Batisa sin pera

1. Kal ki bon motivus di batisa?

SERA ki bu ama Jeova Deus, algin ku dau tudu bon kusas, te mesmu vida? Sera ki bu misti mostra bu amor pa rel? Minjor manera di fasil i dedika bu vida pa rel i batisa. Si bu fasi es, bu na fasi parti di familia di Jeova. Asin, bu Pape i Amigu na giau i kuida di bo, pabia bu na pertensil. (Sal 73:24; Isa 43:​1, 2) Dedikason ku batismu ta dau tambi speransa di tene vida ku ka ta kaba. — 1 Ped 3:21.

2. Ke ku no na fala del nes studu?

² Sera ki i ten algun kusa ku sta na tujiu batisa? Si i ten, abo i ka uniku. Manga di jintis antis di bo, tenba ku fasi mudansas na se komportamentu ku se manera di pensa pa pudi batisa. Gosi e sta na sirbi Jeova ku kontentamentu i ku animu. Ke ku no pudi aprindi di kilis ku batisa na purmeru sekulu? No jubi alguns kusas difisil ke pasa, i ke ku no pudi aprindi di se isemplu.

SAMARITANUS BATISA

3. Kal difikuldadis ku Samaritanus tenba ku nfreta pa pudi batisa?

³ Samaritanus seduba un grupu riliẑiosu na tempu di Jesus. Manga di Samaritanus moraba pertu di sidadi di Siken ku Samaria, ku staba na norti di Judeia. Antis di Samaritanus batisa, e pirsisaba di seta tudu Palabra di Deus i aprindi mas aserka del. Samaritanus ta fiaba di kuma so purmeru sinku livru di Biblia, ku sedu, Kumsada te Ripitison di Lei, i talves livru di Josué ku bin di Deus. Ma e staba na pera pa Mesias bin, konformi purmesa di Deus ku sta na Ripitison di Lei 18:​18, 19. (Jon 4:25) Pa pudi batisa, e tenba di seta Jesus suma Mesias ku faladu di kuma i na bin. ‘Manga di samaritanu’ fasi kila. (Jon 4:39) Tambi suma manga di kristons seduba judeus, talves alguns Samaritanus tenba di muda manera ke ta nkaraba judeus. — Luk 9:​52-54.

4. Di akordu ku Atus 8:​5, 6, 14, kuma ku alguns Samaritanus reaẑi ku pregason di Filipi?

⁴ Ke ku juda Samaritanus batisa? Oca ku Filipi ivanjelizadur pregaba elis aserka di “Kristu”, alguns Samaritanus “seta palabra di Deus.” (Lei Atus 8:​5, 6, 14.) E ka negaba sukuta Filipi, mesmu manera ki seduba judeu. Talves e lembra di versikulus ku fala di kuma Deus ka ta fasi skuju. (Lei 10:​17-19) E ‘para atenson na kil ku Filipi na fala’ aserka di Kristu, i e setaba prova di kuma Deus ku manda Filipi. E fasi kila pabia Filipi fasiba manga di milagris, suma kura duentis i serka dimonius. — At 8:7.

5. Kal lisons ku bu pudi aprindi di Samaritanus?

⁵ Es Samaritanus pudiba nega obi ke ku Filipi staba na fala, pabia i seduba judeu, o pabia e ka ciga di obi es nsinus antis. Ma e ka fasi kila. Samaritanus ka pera pa batisa oca ke sta konvensidu di kuma, Filipi staba na nsina elis bardadi. Biblia fala sin: “Oca ke seta palabra di Filipi ku konta elis Bon Noba di renu di Deus, ku nomi di Jesus Kristu, omis ku minjeris tudu batisa.” (At 8:12) Sera ki bu sta konvensidu di kuma Palabra di Deus i bardadi? Sera ki bu sta konvensidu di kuma Tustumuñas di Jeova ka ta fasi skuju, i e ta mostra amor di bardadi suma ku Jesus fala si sigiduris na fasi? (Jon 13:35) Pa kila, ka bu medi batisa. Bu pudi tene konfiansa di kuma Jeova na bensuau.

