Bu speransa pa futuru na bin kumpri

1. Pabia ku Abraon kontinua tene speransa di kuma i na tene un fiju?

JEOVA purmiti si amigu Abraon di kuma tudu nasons di mundu na bensuadu pabia di si jorson. (Kum 15:5; 22:18) Suma Abraon tene fe forti na Deus, i sta konvensidu di kuma purmesa di Deus na bin kumpri. Mesmu oca Abraon teneba 100 anu i Sara 90 anu, e ka teneba inda fiju. (Kum 21:​1-7) Ma Biblia fala sin: “Abraon, pabia di si fe, i tenba speransa kuma i na fasiduba pape di manga di nason, suma ki faladuba”. (Rom 4:18) Bu sibi di kuma Abraon bin oja ke ki staba na spera. I bin sedu pape di un fiju ki na peraba pa manga di tempu, ku sedu Isaki. Pabia ku Abraon teneba sertesa di kuma Jeova na bin kumpri si purmesa?

2. Pabia ku Abraon tene sertesa di kuma purmesa di Jeova na bin kumpri?

² Pabia di si amisadi intimu ku Jeova, Abraon “tenba sertesa kuma, kil ku Deus fala” na bin kumpri. (Rom 4:21) Abraon tene fabur di Jeova i comal di justu pabia di si fe. (Tiagu 2:23) Suma ki mostradu na Romanus 4:​18, fe di Abraon ku si speransa liga ku n̈utru. Gosi no na jubi ke ku apostolu Paulu fala aserka di speransa, suma ki sta na Romanus kapitulu 5.

3. Ke ku Paulu fala aserka di speransa?

³ Paulu splika pabia ku no “speransa ka ta tisi disanimu”. (Rom 5:5) Tambi i judanu ntindi kuma ku no speransa pudi torna mas forti. Nkuantu no na jubi ke ku Paulu fala del na Romanus 5:​1-5, pensa na ke ku pasa ku bo. Si bu fasil, talves bu na nota di kuma bu speransa torna mas forti disna ku bu kumsa kunsi bardadi. No studu na mostra tambi kuma ku bu pudi torna bu speransa mas forti di ki kil ku bu tene gosi. Purmeru no na fala di speransa bonitu ku Paulu fala di kuma, i ka ta tisi disanimu.

NO SPERANSA BONITU

4. Ke ku faladu del na Romanus 5:​1, 2?

⁴ Lei Romanus 5:​1, 2. Paulu skirbi es palabras pa kongregason di Roma. Ermons ku irmas di la aprindi aserka di Jeova ku Jesus, e mostra fe i e sedu kristons. Pa kila, Deus ‘oca elis justu pa fe,’ i unji elis ku spiritu santu. E pudiba spera risibi un pagamentu bonitu i e tene sertesa di kuma e na bin tenel.

5. Kal speransa ku unjidus tene?

⁵ Dipus Paulu skirbi pa kristons unjidu na Éfesu aserka di speransa ku Deus da elis. “Yardansa pa santus” fasi parti di speransa ke na risibi. (Ef 1:​18, Tradução do Novo Mundo) Tambi Paulu mostra nunde ku Kolosensis na risibi se pagamentu. I comal di “speransa ku sta guardadu pa bos na seu.” (Kol 1:​4, 5) Asin, speransa di kristons unjidu i pa e resusitadu pa vida ku ka ta kaba na seu, nunde ke na rena ku Kristu. — 1 Tes 4:​13-17; Apok 20:6.

6. Ke ku un ermon unjidu fala aserka di si speransa?

⁶ Kristons unjidu da balur pa es speransa. Un delis, i ermon Frederick Franz ku sirbi Deus ku fidelidadi pa manga di anus. I fala sin di tudu si korson na 1991: “Speransa ku no tene i un kusa sertu, i kada un di nos ku fasi parti di 144.000 na risibi ke ku Deus purmiti. No pagamentu na sedu mas minjor di ki kualker kusa ku no tene. . . . “[No] kontinua inda da balur pa es speransa. . . . Nkuantu no na peral, no mas ta dal balur. I un kusa ku bali pena pera, nin si i pirsis peral pa un milyon di anu. N da balur pa no speransa mas di ki antis.”

7-8. Kal speransa ku maioria di nos tene? (Romanus 8:​20, 21)

⁷ Maioria di nos ku na adora Jeova aos tene utru speransa. Es i speransa ku Abraon teneba, ku sedu vida ku ka ta kaba bas di Renu di Deus. (Eb 11:​8-10, 13) Paulu skirbi aserka des speransa bonitu. (Lei Romanus 8:​20, 21.) Oca ku bu kumsa aprindi aserka di purmesa di Biblia pa futuru, kal ku bu mas misti oja? Sera ki i di un dia sedu perfeitu, i nunka fasi pekadu? O bu kontenti dimas di sibi di kuma kilis ku bu ama ku muri, na bin lantandadu pa vivi na paraísu na Tera? Pabia di speransa ku Deus danu, i ten manga di kusas bonitu ku bu pudi spera tene.

