‘Bo kuji kin ku bo dibi di sirbi’

1. Ke ku no dibi di fasi pa tene filisidadi di bardadi, i pabia di ke? (Isaias 48:​17, 18)

NO PAPE ku sta na seu amanu ciu, i misti pa no sedu filis gosi i na futuru tambi. (Ekl 3:​12, 13) I kumpunu ku kapasidadi di fasi kusas dimiradu. Ma, i ka danu kapasidadi di no manda riba di no kabesa, o disidi pa no kabesa ke ki sertu ku ke ki eradu. (Ekl 8:9; Jer 10:23) Jeova sibi di kuma, pa tene filisidadi di bardadi, no dibi di sirbil i obdisil. — Lei Isaias 48:​17, 18.

2. Ke ku Satanas misti pa no fia nel, ma ke ku Jeova fasi?

² Satanas misti pa no fia di kuma, no na sedu filis mesmu si no ka ta sirbi Jeova, i kuma pekaduris pudi sai ben si e manda na se kabesa. (Kum 3:​4, 5) Pa mostra di kuma Satanas i munturus, Jeova disa pa pekaduris manda riba di se kabesa pa un tempu. I ka difisil nota di kuma, guvernus di pekadur tisi mau rusultadu. Pa utru ladu, Biblia fala di manga di omis ku minjeris ku sedu filis pabia e sirbi Jeova. Jesus Kristu i isemplu mas garandi di algin ku sedu filis na sirbi Jeova. Purmeru, no na jubi motivus ku pui Jesus disidi sirbi Jeova. Dipus, no na jubi pabia ku no Pape ku sta na seu mersi no adorason. Pa fin, no na jubi alguns motivus ku pui no disidi sirbi Jeova.

PABIA KU JESUS DISIDI SIRBI JEOVA

3. Ke ku Satanas misti da Jesus, i ke ku Jesus disidi fasi?

³ Oca Jesus staba na Tera, i tenba di disidi kin ki i na sirbi. Puku tempu dipus ku Jesus batisadu, Satanas falal di kuma i na dal tudu renus di mundu, si i adoral so un bias. Jesus falal: “Sai li, Satanas, pabia i sta skritu: ‘Bu na adora Siñor bu Deus; i el son ku bu na sirbi.’” (Mat 4:​8-10) Pabia ku Jesus disidi fasi es? No jubi alguns motivus ku pui i fasi es.

4-5. Kal ki alguns motivus ku pui Jesus disidi sirbi Jeova?

⁴ Motivu mas garandi ku pui Jesus disidi sirbi Jeova, i pabia i tene amor garandi pa si Pape. (Jon 14:31) Tambi Jesus ta sirbi Jeova pabia, i minjor kusa ku dibi di fasidu. (Jon 8:​28, 29; Apok 4:11) I sibi di kuma Jeova i Fonti di vida, i algin di konfiansa, i ta danu manga di bon kusas. (Sal 33:4; 36:9; Tiagu 1:17) Jeova sempri ta konta bardadi pa Jesus, i dal tudu ke ki tene. (Jon 1:14) Ma, i Satanas ku pui no ta muri. I munturus, i ta misti sempri mas, tambi i ta pensa so na si kabesa. (Jon 8:44) Suma Jesus sibi es tudu, nunka i ka misti kopia Satanas i rebela kontra Jeova. — Fil 2:​5-8.

⁵ Utru motivu ku pui Jesus disidi sirbi Jeova, i pabia di manga di bon kusas ku si sirvisu fiel na tisi. (Eb 12:2) I sibiba di kuma si kontinua fiel, i na santifika nomi di si Pape, i kaba ku pekadu ku mortu ku Diabu tisi.

PABIA KU JEOVA MERSI NO ADORASON

6-7. (a) Pabia ku manga di jintis aos ka ta sirbi Jeova? (b) Pabia ku Jeova mersi no adorason?

⁶ Manga di jintis aos ka ta sirbi Jeova pabia e ka kunsi si bon maneras di sedu, tambi e ka sibi di tudu bon kusas ki fasi pa relis. E sedu suma jintis di Atenas ku Paulu pregaba. E ka kunsiba tambi Deus. — At 17:​19, 20, 30, 34.

⁷ Paulu splika elis di kuma Deus di bardadi “ta da tudu jinti vida ku folgu ku tudu kusa.” I fala mas: “Nel ku no na vivi, no na bulbuli; nel tambi ku no sedu.” Deus ku “kumpu un omi ku tudu rasas bin sai nel,” pa kila i tene diritu di risibi no adorason. — At 17:​25, 26, 28.

8. Ke ku Jeova nunka ka na fasi? Bu pudi splika.

⁸ Suma Jeova ku kumpu seu ku Tera, tambi i sta riba di tudu, i pudiba obriganu pa sirbil. Ma, Jeova nunka ka na fasi kila. En ves di kila, i danu manga di provas ku ta mostra di kuma el i izisti, tambi i ama ciu kada un di nos. I misti pa manga di jintis sedu si amigus pa sempri. (1 Tim 2:​3, 4) E ku manda Jeova ta formanu pa nsina utrus aserka di bon kusas ki na bin fasi pa pekaduris, i kuma ki na bin fasil. (Mat 10:​11-13; 28:​19, 20) Tambi i danu kongregasons nunde ku no pudi adoral, i risibi ajuda di ansions ku ta mostra amor. — At 20:28.

