Kopia animu di Jesus na pregason

1. Kal ki un di manera di sedu ku ta diferensia povu di Jeova ku kilis ku ta fala kuma e sedu kristons?

UN KUSA ku ta diferensia povu di Jeova ku kilis ku ta fala kuma, e sedu kristons i di kuma e ta prega ku animu. (Titu 2:14) Ma utrora, i pudi sedu difisil tene animu na pregason. Talves bu ta sinti suma un ansion ku ta tarbaja risu ku fala sin: “I ta ten dias ku N ka ta tene vontadi di prega.”

2. Ke talves ku pudi pui pa i difisil kontinua prega ku animu?

² Talves no gosta di fasi utrus kusas na sirvisu di Jeova mas di ki bai pregason. Pabia? Pabia ora ku no na kumpu Salons di Renu i kuida delis, juda no ermons ku sta na sufri pabia di disastri, o nkoraẑa elis, no ta oja logu bon rusultadu, i kila ta fasinu sinti ben. Ora ku no na tarbaja ku no ermons, no ta tarbaja na pas i no ta mostra amor pa n̈utru. Tambi no sibi di kuma no ermons na gardisi pa ke ku no ta fasi pa relis. Pa utru ladu, no pudi sta na prega na mesmu tiritoriu nunde ku puku jintis ta reaẑi ben. O talves no pudi kontra ku jintis ku nega obi no mensaẑen. Tambi no sibi di kuma nkuantu fin sta na pertusi, no pudi spera kuma i na ten inda mas jintis ku na sta kontra no mensaẑen. (Mat 10:22) Ke ku pudi judanu kontinua tene, o te mesmu aumenta no animu na pregason?

3. Kuma ku Lukas 13:​6-9 kompara animu di Jesus?

³ No pudi tene animu na pregason ora ku no studa isemplu di Jesus. Oca ki staba na Tera, Jesus ka para nunka tarbaja duru na pregason. Nkuantu tempu na bai, Jesus tarbaja inda mas duru. (Lei Lukas 13:​6-9.) Na komparason ku Jesus fasi, i kompara si tarbaju ku di tarbajadur di un orta di uva ku tarbaja tris anu, pa kuida di un pe di figu ku ka padi. Di mesmu manera, Jesus pasa tris anu na prega judeus, ma maioria delis ka sedu si disipulus. Ma, suma ku ki tarbajadur di orta di uva ka pirdi speransa di kuma pe di figu na padi, di mesmu manera Jesus ka para prega jintis. Ma pa kontrariu, Jesus aumenta si sforsu pa pudi toka se korson.

4. Kal kuatru kusas ku no na aprindi di isemplu di Jesus?

⁴ Nes studu, no na fala di kuma ku Jesus mostra animu na pregason, prinsipalmenti na si ultimu seis mis na Tera. (Jubi “Depois disso” na nota di studu di Lukas 10:1.) No pudi kontinua prega ku animu, si no obdisi ke ki fala i kopial. Gosi no na oja kuatru kusas ku no pudi aprindi di isemplu di Jesus: (1) I konsentra na fasi vontadi di Jeova, (2) i ntindi, tambi i aẑi di akordu ku profesias di Biblia, (3) i konfia na ajuda di Jeova, i (4) i kontinua konfia di kuma utrus na obil.

I KONSENTRA NA FASI VONTADI DI JEOVA

5. Kuma ku Jesus mostra di kuma, i konsentra na fasi vontadi di Jeova?

⁵ Jesus prega “Bon Noba di renu di Deus” ku animu, pabia i sibi di kuma i tarbaju ku Deus mistiba pa i fasi. (Luk 4:43) Pa Jesus, prega bon noba seduba tarbaju mas importanti na si vida. Mesmu pertu di fin di si vida, Jesus ta baiba “na prasas ku tabankas” pa nsina utrus. (Luk 13:22) Tambi i forma utrus disipulus pa e pudi prega suma el. — Luk 10:1.

