Kontinua benefisia di medu di Deus

1-2. Kal purblemas ku kristons tene aos ku parsi ku situason di Lo?

ORA ku no oja mau komportamentu di jintis aos, no ta sinti suma ku Lo sinti. I “staba disgustadu pa mau vida di ki jintis ku ta yanda sin lei,” pabia i sibiba di kuma no Pape ku sta na seu odia mau komportamentu. (2 Ped 2:7, 8) Suma Lo medi i ama Deus, kila lebal pa i odia mau komportamentu di jintis ku staba pertu del. Anos tambi no sta na vivi ku jintis ku tene puku o nin un rispitu pa normas di Jeova aserka di kuma ku no dibi di komporta. Nin ku sin, no pudi kontinua tene un komportamentu limpu, si no manti no amor pa Deus i aumenta no medu pa rel. — Dit 14:2.

² Jeova ta judanu fasi es atraves di nkoraẑamentu ku no pudi oja na livru di Ditus. Tudu kristons, omis ku minjeris, jovens ku kilis di idadi, pudi na bardadi benefisia di studa konsijus ku tene jiresa ku sta nes livru.

MEDU DI DEUS TA PROTEẐINU

3. Di akordu ku Ditus 17:3, kal ki un di motivu ku pui no pirsisa di proteẑi no korson? (Jubi tambi fotos.)

³ Un motivu importanti pa proteẑi no korson simboliku, i pabia Jeova ta proba no korson. Es signifika i ta oja mas di ke ki utrus pudi oja, i sibi kal tipu di algin ku na bardadi no sedu. (Lei Ditus 17:3.) I na amanu si no kontinua pensa na si konsijus ku pudi danu vida ku ka ta kaba. (Jon 4:14) Asin no ka na afetadu pa mau komportamentu ku mintidas di Satanas i ku jintis mau di si mundu. (1 Jon 5:18, 19) Ora ku no pertusi mas di Jeova, no amor ku no rispitu pa rel na aumenta. Suma no ka misti pa no Pape fika mal, te mesmu no na odia pensa fasi pekadu. Ora ku no tentadu fasi mal, no punta no kabesa: ‘Kuma ku N pudi, pa diskarna pui pa un Algin ku aman ciu fika mal?’ — 1 Jon 4:9, 10.

4. Kuma ku medu di Jeova proteẑi un irma kontra i tentadu pa fasi mal?

⁴ Un irma di Kroasia comadu Marta ku tentadu pa fasi pekadu seksual, fala sin: “I seduba difisil pa N pensa diritu i luta kontra diseẑu di fasi pekadu. Ma, medu di Jeova proteẑin.”b Kuma ku medu di Jeova fasi kila? Marta fala di kuma i pensa fundu na rusultadu ku si mau disison na lebalba nel. No pudi fasi mesmu kusa. Pior rusultadu i di kuma no na pui pa Jeova fika tristi i no ka na pudi adoral pa sempri. — Kum 6:5, 6.

5. Ke ku bu pudi aprindi di spiriensia di Leo?

⁵ Ora ku no medi Jeova, no ta toma kuidadu pa ka sedu amigu di kilis ku ta fasi mau kusas. Leo, ku sta na Republika Demokratiku di Kongu, aprindi es lison. Kuatru anu dipus ku Leo batisa, i kumsa ku tene mau kumpañerasku. I pensaba di kuma, nkuantu i ka sta na fasi mau kusas, i ka staba na peka kontra Jeova. Ma, i ka tarda, ki mau kumpañerasku lebal na cami i fasi pekadu seksual. I kumsa ku pensa na ke ki nsinaduba pa si papes ku ta sirbi Jeova i na kontentamentu ki teneba. Kal ku bin sedu rusultadu? I kumsa mas ku pensa diritu. Ku ajuda di ansions i riba pa Jeova. Gosi i sta na sirbi ku kontentamentu suma ansion i pioneru spesial.

6. Kal dus minjeris simboliku ku no na bin fala del gosi?

⁶ No jubi ke ku Ditus kapitulu 9 fala aserka di dus minjeris. Un delis representa jiresa i utru representa tulesa. (Komparal ku Romanus 5:14; Gálatas 4:24.) Ora ku no na fasil, lembra di kuma mundu di Satanas dudu pa pekadu seksual ku pornografia. (Ef 4:19) Pa kila, i importanti pa no kontinua aumenta medu ku no tene pa Deus i disvia di mal. (Dit 16:6) Asin, anos tudu, nin si no sedu macu o femia, no pudi benefisia di ke ku faladu del nes kapitulu. Tudu es dus minjeris faladu del suma kilis ku fasi konviti pa kilis ku ka jiru, ku sedu, kilis “ku ka ten ntindimentu.” I suma si kada kin fala sin: ‘Bin ña kasa bu bin kume.’ (Dit 9:1, 5, 6, 13, 16, 17) Ma, ke ku kontisi ku kilis ku seta konviti di minjer jiru ku di minjer tulu, diferenti ciu.