6. Kuma ku isemplu di Ruben pudi judau?

⁶ Ruben di Almaña, kirsi na un familia ku sedu Tustumuñas di Jeova. Ma ocalba joven, i teneba duvida si kontra Deus ten. Kuma ki kaba ku si duvida? I nota di kuma i ka sibiba ciu aserka di ki asuntu, pa kila, i disidi aprindi mas. I fala sin: “Na ña studu pesual, N pirsisaba di tira ña duvidas. N tenba ku studa asuntu di evuluson manga di bias.” I lei livru Existe um Criador Que Se Importa com Você? Es publikason juda Ruben ciu. I fala sin pa si kabesa: ‘Uau! Na bardadi Jeova i un algin ku izisti.’ Na visita di sedi mundial ku Ruben fasi, i kumsa ku gosta di union ku ten na no ermondadi na mundu ntidu. Oca ku Ruben riba pa Almaña, i batisa ku 17 anu. Si bu tene duvida aserka di ke ku bu aprindi, fasi piskisa na no publikasons. Bu pudi tira bu duvida si bu tene “kunsimentu” di bardadi. (Ef 4:​13, 14) Tambi ora ku bu obi spiriensias aserka di amor ku union ku ten entri povu di Jeova na utrus parti di mundu, i ojal na bu propi kongregason, bu amor pa no ermondadi na mundu ntidu na aumenta.

SAULU DI TARSU BATISA

7. Kal manera di pensa ku Saulu pirsisaba di muda?

⁷ Jubi isemplu di Saulu di Tarsu. I nsinadu diritu na Lei di judeus, i staba na torna un algin importanti dianti di utrus judeus. (Gal 1:​13, 14; Fil 3:5) Na tempu ku manga di judeus ta ojaba kristons suma apostatas, Saulu pirsigi elis ku raiba. I pensaba di kuma i sta na fasi vontadi di Deus, ma i staba eradu. (At 8:3; 9:​1, 2; 26:​9-11) Pa pudi seta Jesus i batisa suma kriston, Saulu dibi di staba pruntu pa pirsigidu.

8. (a) Ke ku juda Saulu batisa? (b) Di akordu ku Atus 22:​12-16, kuma ku Ananias juda Saulu? (Jubi tambi diseñu.)

⁸ Ke ku juda Saulu batisa? Oca ku Jesus papia desdi seu ku Saulu, un lus forti pul pa i segu. (At 9:​3-9) I junjun̈a pa tris dia, talves i pensa fundu na ke ku pasa ku el. Saulu staba konvensidu di kuma Jesus i Mesias, i si sigiduris staba na riliẑion di bardadi. Saulu dibi di ripindi ciu pa manera ki partisipa na mortu di Stevon! (At 22:20) Na fin di tris dia, un disipulu comadu Ananias pertusi di Saulu ku bondadi, i kural i si uju yabri. Dipus, i falal pa i batisa sin pera. (Lei Atus 22:​12-16.) Saulu seduba umildi, i sukuta Ananias i batisa. — At 9:​17, 18.

9. Kal lisons ku bu pudi aprindi di Saulu?

⁹ I ten lisons ku no pudi aprindi di Saulu. I pudiba disa pa orgulyu o medu di omi tujil batisa. Ma i ka disa pa kila kontisi. Saulu seduba umildi, i staba dispostu pa muda si vida, pa pudi sedu sigidur di Kristu. (At 26:​14, 19) Saulu staba dispostu pa sedu kriston, mesmu manera ki sibiba di kuma i na pirsigidu. (At 9:​15, 16; 20:​22, 23) Dipus di batismu, i kontinua konfia na ajuda di Jeova pa nguenta diferentis purblemas. (2 Kor 4:​7-10) Bu fe pudi testadu o bu pudi pasa pa alguns purblemas, ora ku bu batisa suma Tustumuña di Jeova. Ma bu pudi tene konfiansa di kuma, Deus ku Kristu na dau sempri ajuda ku bu pirsisa del, pa nguenta i kontinua sedu fiel. — Fil 4:13.

