Jovens — Kal tipu di vida ku bo misti tene?

1. Kal situason difisil ku Joás, Uzias ku Josias pasa?

IMAẐINA bu sedu rei di povu di Deus ocau pikininu o joven! Kuma ku bu na usa puder ku bu tene? Biblia falanu di manga di jovens ku sedu reis di Judá. Pur isemplu, Joás teneba 7 anu di idadi, Uzias tene 16, i Josias tene 8. Es dibi di seduba difisil dimas! Mesmu manera ki i ka seduba fasil, e fasi manga di bon kusas ku ajuda di Jeova i ku di utrus.

2. Pabia ki i bon pa no studa isemplu di Joás, Uzias ku Josias?

² Anos i ka reis o raiñas, ma no pudi aprindi lisons importanti ku es jintis ku Biblia fala del. E toma bon disisons, ma tambi e toma mau disisons. Atraves di se isemplus, no na oja ke ku manda no pirsisa di kuji bon amigus, kontinua baŝa no kabesa i kontinua buska Jeova.

KUJI BON AMIGUS

3. Kuma ku Jeoiada juda rei Joás toma bon disisons?

³ Kopia bon disisons di Joás. Rei Joás, tomaba bon disison oca i seduba joven. Suma i ka teneba pape, i sigi orientason di Ŝef di Saserdoti Jeoiada. E Ŝef di Saserdoti orienta Joás suma si i sedu si propi fiju. Pabia di isemplu di Jeoiada, Joás disidi sirbi Jeova, i juda povu sirbi Jeova tambi. Joás fasi tambi pa templu di Jeova kumpudu mas. — 2 Kron 24:​1, 2, 4, 13, 14.

4. Ke ku no na ngaña ora ku no ama i obdisi mandamentus di Jeova? (Ditus 2:​1, 10-12)

⁴ Si bu nsinadu ama Jeova i vivi di akordu ku si normas, bu dadu un prenda ku tene balur. (Lei Ditus 2:​1, 10-12.) Bu papes pudi trenau di manga di maneras. Jubi kuma ku pape di un irma comadu Katya, judal toma bon disisons. Kada dia ku si pape lebal pa skola, e ta papia di testu di dia juntu. I fala sin: “Es kombersas judan lida ku situasons difisil ku N pasa duranti kil dia.” Ma ke gora, si orientasons ku bin di Biblia ku bu papes dau, parsi di kuma i na tujiu fasi tudu ke ku bu misti? Ke ku pudi judau obdisi elis? Un irma comadu Anastasia, lembra di kuma si papes ta toma tempu pa splikal ke ku manda e pui sertu regras. I fala sin: “Es judan pa N oja kusas ku N faladu pa N ka fasi, i ka suma un kusa duru dimas, ma suma un proteson amorosu.”

5. Kuma ku bu asons na afeta bu papes ku Jeova? (Ditus 22:6; 23:​15, 24, 25)

⁵ Ora ku bu aplika konsijus di Biblia ku bu papes ta dau, bu na pui pa e kontenti. Mas importanti bu na pui pa Jeova kontenti, i bu na tene un amisadi ku el pa sempri. (Lei Ditus 22:6; 23:​15, 24, 25.) Sera ki es ka ta dau bon motivu di kopia isemplu di Joás, oca i seduba joven?

6. Kal konsijus ku Joás kumsa ku sukuta, i kal ki sedu rusultadu? (2 Kron 24:​17, 18)

⁶ Aprindi di mau disisons ku Joás toma. Dipus ku Jeoiada muri, Joás kuji mau kumpañerasku. (Lei 2 Kron 24:​17, 18.) I disidi sukuta ŝefis di Judá ku ka amaba Jeova. Talves bu na konkorda di kuma, Joás dibi di lunjusiba delis, pabia e ta fasi ke ki mau. (Dit 1:10) Ma en ves di kila, i sukuta e falsus amigu. Oca ku Zakarias, primu di Joás tenta kuriẑil, Joás matal. (2 Kron 24:​20, 21; Mat 23:35) Es i un kusa meduñu i ku ka fasi sintidu! Joás kumsaba si vida diritu, ma infilismenti i bin sedu rebeldi i asasinu. Dipus si propi servus matal. (2 Kron 24:​22-25) Si vida na seduba diferenti, si kontinua sukuta Jeova ku kilis ku amal! Kal lison ku bu aprindi di si isemplu?