9. Kuma ku Jeova ta mostra si amor pa tudu jintis?

⁹ Jeova ta mostra si amor, pa manera ki ta trata kilis ku ka misti fia di kuma i izisti. Jubi es provas: Pa manga di anus, manga di jintis disidi sigi se propi normas di ke ki bon o ke ki mau. Mesmu asin, ku bondadi, Jeova ta da elis ke ke pirsisa del pa kontinua vivi i sedu filis. (Mat 5:​44, 45; At 14:16, 17) Jeova pirmiti elis pa e tene amigus ku familia ku ama elis, pa e pudi tene fijus, tarbaja i tene kontentamentu na vida. (Sal 127:3; Ekl 2:24) Es tudu ta mostra di manera klaru di kuma, Jeova ama tudu jintis. (Sai 34:6) Gosi, no na jubi alguns motivus ku pui no disidi sirbi Jeova, i kuma ki ta bensua kilis ku disidi sirbil.

PABIA KU NO DISIDI SIRBI JEOVA

10. (a) Kal ki motivu mas garandi ku pui no ta sirbi Jeova? (Mateus 22:37) (b) Kuma ku bu benefisia di purdon di Jeova? (Salmu 103:​13, 14)

¹⁰ Suma Jesus, motivu mas garandi ku pui no ta sirbi Jeova, i pabia di amor garandi ku no tene pa rel. (Lei Mateus 22:37.) No ta pertusi di Jeova ora ku no aprindi aserka di si maneras di sedu. Pur isemplu, no jubi kuma ku Jeova ta purdanu. Oca israelitas disobdisil, i pidi elis: “Bo konverti, kada un di bos, di bo mau manera di yanda”. (Jer 18:11) Jeova ta lembra di kuma no sedu imperfeitu, anos i reia. (Lei Salmu 103:​13, 14.) Ora ku bu pensa fundu na purdon di Jeova ku si utrus maneras di sedu, sera ki bu ka na misti sirbil pa sempri?

11. Kal ki utru motivus ku pui no disidi sirbi no Pape ku sta na seu?

¹¹ Anos tambi no ta motivadu sirbi Jeova, pabia i minjor kusa ku dibi di fasidu. (Mat 4:10) Tambi no sibi di kuma, no sirvisu fiel pa Jeova ta tisi manga di bon kusas. Ora ku no sirbi Jeova di manera fiel, no ta santifika si nomi, no ta mostra di kuma Diabu i munturus, i no ta kontenta korson di no Pape. Si no disidi sirbi Jeova aos, no ta tene speransa di sirbil pa sempri! — Jon 17:3.

12-13. Ke ku no aprindi ku spiriensia di Jane ku Pam?

¹² Mesmu si no sedu inda joven, no pudi aprindi ama Jeova ciu, i no amor pa rel na torna mas forti nkuantu no na kirsi. I es propi ku kontisi ku Jane ku Pam, ku sedu irmas.a Jane tene 11 anu i Pam tene 10 anu oca ke kumsa ku studa Biblia. Mesmu manera ku se papes ka misti studa Biblia, e disaba pa Jane ku Pam studa Biblia ku Tustumuñas di Jeova, si kontra e na ba ta bai tambi se igreẑa ku familia na fin di semana. Jane fala sin: “Ke ku Tustumuñas di Jeova nsinan na Biblia, judan pa N nguenta tentason di kolegas di usa drogas i fasi pekadu seksual.”

¹³ Dipus di alguns anus, elis tudu dus e batisa. Mas tardi, e kumsa sirvisu di pioneru nkuantu e na kuidaba di se papes ku tene idadi. Jane fala di kuma ki sinti aserka di tudu ke ku Jeova fasi pa relis: “N aprindi di kuma Jeova ta kuida diritu di si amigus fiel, i suma ki sta na 2 Timótiu 2:​19, ‘Jeova kunsi kil ki di sil.’” No ka tene duvida di kuma, Jeova ta kuida di kilis ku disidi sirbil pabia di amor!

14. Kuma ku no palabras ku no asons pudi juda na limpa nomi di Jeova? (Jubi tambi fotos.)

¹⁴ No misti juda na limpa nomi di Jeova di tudu mintida. Pur isemplu, pensa na un amigu intimu ku sedu bon, ku gosta di pati, i ku ta purda. Un dia, bu obi un algin na fala di kuma bu amigu i mau i ka sedu onestu. Kuma ku bu na reaẑiba? Bu na difindil. Di mesmu manera, ora ku Satanas ku utrus na konta mintida pa dana nomi di Jeova, no ta konta bardadi aserka di Jeova i difindil ku koraẑen. (Sal 34:1; Isa 43:10) No ta mostra di kuma, no misti limpa nomi di Jeova atraves di no palabras ku asons.