⁸ Si no spera tene vida ku ka ta kaba na seu o na Tera, no tene speransa bonitu ku ta danu motivu di sta kontenti. No speransa bonitu pudi aumenta i te mesmu torna mas forti. Ke ku Paulu skirbi dipus, mostra kuma ku kila pudi sedu. No jubi gosi ke ki i skirbi aserka di no speransa. Ke ku Paulu skirbi na judanu tene mas konfiansa di kuma, no speransa pa futuru na bin kumpri.

KUMA KU NO SPERANSA PUDI AUMENTA

9-10. Suma ku isemplu di Paulu mostra, ke ku kristons pudi spera? (Romanus 5:3) (Jubi tambi fotos.)

⁹ Lei Romanus 5:3. Nota di kuma kansera pudi pui pa no speransa torna mas forti. Es pudi surprendinu. Na bardadi, tudu sigiduris di Kristu pudi spera di kuma e na tene kansera. Jubi isemplu di Paulu. I fala sin pa kristons di Tesalónika: “Oca no staba inda ku bos, no jumna avisa bos kuma no ten ku pirsigidu; i el propi ku kontisi”. (1 Tes 3:4) Pa Koríntius, i fala es: “Ermons, N misti pa bo sibi kansera ku bin riba di nos . . . tok no pirdi speransa di vida.” — 2 Kor 1:8; 11:​23-27.

¹⁰ Aos tambi, kristons pudi spera pasa algun tipu di kansera. (2 Tim 3:12) Abo gora? Sera ki bu pasa kansera pabia bu mostra fe na Jesus i bu ta sigil? Bu amigus ku bu familia pudi gozau. E pudi te mesmu tratau mal. Sera ki bu tene purblemas na kau di tarbaju pabia bu sta disididu pa sedu onestu na tudu kusa? (Eb 13:18) Sera ki bu pasa pirsigison di guvernu pabia bu ta papia ku utrus aserka di speransa ku bu tene? I ka mporta kal tipu di kansera ku no pudi pasa, Paulu fala di kuma no dibi di kontenti. Pabia di ke?

11. Pabia ku no pirsisa di sta disididu pa sedu firmi pa nfrenta kualker purblema?

¹¹ No pudi kontenti ora ku no na pasa kansera, pabia no sibi di kuma i ta da bon rusultadu. Suma ku Romanus 5:3 fala, “kansera ta da firmesa”. (Anos ku pui letras karegadu ku italiku.) Tudu kristons na pasa kansera. Pa kila, tudu kristons dibi di tene firmesa. No pirsisa di sta disididu pa sedu firmi, i ka mporta kal purblemas ku no pudi pasa. No na oja kil ku no na pera, so si no manti firmi i kontinua sirbi Jeova. No ka misti sedu suma kilis ku Jesus staba na pensa nel oca i na fala di simenteras ku kai na pedra. Na kumsada e seta Palabra di Deus ku kontentamentu, ma “ora ku kasabi bin, jinti lanta kontra” elis, e ta disvia. (Mat 13:​5, 6, 20, 21) I bardadi di kuma, pirsigison o purblemas ka ta kontentanu, ma si no manti firmi e ta da bon rusultadu. Na kal sintidu?

12. Kal bon rusultadu ku no ta tene ora ku no manti firmi dianti di purblemas?

¹² Disipulu Tiagu konta kal bon rusultadu ku no ta tene, ora ku no manti firmi dianti di purblemas. I skirbi asin: “Bo disa pasensa tarbaja na bos diritu, pa bo pudi kabanta sedu kompletu, pa ka bo falta na nada.” (Tiagu 1:​2-4) Tiagu fala di pasensa o firmesa suma si i tene un tarbaju pa fasi. Es i kal tarbaju ki tene? I pudi judau aumenta bu pasensa, bu fe ku bu konfiansa na Deus. Ma no pudi tene mas utru bon rusultadu ora ku no sedu firmi.

13-14. Kal rusultadu ku firmesa ta da i kuma ki sta ligadu ku speransa? (Romanus 5:4)

¹³ Lei Romanus 5:4. Paulu fala firmesa ta judanu “pasa proba” o tene aprovason. (Anos ku pui letras karegadu ku italiku.) Si bu manti firmi, bu na tene aprovason di Jeova. Es ka signifika di kuma Jeova ta kontenti ora ku bu na pasa kansera o purblemas. Ma i ta kontenti pabia bu manti firmi. No ta sinti nkoraẑadu di sibi di kuma ora ku no manti firmi no ta pui pa Jeova kontenti. — Sal 5:12.

