Kontinua sigi Jesus dipus di batismu

1-2. Kal bensons ku un algin ta tene dipus ki batisa?

NO TA kontenti ora ku no batisa i fasi parti di familia di Jeova. Kilis ku tene es privileẑiu na konkorda ku palabras di salmista Davi ku fala sin: “Sortiadu i kil ku bu kuji, bu tisi pa i sta na bu kau sagradu”. — Sal 65:4.

² Jeova ka ta tisi kualker algin na si kau sagradu. Suma ki faladu na studu ku pasa, i ta disidi pertusi di kilis ku mostra di kuma e misti tene un amisadi forti ku el. (Tiagu 4:8) Ora ku bu dedika bu vida pa Jeova i bu batisa, bu ta pertusi mas del di un manera spesial. Bu pudi tene sertesa di kuma, dipus di batismu Jeova na ‘darma riba di bo un benson garandi, tok bu ka na tene kau di pui.’ — Mal 3:10; Jer 17:​7, 8.

3. Kal responsabilidadi seriu ku kristons ku dedika i batisa tene? (Eklesiastis 5:​4, 5)

³ Batismu i kumsada di bu vida na sirvisu di Jeova. Dipus ku bu batisa, bu na misti fasi bu minjor pa kumpri purmesa ku bu fasi di sirbi Jeova i kontinua sedu fiel, mesmu ora ku bu tentadu fasi un kusa mau, o ora ku bu na pasa pa purblemas. (Lei Eklesiastis 5:​4, 5.) Suma disipulu di Jesus, fasi bu minjor pa sigi isemplu di Jesus i obdisi si mandamentus. (Mat 28:​19, 20; 1 Ped 2:21) Es studu na judau fasi kila.

KONTINUA SIGI JESUS MESMU DIANTI DI PURBLEMAS KU TENTASONS

4. Nal kal sintidu ku disipulus di Jesus ta ‘lambu se staka di turtura’? (Lukas 9:23)

⁴ Ka bu pensa di kuma dipus di batismu, bu ka na tene purblemas na vida. Jesus mostra di manera klaru di kuma, si disipulus na lambu un ‘staka di turtura.’ Na bardadi, e na fasil “kada dia”. (Lei Lukas 9:23.) Sera ki Jesus staba na fala di kuma si sigiduris na ba ta sufri sempri? Nau, i ka kila ki misti fala. En ves di kila, i staba na fala di kuma alen di bensons ke na tene, e na pasa tambi pa purblemas. Alguns des purblemas pudi sedu difisil dimas. — 2 Tim 3:12.

5. Kal bensons ku Jesus purmiti pa kilis ku fasi sakrifisius?

⁵ Talves bu familia sta kontra bo, o bu fasi sakrifisiu pa ka buska manga di diñeru pa pudi pui interesi di Renu na purmeru lugar na bu vida. (Mat 6:33) Jeova sibi tudu ke ku bu fasi pa rel. (Eb 6:10) Talves bu nota na bu vida di kuma, es palabras di Jesus i bardadi: “I ka ten ningin ku disa si kasa, o si ermons macu o femia, o si mame o si pape, o si fijus, o si bulañas, pabia di mi ku di Bon Noba, ku ka na risibi sen bias mas ciu ne tempu li, ku kasas, ermons macu ku femia, mames, ku fijus, ku bulañas, tambi ku pirsigison; na tempu ku na bin i na risibi vida ku ka ta kaba.” (Mar 10:​29, 30) Na bardadi, bensons ku bu risibi i mas garandi di ki kualker sakrifisius ku bu fasi. — Sal 37:4.