6. Kuma ku pregason sta ligadu ku utrus tarbaju ku talves no ta fasi? (Jubi tambi fotos.)

⁶ Aos tambi, pregason di bon noba i tarbaju mas importanti ku Jeova ku Jesus misti pa no fasi. (Mat 24:14; 28:​19, 20) Kualker tarbaju ku no ta fasi pa Jeova sta ligadu ku pregason. Pur isemplu, no ta kumpu Salons di Renu pa jintis ku no ta prega pudi bin adora Jeova. Tambi tarbaju ku no ta fasi na Betel ku utrus kaus, ta juda na pregason. Ora ki ten un disastri natural, no ka ta da so no ermons ku irmas ke ke pirsisa del, ma tambi no ta juda elis pa e kontinua fasi runions i kontinua prega. Si no lembra di kuma, pregason i tarbaju mas importanti ku Jeova misti pa no fasi, no na tene diseẑu forti di prega sempri. János, un ansion na Ungria, fala sin: “N ta lembranta ña kabesa di kuma, i ka ten utru tarbaju ku N ta fasi pa Jeova ku pudi toma lugar di pregason. Pregason i tarbaju mas importanti.”

7. Pabia ku Jeova misti pa no kontinua prega? (1 Timótiu 2:​3, 4)

⁷ No pudi aumenta no animu na pregason, ora ku no na oja jintis suma ku Jeova ta oja elis. I misti pa maioria di jintis obi bon noba i pa e setal. (Lei 1 Timótiu 2:​3, 4.) Pa kila, i ta judanu minjoria no manera di prega es mensaẑen ku ta salva vida di jintis. Pur isemplu, broŝura Amor Na Judau Fasi Disipulus tene bon ideias ku pudi judanu kumsa kombersas ku objetivu di fasi disipulus. Mesmu si jintis ka kumsa sirbi Jeova gosi, e pudi bin tene oportunidadi di fasil antis di fin di garandi tribulason. Na futuru, e pudi lembra di ke ku no fala elis i talves e na misti bin sirbi Jeova. Ma es pudi sedu, so si no kontinua prega.

I NTINDI, TAMBI I AẐI DI AKORDU KU PROFESIAS DI BIBLIA

8. Kuma ku kunsi profesias di Biblia juda Jesus usa si tempu ku jiresa?

⁸ Jesus ntindi kuma ku profesias di Biblia na bin kumpri. I sibi di kuma si pregason na leba so tris anu i meiu. (Dan 9:​26, 27) Tambi i sibi ke ku profesias fala aserka di nunde ki na muri i kuma ki na muri. (Luk 18:​31-34) Suma Jesus sibi ke ku faladu, i usa si tempu ku jiresa. Pa kila, i prega ku animu pa pudi kaba tarbaju ki dadu pa fasi.

9. Kuma ku ntindi profesias di Biblia ta judanu kontinua prega ku animu?

⁹ Ntindi profesias di Biblia pudi judanu kontinua prega ku animu. No sibi di kuma i sobra puku tempu pa es mundu mau kabadu ku el. Biblia falaba ja di kuma ku jintis na sedu, i ke ku na kontisi na tempu di fin, i no sta na oja es profesias na kumpri. No sta na nota kuma ku rivalidadi entri Putensia Mundial di Inglatera ku Stadus Unidu kontra Rusia ku utrus guvernus ku ta apoial, sta na kumpri profesia aserka di rei di sul ku rei di norti “na tempu di kabantada”. (Dan 11:40) Tambi no ntindi di kuma, es Putensia Mundial di Inglatera ku Stadus Unidu ta representa pes di statua ku faladu del na Daniel 2:​43-45. No sta konvensidu di kuma, suma ki faladu nes profesia, nin i ka na tarda Renu di Deus na bin kaba ku tudu guvernus di pekadur. Tudu es profesias ta mostra di kuma no sta na vivi pertu di fin, pa kila, no dibi di usa no tempu ku jiresa pa prega bon noba.