¹⁴ Lembra kuma Abraon nguenta situasons difisil, i kila pul pa i tene fabur di Deus. Jeova comal di si amigu, tambi suma algin justu. (Kum 15:6; Rom 4:​13, 22) Mesmu kusa pudi kontisi ku nos. Jeova ka ta mostra si fabur pa nos pabia di kuantidadi di tarbaju ku no ta fasi o nunde ku no sta na sirbil. Jeova ta mostra si fabur pa nos pabia no kontinua firmi. I ka mporta kal ki no idadi, no situason o no kapasidadi, anos tudu no pudi sedu firmi. Sera ki bu sta na pasa un situason difisil i bu kontinua firmi? Si resposta i sin, lembra di kuma bu tene fabur di Deus. Sibi di kuma no tene fabur di Deus pudi danu forsa. I pudi torna no speransa mas forti.

UN SPERANSA FORTI

15. Ke mas ku Paulu fala del, i pabia ku alguns pudi fika surprendidu?

¹⁵ Suma ku Paulu splika, no pudi tene fabur di Deus ora ku no kontinua fiel i nguenta situasons difisil. Nota kuma ku Paulu kontinua si splikason: “Pasa proba ta da speransa; speransa ka ta tisi disanimu.” (Rom 5:​4, 5) Es pudi surprendi alguns jintis. Pabia di ke? Pabia purmeru, na Romanus 5:​2, Paulu fala di speransa ku kristons di Roma teneba ja, ku sedu, ‘speransa di gloria di Deus.’ Ma algin pudi punta: ‘Si kristons teneba ja speransa, pabia ku Paulu fala mas di speransa?’

16. Kuma ku speransa ta aumenta na un algin? (Jubi tambi fotos.)

¹⁶ No pudi ntindi ke ku Paulu misti fala, ora ku no lembra di kuma speransa i un kusa ku ta aumenta. Pensa nes: Sera ki bu lembra di purmeru bias ku bu obi aserka di speransa bonitu ku sta na Palabra di Deus? Na ki tempu, talves ideia di vivi pa sempri na paraísu na Tera i un kusa ku bu ka tene sertesa di kuma i na sedu. Ma, dipus di bu kumsa ku aprindi mas aserka di Jeova i di purmesas ku sta na Biblia, bu sta mas konvensidu di kuma es speransa na bin kumpri.

17. Kuma ku speransa ku bu tene kontinua aumenta dipus di bu dedikason ku batismu?

¹⁷ Mesmu dipus di bu dedikason ku batismu, bu aprindi mas aserka di Jeova i sedu maduru na sintidu spiritual. Pabia di kila, speransa ku bu tene torna mas forti. (Eb 5:13–6:1) Talves bu ciga ja di pasa ke ku faladu na Romanus 5:​2-4. Bu pasaba pa manga di kansera, ma bu manti firmi i bu sinti fabur di Deus. Suma bu sibi di kuma bu tene fabur di Deus, gosi bu tene motivu garandi di spera risibi kil ku Deus purmiti. Speransa ku bu tene gosi sedu mas forti di ki kil ku bu teneba na kumsada. Es speransa pasa sedu mas klaru i bu ta dal balur garandi. I ta afetau ciu, i ta influensia tudu arias di bu vida, i ta muda manera ku bu ta trata bu familia, kuma ku bu ta toma disisons i te mesmu kuma ku bu ta usa bu tempu.

18. Kal garantia ku Jeova danu?

¹⁸ Apostolu Paulu fala di utru pontu importanti dimas aserka di speransa ku bu tene, dipus di bu risibi fabur di Deus. I dau garantia di kuma bu speransa na bin kumpri. Pabia ku bu pudi tene sertesa des? Paulu fala des garantia ku bin di Deus pa kristons: “Speransa ka ta tisi disanimu, pabia Spiritu Santu ku no dadu i darma amor di Deus dentru di no korson.” (Rom 5:5) Bu tene tudu motivu di fia di kuma speransa ku Jeova dau na bin kumpri.

19. Kal sertesa ku bu pudi tene aserka di bu speransa?

¹⁹ Pensa na purmesa ku Jeova fasi Abraon, kuma ki mostral fabur i comal di si amigu. Abraon bin oja ke ki speraba. Biblia fala sin: “Abraon pera ku pasensa, i yangasa kil ku Deus fala i na dal.” (Eb 6:15; 11:​9, 18; Rom 4:​20-22) Abraon ka fika disanimadu. Abo tambi bu pudi tene sertesa di kuma si bu manti fiel bu na risibi ke ku bu na pera. Bu speransa i klaru, i ta dau kontentamentu, i ka na disanimau! (Rom 12:12) Paulu skirbi es: “Asin Deus, ku ta da speransa, ta inci bos di kontentamentu ku pas pabia di bo fe, pa bo pudi ten garandi speransa na puder di Spiritu Santu.” — Rom 15:13.