Bu pudi tene konfiansa di kuma Jeova na judau na tempus difisil

1-2. Kal purblemas ku judeus ku riba pa Jerusalen teneba ku parsi ku di nos? (Jubi kuadru “Tempu di Aẑeu, Zakarias ku Esdras.”)

SERA ki utrora bu ta preokupa ku futuru? Talves bu pirdi bu tarbaju i bu sta preokupadu di kuma ku bu na sustenta bu familia. Talves bu sta preokupadu ku suguransa di bu familia, pabia di purblema pulitiku ku ten na bu tera, pabia di pirsigison o no tarbaju di pregason tujidu. Sera ki bu tene un des purblemas? Si bu tene, bu na nkoraẑadu di oja kuma ku Jeova juda antigu israelitas, oca e pasa pa mesmu purblemas.

² Judeus ku pasa tudu se vida na Babilonia, pirsisa di tene fe forti pa disa rikesa ku vida sabi di Babilonia, i viaẑa pa un tera ku manga delis ka kunsi diritu. Puku tempu dipus ke ciga e kumsa ku tene purblemas di diñeru, purblemas pulitiku ku pirsigison. Pa alguns i seduba difisil konsentra na torna kumpu mas templu di Jeova. Asin serka di 520 AEK, Jeova manda dus profeta ku sedu Aẑeu ku Zakarias, pa juda povu pa e tene mas animu na si tarbaju. (Aẑeu 1:1; Zak 1:1) Suma ku no na bin oja, nkoraẑamentu ku es profetas da, da bon rusultadu. Ma 50 anu dipus, judeus ku riba pirsisa mas di nkoraẑamentu. Dipus Esdras ku ta kopiaba lei diritu sai di Babilonia pa Jerusalen pa nkoraẑa povu di Deus pa e pui adorason di Jeova na purmeru lugar na se vida. — Esd 7:​1, 6.

3. Kal purguntas ku no na bin fala del? (Ditus 22:19)

³ Profesias di Aẑeu ku Zakarias juda povu di Deus na pasadu pa e kontinua konfia na Jeova na tempu di pirsigison. Es profesias tambi pudi judanu pa no konfia na Jeova mesmu si no sta na pasa pa purblemas na vida. (Lei Ditus 22:19.) Nkuantu no na jubi mensaẑen di Deus ku kontadu pa Aẑeu ku Zakarias i jubi isemplu di Esdras, no na ruspundi es purguntas: Kuma ku es judeus afetadu pa tudu es publemas? Pabia ku no dibi di kontinua konsentra na fasi vontadi di Deus na tempus difisil? Kuma ku no pudi aumenta no konfiansa na Jeova na tempus difisil?

PURBLEMAS KU FASI PA JUDEUS PIRDI SE ANIMU

4-5. Ke talves ku pui judeus pirdi animu na se tarbaju di kumpu templu?

⁴ Oca ku judeus riba pa Jerusalen e teneba manga di tarbaju. E kumpu altar di Jeova i e pui alisersu di templu rapidu. (Esd 3:​1-3, 10) Ma e pirdi rapidu animu ke teneba na kumsada. Pabia? Pabia alen di kumpu templu, e dibi di kumpuba se kasas, sumia se lugaris i sustenta se familias. (Esd 2:​68, 70) Tambi e nfrenta pirsigison di se inimigus ku teneba planu di pui elis para tarbaju di kumpu templu. — Esd 4:​1-5.

⁵ Tambi judeus ku riba afetadu pa purblemas pulitiku ku ekonomiku. Gosi, se tera fasi parti di mperiu di Persia. Dipus di Siru rei di Persia muri na 530 AEK, si fiju comadu Kambisis ku toma si lugar, leba tropas pa konkista Ejitu. Oca i na bai pa Ejitu, i pudi sedu di kuma si soldadus pidi israelitas kumida, yagu ku kau di mora, i kila aumenta kansera pa israelitas. Oca ku rei Dariu I toma lugar di Kambisis, i tenba rebelion ku purblemas pulitiku. Es tudu leba manga di kilis ku riba di Babilonia preokupa di kuma ke na sustenta se familia. Pabia di tudu es purblema ke pasa, alguns judeus pensaba di kuma i ka tempu di torna kumpu templu di Jeova. — Aẑeu 1:2.

