Kuma ku no pudi kontinua tene amor forti pa n̈utru?

1-2. (a) Pabia ku Paulu fala di kuma amor i “mas garandi”? (b) Kal purguntas ku no na bin ruspundi?

OCA apostolu Paulu na fala di fe, speransa ku amor, i fala “mas garandi di tudu i amor.” (1 Kor 13:13) Pabia ku Paulu fala sin? Na futuru, no ka na pirsisa di tene fe o speransa na purmesas di Deus aserka di nobu mundu, pabia es kusas na bin kumpri. Ma no na pirsisa sempri di tene amor pa Jeova i pa jintis. Na bardadi, no amor pa Jeova i pa jintis na kontinua aumenta pa sempri.

² Suma no na pirsisa sempri di tene amor, no na bin fala di tris purguntas. Purmeru, pabia ku no dibi di ama n̈utru? Sugundu, kuma ku no ta mostra amor pa n̈utru? Terseru, kuma ku no pudi torna no amor pa n̈utru mas forti?

PABIA KU NO DIBI DI AMA N̈UTRU?

3. Kal motivus ku no tene pa ama n̈utru?

³ Pabia ki importanti pa no ama n̈utru? Un di motivus i di kuma, ora ku no mostra amor pa no ermons no ta mostra di kuma anos i kristons di bardadi. Jesus fala sin pa si apostolus: “Si bo ama n̈utru, tudu jinti ta rapara kuma abos i ña disipulus.” (Jon 13:35) Tambi tene amor pa n̈utru ta judanu pa no kontinua unidu. Paulu fala amor “ta liga tudu kusa pa forma unidadi kompletu.” (Kol 3:14) Ma i ten utru motivu importanti ku pui no dibi di ama n̈utru. Apostolu Jon skirbi es pa si ermons ku irmas: “Kin ku ama Deus, pa i ama tambi si ermon.” (1 Jon 4:21) Ora ku no mostra no amor pa n̈utru no ta mostra no amor pa Deus.

4-5. Fasi komparason di kuma ku no amor pa Deus sta ligadu ku no amor pa n̈utru.

⁴ Na kal sintidu ku no amor pa Deus sta ligadu ku amor ku no ta mostra pa no ermons ku irmas? Jubi ligason ku ten entri no korson ku utrus parti di no kurpu. Ora ku mediku peganu na mon pa sinti batida di no korson, si i fraku o i forti, i pudi sibi si no korson sta diritu o nau. Kuma ku no pudi aplika es prinsipiu?

⁵ Un mediku ta konsigi sibi kuma ku no korson sta ora ki jubi batida di no korson. Anos tambi no pudi sibi si no amor pa Deus i forti, ora ku no jubi si amor ku no tene pa utrus i forti. Si no nota di kuma amor ku no tene pa no ermons ku irmas i fraku, es pudi mostra di kuma amor ku no tene pa Deus i fraku tambi. Ma ora ku no ta mostra sempri amor pa no ermons ku irmas, no na sibi di kuma no amor pa Deus i forti.

6. Pabia ku no dibi di preokupa si amor pa no ermons ku irmas i fraku? (1 Jon 4:​7-9, 11)

⁶ No dibi di preokupa si amor pa no ermons ku irmas i fraku. Pabia? Pabia i signifika di kuma no amisadi ku Jeova i fraku. Apostolu Jon mostra es di manera klaru oca ki lembrantanu es: “Kil ku ka ama si ermon ki oja, kuma ki pudi ama Deus ki ka oja?” (1 Jon 4:20) Kal lison ku no aprindi? Jeova ta kontenti ku nos so si no “ama n̈utru”. — Lei 1 Jon 4:​7-9, 11.

KUMA KU NO TA MOSTRA AMOR PA N̈UTRU?

7-8. Kuma ku no pudi mostra amor pa n̈utru?

⁷ Manga di bias, no pudi oja es mandamentu na Palabra di Deus: “Bo ama n̈utru”. (Jon 15:​12, 17; Rom 13:8; 1 Tes 4:9; 1 Ped 1:22; 1 Jon 4:11) Ma amor i un sentimentu ku sta dentru di nos, ningin ka pudi ojal. Pa kila, kuma ku no pudi mostra no amor pa no ermons ku irmas? Atraves di no palabras ku no asons.

⁸ I ten manga di maneras ku no pudi mostra di kuma no ama no ermons ku irmas. Ali alguns isemplus: “Bo papia bardadi, kada un ku si kumpañer.” (Zak 8:16) “Bo sta ku n̈utru na pas.” (Mar 9:50) Bo toma diantera na “da n̈utru purmeru lugar ku rispitu.” (Rom 12:10) “Bo risibi n̈utru”. (Rom 15:7) Bo kontinua “purda n̈utru”. (Kol 3:13) “Bo juda n̈utru ku kargu”. (Gal 6:2) “Bo ba ta konsola n̈utru”. (1 Tes 4:18) Bo kontinua “juda n̈utru”. (1 Tes 5:11) “Bo ora pa n̈utru”. — Tiagu 5:16.

