Duranti tudu no vida no aprindi di no Nsinadur mas Garandi

ISEMPLU DI ÑA PAPE KU ÑA MAME

Na 1957 ña pape ku ña mame imigra di Italia pa Kindersley, na Saskatchewan, Kanada. Puku tempu dipus e kunsi bardadi, i kila pasa sedu kusa prinsipal na no vida. N lembraba ocan pikininu, no ta pasaba dia ntidu na pregason ku ña familia. Pa kila, utrora N ta brinkaba kuma N sedu “pioneru ausiliar”, oca N teneba so oitu anu!

Ña papes seduba koitadi, ma e disa bon isemplu manera ke fasi sakrifisius pa Jeova. Pur isemplu, na 1963 e bindi manga di kusas ke teneba pa junta diñeru pa mati kongresu internasional na Pasadena, Kalifornia, Stadus Unidu. Na 1972 no munda pa Kanada na Trail, Kolumbia Britaniku, ku teneba serka di 1.000 kilometru di distansia, pa pudi juda na tiritoriu Italianu. Ña pape ta limpaba i kuida di un loja garandi. I ka setaba utrus responsabilidadis pa pudi konsentra na atividadis spiritual.

N ta gardisi pa isemplu ku ña papes disa pa mi ku ña tris ermons. Se isemplu seduba purmeru parti di ña trenamentu na sirvisu di Jeova. E nsinan un kusa ku nunka N diskisi na ña vida, ku sedu, si Renu di Deus sedu kusa mas importanti na ña vida, Jeova na kuida di mi. — Mat 6:33.

N KUMSA SIRVISU DI TEMPU KOMPLETU

Na 1980 N kasa ku Debbie, un irma bonitu ku konsentraba na sirbi Jeova. No mistiba yentra na sirvisu di tempu kompletu, pa kila, Debbie kumsa sirvisu di pioneru tris mis dipus ku no kasa. Un anu dipus di no kasamenti, no munda pa un kongregason pikininu ku teneba nesesidadi, i N sedu pioneru juntu ku el.

Ku tempu no fika disanimadu, i no disidi munda pa utru ladu. Ma antis di fasi kila, no papia ku superintendenti di sirkuitu. I falanu ku amor i di manera sinseru: “Bo sta na pui pa bo situason sedu mas difisil. Bo sta na konsentra na difikuldadi ku bo sta na pasa. Ma si bo konsentra na bo kusas bo na oja tambi bon kusas.” I es konsiju propi ku no pirsisaba del. (Sal 141:5) No aplika logu ki konsiju i no nota di kuma, na bardadi, i tenba manga di kusas pusitivu. Manga delis na kongregason mistiba fasi mas pa Jeova, nkluindu jovens ku alguns ku se omi o minjer ka sedu servu di Jeova. Es seduba un lison importanti dimas ku no aprindi. No aprindi konsentra na bon kusas i pera pa Jeova kuriẑi situason ku parsi difisil. (Mik 7:7) No torna tene mas kontentamentu i kusas minjoria.

Instrutoris di no purmeru skola di pioneru staba na sirbi na utru teras. E mostranuba videos ku fotos i e papiaba di difikuldadis ku bensons ke teneba, i kila pui pa no tene diseẑu di sirbi suma misionariu. Pa kila, no disidi tene objetivu di sedu misionarius.

Pa yangasa es objetivu, na 1984 no munda pa Kebek, na zona ke ta papia Fransis, mas di 4.000 kilometru di Kolumbia Britaniku. La, no tenba ku aprindi nobu kultura ku nobu lingua. Utru difikuldadi ku no ta pasaba sempri i falta di diñeru. I tenba un tempu, no ta kujiba batatas ku sobra na orta di un algin. Debbie ta purparaba batatas di diferentis manera, i ta sabiba mal! Mesmu ku es difikuldadis, no fasi no minjor pa nguenta ku alegria. Alen di kila, no oja di kuma Jeova staba na kuida di nos. — Sal 64:10.

Un dia no risibiba un ŝamada ku no ka spera. I seduba un konviti pa sirbi na Betel di Kanada. Suma no prenŝiba pitison pa Skola di Jileadi, no kontentiba ku konviti, ma na mesmu tempu no staba tristi. Ma no seta es konviti. Oca ku no ciga, no punta ermon Kenneth Little, un membru di Kumison di Filial: “Ke gora di no pitison pa Jileadi?” I fala sin: “No na bin lida ku ki situason mas tardi si bo bin kumbidadu.”

Un semana dipus, ami ku Debbie no kumbidadu pa kursa Skola di Jileadi. Pa kila, no tenba ku toma un disison. Ermon Little falanu: “I ka mporta ke ku bo kuji, un dia bo na misti tene ki utru ku bo ka kuji. Un disison i ka mas minjor di ki utru, Jeova pudi bensua tudu dus.” No seta konviti pa Jileadi, duranti anus no oja di kuma, konsiju ku ermon Little da, i bardadi. Ora ku ermons dibi di kuji kal disignason ke na seta, no ta usa sempri es palabras.

