Jiresa di bardadi sta na grita risu

1. Kuma ku manga di jintis ta reaẑi ora ke risibi konsijus di jiresa ku sta na Biblia? (Dit 1:20, 21)

NA MANGA di teras, manga di bias no ta oja no ermons ku irmas firma na kaus nunde ku manga di jintis ta pasa. E ta na ri i e ta da elis algun kusa pa lei. Sera ki bu ciga ja di partisipa nes tipu di tustumuñu interesanti? Si bu ciga di partisipa, sin duvida bu na lembra di palabras interesanti ku sta na livru di Ditus, ku na fala di jiresa ku na grita na kau publiku pa jintis obi si konsiju. (Lei Ditus 1:20, 21.) Biblia ku no publikasons basiadu na Biblia tene ‘jiresa di bardadi’, ku sedu, jiresa di Jeova. Es i jiresa ku jintis pirsisa del, pa e pudi tene vida ku ka ta kaba. No ta kontenti ora ku un algin seta un di no publikasons. Ma i ka tudu jintis ku ta seta. Alguns ka ta misti sibi ke ku Biblia fala. Utrus ta sta na rinu. E ta pensa kuma Biblia pasa prazu. Utrus ta kritika nsinus di Biblia na asuntus di moral, e ta fala di kuma kilis ku ta sigil i jintis ku ciu regras i ku ta pensa di kuma e mas justu di ki utrus. Mesmu asin, Jeova ku amor kontinua da si jiresa pa tudu jintis. Di kal manera?

2. Nunde ku no pudi oja jiresa di bardadi, ma ke ku manga di jintis disidi fasi?

² Un di maneras ku Jeova pui pa jiresa di bardadi obidu i atraves di si Palabra, Biblia. Kuas tudu jintis pudi tene es livru. Ke gora ku no pudi fala di no publikasons basiadu na Biblia? Ku benson di Jeova e sta dispunivel na mas di 1.000 linguas. Kilis ku ta sukuta, ku sedu, kilis ku ta leil i aplika ke ke aprindi na tene benefisiu. Ma, maioria di jintis disidi ka obi Jeova. Ora ke tene disison pa toma e ta pirfiri konfia na se kabesa, o sukuta se kumpañeris pekadur. Te mesmu e ta njutinu, pabia no disidi sigi ke ku Biblia fala. Es studu na mostra ke ku manda e ta reaẑi des manera. Purmeru, no na bai oja kuma ku no pudi tene jiresa ku bin di Jeova.

KUNSIMENTU DI JEOVA TA DA JIRESA

3. Ke ku no pirsisa di fasi pa tene jiresa di bardadi?

³ Jiresa pudi signifika usa ke ku no sibi pa toma bon disisons. Ma, jiresa di bardadi i mas di ki es. Biblia fala: “Rispita SIÑOR i purmeru pasu pa jiresa. Si bu kunsi ki Algin Puru, bu ten ntindimentu.” (Dit 9:10) Pa kila, ora ku no tene un disison importanti pa toma, no pirsisa di sibi ke ki Jeova ta pensa aserka del, ku sedu, “kunsi ki Algin Puru”. No pudi fasi es atraves di studa Biblia ku publikasons basiadu na Biblia. Ora ku no fasi es, no ta sta na mostra jiresa di bardadi. — Dit 2:5-7.

4. Ke ku manda i so Jeova ku pudi danu jiresa di bardadi?

⁴ I so Jeova ku pudi danu jiresa di bardadi. (Rom 16:27) Ke ku manda no pudi fala di kuma, jiresa bin di Jeova? Purmeru, Jeova i Kriadur, i kunsi tudu kusas ki kumpu. (Sal 104:24) Sugundu, tudu kusas ku Jeova fasi ta mostra kuma i jiru. (Rom 11:33) Terseru, konsiju jiru ku ta bin di Jeova ta benefisia sempri kilis ku ta aplikal. (Dit 2:10-12) Si no misti tene jiresa di bardadi, no dibi di seta es bardadis i disa pa e gia no disisons ku no asons.