9. Pabia ku konsola utrus i un manera importanti di mostra amor? (Jubi tambi foto.)

⁹ No jubi un manera di mostra amor ku faladu del na paragrafu 8. No na jubi ke ku Paulu fala: “Bo ba ta konsola n̈utru”. Pabia ku konsola utrus i un manera importanti di mostra amor? Di akordu ku un livru ku ta fala di Biblia, palabra ku Paulu usa pa “konsola” signifika “firma pertu di un algin pa nkoraẑal, ora ki na sufri pabia di un situason difisil.” Pa kila, ora ku no konsola un ermon ku sta na un situason difisil, no ta judal kontinua sirbi Jeova ku fidelidadi. Kada bias ku no juda un ermon o un irma ku na sufri, no ta sta na mostra amor pa rel. — 2 Kor 7:​6, 7, 13.

10. Kal ligason ku ten entri sinti pena ku konsola?

¹⁰ Sinti pena ku konsola liga ciu ku n̈utru. Na kal sintidu? Ora ku un algin sinti pena pa kin ku na sufri, i ta misti konsolal, i ta fasi algun kusa pa judal. Purmeru, i ta sinti pena, dipus i ta konsola utrus. Paulu mostra di kuma pena ku Jeova ta sinti pa jintis ta lebal na konsola elis. Paulu fala di kuma Jeova i suma un “Pape ku ta ten pena di nos”. (2 Kor 1:3) Li Paulu usa palabras “ku ta ten pena di nos” pa fala di sinti pena pa utrus. Pa kila, “Deus comadu di Pape ku ta ten pena, pabia pena ki ta tene pa jintis i forti.” Es pena ta lebal na animanu “na tudu koldadi kasabi”. (2 Kor 1:4) Suma ku un yagu ku sai di fonti ta da animu pa kilis ku tene sedi, Jeova tambi ta da animu o konsolu pa kilis ku sta disanimadu. Kuma ku no pudi kopia Jeova na sinti pena pa utrus i konsola elis? Un di manera ku no pudi fasi kila i ora ku no tene maneras di sedu ku na judanu sinti pena i konsola utrus. Kal ki alguns des maneras di sedu?

11. Di akordu ku Kolosensis 3:12 ku 1 Pedru 3:​8, kal ki utrus maneras di sedu ku na judanu ama utrus i konsola elis?

¹¹ Ke ku na judanu kontinua ama i kontinua “konsola n̈utru” kada dia? No pirsisa di tene maneras di sedu suma sinti di mesmu manera, ama n̈utru suma ermon ku mostra bondadi. (Lei Kolosensis 3:12; 1 Pedru 3:8.) Kuma ku es maneras di sedu na judanu? Ora ku no sinti pena pa no ermons i preokupa ciu ku elis, no na konsola elis ora ke na sufri. Suma ku Jesus fala: “Boka ta papia kusa ku na inci korson tok i na darma. Omi bon ta tira kusas bon na bon rikesa ku sta nel.” (Mat 12:​34, 35) Konsola no ermons ku irmas ku pirsisa, i un manera importanti di mostra no amor pa relis.

KUMA KU NO PUDI TORNA NO AMOR PA N̈UTRU MAS FORTI?

12. (a) Pabia ku no pirsisa di toma kuidadu pa ka pirdi no amor pa n̈utru? (b) Kal purgunta ku no na bin fala del?

¹² Anos tudu no misti kontinua “ama n̈utru”. (1 Jon 4:7) Pa kila, i importanti pa no lembra di avisu ku Jesus da, di kuma “amor di manga di jinti na fria”. (Mat 24:12) Jesus ka fala di kuma es na kontisi ku maioria di si disipulus. Ma, no dibi di toma kuidadu pa ka sedu influensiadu pa falta di amor ku ten na mundu. Pa kila, no na fala des purgunta importanti: Ke ku pudi judanu sibi si amor ku no tene pa no ermons i forti?

13. Ke ku na judanu sibi si amor ku no tene pa no ermons i forti?

¹³ Un manera di sibi si no amor i forti, i jubi kuma ku no ta lida ku alguns situasons na vida. (2 Kor 8:8) Apostolu Pedru fala di un des situasons: “Riba di tudu, bo ama n̈utru ku tudu bo korson, pabia amor ta kubri manga di pekadu.” (1 Ped 4:8) Asin, ke ku no ta fasi ora ku no ermons fasi eru o fasi un kusa ku denu, pudi judanu sibi si no amor pa relis i forti.

