Kontinua aumenta bu amor

1. Kal bardadis ku bu aprindi kontra bu kumsa ku studa Biblia?

BU LEMBRA di tudu kusas ku bu aprindi kontra bu kumsa ku studa Biblia? Bu fikaba dimiradu di sibi di kuma Deus tene un nomi. Talves bu korson kalma di sibi di kuma Deus ka ta kastiga jintis na nfernu di fugu. Tambi i pudi sedu di kuma bu kontenti dimas di sibi di kuma, bu pudi oja mas kilis ku bu ama ku muri i vivi ku elis na paraísu li na Tera.

2. Alen di aprindi bardadis ku sta na Biblia, kal utru progresu ku bu fasiba? (Efésius 5:1, 2)

² Konformi bu na studaba Biblia, mas bu amor pa Jeova aumentaba. Es amor lebau pa bu aplika ke ku bu aprindiba. Bu toma minjor disisons basiadu na prinsipius di Biblia. Bu minjoria bu manera di oja kusas ku bu komportamentu pabia bu misti kontenta Deus. Suma ku un mininu ta kopia un pape ku ta mostra amor, bu kopia bu Pape ku sta na seu. — Lei Efésius 5:1, 2.

3. Kal purguntas ku no pudi fasi no kabesa?

³ No pudi punta no kabesa: ‘Sera ki ña amor pa Jeova torna mas forti gosi di ki kontra ku N kumsa sedu kriston? Disna ku N batisa, sera ki ña manera di pensa i di fasi kusas i suma di Jeova, spesialmenti na manera di mostra amor pa ña ermons ku irmas?’ Si bu nota di kuma ‘amor ku bu teneba na kumsada’ ka sedu forti suma antis, ka bu disanima. I mesmu kusa ku kontisi ku purmeru kristons. Jesus ka nega elis, i nin i ka na neganu tambi. (Apok 2:4, 7) I sibi di kuma no pudi aprindi tene mas amor, suma ki ku no teneba na kumsada, kontra no aprindi bardadi.

4. Ke ku no na bin oja nes studu?

⁴ Nes studu no na bin oja kuma ku no pudi kontinua aumenta no amor pa Jeova i pa utrus. Dipus no na bin oja alguns bensons ku no na tene, si no ama Jeova i ama no ermons ku irmas.

AUMENTA BU AMOR PA JEOVA

5-6. Kal purblemas ku apostolu Paulu pasa duranti si ministeriu, ma ke ku lebal pa i kontinua sirbi Jeova?

⁵ Apostolu Paulu tene un vida filis na si sirvisu pa Jeova, ma tambi i pasa pa manga di purblemas. Manga di bias, Paulu ta fasiba bias lunju, i na ki tempu i ka seduba fasil fasi bias. Na ki bias, utrora Paulu ta pasa pa “pirigu di riu” ku “pirigu di bandidus”. Tambi utrora si inimigus ta sutal. (2 Kor 11:23-27) Tambi i ka tudu ora ku ermons kriston di Paulu ta da balur pa sforsu garandi ki ta fasi pa juda elis. — 2 Kor 10:10; Fil 4:15.

⁶ Ke ku juda Paulu kontinua sirbi Jeova? Paulu aprindi ciu aserka di maneras di sedu di Jeova atraves di Skrituras i ku ke ki pasa. Kila pui Paulu pa sta konvensidu di kuma Jeova Deus amal. (Rom 8:38, 39; Ef 2:4, 5) Tambi i pasa na ama Jeova ciu. Paulu mostra si amor pa Jeova ‘manera ki sirbi’ i kontinua sirbi “si pobu”. — Eb 6:10.

7. Kal ki un di maneras ku no pudi aumenta no amor pa Jeova?

⁷ No pudi aumenta no amor pa Deus ora ku no pega tesu na studa si Palabra. Ora ku bu na lei Biblia tenta diskubri ke ku kada parti ta nsinau aserka di Jeova. Punta bu kabesa: ‘Kuma ku es parti ta mostra di kuma Jeova aman? Kal provas ki dan di kuma Jeova aman?’