VIDA DI MISIONARIUS

No staba kontenti di fasi parti di 24 alunus ku kumbidadu pa turma 83 di Jileadi, ku fasidu na Abril di 1987 na Brooklyn, Nova York. Ermon Ulysses Glass ku Jack Redford seduba no instrutoris prinsipal. Skola duraba sinku mis, i no toma diploma na dia 6 di Setembru di 1987. No disignadu pa Aiti juntu ku John ku Marie Goode.

Misionarius ku sai di Jileadi ka mandadu pa Aiti disna di 1962, oca ku ultimus misionariu serkadu di la. Tris semana dipus di no formatura, no staba na sirbi na Aiti, na un zona isoladu na un kongregason pikininu di 35 publikaduris. No seduba joven i sin spiriensia, i no moraba anos so na kasa di misionarius. Jintis seduba koitadi i maioria delis ka sibiba lei. Na kumsada di no sirvisu misionariu, no oja manifestasons, golpi di stadu, bareras na strada ku pudu fugu, tambi cuba ku bentu forti.

No aprindi ciu di ermons ku irmas di Aiti ku seduba forti i alegri. Manga delis teneba difikuldadis na vida, ma e amaba Jeova ku pregason. Pur isemplu, un irma di idadi ka sibiba lei, ma i nkorna 150 testu di Biblia. Situason ku no ta pasa kada dia, ta motivanu prega mensaẑen di Renu suma uniku suluson pa purblemas di pekadur. No fika tokadu di oja no purmerus studantis sedu pionerus regular, pionerus spesial ku ansions.

Oca N staba na Aiti, N kunsi Trevor, un misionariu joven Mórmon, i N teneba oportunidadi di papia ku el aserka di Biblia manga di bias. Alguns anus dipus, i mandan un karta ku N ka speraba. I fala sin: “N na batisa na asembleia ku na bin! N misti riba pa Aiti, pa sedu pioneru spesial na mesmu zona ku N seduba misionariu Mórmon.” I fasil pa manga di anus, juntu ku si minjer.

EUROPA DIPUS AFRIKA

No disignadu pa sirbi na un parti di Europa nunde ku tarbaju di Renu kumsa ranka mas. Na 1992, no ciga na sidadi di Liubliana, Slovenia, pertu nunde ku ña papes kirsi antis de munda pa Italia. Gera tenba inda na Antigu Iugoslavia. Filial na Viena na Austria, juntu ku skritorius na Zagreb na Kroasia ku Belgradu na Servia, ta kuidaba di tarbaju di pregason na ki zona. Gosi, kada republika indipendenti dibi di tene si propi Betel.

Pa kila, no tenba ku aprindi nobu lingua ku nobu kultura. Jintis des zona ta fala “jezik je težek,” ku signifika “e lingua difisil.” Na bardadi, i seduba difisil! No fikaba dimiradu di oja fidelidadi di no ermons ku irmas ku staba pruntu pa seta mudansa di organizason i no oja kuma ku Jeova bensua elis. Mas un bias, no oja kuma ku Jeova sempri ta kuriẑi asuntu ku amor i na bon mumentu. No aprindi manga di lisons na Slovenia, tambi manga di lisons ku no aprindi antis, judanu nguenta situasons difisil ku no pasa la.

Ma no kontinua tene mudansas na no vida. Na 2000 no mandadu pa Kosta di Marfin na Afrika Osidental. Ma pabia di gera sivil na Kosta di Marfin no lebadu pa Sera Lioa na Novembru di 2002, nunde ki kumsa kaba tambi un gera sivil ku dura 11 anu. No fikaba tristi manera ku no sai di repenti di Kosta di Marfin. Ma lison ku no aprindiba judanu kontinua tene alegria.

No konsentraba na jintis ku misti kunsi bardadi i na ermons ku irmas amorosu ku nguenta manga di anus di gera. E seduba koitadi, ma e gostaba di pati ke ke tene. Un irma pati Debbie alguns ropas. Oca Debbie ka mistiba seta, ki irma nsisti i falal: “Duranti gera, ermons di utru tera judanu. E bias, i anos tambi ku ten ku juda.” No fiksa objetivu di kopia se isemplu.

Pa fin, no riba mas pa Kosta di Marfin, ma purblemas pulitiku torna ten mas. Pa kila, na Novembru di 2004, no lebadu atraves di elikopturu, i kada kin teneba so un mala di 10 kilu. No durmi di noti na un basi militar Fransis, i na utru dia no lebadu pa Suisa. Oca ku no ciga Filial serka di me-noti, Kumison di Filial ku instrutoris di Skola di Trenamentu Ministerial juntu ku se minjeris barsanu e danu kumida kinti ku manga di ŝokolati suisu. Es fasinu sinti di kuma no amadu.