10. Kuma ku isemplu di Anna pudi judau?

¹⁰ Anna kirsi na un familia di etnia kurdu na Lesti di Europa. Dipus ku si mame batisa, Anna kumsa ku studa Biblia ku 9 anu ku pirmison di si pape. Ma oca ku si parentis ku mora ku el sibi di kuma i staba na studa Biblia ku Tustumuñas di Jeova, e kumsa ku ranjal purblema. Si familias ta pensaba di kuma i un borgoña garandi pa familia, si un delis disa riliẑion di se donas. Oca ku Anna tene 12 anu, i pidi si pape pa i disal batisa. Si pape mistiba sibi si el propi ku misti batisa, o si utru algin ku sta na forsijal pa i batisa. Anna falal: “N ama Jeova.” Si pape seta pa i batisa. Dipus di si batismu, si familia kontinua gozal i tratal mal. Un di si dona falal asin: “I minjor leba mau vida i fuma, di ki sedu Tustumuña di Jeova.” Ke ku Anna fasi? I fala sin: “Jeova judan pa N sedu forti, i ña mame ku ña pape judan ciu.” Anna skirbi lista di mumentus ku Jeova judal na si vida. Di un tempu pa utru, i ta jubi ki lista, pa ka diskisi kuma ku Jeova judal. Si bu sta ku medu di kuma bu na bin pirsigidu, lembra di kuma Jeova na bin judau tambi. — Eb 13:6.

KORNÉLIU BATISA

11. Pabia ku Kornéliu pudiba tene duvida si dibi di batisa?

¹¹ No pudi tambi aprindi lisons importanti di isemplu di Kornéliu. I seduba “kapiton”, ku sedu, un kumandanti di serka di 100 tropas romanu. (At 10:1) Pabia des, manga di jintis ku militaris kunsilba. Biblia fala tambi di kuma “i seduba omi riliẑiosu”, i “ta da ciu pa judeus pobri”. (At 10:2) Jeova manda apostolu Pedru pa i kontal bon noba. Sera ki Kornéliu adia batismu pabia di si kargu?

12. Ke ku juda Kornéliu batisa?

¹² Ke ku juda Kornéliu batisa? Biblia fala di kuma el “ku si familia tudu e ta adoraba Deus”. Tambi Kornéliu ta oraba Deus sempri. (At 10:2) Oca ku Pedru konta bon noba pa Kornéliu, el ku tudu si familia e seta Kristu i e batisa logu. (At 10:​47, 48) Sin duvida, Kornéliu staba dispostu pa fasi kualker mudansas pa pudi adora Jeova juntu ku si familia. — Jos 24:15; At 10:​24, 33.

13. Kal lisons ku bu pudi aprindi di Kornéliu?

¹³ Suma Saulu, Kornéliu pudiba disa pa si kargu tujil sedu kriston. Ma i ka fasi kila. Sera ki bu pirsisa di fasi mudansas garandi na bu vida pa pudi batisa? Si bu pirsisa di fasil, Jeova na judau. I na bensuau si bu disidi aplika prinsipius di Biblia na bu vida pa pudi sirbil.

14. Kuma ku isemplu di Tsuyoshi pudi judau?

¹⁴ Tsuyoshi di Japon tenba di fasi mudansa na si tarbaju pa pudi batisa. Diretor ta organizaba floris pa funeral Budista i fasi kusas duranti funeral ku sta ligadu ku riliẑion falsu. Ora ku diretor ka pudiba mati, Tsuyoshi ta tomaba si lugar pa fasi es kusas. Ma oca Tsuyoshi aprindi bardadi aserka di mortu, i sibiba di kuma i ka na pudi batisa si kontinua partisipa na riliẑion falsu. (2 Kor 6:​15, 16) Tsuyoshi konta diretor di kuma i ka pudi fasi mas es kusas. Kal ku sedu rusultadu? Tsuyoshi kontinua na tarbaju, sin partisipa na riliẑion falsu. I batisa serka di un anu dipus ki kumsa ku studa Biblia.a Si bu pirsisa di fasi mudansa na bu tarbaju pa kontenta Deus, tene sertesa di kuma i na dau ke ku abo ku bu familia, bo pirsisa del. — Sal 127:2; Mat 6:33.