8. Kuma ku orason pudi judanu aumenta no amor pa Deus?

⁸ Utru kusa ku pudi judanu aumenta no amor pa Jeova i ora ku no ta ora tudu dia pa kontal ke ku sta na no korson. (Sal 25:4, 5) Si no fasi es, Jeova na ruspundi no orasons. (1 Jon 3:21, 22) Un irma na Asia comadu Khanh, fala sin: “Na kumsada, N amaba Jeova pabia di ke ku N aprindi del, ma oca ku N nota di kuma i ruspundi ña orasons, ña amor pa rel aumenta. Es leban pa N misti fasi kusas ku na kontenti Jeova.”b

AUMENTA BU AMOR PA UTRUS

9. Kuma ku Timótiu mostra di kuma i staba na progredi na mostra amor?

⁹ Alguns anus dipus ki sedu kriston, Paulu kunsi Timótiu, ku seduba un bon joven. Timótiu ama Jeova i ama tambi jintis. Paulu fala Filipensis: Timótiu “i uniku ku ten sintidu suma mi, ku ta ten interes di bardadi pa bos.” (Fil 2:20) Li, Paulu ka staba na fala di kapasidadi ku Timótiu tene di organiza kusas o fasi diskursu publiku, ma Paulu fikaba dimiradu pa kuma ku Timótiu ta mostra amor pa si ermons ku irmas. Sin duvida, kongregasons ku Timótiu ta visita ta staba ku presa di risibi si visitas. — 1 Kor 4:17.

10. Kuma ku Anna ku si omi mostra amor pa se ermons ku irmas?

¹⁰ Anos tambi no ta buska maneras di juda no ermons ku irmas. (Eb 13:16) No jubi isemplu di Anna ku faladu del na studu ku pasa. Dipus di un bentu forti, el ku si omi e visita kasa di un Tustumuña di Jeova i e diskubri di kuma kankra di kasa des familia dana. Pabia di kila, es familia ka tene ropas limpu. Anna fala sin: “No toma se ropas, no laba elis, no lisa, no dobra elis i no ribanta elis el. I ka seduba difisil pa no fasi es, ma suma no fasil no pasa sedu gosi bon amigus.” Amor ku Anna ku si omi tene pa se ermons ku irmas, kila ku leba elis pa da ajuda pratiku. — 1 Jon 3:17, 18.

11. (a) Kuma ku utrus ta sinti ora ku no na sforsa pa mostra elis amor? (b) Di akordu ku Ditus 19:17, kuma ku Jeova ta ojanu ora ku no mostra amor?

¹¹ Ora ku no trata utrus ku amor i ku bondadi, e ta nota di kuma no sta na sforsa pa kopia Jeova. Tambi e pudi da balur pa no bondadi, mas di ki kil ku no imaẑinaba. Khanh, ku faladuba ja del, ta lembra ku amor di kilis ku judal. I fala sin: “N na gardisi ciu pa tudu irmas ku N gosta ciu del ku ta lebanba pa pregason. E ta bin pañan na kasa e kumbidan pa no bai kume alguns kusas juntu, e ta fasi tudu pa N riba kasa ku suguransa. Gosi N nota di kuma e ta fasiba manga di sforsu. Tambi e ta fasilba ku amor.” Na bardadi, i ka tudu jintis ku ta gardisinu pa ke ku no fasi pa relis. Khanh fala sin aserka di kilis ku judal: “Si N pudiba, N na paga elis pa tudu bon kusas ke fasi pa mi, ma gosi N ka sibi nunde ku elis tudu e mora. Ma Jeova pudi fasil, i N ta ora pa i paga elis pa mi.” Khanh tene rason. Jeova ta nota pa kusas di bon ku no ta fasi pa utrus, nin si pikininu dimas. I ta ojal suma un sakrifisiu ku tene balur, tambi suma un dibida ki na bin paganu. — Lei Ditus 19:17.

12. Kuma ku ermons pudi mostra se amor pa kongregason? (Jubi tambi fotos.)

¹² Si abo i un ermon, kuma ku bu pudi mostra amor pa utrus i kuma ku bu pudi sforsa pa juda elis? Un ermon joven comadu Jordan punta un ansion, ke ki pudi fasi mas pa juda na kongregason. Ansion ngabal pa progresu ki fasi ja, tambi i dal alguns konsijus di ke ki pudi fasi mas. Pur isemplu, i fala Jordan pa i ba ta ciga sedu na Salon di Renu, fala utrus manteña, kumenta na runions, prega sempri ku si grupu di pregason i pensa na kusas ki pudi fasi pa juda utrus. Kontra Jordan fasi es, i ka aprindi so kuma di fasi alguns kusas, ma i aprindi tambi inda mas kuma di mostra amor pa si ermons ku irmas. Jordan aprindi di kuma, i ka ora ku un ermon sedu servu ministerial ki ta kumsa ku juda utrus, ma i ta kontinua juda elis. — 1 Tim 3:8-10, 13.

