BIBLIOTEKA NA INTERNET di Watchtower
BIBLIOTEKA NA INTERNET
di Watchtower
Kriol di Gine-Bisau
N̈, n̈, Ŝ, ŝ, Ẑ, ẑ
  • N̈
  • n̈
  • BIBLIA
  • PUBLIKASONS
  • RUNIONS
  • w25 Abril pp. 14-19
  • Sedu bon amigus di no ermons ku irmas i bon pa nos!

I ka ten ni un video dispunivel nes parti ku bu kalka.

Diskulpa, i ten un eru oca ku bu na tenta yabri video.

  • Sedu bon amigus di no ermons ku irmas i bon pa nos!
  • Sintinela ta Fala di Renu di Jeova (Sintinela di Studu) — 2025
  • Subtitulus
  • Materia di mesmu asuntu
  • PABIA KU NO DIBI DI SEDU BON AMIGUS DI NO ERMONS KU IRMAS
  • NO MOSTRA RISPITU PA N̈UTRU
  • “KA BO SEDU DIVIDIDU”
  • NO AMA DI “BARDADI KU KIL KU NO NA FASI”
  • Jeova amau ciu
    Sintinela ta Fala di Renu di Jeova (Sintinela di Studu) — 2024
  • ‘I bon pa no pertusi di Deus!’
    Sintinela ta Fala di Renu di Jeova (Sintinela di Studu) — 2025
  • Disisons ku ta mostra di kuma no konfia na Jeova
    No Vida Kriston ku No Ministeriu — Manual pa Runion — 2023
  • Juda utrus na pui pa bu sedu filis
    Sintinela ta Fala di Renu di Jeova (Sintinela di Studu) — 2024
Oja utru kusas
Sintinela ta Fala di Renu di Jeova (Sintinela di Studu) — 2025
w25 Abril pp. 14-19

STUDU 16

KANTIKU 87 As Reuniões Encorajam-nos

Sedu bon amigus di no ermons ku irmas i bon pa nos!

“Un kusa bon i sabi dimas i pa ermons vivi juntu na unidadi!” — SAL 133:1.

KE KU NO NA BIN APRINDI

No na oja kuma ku no pudi pertusi mas di n̈utru i kuma ku Jeova ta bensuanu, ora ku no sedu amigus di no ermons ku irmas.

1-2. Kal ki un di kusas importanti pa Jeova, i ke ki misti pa no fasi?

MANERA ku no ta trata utrus i importanti dimas pa Jeova. Jesus nsina di kuma no dibi di ama no kumpañer suma ku no ama no kabesa. (Mat 22:​37-39) Es nklui mostra bondadi, mesmu pa kilis ku ka ta sirbi Jeova. Ora ku no mostra es tipu di bondadi, no ta sta na kopia Jeova Deus ku “ta fasi pa si sol sai pa jinti mau ku jinti bon; si cuba ta kai riba di jinti justu ku injustu.” — Mat 5:45.

2 Jeova ama tudu pekaduris, ma i mas ama kilis ku ta obdisil. (Jon 14:21) I misti pa no kopial. I falanu pa no mostra no ermons ku irmas di kuma, no ama elis di ‘tudu no korson’. (1 Ped 4:8; Rom 12:10) Es tipu di amor, i mesmu amor ku no ta tene pa no familia o pa un amigu intimu.

3. Ke ku no pirsisa di fasi pa no amor aumenta?

3 Amor i suma un planta ku no tene na kasa ku pirsisa di kuidadu del pa i pudi kirsi. Apostolu Paulu da kristons es konsiju: “Bo kontinua ama n̈utru suma ermons.” (Eb 13:1) Jeova misti pa no kontinua mostra amor pa utrus. Nes studu, no na oja pabia ku no dibi di sedu bon amigus di no ermons ku irmas, i kuma ku no pudi kontinua fasil.

PABIA KU NO DIBI DI SEDU BON AMIGUS DI NO ERMONS KU IRMAS

4. Suma ki faladu na Salmu 133:​1, kuma ku no pudi kontinua da balur pa union ku ten entri no ermons ku irmas? (Jubi tambi fotos.)