5. Kal ku ta sedu rusultadu ora ku jintis ka seta di kuma, jiresa di bardadi bin so di Jeova?

⁵ Manga di jintis ku no ta oja na pregason ta rikuñisi di kuma, kusas ku sta na naturesa kumpudu bonitu dimas, ma e ta fala di kuma, i ka ten kin ku kumpu elis. Utrus ta fala di kuma e fia na Deus, ma e ta pensa di kuma, ke ku Biblia ta nsina pasa prazu, i e ta disidi vivi di manera ke misti. Kal ki rusultadu? Sera ki mundu sedu minjor, manera ku jintis konfia na se propi jiresa, en ves di konfia na Deus? Sera ki e oja filisidadi di bardadi o speransa suguru pa futuru? Ke ku no sta na oja na mundu ta konvensinu des bardadi: “Si bu sta kontra SIÑOR, nin jiresa nin ntindimentu nin planus e ka na baliu.” (Dit 21:30) Es ta motivanu pa no kontinua pidi Jeova pa i danu jiresa di bardadi. Infilismenti, manga di jintis ka ta fasil. Pabia di ke?

KE KU MANDA JINTIS TA NEGA JIRESA DI BARDADI

6. Di akordu ku Ditus 1:22-25, ba kin ku ka misti obi jiresa di bardadi?

⁶ Manga di jintis ta nega obi jiresa di bardadi ku “na grita na rua”. Di akordu ku Biblia, i ten tris grupu di jintis ku nega obi jiresa: “Tulus”, o jintis ku ka maduru, “trosaduris” ku “tulus”. (Lei Ditus 1:22-25.) No na bai jubi pabia kes jintis nega jiresa di Deus, i kuma ku no pudi ivita sedu suma elis.

7. Ke ku manda alguns ta disidi kontinua sedu “algin ku ka maduru”?

⁷ “Algin ku ka maduru” i algin ku ta fia na tudu ke ki obi, i fasil ngana. (Dit 14:15) Manga di bias no ta oja es tipu di jintis na pregason. Pur isemplu, pensa na milyons di jintis ku nganadu pa ŝefis riliẑiosu o pulitikus. Alguns delis fika mal dimas oca e nota di kuma, es ŝefis riliẑiosu o pulitikus konta elis mintida. Ma, kilis ku faladu del na Ditus 1:22 disidi kontinua sedu jintis ku ka maduru, pabia e gosta di sedu asin. (Jer 5:31) E ta fasi ke ke misti, e ka misti aprindi ke ku Biblia fala, o obdisi leis ku sta na Biblia. Manga di jintis ta sinti suma es minjer di Kanada ku gosta ciu di si riliẑion, ku fala sin pa un Tustumuña di Jeova ku bai visital: “Si no padri ngananu, kulpa i di sil, i ka di nos!” Sin duvida, no ka misti kopia kilis ku disidi sigi un kusa ke sibi kuma i ka sta sertu! — Dit 1:32; 27:12.   

8. Ke ku na judanu sedu algin maduru?

⁸ Biblia tene rason di nsentivanu pa no ka kontinua sedu jintis ku ka maduru, ma pa no ‘sedu jintis maduru na ntindimentu.’ (1 Kor 14:20) No ta sedu jintis maduru, ora ku no aplika prinsipius di Biblia na no vida. Si no aplika es prinsipius, no na oja kuma ku Biblia na judanu ivita purblemas i toma bon disisons. I bon pensa na disisons ku no tomaba ja. Pur isemplu, si bu ta studa Biblia i mati runions, ma bu ka dedika inda bu vida pa Jeova i batisa, bu dibi di pensa na ke ku bu dibi di fasi pa yangasa es objetivu. Si no batisa ja, sera ki no sta na minjoria no manera di prega i nsina bon noba? Sera ki no disisons ta mostra di kuma, no sta na aplika ke ku no aprindi na Biblia? Sera ki no ta trata utrus suma ku Jesus na trataba elis? Si no pirsisa di fasi mudansas, no dibi di pensa ciu na nsinamentus di Jeova ku “ta da jiresa pa kilis ku ka ten.” — Sal 19:7.   