6. Pabia ku bu pirsisa di luta kontra “kusas ku no kurpu ta dija”, dipus di batismu?

⁶ Bu na pirsisa inda di luta kontra “kusas ku no kurpu ta dija” dipus di batismu. (1 Jon 2:16) Bu pirsisa di fasil, pabia bu yarda pekadu di no pape Adon. Utrora bu pudi sinti suma apostolu Paulu. I fala sin: “Dentru di mi N gosta di lei di Deus, ma N oja na ña kurpu utru koldadi lei ku na geria kontra lei ku N seta; i na leban pa katiberasku di lei di pekadu ku sta na ña kurpu.” (Rom 7:​22, 23) Talves bu pudi sinti disanimadu pabia bu dibi di luta kontra mau diseẑus. Ma, pensa na purmesa ku bu fasi pa Jeova oca ku bu dedika bu vida pa rel, na dau forsa di luta kontra tentason. Na bardadi, es purmesa na judau ora ku bu sta dianti di tentasons. Di kal manera?

7. Kuma ku dedika bu vida pa Jeova na judau kontinua sedu fiel?

⁷ Ora ku bu dedika bu vida pa Jeova, bu ta nega bu kabesa. Es signifika di kuma, bu disidi nega diseẑus pesual ku objetivus ku ka ta kontenta Jeova. (Mat 16:24) Pa kila, ora ku bu tentadu, bu ka pirsisa di gasta tempu na pensa na ke ku bu dibi di fasi. Bu disidiba ja ke ku bu na fasi, ku sedu, kontinua sedu fiel pa Jeova. Bu na kontinua sta disididu pa kontenta Jeova. Bu na fasi suma ku Jo fasi. Mesmu oca ki pasa situasons difisil, i fala sin di tudu korson: “N ka na nega ña bardadi tok N muri.” — Jo 27:5.

8. Kuma ku pensa na purmesa ku bu fasi na bu orason di dedikason, na judau pa ka kai na tentason?

⁸ Pensa na purmesa ku bu fasi na bu orason di dedikason pa Jeova, na dau forsa pa ka kai na kualker tentason. Pur isemplu, sera ki bu na mostra interesi romantiku pa omi o minjer di utru algin? I klaru di kuma bu ka na fasil! Bu purmitiba ja Jeova di kuma, bu ka na ciga di fasi un kusa des. Si bu ka disa pa mau sentimentu kirsi na bu korson, bu ka na pirsisa di luta pa kaba ku elis dipus. Bu na “disvia” di “kamiñu di jintis ku ka kunsi Deus.” — Dit 4:​14, 15.

9. Kuma ku pensa na purmesa ku bu fasi na bu orason di dedikason, na judau tambi pui atividadis spiritual na purmeru lugar na bu vida?

⁹ Ke gora si algin dau un tarbaju ku na tujiu mati sempri runions di kongregason? Bu na sibi ke ku bu dibi di fasi. Antis di bu dadu es tarbaju, bu disidiba ja di kuma bu ka na seta tarbaju ku na tujiu mati runions. Pa kila, bu ka na tentadu seta es tipu di tarbaju, na mesmu tempu, tenta buska manera di pui Jeova na purmeru lugar. Pensa na isemplu di Jesus pudi judanu. I staba disididu pa kontenta si Pape. Suma Jesus, sta disididu pa nega logu-logu i di manera firmi, kualker kusa ku bu sibi di kuma, i ka na kontenta Deus ku bu dedika bu vida pa rel. — Mat 4:10; Jon 8:29.

10. Kuma ku Jeova na judau dipus di batismu pa kontinua sigi Jesus?

¹⁰ Bardadi i di kuma, purblemas ku tentasons ku bu ta pasa, ta dau oportunidadi pa bu mostra di kuma, bu sta disididu pa kontinua sigi Jesus. Ora ku bu fasil, bu pudi tene sertesa di kuma Jeova na judau. Biblia fala sin: “Deus i fiel; i ka na disa pa bo tentadu mas di ki kil ku bo pudi ku el; na ora di tentason i ta da tambi manera di kapli, pa bo pudi nguental.” — 1 Kor 10:13.