4 Lei Salmu 133:1. No konkorda ku salmista ku skirbi di kuma, sedu amigu di kilis ku ama Jeova i “bon”, tambi i “sabi.” Suma ku un algin ka ta nota di balur di un arvuri garandi ki ta oja kada dia, no pudi tambi ka da balur pa bonitasku di union ku ten entri no ermons ku irmas. No ta oja sempri no ermons ku irmas, talves na un semana no ta oja elis manga di bias. Kuma ku no pudi kontinua da elis balur? Amor ku no tene pa no ermons ku irmas na aumenta, si no ta toma tempu pa pensa na balur ku kada un delis tene na kongregason i pa nos.

Fotos: 1. Un irma sta na jubi di manera dimiradu pa un arvuri ku si fojas sai kor. 2. Mas tardi, i sta na barsa utru irma na un kongresu reẑional. Utrus na kongresu sta na papia ku n̈utru ku kontentamentu.

Nunka ka bu disa di da balur pa bonitasku di union ku ten entri no ermons ku irmas. (Jubi paragrafu 4)


5. Kal ku ta sedu rusultadu, ora ku utrus oja amor ku no tene pa n̈utru?

5 Alguns ku mati runion pa purmeru bias, ta fika tokadu ku amor ku no tene pa n̈utru. Pabia di kila, e pudi nota di kuma e oja bardadi. Jesus fala sin: “Si bo ama n̈utru, tudu jinti ta rapara kuma abos i ña disipulus.” (Jon 13:35) Jubi spiriensia di un joven comadu Chaithra. I staba na studa Biblia ku Tustumuñas di Jeova. I seta un konviti pa bai mati kongresu reẑional. Dipus di mati purmeru dia di kongresu, i fala sin pa kin ku ta studa Biblia kel: “Nunka ña pape ku ña mame barsan. Ma na bo kongresu, N risibi 52 abrasus so na un dia! N sinti di kuma Jeova staba na usa si povu pa mostran si amor. N misti fasi parti des familia.” Chaithra kontinua studa i fasi mudansas na si vida, i batisa na 2024. Ora ku nobus oja no bon komportamentu, suma amor ku no tene pa n̈utru, manga di bias, kila ta leba elis kumsa sirbi Jeova. — Mat 5:16.

6. Kuma ku sedu amigus di no ermons ku irmas pudi proteẑi no amisadi ku Jeova?

6 Sedu amigus di no ermons ku irmas pudi proteẑi no amisadi ku Jeova. Paulu fala si ermons na fe pa e kontinua nkoraẑa o ‘konsija n̈utru tudu dia pa ka nin un delis fika duru pa nganu di pekadu.’ (Eb 3:13) Si no disanima ciu, tok i difisil pa no kontinua fasi ke ki sertu, Jeova pudi pui pa un ermon na fe nota kila, i danu ajuda ku no pirsisa del. (Sal 73:​2, 17, 23) Es tipu di ajuda pudi judanu ivita fasi ke ki mau.

7. Kuma ku amor sta ligadu ku union? (Kolosensis 3:​13, 14)

7 No fasi parti di un grupu di jintis ku ta sforsa ciu pa mostra amor pa n̈utru, pa kila no tene manga di bensons. (1 Jon 4:11) Pur isemplu, amor ta lebanu pa no kontinua “nguenta n̈utru”, i es ta juda pa i ten union ku no ermons ku irmas. (Lei Kolosensis 3:​13, 14; Ef 4:​2-6) Pa kila, na no runions, i ta ten un bon ambienti ku ka ta ojadu na nin un parti di mundu.

NO MOSTRA RISPITU PA N̈UTRU

8. Kuma ku Jeova ta judanu pa no sta unidu ku no ermons ku irmas?

8 Union ku ten entri no ermons ku irmas na mundu ntidu, i un milagri. Jeova ku pui pa i sedu asin, mesmu manera ku no sedu imperfeitu. (1 Kor 12:25) Biblia fala di kuma, ‘Deus nsinanu kuma ku no dibi di ama n̈utru.’ (1 Tes 4:9) Es signifika di kuma, Jeova ta usa Biblia pa kontanu ke propi ku no pirsisa di fasi pa pudi pertusi mas di n̈utru. Deus pudi “nsinanu” ora ku no ta studa diritu kusas ki ta nsina i aplika elis. (Eb 4:12; Tiagu 1:25) I es propi ku Tustumuñas di Jeova ta sforsa pa fasi.