10. Di kal utru manera ku profesias di Biblia pudi aumenta no animu na pregason?

¹⁰ Tambi profesias di Biblia tene mensaẑen ku ta danu vontadi di prega. Carrie, un irma ku mora na Republika Dominikanu fala sin: “Ora ku N pensa na kusas bonitu ku Jeova purmiti fasi na futuru, kila ta leban konta utrus el.” I kontinua fala: “Ora ku N oja purblemas ku jintis tene, N ta nota di kuma, e pirsisa di sibi di kuma Jeova purmiti kusas bonitu pa relis tambi.” Profesias di Biblia ta judanu kontinua prega pabia no sibi di kuma, Jeova sta na judanu. Un irma comadu Leila, ku sta na vivi na Ungria, fala sin: “Isaias 11:​6-9 ta nkoraẑan konta bon noba mesmu pa kilis ku parsi di kuma e ka na setal. N sibi di kuma kualker algin pudi muda ku ajuda di Jeova.” Tambi Christopher un ermon na Zambia fala sin: “Suma ki faladu na Markus 13:​10, bon noba sta na kontadu na mundu ntidu, i N ta sinti kontenti dimas di juda na kumpri es.” Kal profesias di Biblia ku ta nkoraẑau kontinua prega?

I KONFIA NA AJUDA DI JEOVA

11. Pabia ku Jesus pirsisa di konfia na ajuda di Jeova pa kontinua prega ku animu? (Lukas 12:​49, 53)

¹¹ Jesus konfia di kuma Jeova na judal pa kontinua prega ku animu. Mesmu manera ku Jesus ta pregaba ku kuidadu, i sibi di kuma bon noba di Renu na pui pa alguns fika ku raiba, i manga di jintis na sta kontra ki mensaẑen. (Lei Lukas 12:​49, 53.) Pabia di pregason di Jesus, manga di bias ŝefis riliẑiosu tenta matal. (Jon 8:59; 10:​31, 39) Ma Jesus kontinua prega pabia i sibi di kuma Jeova staba ku el. I fala sin: “Kil ku mandan sta ku mi. I ka disan ami son, pabia N ta fasi sempri kusas ki gosta.” — Jon 8:29.

12. Kuma ku Jesus purpara si disipulus pa e kontinua prega mesmu si utrus sta kontra elis?

¹² Jesus lembranta si disipulus di kuma, e pudi konfia di kuma Jeova na juda elis. Manga di bias, i garanti elis di kuma Jeova na juda elis, mesmu ora ke pirsigidu. (Mat 10:​18-20; Luk 12:​11, 12) Suma Jesus sibi di kuma manga di jintis na sta kontra bon noba, i fala si disipulus pa e toma kuidadu. (Mat 10:16; Luk 10:3) I fala elis pa e ka forsija jintis ku ka misti obi se mensaẑen. (Luk 10:​10, 11) Tambi i fala elis pa e kuri, si e pirsigidu. (Mat 10:23) Mesmu manera ku Jesus teneba animu na pregason, i konfia na Jeova, i ta ivitaba situasons pirigosu ora ki pudi. — Jon 11:​53, 54.

13. Pabia ku bu pudi tene sertesa di kuma Jeova na judau?

¹³ No pirsisa di ajuda di Jeova pa pudi kontinua prega ku animu, ora ku jintis sta kontra nos. (Apok 12:17) Pabia ku bu pudi tene sertesa di kuma Jeova na judau? No jubi orason di Jesus ku sta na Jon kapitulu 17. Jesus pidi pa Jeova jubi si apostolus, i Jeova ruspundi es orason. Livru di Atus mostra kuma Jeova juda apostolus prega ku animu, mesmu ku pirsigison. Na si orason, Jesus pidi tambi Jeova pa i juda kilis ku na tene fe na pregason di apostolus. Bu fasi parti di ki jintis. Jeova kontinua ruspundi orason di Jesus. Jeova na judau suma ki juda apostolus. — Jon 17:​11, 15, 20.