6. Kal utru purblema ku judeus pasa, i di akordu ku Zakarias 4:​6, 7 kal garantia ku Zakarias da elis?

⁶ Lei Zakarias 4:​6, 7. Alen di purblemas pulitiku ku ekonomiku, judeus dibi di lidaba ku pirsigison. Na 522 AEK, se inimigus konsigi pui pa guvernu di Persia pui pa templu di Jeova para kumpudu. Ma Zakarias garanti judeus di kuma, Jeova na usa si spiritu santu ku tene puder pa kaba ku tudu purblemas. Na 520 AEK, rei Dariu disa pa e kontinua tarbaju di kumpu templu, i da elis diñeru pa fasil, tambi i da ordi pa guvernaduris lokal juda elis. — Esd 6:​1, 6-10.

7. Kuma ku Jeova bensua judeus ku riba pa Jerusalen, oca ke pui vontadi di Deus na purmeru lugar?

⁷ Jeova usa Aẑeu ku Zakarias pa purmiti si povu di kuma, i na juda elis si e pui tarbaju di kumpu templu na purmeru lugar. (Aẑeu 1:​8, 13, 14; Zak 1:​3, 16) Judeus kumsa mas tarbaju di kumpu templu na 520 AEK, pabia di nkoraẑamentu ke risibi di profetas, i e kaba kumpul na menus di sinku anu. Suma judeus pui vontadi di Deus na purmeru lugar, mesmu ku manga di purblemas, Jeova da elis ke ke pirsisa del, tambi i juda elis pa e pertusi del. Kila leba elis na adora Jeova ku kontentamentu. — Esd 6:​14-16, 22.

KONTINUA KONSENTRA NA FASI VONTADI DI DEUS

8. Kuma ku palabras ku sta na Aẑeu 2:4 ta judanu kontinua konsentra na fasi vontadi di Deus?

⁸ Suma garandi tribulason sta na pertusi kada bias mas, i importanti dimas pa no lembra di kuma no pirsisa di obdisi mandamentu di prega. (Mar 13:10) Ma i pudi sedu difisil konsentra na pregason si no tene purblema di diñeru o si jintis sta kontra no tarbaju di pregason. Ke ku pudi judanu pui interesis di Renu na purmeru lugar na no vida? Kontinua konfia di kuma Jeova “ku ten tudu puder” sta na no ladu. I na judanu si no kontinua pui interesis di Renu riba di no propi interesis. Pa kila, no ka dibi di medi nada. — Lei Aẑeu 2:4.

9-10. Kuma ku un kasal nota di kuma ke ku Jesus fala na Mateus 6:33 i bardadi?

⁹ Jubi isemplu di Oleg ku Irina,b un kasal ku sta na sirbi suma pionerus. Dipus ke munda pa juda un kongregason na utru ladu e pirdi se tarbaju pabia di purblemas ekonomiku na se tera. E fikaba sin tarbaju fiksu pa serka di un anu, ma mesmu asin e kontinua sinti ajuda ku Jeova da elis ku amor, i un bias e risibi ajuda di se ermons ku irmas. Ke ku juda elis oca e staba na pasa situasons difisil? Oleg ku na kumsada staba disanimadu, fala sin: “Manti okupadu na pregason judanu konsentra na kusa mas importanti na vida.” Nkuantu el ku si minjer e kontinua buska tarbaju, e manti okupadu na pregason.

¹⁰ Un dia oca e riba di pregason, se visiñu fala elis di kuma un di se amigus intimu viaẑa serka di 160 kilometru pa tisi elis dus saku di kusas di kume. Oleg fala sin: “Na ki dia, mas un bias N nota di kuma Jeova ku kongregason ta kuida diritu di nos. No sta konvensidu di kuma Jeova nunka ka na ciga di diskisi di si servus, mesmu si e sinti di kuma kusas ka na ciga di minjoria ku elis.” — Mat 6:33.