KUMA KU BU PUDI KONTINUA SIGI JESUS

11. Kal ki un di minjor maneras di kontinua sigi Jesus? (Jubi tambi fotos.)

¹¹ Jesus ta sirbiba Jeova di tudu korson, tambi i kontinuaba pertusi di Jeova na orason. (Luk 6:12) Na bardadi, un di minjor maneras di bu kontinua sigi Jesus dipus di bu batismu, i kontinua fasi kusas ku na pertusiu mas di Jeova. Biblia fala sin: “Konformi lugar ku no yangasa na vida spiritual, no bai pa dianti.” (Fil 3:16) Di un tempu pa utru, bu na obi spriensias di ermons ku irmas ku disidi fasi mas na se sirvisu pa Jeova. Talves e mati Skola pa Ivanjilizaduris di Renu o e munda pa nunde ki ten mas nesesidadi. Si bu situason na pirmiti, es i un bon objetivu pa bo tambi. Povu di Jeova ta sta ku diseẑu garandi di buska maneras di fasi mas pa rel. (At 16:9) Ma ke gora si gosi bu ka konsigi fasil? Ka bu pensa di kuma kilis ku konsigi fasil e ma bo. Ke ku mas importanti, i pa bu kontinua nguenta. (Mat 10:22) Ka bu diskisi di kuma bu ta pui Jeova pa i kontenti dimas, ora ku bu fasi ke ku bu pudi konformi bu situason. Es i un manera importanti di bu kontinua sigi Jesus dipus di bu batismu. — Sal 26:1.

12-13. Ke ku bu pudi fasi si bu ka tene mesmu alegria ku bu kustumaba tene na sirbi Jeova? (1 Koríntius 9:​16, 17) (Jubi tambi kuadru “Kontinua na kurida.”)

¹² Ke ku bu dibi di fasi si bu nota di kuma bu ka ta ora Jeova di tudu korson, o bu ka tene alegria na pregason suma antis? Ke gora si bu ka tene animu di lei Biblia suma antis? Si bu sinti des manera dipus di batismu, ka bu pensa di kuma bu ka tene ja mas spiritu di Jeova. Bu sedu imperfeitu, i bu sentimentus pudi muda di un dia pa utru. Si bu animu na sirbi Jeova kumsa ku rapati, pensa na isemplu di apostolu Paulu. I sforsaba ciu pa kopia Jesus, ma i sibiba di kuma utrora i ka ta teneba diseẑu forti pa fasi ke ki pirsisaba di fasi. (Lei 1 Koríntius 9:​16, 17.) I fala sin: “Ma N fasil suma un dever, pabia i Deus ku dan el pa N fasi.” Na utru palabras, Paulu staba disididu pa kumpri si ministeriu i ka mporta kuma ki staba na sinti na ki mumentu.

¹³ Di mesmu manera, ka bu toma disisons basiadu so na kuma ku bu ta sinti. Sta disididu pa fasi ke ki sertu mesmu si bu ka misti fasil. Si bu kontinua fasi ke ki sertu, bu sentimentus pudi minjoria. Di kualker manera, bon kustumu di fasi studu pesual, fasi orason, mati runions i prega, na judau kontinua sigi Jesus dipus di batismu. Ora ku bu ermons ku irmas ojau na kontinua sirbi Jeova, e na sinti nkoraẑadu. — 1 Tes 5:11.

BO KONTINUA “JUBI BO KABESA BO JULGA SI BO NA VIVI NA FE”

14. Ke ku bu dibi di jubi sempri i pabia di ke? (2 Koríntius 13:5)

¹⁴ Dipus di bu batismu, i importanti jubi bu kabesa sempri. (Lei 2 Koríntius 13:5.) Di un tempu pa utru, i bon jubi si bu ta ora kada dia, lei i studa Biblia, mati runions i prega. Tenta buska maneras di torna es ativadadis mas interesanti. Pur isemplu, fasi bu kabesa es purguntas: ‘Sera ki N pudi splika nsinus simplis di Biblia pa utrus? Sera ki i ten maneras ku N pudi torna ña pregason mas animadu? Sera ki N ta sedu diretu na ña orasons? Sera ki ña orasons ta mostra di kuma, N pui tudu ña konfiansa na Jeova? Sera ki N ta mati sempri runions? Kuma ku N pudi minjoria ña konsentrason ku partisipason na runions?’

