, i bin un surpresa mas garandi na ña vida. Ray, ermon di Lesli, kumbidadu pa Betel. I sedu ña kolega di kuartu! Es pui pa N torna tene mas amisadi ku Lesli. No kasa na 27 di Fevereru di 1971, ku sedu ultimu dia di ña kuatru anu di sirvisu di Betel.

Ami ku Lesli no disignadu pa sirbi na Kebek, na un kongregason di lingua Fransis. Dipus di puku anus, pa ña surpresa, N kumbidadu pa sirbi suma superintendenti di sirkuitu ocan ku 28 anu. N pensaba di kuma N seduba joven dimas, i N ka teneba manga di spiriensia pa sedu superintendenti di sirkuitu. Ma palabras di Jeremias 1:7, 8 nkoraẑan. Ma, Lesli fasi asidentis di karu, tambi i teneba difikuldadi di durmi. Gosi, kuma ku no pudi tarbaja na sirkuitu? Ma Lesli fala sin: “Si Jeova kumbidanu fasi un kusa, sera ki no ka dibi di tenta fasil?” No seta es disignason, i no sirbi na sirkuitu pa 17 anu.

N teneba manga di kusa di fasi oca N seduba superintendenti di sirkuitu. I ka tudu ora ku N ta teneba manga di tempu pa sta ku Lesli. N tenba ku aprindi utru kusa. I seduba un sugunda-fera parmaña sedu, algin toka kampaiña. Nin un algin ka staba la, i staba la so sestu di pikiniki ku tuaja di mesa, frutas, keẑu, pon, garafa di biñu, okulus ku un nota ku ka teneba nomi ku fala sin: “Leba bu minjer pa pikiniki.” I seduba un dia bonitu di sol. Ma N splika Lesli di kuma N teneba diskursus pa purpara, i N ka na pudi bai. I ntindiba, ma i staba un bokadu tristi. Oca N sinta na mesa, ña konsiensia kumsa ku nkomodan. N pensa na Efésius 5:25, 28. N pensa di kuma es versikulus di Biblia i un manera di Jeova lembrantan, pa N kuida di sentimentus di ña minjer. Dipus di N ora, N fala Lesli “no bai”, i kontenti. No bai pa un kau bonitu na un riu, no distindi tuaja di mesa, i seduba un di minjoris dia ku no pasa juntu. N konsigi tambi purpara ña diskursus.

No tarbaju di sirkuitu danu manga di alegria, disna di Kolumbia Britaniku te na Tera Nobu. Gosi N sta na viaẑa suma ku N mistiba, ocanba mas pikininu. N staba na pensa bai Skola di Jileadi, ma N ka mistiba bai pa utru tera. Parsiba di kuma misionarius i jintis spesial, i N ka pensaba kuma N pudi sedu misionariu. Tambi N teneba medu di kuma, no pudi mandadu pa un tera na Afrika ku teneba duensa ku gera. N staba kontenti nunde ku N sta, na Kanada.

PA NO SURPRESA, NO KUMBIDADU PA STONIA, LETONIA KU LITUANIA

Na 1992, Tustumuñas di Jeova pudi mas un bias prega di manera livri na alguns paisis ku fasiba parti di antigu Union Sovietiku. Pa kila, ermons puntanu si no staba dispostu pa bai pa Stonia i sedu misionarius. No fikaba surprendidu dimas, ma no ora aserka des asuntu. Mas un bias no pensa nes purgunta: ‘Si Jeova kumbidanu fasi un kusa, sera ki no ka dibi di tenta fasil?’ No seta es disignason, i N fala: ‘Pelu menus, no ka na bai pa Afrika.’