7. Ba kin ku bu dibi di kuji pa e sedu bu amigus? (Jubi tambi foto.)

⁷ Un lison ku no pudi aprindi di mau disison di Joás, i di kuma no dibi di kuji amigus ku na tene bon influensia na nos. No dibi di kuji amigus ku ama Jeova i ku misti pul pa i fika kontenti. No ka pirsisa di sedu amigus so di jintis ku tene mesmu idadi ku nos. Lembra di kuma, Joás seduba mas joven di ki si amigu Jeoiada. Aserka di kilis ku bu kuji suma bu amigus, punta bu kabesa: ‘Sera ke na judan aumenta ña fe na Jeova? Sera ke ta nkoraẑan sigi normas di Deus? Sera ke ta papia di Jeova i papia di bardadis ku tene balur? Sera ke rispita normas di Deus? Sera ke ta kontan so ke ku N misti obi, o e ta tene koraẑen di kuriẑin si N ka sta na yanda diritu?’ (Dit 27:​5, 6, 17) Na bardadi, si bu amigus ka ama Jeova, bu ka pirsisa delis. Ma si bu amigus ama Jeova, e na judau sempri! — Dit 13:20.

8. Ke ku no dibi di pensa nel si no ta usa redi sosial?

⁸ Redi sosial pudi sedu un bon manera di manti kontaktu ku familia i ku amigus. Ma manga di jintis ta usa es manera di kumunika pa pui utrus fika dimiradu, e ta mostra tudu jintis fotos o videos di ke ke kumpra o ke ke fasi. Si bu ta usa redi sosial, punta bu kabesa: ‘Sera ki ña objetivu i pa pui utrus fika dimiradu ku mi? Sera ki ña objetivu i pa nkoraẑa utrus o N misti pa e ngaban? Sera ki N ta disa pa opinion di utrus influensia ña pensamentu, ña palabras ku ña asons di manera negativu?’ Ermon Nathan Knorr, ku sirbiba suma membru di Korpu Guvernanti, da es konsiju: “Ka bu tenta kontenta pekaduris. Bu na kaba pa ka kontenta ningin. Kontenta Jeova, i bu na kontenta tudu kilis ku ama Jeova.”

NO PIRSISA DI KONTINUA BAŜA NO KABESA

9. Kal kusas ku Jeova juda Uzias fasi? (2 Kronikas 26:​1-5)

⁹ Kopia bon disisons di Uzias. Uzias baŝa si kabesa ocalba joven. I nsinadu “ntindi kusas di Deus” o rispital. I vivi 68 anu, i Jeova bensua maior parti di si vida. (Lei 2 Kronikas 26:​1-5.) Uzias ngaña gera kontra manga di nasons inimigu, tambi i fasi pa Jerusalen sedu forti. (2 Kron 26:​6-15) Na bardadi, Uzias kontentiba ku tudu ke ku Deus judal fasi. — Ekl 3:​12, 13.

10. Ke ku kontisi ku Uzias?

¹⁰ Aprindi di mau disisons ku Uzias toma. Rei Uzias kustuma konta utrus ke ke dibi di fasi. Sera ki kila pul pensa di kuma i pudi fasi kualker kusa ki mistiba? Un dia, Uzias disidi entra na templu di Jeova i ku arogansia i tenta kema nsensu na altar, kusa ku reis ka dibi di fasiba. (2 Kron 26:​16-18) Ŝef di Saserdoti Azarias tenta kuriẑil, ma Uzias paña raiba mal. Infilismenti, Uzias ka kontinua sedu fiel, i Jeova kastigal ku lepra. (2 Kron 26:​19-21) Si vida na seduba mas minjor si kontra i kontinua baŝa si kabesa!