15-16. Ke ku bu aprindi di isemplu di un ermon, aserka di ka kai na un tentason?

¹⁵ Tambi i bon pa bu sibi diritu kal ki bu frakesas. Un ermon comadu Robert konta ke ku pasa ku el, ku mostra di manera klaru es asuntu. I fala sin: “Ocan ku serka di 20 anu, N teneba un tarbaju di me-piriudu. Un dia dipus di tarbaju, ña kolega femia kumbidan pa si kasa. I falan di kuma no na sta anos so i no na pasa un ‘bon mumentu juntu’. Na kumsada, N dalba so un diskulpa siñu, ma pa fin N falal nau i N splikal pabia ku N ka pudi seta.” Robert ka kai na tentason. Es i di ngaba. Ma dipus, i pensa na ke ku pasa, i nota di kuma i dibi di reaẑiba di un manera diferenti. I fala sin: “N ka negaba di manera firmi o rapidu, suma ku José nega dita ku minjer di Potifar. (Kum 39:​7-9) Na bardadi, N fikaba surprendidu di nota kuma ki seduba difisil pa N nega. Ke ku pasa judan nota di kuma, N pirsisaba di torna ña amisadi ku Jeova mas forti.”

¹⁶ I pudi sedu bon pa bu jubi bu kabesa diritu suma ku Robert fasi. Mesmu si bu ka kai na tentason, fasi bu kabesa es purgunta: ‘Kantu tempu ku N ta toma pa N fala nau?’ Si bu nota di kuma bu pirsisa di minjoria, ka bu fika disanimadu. Sta kontenti di sibi di kuma, gosi bu nota des frakesa. Ora Jeova aserka di bu frakesa i fasi kusas ku na torna bu diseẑu mas forti di fasi ke ki fala. — Sal 139:​23, 24.

17. Kuma ku nomi di Jeova afetadu ku ke ku pasa ku Robert?

¹⁷ I ten utru kusa mas ku no pudi aprindi ku ke ku pasa ku Robert. I fala sin: “Dipus ku N nega konviti di ña kolega di tarbaju, i falan sin: ‘Bu pasa na testi!’ N puntal ke ki misti fala kes. I falan di kuma un di si kolega macu, ku seduba Tustumuña di Jeova, fala di kuma tudu jovens Tustumuñas di Jeova ta fasi kusas mau sukundidu, ora ke tene oportunidadi di fasil. Pa kila i fala si amigu di kuma i na jubi si na bardadi i sedu asin. Dipus N fika kontenti manera ku N ngaba nomi di Jeova.”

18. Ke ku bu sta disididu pa fasi dipus di batismu? (Jubi tambi kuadru “Dus artigu ku bu na gosta del.”)

¹⁸ Ora ku bu dedika bu vida pa Jeova i bu batisa, bu ta mostra di kuma bu misti limpa si nomi, i ka mporta ke ku pudi kontisi. Tambi bu pudi tene sertesa di kuma, Jeova sibi kal purblemas ku bu ta pasa i kal tentasons ku bu ka kai nel. I na bensuau pa manera ku bu ta sforsa pa kontinua sedu fiel. Bu pudi tene sertesa di kuma, ku si spiritu santu, i pudi dau forsa di kontinua sedu fiel. (Luk 11:​11-13) Ku ajuda di Jeova, bu na konsigi kontinua sigi Jesus dipus ku bu batisa.