Sera ki bu sta pruntu pa dedika bu vida pa Jeova?

1-2. Ke ku un algin dibi di fasi antis di batisa?

DURANTI 5 anu ku pasa, mas di un milyon di jintis batisa suma Tustumuñas di Jeova. Suma disipulu di purmeru sekulu comadu Timótiu, manga delis nsinadu bardadi ‘disna di se mininesa’. (2 Tim 3:​14, 15) Alguns kunsi bardadi aserka di Jeova oca ke kirsi, i utrus oca ke tene idadi avansadu. Un minjer ku studa Biblia ku Tustumuñas di Jeova batisa kontra i tene 97 anu!

² Si abo i studanti di Biblia o bu papes sedu Tustumuñas di Jeova, sera ki bu sta na pensa batisa? Es i bon objetivu! Ma antis di bu batisa, bu pirsisa di dedika bu vida pa Jeova. Es studu na splika ke ku signifika dedika bu vida pa Jeova. I na judau tambi oja pabia ku bu ka dibi di medi dedika bu vida pa Jeova i batisa, ora ku bu sta pruntu pa fasil.

KE KU DEDIKASON SIGNIFIKA?

3. Da isemplu di jintis ku dedika se vida pa Jeova.

³ Na Biblia, ora ku un algin dedika si vida pa Jeova, i ta kujidu pa un objetivu spesial. Israelitas seduba un nason dedikadu pa Jeova. Ma alguns israelitas dedika pa Jeova di un manera spesial. Pur isemplu, Aron ta puiba un ŝapeu ku tene un lamina di uru ku na lampra, “suma sinal di kuma i separadu pa Deus”. Es lamina di uru ta mostraba di kuma i kujidu pa sirbi Jeova di un manera spesial, ku sedu, suma ŝef di saserdotis na Israel. (Sir 8:9) Nazireus tambi ta dedika pa Jeova di un manera spesial. Palabra “Nazireu,” ku bin di un palabra Ebraiku nazirʹ, signifika “un algin separadu,” o “un algin dedikadu.” Nazireus tenba di obdisi mandamentus spesial ku skirbidu na Lei di Moisés. — Num 6:​2-8.

4. (a) Ora ku bu dedika bu vida pa Jeova, kal kusa ku ta torna mas importanti na bu vida? (b) Ke ku signifika “nega” bu kabesa? (Jubi tambi diseñu.)

⁴ Ora ku bu dedika bu vida pa Jeova, bu ta disidi sedu disipulu di Jesus Kristu i fasi vontadi di Jeova ta pasa sedu un kusa mas importanti na bu vida. Ke ku dedikason ta iziẑi? Jesus fala sin: “Si algin misti bin ku mi, i ten ku nega si kabesa”. (Mat 16:24) Palabras Greku ku traduzidu pa “i ten ku nega si kabesa” pudi tambi traduzidu pa “i ka na vivi mas pa si kabesa.” Suma servu dedikadu di Jeova, bu na pirsisa di nega kualker kusa ku ka ta kontenta Jeova. (2 Kor 5:​14, 15) Es signifika nega “obras di karni”, suma pekadu seksual. (Gal 5:​19-21, Tradução do Novo Mundo; 1 Kor 6:18) Sera ki obdisi es mandamentus na torna bu vida difisil? I ka na sedu difisil si bu ama Jeova, i si bu sta konvensidu di kuma obdisi si leis i un kusa bon pa bo. (Sal 119:97; Isa 48:​17, 18) Un ermon comadu Nicholas fala sin: “Bu pudi oja normas di Jeova suma grelias di un prison ku ta tujiu fasi ke ku bu misti, o suma grelias ku na proteẑiu di zonas ku lions sta.”

5. (a) Kuma ku bu ta dedika bu vida pa Jeova? (b) Kal diferensa ku ten entri dedikason ku batismu? (Jubi tambi fotos.)

⁵ Kuma ku bu ta dedika bu vida pa Jeova? Bu ta purmitil na un orason di kuma bu na adoral el son, i bu na pui si vontadi na purmeru lugar na bu vida. Na bardadi, bu sta na purmiti Jeova di kuma bu na kontinua amal “ku tudu bu korson, ku tudu bu alma, ku tudu bu ntindimentu, ku tudu bu forsa.” (Mar 12:30) Bu ta fasi bu dedikason ora ku bu sta abo so, entri abo ku Jeova. Pa utru ladu, batismu i publiku; i ta mostra utrus di kuma bu dedikaba ja bu vida pa Jeova. Bu dedikason i un purmesa seriu. Bu objetivu dibi di sedu kumpri ki purmesa, i Jeova na spera pa bu fasil. — Ekl 5:​4, 5.

PABIA KU BU DIBI DI DEDIKA BU VIDA PA JEOVA?