NEGA KONVITI DI MINJER TULU

7. Di akordu ku Ditus 9:13-18, ke ku kontisi ku kilis ku seta konviti di minjer tulu? (Jubi tambi diseñu.)

⁷ Jubi kal konviti ku ‘minjer tulu’ fasi. (Lei Ditus 9:13-18.) I coma kilis ku ka tene ntindimentu ku forsa, i fala elis: “Bo yentra” i bo fasi festa. Kal ku sedu rusultadu? “Mortu sta na si kau”. Talves bu na lembra di palabras ku parsi kes ku tene signifikadu, ku sta na kumsada di livru di Ditus. No avisadu kontra “minjer infiel pa si omi” ku “minjer ku misti atraiu”. No faladu di kuma: “Si kasa ta mpina pa mortu”. (Dit 2:11-19) Ditus 5:3-10 tene tambi un avisu aserka di “minjer di utru omi” ku si “pes ta ria pa mortu”.

8. Kal disison ku no dibi di toma?

⁸ Kilis ku obi konviti di ‘minjer tulu’ tene un disison pa toma: Sera ki e na seta si konviti o e na negal? Anos tambi no pudi sta dianti di mesmu situason. Ora ku no tentadu pa fasi pekadu seksual o jubi pornografia suma ki ta mostradu na televison o na internet, ke ku no na disidi fasi?

9-10. Kal ki alguns motivus ku pui no dibi di ivita pekadu seksual?

⁹ I ten bon motivus ku pui no dibi di ivita pekadu seksual. Livru di Ditus fala kuma ‘minjer tulu’ fala sin: “Yagu furtadu i dos”. Ke ki “yagu furtadu”? Biblia kompara relason seksual entri omi ku minjer ku kasa suma yagu fresku. (Dit 5:15-18) Un omi ku un minjer ku kasa legalmenti pirmitidu pa e tene relason seksual ku n̈utru. I diferenti ciu ku “yagu furtadu”. Es pudi signifika pekadu seksual. Manga di bias, es ta fasidu sukundidu, suma ku manga di bias ladrons ta furta sukundidu. “Yagu furtadu” pudi parsi, dos si kilis ku fasil pensa di kuma ningin ka na diskubri ke ke fasi. E na ngana se kabesa, pabia Jeova oja tudu! Pirdi fabur di Jeova i kusa mas malgos o pior ku pudi kontisi ku nos. Pa kila, i ka ten nada di “dos” o ku ta da prazer. (1 Kor 6:9, 10) Ma i ten inda utrus mau rusultadu.

¹⁰ Pekadu seksual pudi tisi borgoña, sentimentu di ka bali nada, preña sin misti ku familias divididu. Na bardadi, si no sedu jiru, no na nega bai “kasa” di minjer tulu i kume la. Fora di pirdi amisadi ku Jeova, manga di kilis ku ta fasi pekadu seksual ta paña duensas ku ta leba elis muri sedu. (Dit 7:23, 26) Ditus kapitulu 9 versikulu 18 kaba kes palabras ku fala sin: “Si kumbidadus sta na koba di mortu.” Gosi, ke ku manda manga di jintis ta seta si konviti ku ta leba pa mortu? — Dit 9:13-18.

11. Pabia ku jubi pornografia ta fasinu mal?

¹¹ Un di kusas ku ta tenta manga di jintis pa seta si konviti i armadilia di pornografia. Alguns ta pensa di kuma jubi pornografia ka ta fasi mal. Ma, pornografia ta fasi mal pa jintis, i ta pui elis pirdi rispitu pa se kabesa i pa utrus, i ta pasa sedu un visiu o un kusa ki difisil para jubi. Imaẑens pornografiku tene puder, i ta difisil diskisi. Tambi pornografia ka ta kaba ku mau diseẑu, ma i ta aumental. (Kol 3:5; Tiagu 1:14, 15) Manga di jintis ku ta jubi pornografia ta bin kaba pa fasi pekadu seksual.

12. Kuma ku no ta mostra di kuma no sta na ivita imaẑens ku pudi punu tene pensamentus imoral?

¹² Suma kristons, ke ku no dibi di fasi si mostradu un imaẑen pornografiku na no apareliu eletroniku? No dibi di para jubil logu-logu. Si no lembra di kuma kusa mas importanti ku no tene i no amisadi ku Jeova, kila na judanu pa no para jubil logu. Te mesmu imaẑens ku ka pornografiku pudi punu tene pensamentus imoral. Pabia ku no dibi di ivita elis? Pabia no ka misti da nin un pasusiñu ku na lebanu kai na pekadu seksual na no korson. (Mat 5:28, 29) Un ansion na Tailandia comadu David fala sin: “N ta punta ña kabesa: ‘Nin si imaẑens ka sedu pornografiku, sera ki Jeova na kontenti si N kontinua jubi elis?’ Es manera di pensa ta judan aẑi ku jiresa.”

13. Ke ku ta judanu aẑi ku jiresa?

¹³ Medu di fasi kualker kusa ku ka na kontenta Jeova, na judanu aẑi ku jiresa. Rispitu o medu di Deus i “purmeru pasu pa jiresa”. (Dit 9:10) No oja es na kumsada di Ditus kapitulu 9, nunde ku “jiresa” di bardadi komparadu ku utru minjer.