13. Kuma ku amor leba un ermon comadu Christian pa sedu mas ansion?

¹³ Sera ki bu staba na sirbi suma servu ministerial o suma ansion? Jeova lembra di tarbaju ku bu fasiba i ku amor ku lebau na fasil. (1 Kor 15:58) I ta nota tambi di amor ku bu kontinua mostra. Un ermon comadu Christian fikaba mal oca ki ka sedu mas ansion. Ma i fala sin: “N disidi kuma N na fasi tudu ku N pudi pa sirbi Jeova ku amor, i ka mporta si N sedu ansion o nau.” Ku tempu, i bin sedu mas ansion. Christian fala sin: “N staba un bokadu ku medu pa sirbi mas suma ansion. Ma, si di vontadi di Jeova pa N sirbi mas suma ansion, N na fasil pabia di ña amor pa rel i pa ña ermons ku irmas.”  

14. Ke ku bu aprindi di ke ku un irma na Jeorẑia fala?

¹⁴ Servus di Jeova ta mostra tambi amor pa se kumpañeris. (Mat 22:37-39) Pur isemplu, un irma na Jeorẑia comadu Elena, fala sin: “Na kumsada, uniku kusa ku ta punba prega, i ña amor pa Jeova. Ma konformi ña amor pa ña Pape ku sta na seu aumenta, ña amor pa jintis aumenta tambi. N ta tenta pensa na kal purblemas ke tene, i kal asuntu ku na interesa elis. Konformi N staba na pensa nelis des manera, N mas ta misti juda elis.” — Rom 10:13-15.

BENSONS KU NO TA TENE ORA NO MOSTRA AMOR PA UTRUS

15-16. Suma ki mostradu na fotos, kal bensons ku no ta tene ora ku no mostra amor pa utrus?

¹⁵ Ora ku no mostra amor pa no ermons ku irmas, i ka elis so ku ta benefisia. Kontra duensa di COVID-19 kumsa, un ermon comadu Paolo ku si minjer nsina manga di irmas di idadi kuma ke pudi usa se aparelius eletroniku pa prega. Na kumsada, i seduba difisil pa un irma usa si apareliu eletroniku, ma dipus i bin konsigi. I konsigi usal pa kumbida alguns di si familia pa Memorial. Sesenta jintis di si familia mati pa videokonferensia! Irma ku si familia benefisia di sforsu ku Paolo ku si minjer fasi. Dipus, irma skirbi pa Paolo, i fala sin: “Obrigadu pa manera ku bu nsinanu, anos ku tene idadi. N ka na diskisi nunka di preokupason ku Jeova tene pa nos i di bo sforsu garandi pa judanu.”

¹⁶ Spiriensias suma es nsina Paolo un lison importanti. Es lembrantal di kuma, amor i mas importanti di ki kunsimentu o kapasidadi ku no tene di fasi kusas. I fala sin: “N seduba superintendenti di sirkuitu. Aos, N nota di kuma, ermons ku irmas pudi ka lembra di ña diskursus, ma e kontinua lembra di kusas ku N fasi pa juda elis.”

17. Kin mas ku na benefisia ora ku no mostra amor?

¹⁷ Anos propi no na benefisia di un manera ku no ka imaẑina, ora ku no mostra amor pa utrus. Jonathan, ku mora na Nova Zelandia konfirma es. Un sabadu di tardi, oca ku kau kinti, i oja un ermon pioneru ku na prega el son. Jonathan disidi prega ku ki pioneru kada sabadu di tardi. Na ki tempu, Jonathan ka notaba te kal puntu ki na benefisia di bondadi ki mostra. Jonathan fala sin: “Na ki tempu N ka gostaba di pregason. Ma nkuantu N staba na sukuta manera ku ki pioneru ta nsina i oja bon rusultadu ki teneba na pregason, N pasa na gosta di pregason. N pasa tene tambi bon amigu ku judan kirsi na sintidu spiritual, tene kontentamentu na pregason i pertusi mas di Jeova.”

18. Ke ku Jeova misti pa no fasi?

¹⁸ Jeova misti pa anos tudu no aumenta no amor pa rel i pa utrus. Suma ku no oja, no pudi aumenta no amor pa Jeova, ora ku no na lei si Palabra, pensa fundu nel i papia ku el sempri na orason. No pudi aumenta no amor pa no ermons ku irmas, ora ku no na fasi kusas ku na juda elis. Konformi no amor na aumenta, no na pertusi mas di Jeova i pertusi mas di no ermons ku irmas. Tambi no na tene es amisadis pa sempri!