9. Ke ku no aprindi di Romanus 12:​9-13 aserka di mostra rispitu pa n̈utru?

9 Kuma ku Palabra di Deus ta nsinanu, pa sedu bon amigus di no ermons ku irmas? Jubi ke ku Paulu fala aserka des asuntu, na Romanus 12:​9-13. (Lei.) Nota di kuma i fala asin: “Bo da n̈utru purmeru lugar ku rispitu.” Ke ku es signifika? No dibi di sedu purmeru na mostra utrus ‘amor di tudu no korson’ di diferentis maneras, suma purda, risibi utrus diritu i ba ta pati. (Ef 4:32) I ka pirsis pa bu pera pa bu ermon o irma bin pa bo. Bu pudi fasil “purmeru”. Bu na bin oja ke ku Jesus purmiti oca i fala: “I mas minjor da di ki bo risibi.” — At 20:35.

10. Kuma ku no pudi pega tesu na “da n̈utru purmeru lugar ku rispitu”? (Jubi tambi foto.)

10 I interesanti nota di kuma, logu dipus ku Paulu falanu pa no sedu purmeru na da n̈utru lugar ku rispitu, i fala pa ka ‘no sedu divagarosu na tarbaju.’ Algin ku ka sedu divagarosu i ta pega tesu na tarbaju. Ora ki dadu un tarbaju, i ta fasil diritu. Ditus 3:​27, 28 falanu sin: “Ka bu nega fasi ben pa algin ku mersi, si bu ten manera di judal.” Pa kila, ora ku no nota di kuma un algin pirsisa di ajuda, no ta fasi tudu ku no pudi pa judal. No ka ta adia fasi ke ku no dibi di fasi, nin no ka ta pensa di kuma utru algin na bin fasil. — 1 Jon 3:​17, 18.

Un ermon joven firma na skada i sta na limpa paja na kankra di kasa di un ermon.

No dibi di sedu purmeru na juda no ermons ku irmas ku pirsisa di ajuda. (Jubi paragrafu 10)


11. Ke ku pudi judanu sedu bon amigus di no ermons ku irmas?

11 Utru manera ku no pudi mostra rispitu pa utrus, i ora ku no sedu rapidu na purda elis ora ke yaranu. Efésius 4:26 fala sin: “Ka bo fika ku raiba tok sol kai.” Pabia ku no ka dibi di fika ku raiba? Versikulu 27 splika di kuma si no fika ku raiba tok sol kai, no na ‘da Diabu lugar pa i yentra.’ Jeova falanu na si Palabra manga di bias pa no purda n̈utru. Kolosensis 3:13 falanu pa no kontinua “purda n̈utru”. Purda falias di utrus i un di minjor manera di sedu se amigus. Ora ku no purda utrus, no ta juda pa i “ten ligason di pas pa guarda suguru ki unidadi ku Spiritu ta da.” (Ef 4:3) Na bardadi, ora ku no purda utrus, no ta juda pa i ten pas ku union na povu di Jeova.

12. Kuma ku Jeova ta judanu pa no sedu purdadur?

12 I bardadi di kuma, i pudi sedu difisil purda kilis ku fasinu mal. Ma no pudi purda elis ku ajuda di spiritu di Deus. Dipus di Biblia falanu pa no ‘ama n̈utru di tudu no korson’ i pa ka “sedu divagarosu na tarbaju,” i fala pa no “sedu kinti na spiritu”. Un algin ku “kinti” ta “sta ku manga di vontadi pabia di influensia di spiritu santu”. (Jubi nota di studu na Romanus 12:11.) Asin, spiritu di Deus pudi judanu mostra amor i purda n̈utru di tudu korson. E ku manda no ta pidi Jeova di tudu korson pa i judanu. — Luk 11:13.

“KA BO SEDU DIVIDIDU”

13. Ke ku pudi tisi divison na no metadi?

13 Kongregason formadu pa ‘tudu tipu di jintis’ di diferenti edukason. (1 Tim 2:​3, 4) Si no ka toma kuidadu, es diferensas pudi tisi divison na asuntus ku kada kin pudi toma si propi disison. Suma pur isemplu, manera di bisti, di kumpu-kumpu, kuida di saudi, filmis ku no ta jubi, musikas ku no ta obi i asin pa dianti. (Rom 14:4; 1 Kor 1:10) Suma Deus nsinanu pa no ama n̈utru, no dibi di toma kuidadu pa ka nsisti di kuma kusas ku no disidi fasi, i mas minjor di ki di utrus. — Fil 2:3.