11. Ke ku no pudi spera si no kontinua konsentra na fasi vontadi di Deus?

¹¹ Jeova misti pa no konsentra na tarbaju di salva vida, ku sedu fasi disipulus. Suma ki faladu na paragrafu 7, Aẑeu fala povu di Jeova pa e kumsa fasi tarbaju di templu. Si e fasil Jeova purmiti di kuma i na “bensua” elis. (Aẑeu 2:​18, 19) Anos tambi no pudi tene sertesa di kuma Jeova na bensua no sforsu, si no da prioridadi pa tarbaju ki danu pa fasi.

KUMA KU NO PUDI AUMENTA NO KONFIANSA NA JEOVA?

12. Pabia ku Esdras ku si ermons ku riba pirsisaba di tene fe forti?

¹² Na 468 AEK, Esdras viaẑa ku sugundu grupu di judeus ku sai di Babilonia pa Jerusalen. Esdras ku kilis ku staba ku el pirsisaba di tene fe forti pa fasi es bias. E teneba manga di uru ku prata ku rei da elis pa templu, pa kila e pudiba atakadu pa ladrons. (Esd 7:​12-16; 8:31) Tambi e bin nota di kuma te mesmu Jerusalen ka seduba suguru. I ka tenba manga di jintis ku mora la, i si muras ku portons pirsisaba di kumpudu. Ke ku no pudi aprindi di isemplu di Esdras aserka di aumenta no konfiansa na Jeova?

13. Kuma ku Esdras aumenta si konfiansa na Jeova? (Jubi tambi nota bas di paẑina.)

¹³ Esdras oja kuma ku Jeova apoia si povu na tempus difisil. I pudi sedu di kuma Esdras staba na Babilonia, oca rei Asueru manda mata tudu judeus ku staba na mperiu di Persia, na 484 AEK, anus antis di riba pa Jerusalen. (Est 3:​7, 13-15) Vida di Esdras ku tudu judeus staba na pirigu! Oca ke obi es ameasa, e staba preokupadu tok e para kume, e cora i e buska ajuda di Jeova na orason. (Est 4:3) Imaẑina kuma ku Esdras ku si ermons judeus sinti kontra kilis ku fasi planu pa mata judeus kabadu ku el! (Est 9:​1, 2) Ke ku kontisi ku Esdras na ki tempu, purparal pa tempu mas difisil na futuru, i aumenta si konfiansa di kuma Jeova pudi proteẑi si povu.c

14. Kal lison ku un irma aprindi oca i nota di kuma Jeova kuida del na tempu difisil?

¹⁴ Ora ku no nota kuma ku Jeova kuida di nos na tempus difisil, konfiansa ku no tene nel ta aumenta. Jubi isemplu di Anastasia, ku mora na Europa di Lesti. I disa si tarbaju oca si kolega tenta forsijal pa i apoia un partidu pulitiku. I fala sin: “Nunka N pasa un situason nunde ku N fika sin diñeru.” Dipus i fala mas: “N disa asuntu na mon di Jeova, N oja kuma ki kuida di mi ku amor. Si un dia N bin pirdi tarbaju mas, N ka na medi. Si ña Pape ku sta na seu kuida di mi aos, i na bin kuida di mi tambi na futuru.”

15. Ke ku juda Esdras kontinua konfia na Jeova? (Esdras 7:​27, 28)

¹⁵ Esdras rikuñisi mon di Jeova na si vida. Oca Esdras pensa na tempu ku Jeova kuida del, es judal pa i kontinua konfia nel. Nota es palabras: “Ku mon di SIÑOR riba di mi, N mara koraẑen”. (Lei Esdras 7:​27, 28.) Esdras fala mas mesmu kusa sinku bias na livru di Biblia ki skirbi. — Esd 7:​6, 9; 8:​18, 22, 31.

16. Na kal situasons ku no pudi oja di manera klaru mon di Deus na no vida? (Jubi tambi fotos.)

¹⁶ Jeova pudi judanu ora ku no sta na pasa pa un situason difisil. Pur isemplu, ora ku no pidi no patron folga pa no pudi mati un kongresu, o pidil pa i muda ora di tarbaju pa pudi mati tudu no runions, no pudi kria un oportunidadi di oja mon di Jeova na no vida. Rusultadu pudi sedu mas minjor di ki kil ku no spera. Dipus, no konfiansa na Jeova na torna mas forti.