11. Ke ku ta mostra di kuma no baŝa no kabesa? (Jubi tambi foto.)

¹¹ Oca Uzias tene puder, i diskisi di kuma Jeova ku dal forsa ku rikesa. Ke ku no pudi aprindi? No dibi di lembra di kuma, i Jeova ku danu tudu bon kusas ku no tene na vida i na si sirvisu. En ves di ngaba no kabesa pa ke ku no fasi, no dibi di ngaba Jeova pa tudu ke ku no konsigi fasi.b (1 Kor 4:7) Ku umildadi no dibi di rikuñisi di kuma no sedu imperfeitu i no pirsisa di disiplina. Un ermon ku tene 60 i tal anu fala sin: “N aprindi pa ka fika mal ora ku utrus nota di ña erus. Ora ku N risibi disiplina pabia di erus ku N ta fasi pabia di falta di maduresa, N ta tenta kuriẑi ki erus i kontinua avansa.” Ora ku no rispita Jeova i no kontinua baŝa no kabesa, no na tene un vida filis. — Dit 22:4.

KONTINUA BUSKA JEOVA

12. Kuma ku Josias buska Jeova oca i seduba joven? (2 Kronikas 34:​1-3)

¹² Kopia bon disisons ku Josias toma. Josias teneba 16 anu oca i kumsa buska Jeova. I mistiba aprindi aserka di Jeova i fasi si vontadi. Ma vida ka seduba fasil pa es rei ku seduba joven. Na ki tempu, manga di jintis ta adoraba deusis falsu, pa kila Josias pirsisaba di koraẑen pa pui elis para fasil. I seduba koraẑosu! Antis di Josias tene 20 anu, i kumsa ku kaba ku adorason falsu na Israel. — Lei 2 Kronikas 34:​1-3.

13. Ke ku dedikason pa Jeova signifika pa bo?

¹³ Nin si bu sedu joven dimas bu pudi disidi kopia Josias, ora ku bu na buska Jeova i kunsi diritu si maneras di sedu. Si bu fasil, bu na misti dedika bu vida pa rel. Kuma ku es dedikason na afeta bu vida di kada dia? Luke, ku batisa oca i tene 14 anu fala sin: “Apartir di aos, N na pui sirvisu di Jeova na purmeru lugar na ña vida, N na sforsa pa kontental.” (Mar 12:30) Bu na tene benson si bu misti fasi mesmu kusa!

14. Da isemplus di kuma ku alguns jovens sta na kopia isemplu di rei Josias.

¹⁴ Kal situasons difisil ku bu pudi nfrenta suma joven ku ta sirbi Jeova? Johan ku batisa ku 12 anu, fala di kuma si kolegas di turma ta tental pa fuma sigaru eletroniku. Pa tene forsa di ka kai na tentason, Johan ta lembranta si kabesa di kuma fuma sigaru eletroniku pudi dana si saudi ku si amisadi ku Jeova. Rachel ku batisa oca i tene 14 anu, splika ke ku judal lida situasons difisil ki nfrenta na skola. I fala sin: “N ta sforsa pa lembra di kusas spiritual. Pur isemplu, kusas ku ta nsinadu na disiplina di storia pudi lembrantan storia di un algin na Biblia o un profesia. O utrora ora ku N na papia ku un algin na skola, N ta pensa na un testu di Biblia ku N pudi mostral.” Situasons difisil ku bu ta pasa, pudi sedu diferenti di kilis ku rei Josias pasa, ma bu pudi sedu jiru i fiel suma el. Lida ku situasons difisil ora ku bu sedu joven, na purparau pa nfrenta utrus situasons difisil na futuru.