Logu no kumsa ku aprindi Stonianu. Dipus di alguns misis na Stonia, no pididu pa tarbaja na sirkuitu. No ta visitaba 46 kongregason ku alguns grupu na Stonia, Letonia ku Lituania, tambi na Kaliningradu, Rusia. Es signifika di kuma no dibi di tenta aprindi Leton, Lituanu ku Rusu. I seduba difisil. Ma, ermons ku irmas staba kontenti manera ku no na tenta aprindi se lingua, i e judanu. I bin ten un Filial na Stonia na 1999, i N disignadu pa sirbi na kumison di filial juntu ku Toomas Edur, Lembit Reile ku Tommi Kauko.

No pasa kunsi manga di Tustumuñas di Jeova ku mandaduba aforsa pa Siberia. Mesmu ku tratamentu duru na prison, i e separadu di se familia, e ka fikaba ku raiba na korson. E kontinua sedu alegri i pega tesu na pregason. Es isemplu nsinanu di kuma, mesmu bas di situasons difisil no pudi nguenta i tene alegria.

No tarbaja ciu pa manga di anos, i no ka toma tempu sufisienti pa diskansa, pa kila, Lesli kumsa ku kansa mal. No ka diskubriba logu di kuma i pabia i teneba un duensa ku ta pul i kansa mal, comadu fibromialẑia. No sta na pensa ku seredadi riba pa Kanada. Oca no kumbidadu pa Skola di Membrus di Kumison di Filial ku Se Minjeris na Patterson, Nova York, Stadus Unidu di Amerika, N pensaba di kuma no ka pudi matil. Ma, dipus di manga di orasons no seta. Jeova bensua no disison. Ma i oca no bai pa skola ku Lesli konsigi tene tratamentu mediku ki na pirsisaba del. Dipus di tratamentu, no konsigi retoma no atividadi normal.

UTRU SURPRESA I UTRU KONTINENTI

Oca no riba pa Stonia, na noti di 2008, N risibi un ŝamada di sedi mundial, i e puntanu si no na seta disignason pa bai pa Kongu. N fikaba surprendidu, pabia N pirsisa di ruspundi na utru dia. Na kumsada, N ka kontaba Lesli, pabia N sibiba kuma i ka na durmi ki di noti. Ma i ami ku ka durmiba ki di noti, pabia N staba na ora Jeova aserka di ña preokupason di bai Afrika.

Un dia dipus oca N konta Lesli, no pensa sin: “Jeova ku sta na kumbidanu pa bai pa Afrika. Kuma ku no sibi di kuma no ka pudi fasil i gosta del, si no ka tenta?” Dipus di no fasi 16 anu na Stonia, no bai pa Kinŝasa, na Kongu. Filial teneba un jardin bonitu, i seduba un lugar kalmu. Un di purmeru kusas ku Lesli pui na no kuartu i un kartaz ki guarda disna ku no sai di Kanada. I skirbidu es palabras: “Sta kontenti nunde ku bu sta.” Dipus di kunsi ermons, diriẑi studus di Biblia, spirimenta kontentamentu di sedu misionarius, no alegria na sirvisu di Jeova aumenta. Ku tempu, no tene privileẑiu di fasi visita di filialis na 13 teras di Afrika. Es pirmitinu oja manga di jintis diferenti i ku tene bon maneras di sedu. Gosi N ka tene ja mas medu, i no na gardisi Jeova manera ki mandanu pa sirbi na Afrika.

Na kongu, no kusñadu diferenti tipus di kumida, suma bicus, kusas ku N pensaba di kuma no ka na pudiba kume. Ma oca no oja ermons na kume es kumidas, no tenta kume elis, i no gosta.

No bai pa lesti di pais pa nkoraẑa no ermons ku irmas, i leba elis kusas ke pirsisa del. Nes lugaris, i tenba jintis armadu ku ta ataka tabankas i molostra minjeris ku mininus. Maioria di no ermons tene puku kusas material. Ma, se speransa forti na resureison, se amor pa Jeova, ku se fidelidadi pa si organizason, tokanu ciu. Se isemplu lebanu na pensa na ke ku manda no ta sirbi Jeova, i lebanu tambi na aumenta no fe nel. Alguns ermons pirdi se kasas ku kusas ke labra. Es lembrantan di kuma, no pudi pirdi kusas material rapidu, i no amisadi ku Jeova i kusa mas importanti. Mesmu ku manga di purblemas, no ermons ka ta miskiña sempri. Se atitudi nkoraẑanu pa no nfrenta no purblemas, ku purblemas di saudi ku koraẑen.