14. Ke ku no dibi di sforsa sempri pa sedu i pabia di ke?

14 No pudi tambi ivita divisons na kongregason, ora ku sempri no sforsa pa sedu nkoraẑanti pa utrus. (1 Tes 5:11) Nes ultimus tempu, manga di jintis ku seduba inativu o ku tiradu di kongregason riba. No risibi elis ku amor! (2 Kor 2:8) Nota ke ku kontisi ku un irma ku mati runion pa purmeru bias na Salon di Renu, dipus di sedu inativu pa 10 anu. I fala sin: “Tudu jintis kontenti ku mi i e dan mon.” (At 3:19) Kuma ki sinti pa manera ke mostral bondadi? I fala sin: “I fasin sinti di kuma Jeova staba na judan pa N sedu mas filis.” Si no sforsa pa sedu algin ku ta nkoraẑa utrus, Kristu na pudi usanu pa anima kilis “ku kansa ku kargu pisadu.” — Mat 11:​28, 29.

15. Kal ki utru manera ku no pudi juda pa i ten union na kongregason? (Jubi tambi foto.)

15 Utru manera ku no pudi juda pa i ten union na kongregason i atraves di ke ku no ta papia. Jo 12:11 fala sin: “Nta oreja ka ta purba palabras suma ku boka ta purba kumida?” Suma ku un bon kusiñeru ta purba sempri si kumida, pa tene sertesa di kuma i sabi antis di sirbil pa utrus, no dibi di pensa tambi diritu na ke ku no na fala antis di falal. (Sal 141:3) No dibi di sempri tene sertesa di kuma ke ku no na fala na nkoraẑa, anima i “fasi ben pa kilis ku obil.” — Ef 4:29.

Un ermon sta na sinti gustu di ke ki kusiña antis di sirbil pa si kumbidadus.

Pensa na ke bu na fala antis di falal. (Jubi paragrafu 15)


16. Ba kin ku dibi di mas sforsa pa usa palabras ku na nkoraẑa utrus?

16 Omis ku papes dibi di kuida na se manera di papia, pa se palabras pudi nkoraẑa utrus. (Kol 3:​19, 21; Titu 2:4) Ansions tambi dibi di anima i nkoraẑa karnelis di Jeova. (Isa 32:​1, 2; Gal 6:1) Un ditu ku sta na Biblia lembrantanu es palabras: “Palabra sertu na si tempu propi i bon.” — Dit 15:23.

NO AMA DI “BARDADI KU KIL KU NO NA FASI”

17. Kuma ku no pudi tene sertesa di kuma, amor ku no tene pa no ermons ku irmas i di bardadi?

17 Apostolu Jon nkoraẑanu pa ‘ka no ama son ku palabra di boka, ma pa no ama na bardadi ku kil ku no na fasi.’ (1 Jon 3:18) No misti pa amor ku no tene pa no ermons ku irmas bin di korson. Kuma ku no pudi fasil? Konformi no na pasa tempu ku no ermons ku irmas, no mas na pertusi di n̈utru, i no amor pa n̈utru na torna mas forti. Pa kila, buska oportunidadis pa pasa tempu ku utrus, suma na runions i na pregason. Ranja tempu pa visita utrus. Ora ku no fasi es kusas, no ta mostra di kuma ‘Deus nsinanu kuma ku no dibi di ama n̈utru.’ (1 Tes 4:9) Tambi no na kontinua oja ku no propi uju di kuma, “un kusa bon i sabi dimas i pa ermons vivi juntu na unidadi!” — Sal 133:1.

KUMA KU BU NA RUSPUNDIBA?

  • Pabia ku sedu bon amigus di no ermons ku irmas i bon pa nos?

  • Kuma ku no pudi sedu purmeru na mostra rispitu pa utrus?

  • Kuma ku no pudi juda pa i ten union na kongregason?

KANTIKU 90 ‘Encorajemo-nos Uns aos Outros’

    Publikasons na Kriol di Gine-Bisau (2000-2025)
    Sai
    Entra
    • Kriol di Gine-Bisau
    • Manda pa utru algin
    • Preferensias
    • Copyright © 2025 Watch Tower Bible and Tract Society of Pennsylvania
    • Termus di Usu
    • Pulitika di Privasidadi
    • Normas di Privasidadi
    • JW.ORG
    • Entra
    Manda pa utru algin