SETA KONVITI DI MINJER JIRU

14. Kal ki utru konviti ku sta na Ditus 9:1-6?

¹⁴ Lei Ditus 9:1-6. Es versikulus falanu di konviti ku bin di Jeova, ku sedu, kin ku kumpunu, tambi i Dunu di jiresa. (Dit 2:6; Rom 16:27) Jiresa di bardadi kumpu un kasa garandi ku tene seti firkija. Es ta mostra di kuma Jeova gosta di pati. Tambi i ta risibi tudu kilis ku misti aprindi aserka del pa e pudi sedu jiru.

15. Ke ku Deus kumbidanu pa no fasi?

¹⁵ Jeova gosta di pati, i ta da manga di kusas. Es maneras di sedu mostradu klaru na “jiresa” di bardadi ku komparadu ku un minjer na Ditus kapitulu 9. Es versikulus fala di kuma, na si kasa, ki minjer mata si limarias, i pui kusas sabi na biñu, i pui kusas na mesa. (Dit 9:2) Dipus, di akordu ku versikulu 4 ku 5, jiresa di bardadi “fala kilis ku ka ten ntindimentu: ‘Bo bin, bo kume di ña kumida.’” Pabia ku no dibi di bai kasa di jiresa di bardadi i kume kumida ki purpara? Jeova misti pa si fijus sedu jiru i pa e sta suguru. Jeova ka misti pa no fasi erus ku na bin fasinu mal. E ku manda “i ta guarda jiresa di bardadi pa kilis ku sedu justu”. (Dit 2:7) Ora ku no tene medu di Jeova, no na misti kontental. No ta sukuta si konsijus ku tene jiresa i no ta kontenti di aplika elis. — Tiagu 1:25.

16. Kuma ku medu di Deus juda Alain toma un bon disison, i kal ki bin sedu rusultadu?

¹⁶ Jubi kuma ku medu di Deus juda Alain toma un bon disison. Alain i un ansion na kongregason tambi i pursor. I fala sin: “Manga di ña kolegas ta jubi filmis pornografiku pa aprindi aserka di seksu.” Ma Alain sibi di kuma kila ka sta ben. I fala sin: “Pabia di amor ku rispitu ku N tene pa Jeova, N nega far jubi kil filmis. Tambi N splika ña kolegas pabia ku N nega jubi kil filmis.” I staba na aplika konsiju di “jiresa” di bardadi pa “yanda na kamiñu di ntindimentu.” (Dit 9:6) Alguns di kolegas di Alain fikaba dimiradu pa manera ki manti firmi na si disison. I gosi e sta na studa Biblia i mati runions.

17-18. Kal bensons ku kilis ku seta konviti di “jiresa” di bardadi tene, i ke ke spera bin tene na futuru? (Jubi tambi diseñu.)

¹⁷ Jeova usa isemplus des dus minjeris, pa mostranu kuma ku no pudi tene un futuru filis. Kilis ku seta konviti di ‘minjer tulu’ ta konsentra na ke ki “dos”, ku sedu, prazer di pekadu seksual. Na bardadi, e ta vivi so pa kil dia, e ka ta pensa na futuru. Se futuru sta na “koba di mortu.” — Dit 9:13, 17, 18.

¹⁸ Kilis ku seta konviti di “jiresa” di bardadi, tene un futuru diferenti! Desdi gosi si kumbidadus tene manga di kumidas ku purparadu diritu i ku ta da saudi, un festa di kumida spiritual ku purparadu diritu. (Isa 65:13) Jeova fala sin atraves di profeta Isaias: “Bo sukutan diritu, bo kume kil ki bon; asin bo ta kontenti ku kumida riku.” (Isa 55:1, 2) No sta na aprindi ama ke ku Jeova ama i nuju ke ku Jeova nuju. (Sal 97:10) Tambi no sta kontenti pabia no pudi kumbida utrus pa aprindi aserka di “jiresa” di bardadi. I suma si no “bai pa kau mas altu di prasa, i kumbida jinti, i fala: ‘Abos ku ka jiru, bo yentra.’” Benefisius ku anos i ku kilis ku seta konviti na tene i ka so pa gosi. E sta na nguenta, i kila ta pirmitinu “tene vida” ku ka ta kaba nkuantu no sta na “yanda na kamiñu di ntindimentu.” — Dit 9:3, 4, 6.

19. Di akordu ku ke ku Eklesiastis 12:13, 14 fala, ke ku no dibi di sta disididu pa fasi? (Jubi tambi kuadru “Medu di Deus ta benefisianu.”)

¹⁹ Lei Eklesiastis 12:13, 14. Pa medu di Deus kontinua proteẑi no korson i judanu manti limpu na sintidu moral i spiritual nes mau fin di tempu. Es medu na lebanu pa no fasi tudu ku no pudi pa kontinua kumbida manga di jintis pa buska “jiresa” di bardadi i benefisia del.