No disignadu pa un tempu na Gana, i no bin riba mas pa Kosta di Marfin oca ku manifestason sivil kalma. Bondadi ku ermons mostranu, judanu nguenta oca ku no obrigadu sai di repenti di Kosta di Marfin i risibi disignasons pa un tempu. Ami ku Debbie no sibi di kuma amor di ermons i un kusa normal na organizason di Jeova, ma nunka no ojal suma un kusa ku no mersi. Na bardadi te mesmu es mumentus difisil, pasa sedu un parti importanti di no trenamentu.

PA MEDIU ORIENTI

Na 2006, no risibi un karta di sedi mundial ku falanu di kuma, no risibi un nobu disignason di bai sirbi na Mediu Orienti. Mas un bias, es signifikaba un nobu spiriensia, difikuldadis, linguas ku kulturas. No tenba ku aprindi ciu nes zona ku tene manga di purblemas, pabia di pulitika ku riliẑion. No gostaba ciu manera ku jintis ta papia diferentis lingua na kongregason i union ku ta ten ora ku no sigi orientason di organizason. No fikaba dimiradu ku ermons ku irmas, pabia maioria delis nguentaba ku koraẑen pirsigison di se familia, kolegas di skola, kolegas di tarbaju ku visiñus.

Na 2012, no mati kongresu spesial na Tel Aviv, Israel. Es kongresu seduba purmeru bias ku povu di Jeova runi na un garandi numeru na ki reẑion disna di Pentekostis di 33 EK. Es seduba un okasion ku no ka na diskisi!

Oca ku no staba la, no mandadu pa visita un pais nunde ku no tarbaju tujidu. No leba alguns publikasons, no prega i no mati asembleias na grupusiñus. Na tudu ladu i tenba militaris ben armadu ku postus di kontrolu, ma no sinti suguru manera ku no yandaba ku kuidadu ku alguns publikaduris.

NO RIBA PA AFRIKA

Na 2013, no risibi un nobu disignason, pa sirbi na filial di Kinŝasa na Kongu. I un pais garandi i bonitu, ma ku pasa pa koitadesa garandi ku manga di gera. Na kumsada no fala: “No sibi kuma ku vida seduba na Afrika pabia no moraba ja la. Pa kila, no ka na tene manga di difikuldadi di vivi na Kongu.” Ma no teneba manga di kusas pa aprindi, prinsipalmenti oca ku no viaja na zonas ku ka teneba stradas nin puntus. No konsentraba na bon kusas, suma pur isemplu manera ku no ermons kontinuaba nguenta ku alegria mesmu manera ke teneba purblemas ekonomiku, mamera ke gosta di pregason, i e ta sforsa pa mati runions ku asembleias. No oja ku no propi uju kuma ku tarbaju di Renu staba na avansa, ma es tudu seduba pusivel so ku ajuda i ku benson di Jeova. Anus ku no pasa na sirvisu di tempu kompletu na Kongu, nsinanu lisons importanti dimas i danu amigus ku sedu suma un familia pa nos.

Na fin di 2017, no risibi utru disignason, pa Afrika di Sul. Es seduba filial mas garandi ku no ciga ja di sirbi, te mesmu disignason di Betel seduba nobu pa nos. Ma un bias, no tenba ku aprindi manga di kusas, ma lison ku no aprindiba na pasadu judanu i gianu. o ama manga di ermons ku irmas ku kontinua sirbi Jeova di manera fiel pa manga di anus. I seduba bon di oja kuma ku familia di Betel ta tarbaja juntu na union, mesmu manera ki tene jintis di diferenti rasa ku kultura. No oja di manera klaru, kuma ku Jeova sta na bensua si povu ku pas, pabia e sta na bisti nobu naturesa i aplika prinsipius di Biblia.

Na tudu es anus, ami ku Debbie no risibi disignasons interesanti, no adapta ku diferentis kultura i no aprindi nobu linguas. I ka tudu ora ki seduba fasil, ma no sinti sempri amor fiel di Jeova atraves di si organizason ku no ermons na mundu ntidu. (Sal 144:2) No tene sertesa di kuma no sirvisu di tempu kompletu trenanu pa sedu minjoris servu di Jeova.

N da balur pa ke ku ña papes nsinan, pa apoiu ku Debbie, minjer ku N gosta ciu del ta dan i pa bon isemplu di no familia spiritual na mundu ntidu. Ami ku Debbie no aprindi manga di kusas, ma ora ku no na pensa na futuru, no sta disididu pa kontinua aprindi lisons ku no Nsinadur mas Garandi ta danu.