9. Kuma ku “trosaduris” mostra di kuma e nega jiresa?

⁹ Sugundu grupu di jintis ku nega jiresa ku bin di Deus i “trosaduris.” Utrora, no ta papia kes tipu di jintis na pregason. E gosta di goza utrus. (Sal 123:4) Biblia avisanu di kuma, na kabantada di tempu, i na ten manga di trosaduris. (2 Ped 3:3, 4) Lo sedu un omi justu. Ma, omis ku staba pa kasa si fijus ka obi avisus di Deus. Aos tambi, alguns jintis ka ta obi avisus di Deus. (Kum 19:14) Manga delis ta goza kilis ku ta obdisi ke ku Biblia fala. Trosaduris ta fasi trosa pabia di “se diseẑu mau, sin mporta ku Deus.” (Jud 7, 17, 18) Ke ku Biblia fala aserka des trosaduris ta ojadu na komportamentu di apostatas ku utrus jintis ku nega Jeova!

10. Suma ki faladu na Salmu 1:1, kuma ku no pudi ivita sedu trosaduris?

¹⁰ Kuma ku no pudi tene sertesa di kuma no ka sedu trosaduris? Un di maneras, i ivita kumpañerasku di kilis ku ta keŝa di tudu kusas. (Lei Salmu 1:1.) Es signifika no ka ta sukuta o lei kualker kusa di apostatas. No dibi di toma kuidadu pa ka kumsa keŝa di tudu kusas, i duvida di Jeova ku instrusons ku no ta risibi di si organizason. Pa pudi ivita es, no dibi di punta no kabesa: ‘Sera ki N kustuma keŝa ora ku no risibi nobu orientason o splikasons? Sera ki N tene tendensia di buska falias na kilis ku ta toma diantera?’ Ora ku no para logu fasi es kusas, Jeova na kontenti ku nos. — Dit 3:34, 35.

11. Kuma ku “tulus” ta oja normas di moral di Jeova?

¹¹ Terseru grupu di jintis ku nega jiresa i “tulus.” E sedu tulu pabia e nega vivi di akordu ku leis di moral di Deus. E ta fasi ke ke pensa kuma i sta diritu. (Dit 12:15) Es tulus nega Jeova, ku sedu Dunu di jiresa. (Sal 53:1) Ora ku no oja elis na pregason, manga di bias e ta kritikanu risu pa manera ku no ta rispita normas di Biblia. Ma, e ka pudi danu un vida minjor. Biblia fala sin: “Jiresa ta pasa riba di kabesa di tulu; na juntamentu na porton di prasa i ka ta yabri si boka.” (Dit 24:7) Tulus ka tene nin konsijus di jiresa pa danu. E ku manda Jeova avisanu pa no “fika lunju di tulu”. — Dit 14:7.

12. Ke ku na judanu pa ka no aẑi suma tulus?

¹² No ka sedu suma kilis ku odia konsijus di Deus. En ves di kila, no aprindi ama manera di pensa di Deus, ku nklui tudu si leis. No ta aumenta es amor, ora ku no na kompara rusultadus ku no ta tene ora ku no obdisi, ku ora ku no disobdisi. Jubi tipu di purblemas ku jintis ta ranja pa se kabesa, ora ke nega sigi konsijus jiru di Jeova pabia di se tulesa. Dipus, jubi kuma ku bu vida minjoria ciu pa manera ku bu obdisi Deus. — Sal 32:8, 10.

13. Sera ki Jeova ta forsijanu sigi si konsiju ku tene jiresa?

¹³ Tudu jintis pudi tene jiresa di Jeova, ma i ka ta forsija ningin pa setal. I kontanu ke ku ta kontisi ora ku jintis nega sukuta si jiresa. (Dit 1:29-32) Kilis ku disidi ka obdisi Jeova “na risibi rusultadu di kusas ke fasi.” Ku tempu, e na pasa manga di dur ku sufrimentu pabia di se manera di vivi. Dipus, Jeova na kaba ku elis. Pa utru ladu, kilis ku ta obdisi konsiju jiru di Jeova i ku ta aplikal, fasidu es purmesa: “Kil ku para sintidu na ña palabra i na mora suguru, ketu, sin ten medu di mal.” — Dit 1:33.   

JIRESA DI BARDADI TA BENEFISIANU

14-15. Ke ku no aprindi di Ditus 4:23?

¹⁴ No ta benefisia sempri ora ku no aplika konsijus di Deus ku tene jiresa. Suma ku no ojaba, tudu jintis pudi tene konsijus jiru di Jeova, sin paga nada. Pur isemplu, na livru di Ditus, Jeova da konsijus pratiku ku sempri ta da bon rusultadu ora ku no aplika elis. No na bai jubi kuatru isemplu des konsijus jiru.