NOBU DISIGNASON NA ASIA

I ten mas utru surpresa. No pididu pa munda pa filial di Hong Kong. Nunka no imaẑina vivi na Asia. Ma dipus di spurmenta amor di Jeova na tudu utrus disignasons, no seta konviti. Na 2013, ku lagrimas na ujus, no disa no kiridu ermons ku bonitasku di Afrika, sin sibi ke ku na peranu.

I un mudansa garandi vivi na Hong Kong, pabia i un sidadi muvimentadu ku tene jintis di tudu parti di mundu. I difisil aprindi lingua Ŝines. Ma ermons risibinu, i no gosta ciu di se kumida. Tarbaju staba na aumenta ciu, i filial pirsisaba di manga di spasu. Ma pres di kaus staba na aumenta ciu. Pa kila, ku jiresa Korpu Guvernanti disidi mudanta alguns tarbaju pa utru kau i bindi maioria di predius di filial. Puku tempu dipus, na 2015, no bai pa Koreia di Sul nunde ku no kontinua sirbi. No dibi di aprindi utru lingua difisil, mesmu ku no ka pudi papial diritu, ermons ku irmas ta nkoraẑanu ora ke falanu di kuma, no sta na pega tesu na papia Koreanu.

LISONS KU NO APRINDI NA NO SIRVISU PA JEOVA

I ka sempri fasil fasi nobu amisadis, ma no nota di kuma, ora ku no kumbida utrus bin visitanu, no ta konsigi kunsi elis mas rapidu. No nota di kuma no ermons mas parsi ku nos di ki sedu diferenti, i di kuma Jeova kumpunu di manera dimiradu, pa no konsigi yabri no korson, i mostra amor pa manga di amigus. — 2 Kor 6:11.

No nota di kuma no pirsisa di seta jintis suma ku Jeova ta fasi, tambi no pirsisa di oja provas di kuma Jeova amanu, i sta na orientanu. Ora ku no sta disanimadu, o no punta no kabesa si no ermons amanu, no ta lei mas kartons ku tene mensaẑen ku kartas di no amigus. Jeova ruspundi no orasons i danu sertesa di kuma i amanu, tambi i danu forsa.

Pa anus, ami ku Lesli no aprindi importansia di ranja tempu pa n̈utru, i ka mporta si no tene manga di kusas di fasi. Tambi no ntindi di kuma i importanti ri no kabesa ora ku no yara, spesialmenti ora ku no na aprindi nobu lingua. Tambi kada noti, no ta tenta pensa na un kusa ku no gosta del, ku no pudi gardisi Jeova pa rel.

Na bardadi, N sinti di kuma N ka pudi nunka sedu misionariu o vivi na utrus tera. Ma, N tene kontentamentu di aprindi di kuma, i pusivel fasi tudu kusas ku ajuda di Jeova. N ta lembra di palabras di profeta Jeremias ku fala sin: “O SIÑOR, bu nganan”. (Jer 20:7) I surprendinu ku manga di kusas interesanti, i bensuanu di un manera ku no ka imaẑina, te mesmu i pun pa N viaẑa na avion suma ku N mistiba. No viaẑa pa manga di kaus, mas di ki kil ku N pensaba ocanba pikininu, no visita filialis na sinku kontinentis. Tambi N na gardisi ciu Lesli, manera ki staba dispostu pa apoian na tudu es disignasons.

No ta lembra sempri di kuma tudu ke ku no ta fasi i pabia di no amor pa Jeova. Kusas bonitu ku no tene aos, ta mostra kuma ku vida pa sempri na sedu, ora ku Jeova ‘yabri si mon, i fartanda diseẑu di tudu ku tene vida.’ — Sal 145:16.