14. Kuma ku no sibi di kuma no na konsigi kontinua prega ku animu? (Jubi tambi foto.)

¹⁴ Mesmu si sta na sedu kada bias mas difisil prega bon noba ku animu nkuantu fin sta na pertusi, no na risibi tudu ajuda ku no pirsisa del. (Luk 21:​12-15) Suma Jesus ku si disipulus, no ta disa pa jintis disidi se na sukuta o nau, tambi no ta ivita diskuti ku elis. Mesmu na teras nunde ku no ermons ka tene liberdadi di prega, e ta konsigi kontinua prega bon noba pabia e konfia na Jeova, i ka na se propi forsa. Suma ku Jeova da forsa pa kristons di purmeru sekulu, tambi i ta danu forsa pa no pudi “konta si palabra” di manera kompletu suma ki misti. (2 Tim 4:17) Bu pudi tene sertesa di kuma si bu konfia na Jeova, bu na konsigi kontinua prega ku animu.

I KONTINUA KONFIA DI KUMA UTRUS NA OBIL

15. Ke ku ta mostra di kuma Jesus teneba konfiansa di kuma si pregason na tene bon resultadu?

¹⁵ Jesus teneba konfia di kuma jintis na obi bon noba. Es judal pa i manti si animu na pregason. Pur isemplu, serka di un anu dipus ku Jesus kumsa prega, i notaba di kuma manga di jintis mistiba obi bon noba, i kompara elis ku un lugar ku sta prontu pa kebur. (Jon 4:35) Serka di un anu dipus, i fala si disipulus: “Kebur i garandi”. (Mat 9:​37, 38) Mas tardi i fala mas: “Kebur i garandi . . . Bo pidi Siñor, ki Dunu di kebur, pa i manda tarbajaduris pa si kebur.” (Luk 10:2) Jesus kontinua konfia di kuma i na ten jintis ku na sukuta bon noba, tambi i kontenti oca e fasil. — Luk 10:21.

16. Kuma ku komparasons di Jesus mostra di kuma pregason na tene bon rusultadu? (Lukas 13:​18-21) (Jubi tambi foto.)

¹⁶ Jesus nsina si disipulus pa e kontinua prega ku animu, oca ki lembranta elis di kuma, mensaẑen ke na prega na tene bon rusultadu. Pur isemplu, jubi dus komparason ki fasi. (Lei Lukas 13:​18-21.) Jesus usa komparason di garan di mostarda pa mostra di kuma, manga di jintis na seta bon noba, i nada ka pudi tuji pa kila kontisi. Tambi i usa komparason di fermentu pa mostra di kuma, mensaẑen di Renu na pregadu na manga di kaus, i na pui pa jintis fasi mudansas ku ka ta notadu logu pa utrus. Asin, Jesus juda si disipulus nota di kuma, mensaẑen ke na prega na tene bon rusultadu.

17. Kal motivus ku no tene di konfia di kuma no pregason na tene bon rusultadu?

¹⁷ No ta sinti nkoraẑadu pa kontinua prega ku animu, ora ku no pensa na kuma ku pregason sta na juda manga di jintis na mundu ntidu. Kada anu, milyons di jintis interesadu ta mati Memorial i e ta studa Biblia ku nos. Manga di jintis ta batisa i e ta junta ku nos na tarbaju di pregason. No ka sibi kantu jintis ku na kumsa sirbi Jeova, ma no sibi di kuma Jeova sta na junta garandi multidon, ku na bin salva na garandi tribulason. (Apok 7:​9, 14) Dunu di kebur tene konfiansa di kuma, manga di jintis na bin seta bon noba, pa kila no tene bon motivu di kontinua prega.

18. Ke ku no misti pa utrus nota na nos?

¹⁸ Disipulus di Jesus sempri kunsidu suma jintis ku ta prega ku animu. Oca ku jintis nota di kuma apostolus ta prega ku koraẑen, “e rapara kuma e ta staba juntu ku Jesus.” (At 4:13) No misti tambi prega bon noba ku koraẑen i ku animu, asin jintis na nota di kuma anos tambi no ta kopia isemplu di Jesus.