6. Pabia ku un algin ta dedika si vida pa Jeova?

⁶ Rason prinsipal pa bu dedika bu vida pa Jeova i bu amor pa rel. Bu amor ka basia so na ke ku bu ta sinti. Bu amor pa Jeova aumenta oca ku bu tene “kunsimentu” izatu aserka del ku ke ki misti. (Kol 1:9) Bu studu di Biblia konvensiu di kuma (1) Jeova izisti, (2) Biblia i si Palabra nspiradu, i (3) i ta usa si organizason pa fasi si vontadi.

7. Ke ku no dibi di sta na fasi antis di dedika no vida pa Jeova?

⁷ Kilis ku dedika se vida pa Jeova dibi di kunsi nsinus simplis di Palabra di Deus i e ta sigi normas di Deus. E ta fasi se minjor pa konta utrus ke ke aprindi. (Mat 28:​19, 20) Se amor pa Jeova kirsi, i se diseẑu di korson i pa adoral el son. I ka kila ku bu misti fasi? Si bu tene es tipu di amor, bu ka na dedika bu vida i batisa so pa kontenta kin ku ta studa Biblia ku bo, o bu papes, nin bu ka na fasil so pabia bu amigus sta na fasil.

8. Kuma ku da balur garandi pa tudu ke ku Jeova fasi pa bo, pudi judau dedika bu vida pa rel? (Salmu 116:​12-14)

⁸ Ora ku bu pensa na tudu kusas ku Jeova fasi pa bo, bu na gardisil i bu na misti dedika bu vida pa rel. (Lei Salmu 116:​12-14.) Biblia coma Jeova di kil ku ta da “tudu bon pursenti ku tudu kusa diritu”. (Tiagu 1:17) Un des prendas mas garandi i sakrifisiu di si Fiju, ku sedu Jesus. Pensa so nes! Resgati pui pa bu tene un amisadi forti ku Jeova. Tambi es dau oportunidadi di tene vida ku ka ta kaba. (1 Jon 4:​9, 10, 19) Dedika bu vida pa Jeova i un manera di mostra di kuma bu da balur pa es amor mas garandi ku ciga ja di mostradu, juntu ku tudu utrus bensons ku Jeova dau. (Lei 16:17; 2 Kor 5:15) Es faladu del na lison 46, pontu 4 di livru Bu Pudi Tene un Vida Filis pa Sempri! ku tene video di tris minutu, Da Deus Bu Minjor Prenda.

SERA KI BU STA PRUNTU PA DEDIKASON KU BATISMU?

9. Pabia ku bu ka dibi di kompara bu kabesa ku utrus, ora ku bu misti dedika bu vida pa Jeova?

⁹ Talves bu pudi sinti di kuma bu ka sta pruntu pa dedikason ku batismu. Talves bu pirsisa inda di fasi mudansas na bu vida pa pudi sigi normas di Jeova, o talves bu pirsisa di mas tempu pa torna bu fe mas forti. (Kol 2:​6, 7) I ka tudu studantis ku ta progredi na mesmu ritmu, tambi i ka tudu jovens ku ta sta pruntu pa dedikason ku batismu na mesmu idadi. Tenta ntindi kal mudansas ku bu pirsisa di fasi, dipus fasi ke ku bu pudi fasi sin kompara ku utru algin. — Gal 6:​4, 5.

10. Ke ku bu pudi fasi si bu pensa di kuma, bu ka sta inda pruntu pa dedikason ku batismu? (Jubi tambi kuadru “Pa kilis ku kriadu na bardadi.”)

¹⁰ Mesmu si bu pensa di kuma, bu ka sta inda pruntu pa dedika bu vida pa Jeova, kontinua fasil bu objetivu. Ora Jeova pa i judau fasi kualker mudansas na bu vida. (Fil 2:13; 3:16) Bu pudi tene sertesa di kuma i na obi bu orason, tambi i na judau. — 1 Jon 5:14.

PABIA KU ALGUNS TA MEDI DEDIKA I BATISA

11. Kuma ku Jeova na judanu kontinua sedu fiel pa rel?

¹¹ Alguns ku sta ja pruntu, kontinua inda tene medu di dedika se vida i batisa. Talves e pudi tene medu di kuma dipus ke batisadu e pudi fasi un pekadu gravi i disasosiadu. Si bu tene es medu, tene sertesa di kuma Jeova na dau tudu ku bu pirsisa del ‘pa bu pudi yanda na manera dignu, pa i pudi kontenti’. (Kol 1:10) I na dau tambi forsa fasi ke ki i sertu. I juda ja manga di jintis fasi ke ki i sertu. (1 Kor 10:13) Es i un di motivus ku pui puku jintis ku ta disasosiadu di kongregason kriston. Jeova ta juda si povu pa e kontinua sedu fiel.