14. Di akordu ku 1 Pedru 4:​8, kal tipu di amor ku no pirsisa di tene? Bu pudi da un isemplu.

¹⁴ Gosi, no jubi diritu palabras di Pedru. Purmeru parti di versikulu 8 fala di kal tipu di amor ku no pirsisa di tene, ku sedu, “ama n̈utru ku tudu bo korson”. Frasi “tudu bo korson” ku Pedru usa, signifika “stika.” Sugundu parti di versikulu fala di ke ku no na fasi, ora ku no tene amor di tudu korson pa utrus. Amor di tudu korson pa no ermons na judanu kubri se pekadus. No pudi komparal des manera: No ta pega amor ku dus mon, suma ora ku no pega tisidu no stikal tok i ta kubri i ka son un, o dus, ma “manga di pekadu.” Kubri signifika purda. Suma ku un tisidu pudi kubri un manca, asin ku amor pudi kubri frakesas ku imperfeisons di utrus.

15. Si amor pa no ermons ku irmas i forti dimas, ke ku no na konsigi fasi? (Kolosensis 3:13)

¹⁵ No amor pa utrus dibi di sedu forti dimas pa no pudi purda imperfeisons di no ermons, mesmu si utrora i difisil dimas. (Lei Kolosensis 3:13.) Ora ku no konsigi purda utrus, no ta mostra di kuma no amor i forti i no misti kontenta Jeova. Ke mas ku pudi judanu purda erus di utrus i ka lestu ku paña raiba pa se manera di fasi kusas?

16-17. Ke mas ku na judanu pa ka konsentra na erus pikininu di utrus? Bu pudi da un isemplu. (Jubi tambi fotos.)

¹⁶ Konsentra na bon maneras di sedu di bu ermons ku irmas. Jubi es isemplu. Imaẑina di kuma bu sta na jumbai ku un grupu di ermons ku irmas. Bo pasa un bon mumentu i na fin di jumbai bo tira un foto di grupu. Bo tira mas dus foto si kontra ki purmeru ka sai diritu. Gosi bo tene tris foto. Ma na un delis bu nota di kuma un ermon ka sta na ri. Ke ki bu na fasi ku ki foto? Bu na pagal, pabia bu tene dus utru foto nunde ku tudu na ri juntu ku ki ermon.

¹⁷ No pudi kompara fotos ku no guarda ku lembransas ku no kontinua tene. Normalmenti no ta tene bon lembransas di tempu ku no pasa ku no ermons ku irmas. Ma talves na un des mumentus un ermon o un irma fala o fasi un kusa ki ka bon. Ke ku no dibi di fasi ku es lembransa? Pabia ku bu ka na tenta pagal, suma ku bu paga un di ki fotos? (Dit 19:11; Ef 4:32) No pudi diskisi di erusiñus di no ermon o irma, pabia no ta lembra di manga di bon mumentus ku no pasa ku el. I es tipu di lembransas ku no misti kontinua tene i da balur.

PABIA KU AMOR I IMPORTANTI DIMAS AOS?

18. Kal kusas importanti aserka di amor ku no fala del nes studu?

¹⁸ Pabia ku no misti pa amor ku no tene pa n̈utru kontinua forti? Suma ku no oja, ora ku no mostra amor pa no ermons ku irmas, no ta mostra amor pa Jeova. Kuma ku no ta mostra no amor pa no ermons ku irmas? Un manera di fasi kila i konsola elis. No na konsigi kontinua “konsola n̈utru” si no ta sinti pena di utrus. Kuma ku no pudi kontinua tene amor forti pa n̈utru? I ora ku no ta purda erus di no ermons mesmu si difisil fasil.

19. Pabia ku mostra amor pa n̈utru i importanti dimas aos?

¹⁹ Pabia ku mostra amor pa n̈utru i importanti dimas aos? Jubi ke ku Pedru fala: “Fin di tudu kusa sta ja pertu; asin . . . bo ama n̈utru ku tudu bo korson”. (1 Ped 4:​7, 8) Suma fin des mundu mau sta na pertu kada bias mas, ke ku no pudi spera? Jesus fala sin pa si sigiduris: “Tudu jintis na odia bos pabia di ña nomi.” (Mat 24:9) Pa nguenta es odiu no pirsisa di kontinua unidu. Si no ama no ermons ku irmas, Satanas nunka ka na konsigi dividinu, pabia amor “ta liga tudu kusa pa forma unidadi kompletu.” — Kol 3:14; Fil 2:​1, 2.