15. Ke ku juda Josias sirbi Jeova ku fidelidadi? (2 Kronikas 34:​14, 18-21)

¹⁵ Oca rei Josias teneba 26 anu i kumsa ku fasi reparason di templu. Oca tarbaju na fasidu, i ojadu “libru di lei di SIÑOR, ki lei ku Deus da Moisés.” Oca rei obi leitura di livru, i pui pa i fasidu logu ke ku faladu. (Lei 2 Kronikas 34:​14, 18-21.) Sera ki bu gosta di lei Biblia tudu dia? Si bu ta fasil, sera ki bu ta fasil ku animu? Sera ki bu ta marka versikulus ku pudi judau? Luke, ku faladuba del na kumsada, ta marka kusas interesanti ki diskubri. Sera ki fasi mesmu kusa, na judau lembra di versikulus ku pontus ku bu gosta del? Mas ku bu kunsi Biblia i bu gosta del, mas bu na misti sirbi Jeova. Suma rei Josias, Palabra di Deus na judau fasi ke ki sertu.

16. Kal eru garandi ku Josias fasi, i ke ku kila ta nsinanu?

¹⁶ Aprindi di mau disison ku Josias toma. Oca Josias tene serka di 39 anu, i fasi un eru ku pul i muri. I konfia na si kabesa, en ves di buska orientason di Jeova. (2 Kron 35:​20-25) I ten ke ku no pudi aprindi des. I ka mporta no idadi o kantu tempu ku no sta na studa Biblia, no dibi di kontinua buska Jeova. No pudi fasil ora ku no ta ora sempri pa buska orientason di Jeova, studa si Palabra, i sukuta konsiju di kristons maduru. Talves no ka na fasi erus garandi i no na sedu mas filis. — Tiagu 1:25.

JOVENS — BO PUDI TENE UN VIDA FILIS

17. Kal lisons importanti ku no aprindi di tris reis di Judá?

¹⁷ I ten manga di kusas interesanti ku bu pudi fasi ora ku bu sedu joven. Storia di Joás, Uzias ku Josias mostra di kuma jovens pudi toma bon disisons i fasi kusas ku na kontenta Jeova. I bardadi di kuma, es jovens fasi erus ku leba elis na mau rusultadu. Ma no pudi kopia bon isemplus des reis i ivita fasi erus ke fasi. Si no fasil no pudi tene un vida filis.

18. Kal isemplus bibliku ku mostra di kuma bu pudi tene un vida filis?( Jubi tambi diseñu.)

¹⁸ Biblia fala di utrus jovens ku pertusi di Jeova, ku tene si fabur i ku tene filisidadi na se vida. Davi seduba un delis. Oca ki seduba mas joven i disidi sedu amigu di Deus, mas tardi i bin sedu un rei fiel. I bardadi di kuma Davi fasi erus, ma Deus ojal suma un algin fiel. (1 Re 3:6; 9:​4, 5; 14:8) Ora ku bu studa vida di Davi, si isemplu na nkoraẑau sirbi Jeova ku fidelidadi. O bu pudi studa isemplu di Markus o di Timótiu. Bu na nota di kuma e kumsa sirbi Jeova oca e seduba mas joven, i e kontinua sirbil ku fidelidadi. Kila leba elis na tene filisidadi na vida.

19. Kal tipu di vida ku bu pudi tene?

¹⁹ Kuma ku bu ta usa bu vida gosi na afeta ciu bu vida na futuru. Si bu konfia na Jeova, i bu ka konfia na bu propi ntindimentu, Jeova na gia bu pasu. (Dit 20:24) Bu pudi tene un vida filis. Lembra di kuma Jeova ta da balur pa ke ku bu sta na fasi pa rel. Sera ki i ten un kusa mas minjor di ki usa bu vida pa sirbi no Pape ku sta na seu ku amanu?