JINTIS DI KORINTU BATISA

15. Ke ku pudiba tuji jintis di Korintu pa e batisa?

¹⁵ Jintis di antigu sidadi di Korintu gostaba ciu di diñeru i e ta lebaba mau vida. Manga delis ta fasiba kusas ku ka ta kontenta Deus. Pa kila, i seduba difisil pa jintis ku ta viviba na ki sidadi seta bon noba. Ma oca ku apostolu Paulu bai pa ki sidadi i konta bon noba aserka di Kristu, “manga di jinti di Korintu obil, e seta Siñor, e batisadu.” (At 18:​7-11) Dipus, Siñor Jesus Kristu parsi pa Paulu i falal: “Manga di jinti ne prasa i di mi.” Pa kila, Paulu kontinua prega la, pa un anu i meiu.

16. Ke ku juda jintis di Korintu batisa? (2 Koríntius 10:​4, 5)

¹⁶ Ke ku juda jintis di Korintu batisa? (Lei 2 Koríntius 10:​4, 5.) Palabra di Deus ku si spiritu santu juda elis fasi mudansas garandi na se vida. (Eb 4:12) Jintis di Korintu ku seta bon noba aserka di Kristu, konsigi para fasi kusas suma cami, furta i leba vida omoseksual. — 1 Kor 6:​9-11.b

17. Kal lisons ku bu pudi aprindi di jintis di Korintu?

¹⁷ Nota di kuma, mesmu manera ku alguns na Korintu tenba di fasi mudansas garandi, e ka pensaba di kuma i seduba difisil dimas fasi es mudansas pa e pudi sedu kristons. E fasi sforsu garandi pa yentra na kamiñu pikininu i pertadu ku ta leba pa vida. (Mat 7:​13, 14) Sera ki bu sta na sforsa ciu pa kaba ku mau komportamentu pa pudi batisa? Nunka ka bu para sforsa! Pidi Jeova si spiritu santu pa i judau luta kontra diseẑu di fasi ke ki mau.

18. Kuma ku isemplu di Monika pudi judau?

¹⁸ Monika di Jeorjia, sforsa ciu pa para usa palabras susu i divirti ku kusas ku ka bali, pa pudi batisa. I fala sin: “Oca N seduba mas joven, orason danba forsa ku N pirsisa del pa fasi mudansa. Jeova sibi di kuma N mistiba fasi ke ki sertu, tambi sempri i staba na judan i orientan.” Monika batisa ku 16 anu. Sera ki i ten kusas ku bu pirsisa di para fasi, pa pudi sirbi Jeova suma ki misti? Kontinua pidil pa i dau forsa pa bu fasi mudansas. Jeova ta da si spiritu santu ku bondadi. — Jon 3:34.

BU FE PUDI MUDANTA MONTAÑAS

19. Ke ku pudi judau kaba ku purblemas ku parsi ku montaña? (Jubi tambi foto.)

¹⁹ Bu pudi tene sertesa di kuma Jeova amau, tambi i misti pa bu fasi parti di si familia. Nada ka pudi tuji pa es sedu, i ka mporta kal situason ku pudi pui pa i difisil pa bu batisa. Jesus fala sin pa un grupu di si disipulus: “Si bo ten fe, nin si i pikininu suma garan di mostarda, bo ta fala e monti pa i sai di li pa utru ladu; i ta sai. I ka ta ten nada ku bo ka pudi fasi.” (Mat 17:20) Kilis ku obiba es palabras staba ku Jesus so pa alguns anus, pa kila, se fe pirsisaba di kirsi. Ma Jesus garanti elis di kuma, se tene fe forti, Jeova na juda elis kaba ku purblemas ku parsi ku montaña. Jeova na judau tambi fasi mesmu kusa!

20. Kuma ku isemplu di kristons di pasadu ku di no tempu ku faladu del nes studu nkoraẑau?

²⁰ Si i ten un kusa na bu vida ku sta na tujiu batisa, aẑi logu pa kaba ku el. Bu pudi tene nkoraẑamentu ku forsa, atraves di isemplu di kristons di pasadu ku di no tempu. Se isemplu pudi nkoraẑau i lebau pa bu dedika bu vida pa Jeova i batisa. Es i minjor disison ku bu pudi toma!