15. Kuma ku apostolu Paulu benefisia di muda si objetivu? (Filipensis 3:​7, 8)

¹⁵ No sta dispostu pa fasi mudansas na no vida, pa pudi kontenta Jeova o pa fasi mas na si sirvisu. Pur isemplu, apostolu Paulu teneba un pusison importanti na riliẑion di judeus, ma i disa ki riliẑion pa pudi sedu disipulu di Kristu i sirbi Jeova. (Gal 1:14) Pabia di kila, i tene spiriensias bonitu na sirbi Jeova, tambi i na bin manda ku Kristu na seu. Nunka i ripindi di disison ki toma di sirbi Jeova, i nin anos tambi no ka na ripindi. — Lei Filipensis 3:​7, 8.

16. Ke ku no aprindi di spiriensia di Julia? (Jubi tambi fotos.)

¹⁶ Si no pui sirvisu di Jeova suma kusa mas importanti na no vida, i na bensuanu gosi i tambi na futuru. Jubi spiriensia di un irma comadu Julia. Oca Julia seduba mas joven, i ta kantaba na koral di igreẑa. I ta kantaba ben, pa kila i risibi formason pa sedu artista. I ka tarda, Julia kumsa ku tene fama, i kanta na kaus di fama. Oca ki ta baiba inda skola di musika ku tene fama, un di si kolega di turma kumsa ku papia kel aserka di Deus, i splikal di kuma Deus tene nomi, ku sedu Jeova. Puku tempu dipus, Julia kumsa ku studa Biblia dus bias na semana. Ku tempu, i disidi usa si vida pa sirbi Jeova, en ves di sedu artista. I ka seduba fasil pa i toma es disison. I fala sin: “Manga di jintis ta falan kuma N tulu, pa manera ku N para kanta pa pudi sirbi Jeova. Ma N mistiba usa tudu ña vida pa sirbi Jeova.” Kuma ki ta sinti aos pa disison ki toma mas di 30 anu atras? I fala asin: “N sedu filis manera ku N disidi sirbi Jeova, i N sibi di kuma Jeova na bin fartanda tudu ña diseẑus na futuru.” — Sal 145:16.

KONTINUA SIRBI JEOVA

17. Kuma ku manera ku no sta na vivi pertu di fin des mundu, ta influensia kilis ku disidi sirbi Deus ku kilis ku ka fasil inda?

¹⁷ No sta na vivi pertu di fin des mundu. Apostolu Paulu fala sin: “Mas un bokadu, kil ku na bin i na bin; i ka na tarda.” (Eb 10:37) Ke ku es signifika? I sobra puku tempu pa kilis ku ka sta inda na sirbi Jeova, pa kila e dibi di fasi tudu ke pudi pa disidi sirbil. (1 Kor 7:29) Ma si no disidi ja sirbi Jeova, no sibi di kuma mesmu si no na bin nguenta purblemas, i na sedu so pa un ‘bokadu di tempu’.

18. Ke ku Jesus ku Jeova misti pa no fasi?

¹⁸ Jesus nkoraẑa si disipulus i ka so pa e kumsa ku sigil, ma tambi pa e kontinua sigil. (Mat 16:24) Pa kila, si no sta na sirbi Jeova pa manga di anus, no pirsisa di sta disididu pa kontinua fasil. No dibi di sforsa ciu pa kontinua sirbi Jeova. I pudi ka sedu fasil, ma desdi gosi no pudi sedu filis i tene manga di bensons na sirbi Jeova! — Sal 35:27.

19. Ke ku no aprindi ku spiriensia di Gene?

¹⁹ Alguns ta pensa di kuma, se sta na sirbi Jeova e ka na pudi sta sabi na vida. Si abo i joven, sera ki bu ta pensa di kuma bu sta na pirdi algun kusa si bu ta sirbi Jeova? Un ermon joven comadu Gene fala sin: “N pensa di kuma, si N sedu Tustumuña di Jeova i na ten manga di kusas interesanti ku N ka na pudi fasi. I parsi di kuma manga di jovens ku no lanta juntu ta pasa tempu na fasi kusas suma festa, namora, juga videos gaimi violentu, nkuantu ki ami N ta pasa tempu na runions ku pregason.” Ke ku es manera di pensa leba Gene na fasi? I fala sin: “N ta sirbiba Jeova i na mesmu tempu N ta fasiba mau kusas sukundidu, i kila fasinba sinti ben pa un tempu. Ma kila ka danba filisidadi di bardadi. N kumsa ku pensa na benefisius di obdisi ke ku Biblia ta fala, i N disidi sirbi Jeova di tudu korson. Disna di ki mumentu, N nota di kuma Jeova ta ruspundi tudu ña orasons.”

20. Ke ku no sta disididu pa fasi?

²⁰ Un salmista kanta sin pa Jeova: “Sortiadu i kil ku bu kuji, bu tisi pa i sta na bu kau sagradu”. (Sal 65:4) Pa anos tudu no disidi kontinua sirbi Jeova. No na fala sin suma Josué: ‘Ami ku ña familia, no na sirbi Jeova.’ — Jos 24:15.