¹⁵ Proteẑi bu korson simboliku. Biblia fala sin: “Riba di tudu, guarda bu korson, pabia el i fonti di vida.” (Dit 4:23) Pensa na ke ku no pirsisa di fasi pa proteẑi no propi korson. No pirsisa di kume bon kumida, fasi izersisiu i ivita mau abitus. No ta fasi mesmu kusa pa proteẑi no korson simboliku. Kada dia, no ta alimenta di Palabra di Deus. No ta purpara pa mati runions i no ta da kumentarius. No ta manti ativu ora ku no ta partisipa sempri na pregason. No ta ivita tene mau abitus, ora ku no manti limpu di kualker kusa ku pudi susa no pensamentu, suma divirtimentu imoral ku mau kumpañerasku.

16. Ke ku manda Ditus 23:4, 5 sedu di ajuda garandi pa nos aos?

¹⁶ Kontenti ku ke ku bu tene. Biblia da es konsiju: “Ka bu fadiga pa sedu riku, . . . Bu na pui uju na kil ku ka na tarda. Bu rikesa na ranja asa, i bua pa seu suma agia.” (Dit 23:4, 5) Jintis pudi pirdi se diñeru ku kusas ke tene ku fasilidadi. Ma, manga di jintis riku ku koitadis ta preokupa ciu na buska diñeru. E ku manda manga di bias e ta fasi kusas ku ta dana se nomi, se amisadis, te mesmu se saudi. (Dit 28:20; 1 Tim 6:9, 10) Pa utru ladu, jiresa ta judanu pa ka preokupa ciu ku diñeru. I na judanu luta kontra diseẑu di misti tene mas, asin no na kontenti i sinti filis ku kil ku no tene. — Ekl 7:12.

17. Kuma ku no pudi tene “palabras di jiru”, suma ki faladu na Ditus 12:18?

¹⁷ Pensa antis di papia. Si no ka kuida, no palabras pudi tisi manga di danu. Biblia fala sin: “I ten utrus ku tene palabra suma ponta di spada, ma palabras di jiru ta da saudi.” (Dit 12:18) No ta juda pa i ten pas, ora ku no ivita papia di erus di utrus. (Dit 20:19) Si no misti pa no palabras nkoraẑa utrus i ka fasi elis sinti mal, no dibi di lei i pensa sempri na Palabra di Deus. (Luk 6:45) Ora ku no ta medita na ke ku Biblia ta fala, no palabras ta sedu suma “fonti di jiresa” ku ta nkoraẑa utrus. — Dit 18:4.   

18. Kuma ku aplika konsiju ku sta na Ditus 24:6 ta judanu sai ben na pregason?

¹⁸ Sigi orientasons di organizason. Biblia danu es konsiju ku pudi judanu sai ben: “Pa fasi gera bu pirsisa di konsiju jiru; pa ngaña gera bu pirsisa di manga di konsijadur.” (Dit 24:6) Jubi kuma ku aplika es versikulu pudi judanu sai ben na no tarbaju di prega ku nsina. En ves di prega i nsina suma ku no misti, no ta tenta sigi suẑestons ku no risibi. No ta risibi orientasons jiru na no runions, nunde ku no ta aprindi bon manera ku utrus ta nsina Biblia. Alen des, organizason di Jeova danu publikasons ku videos ku pudi juda jintis ntindi Biblia. Sera ki bu sta na aprindi usa es publikasons ku videos diritu?

19. Kuma ku bu ta sinti aserka di jiresa ku Jeova ta da? (Ditus 3:13-18)

¹⁹ Lei Ditus 3:13-18. No na gardisi Jeova ciu pa bon konsijus ku sta na si Palabra! Nunde ku no na staba sin es konsijus? Nes studu, no oja alguns isemplus di bon konsijus ku sta na livru di Ditus. Sin duvida, Biblia ntidu tene konsijus jiru ku bin di Jeova. Pa no sta sempri disididu pa aẑi di akordu ku jiresa ku Jeova ta da. Manga di jintis ka ta da balur pa jiresa di Deus, ma no sta konvensidu di kuma, ‘tudu kilis ku pega na jiresa na sedu filis.’