17. Kuma ku Esdras mostra umildadi na tempus difisil? (Jubi diseñu ku sta na kapa.)

¹⁷ Ku umildadi Esdras pidi ajuda di Jeova. Ora ku Esdras staba preokupadu dimas ku kusas ki dibi di fasi, i ta oraba Jeova ku umildadi. (Esd 8:​21-23; 9:​3-5) Ma Esdras konfiaba na Jeova, i utrus staba dispostu pa apoial i kopia si fe. (Esd 10:​1-4) Ora ku no sta preokupadu dimas ku no nesesidadis material o suguransa di no familia no dibi di ora Jeova ku konfiansa.

18. Ke ku pudi judanu aumenta no konfiansa na Jeova?

¹⁸ Si no buska ajuda di Jeova ku umildadi, i seta ajuda di no ermons ku irmas no konfiansa na Jeova na aumenta. Erika ku tene tris fiju, sempri konfia di kuma Jeova na kuida del mesmu oca ki pasa kasabi. Dentru di puku tempu, i pirdi bariga, tambi si omi ki gosta ciu del muri. Ku tudu ke ku pasa ku el, i fala sin: “Bu ka pudi sibi antis kuma ku Jeova na judau. Bu pudi risibi ajuda di maneras ku bu ka spera. N oja kuma ku Jeova ruspundi manga di ña orasons, atraves di palabras ku asons di ña amigus. Si N konta ña amigus ke ku sta na pasa ku mi, i pudi sedu mas fasil pa e judan.”

KONTINUA KONFIA NA JEOVA TE FIN

19-20. Ke ku no aprindi di judeus ku ka pudi riba pa Jerusalen?

¹⁹ No pudi tambi aprindi di judeus ku ka konsigi riba pa Jerusalen. Alguns ka konsigi riba pabia di idadi, o duensa o pabia di se situason na familia. Nin ku sin e staba kontenti di apoia kilis ku na riba, e da elis manga di kusas ke pirsisa del pa templu. (Esd 1:​5, 6) Parsi kuma serka di 19 anu dipus di purmeru grupu riba pa Jerusalen, kilis ku fika na Babilonia kontinua manda ofertas pa Jerusalen. — Zak 6:10.

²⁰ Mesmu si no ka konsigi fasi tudu ku no mistiba na sirvisu di Deus, no pudi tene sertesa di kuma i ta kontenti ku tudu ke ku no ta fasi pa kontental. Kuma ku no sibi kila? Na tempu di Zakarias, Jeova pidi si profeta pa i kumpu koroa di uru ku prata ku mandadu pa kilis ku sta na Babilonia. (Zak 6:11) Es “koroa” na sirbi suma “lembransa” di ofertas ke fasi di tudu korson. (Zak 6:14) No pudi tene konfiansa di kuma, Jeova ka na diskisi nunka di sforsu ku no fasi di tudu korson pa sirbil na tempus difisil. — Eb 6:10.

21. Ke ku pudi judanu tene konfiansa na Jeova i ka mporta ke ku pudi kontisi na futuru?

²¹ Sin duvida, no na kontinua tene situasons difisil nes tempu di fin i situasons pudi te mesmu piora na futuru. (2 Tim 3:​1, 13) Ma no ka pirsisa di sta preokupadu dimas. Lembra di palabras di Jeova pa si povu na tempu di Aẑeu: “N sta ku bos . . . ka bo medi.” (Aẑeu 2:​4, 5) Anos tambi no pudi tene sertesa di kuma Jeova na sta ku nos, si no fasi no minjor pa fasi si vontadi. Ora ku no aplika lisons ku no aprindi di profesias di Aẑeu ku Zakarias ku isemplu di Esdras, no pudi kontinua tene konfiansa na Jeova, i ka mporta situasons difisil ku no pudi pasa na futuru.