12. Kuma ku bu pudi ivita kai na pekadu gravi?

¹² Tudu jintis imperfeitu ta tentadu fasi kusas ku ka bon. (Tiagu 1:14) Ma, bu ten ku disidi ke ku bu na fasi ora ku bu tentadu. Na bardadi, tudu dipindi di kuma ku bu na leba bu vida. I ten jintis ku ta fala di kuma no ka pudi kontrola no sentimentus, ku ke ku no ta fasi. Ma, kila i ka bardadi. Bu pudi aprindi kontrola bu mau diseẑus. Pa kila, mesmu ora ku bu tentadu, bu pudi disidi ka fasi mau kusa. I ten tambi utru kusa ku pudi judau pa ka kai na pekadu. Pur isemplu, ora Jeova kada dia. Kontinua fasi studu pesual di Palabra di Deus. Mati runions di kongregason. Papia ku utrus aserka di ke ku bu fia nel. Fasi es kusas sempri, na judau kontinua sedu fiel pa Jeova. Tambi ka bu diskisi nunka di kuma Jeova na judau fasil. — Gal 5:16.

13. Kal bon isemplu ku José disanu?

¹³ I na sedu mas fasil kontinua sedu fiel pa Jeova, si bu disidi antis ke ku bu na fasi ora ku bu tentadu. Biblia falanu di manga di jintis ku fasil, mesmu pa manera ke sedu imperfeitu tambi. Pur isemplu, manga di bias minjer di Potifar tenta José. Ma José sibiba ja ke ki i dibi di fasi. Biblia falanu di kuma “i nega”. I fala sin: “Kuma ku N na fasi e mal garandi, N peka kontra Deus?” (Kum 39:​8-10) Na bardadi, José sibiba ja ke ki i na fasi antis di minjer di Potifar tental. Es pui pa i sedu mas fasil pa i fasi ke ki sertu oca ki tentadu.

14. Kuma ku no pudi aprindi nega kai na tentason?

¹⁴ Kuma ku bu pudi kopia José i fasi ke ki sertu ora ku bu tentadu? Bu pudi disidi desdi gosi ke ku bu na fasi ora ku bu tentadu. Aprindi nega logu-logu kusas ku Jeova nuju, te mesmu nega pensa nelis. (Sal 97:10; 119:165) Asin bu ka na kai na pekadu ora ku bu tentadu. Bu na sibiba ja kuma ku bu na reaẑi. Bu na staba ja pruntu di fasi ke ki sertu.

15. Kuma ku un algin ta mostra di kuma, i sta na ‘buska’ Jeova di tudu korson? (Ebreus 11:6)

¹⁵ Talves bu sibi di kuma bu oja bardadi, i bu misti sirbi Jeova di tudu bu korson, ma, bu sta inda na sinti di kuma bu ka sta pruntu pa dedikason ku batismu. Bu pudi fasi suma rei Davi. Bu pudi pidi Jeova: “O Deus, jubin, pa bu pudi kunsi ña korson; spurmentan, pa bu kunsi ña pensamentus. Jubi si N na yanda na un kamiñu mau; gian na kamiñu antigu.” (Sal 139:​23, 24) Jeova ta bensua kilis ku ta “buskal” di tudu korson. Sforsu ku bu sta na fasi pa yangasa objetivu di dedikason ku batismu, ta mostra Jeova di kuma bu sta na buskal di tudu korson. — Lei Ebreus 11:6.

KONTINUA PERTUSI DI JEOVA

16-17. Kuma ku Jeova ta tisi kilis ku kriadu na bardadi? (Jon 6:44)

¹⁶ Jesus fala di kuma i Jeova ku ta tisi si disipulus. (Lei Jon 6:44.) Pensa na balur ku es palabras tene i ke ki signifika pa bo. Kada kin ku Jeova tisi pa bardadi i oja un kusa bon nel. I ta oja ki algin suma un algin “spesial”. (Lei 7:6) I des manera ki i ta ojau tambi.

¹⁷ Ma, talves bu sedu joven ku kriadu na bardadi. I pudi sedu ki bu sta na pensa di kuma, bu sta na sirbi Jeova so pabia bu papes sta na fasil, i ka pabia di kuma Jeova ku tisiu pa bardadi. Ma, Biblia falanu asin: “Bo ciga pertu di Deus; i ta ciga pa bos.” (Tiagu 4:8; 1 Kron 28:9) Ora ku bu kumsa pertusi di Jeova, Jeova ta pertusi di bo. Jeova ka ta ojau so suma kil ku fasi parti di un grupu. I ta tisi kada kin pa bardadi, nkluindu kil ku kriadu na bardadi. Ora ku kil algin kumsa ku pertusi di Jeova, Jeova ta fasi ke ku faladu na Tiagu 4:8. — Komparal ku 2 Tesalonisensis 2:13.

18. Ke ku no na bin fala del na studu ku na bin? (Salmu 40:8)

¹⁸ Ora ku bu dedika bu vida pa Jeova i bu batisa, bu ta mostra mesmu manera di sedu ku Jesus. Di livri vontadi, i aprisenta si kabesa pa si Pape pa fasi kualker kusa ki pididu. (Lei Salmu 40:8; Eb 10:7) Na studu ku na bin, no na fala di ke ku na judau kontinua sirbi Jeova di manera fiel dipus di bu batismu.