Lisons ku no pudi aprindi di profesia di Jakó — Parti 1

1-2. Ke ku Jakó fasi antis di muri, i pabia di ke? (Jubi tambi diseñu.)

I PASA ja serka di 17 anu ku Jakó, servu fiel di Jeova sai di Kanaan pa Ejitu juntu ku si familia. (Kum 47:28) Jakó kontentiba ciu di oja mas si fiju José, pabia i pensaba di kuma José muri. Jakó ku tudu si fijus staba mas juntu. Ma Jakó sibiba di kuma, i pertu muri. Pa kila, i coma si fijus pa un runion importanti. — Kum 49:28.

² Na ki tempu, un pape kustuma junta tudu si familia pa da elis instrusons antis di muri. (Isa 38:1) Tambi nes runion, i ta konta kin ku na sedu ŝef di familia ora ki muri.

3. Di akordu ku Kumsada 49:​1, 2, pabia ku palabras di Jakó teneba importansia garandi?

³ Lei Kumsada 49:​1, 2. Ma i ka seduba so un simplis runion di familia. Jakó seduba un profeta. Nes runion, Jeova pui pa Jakó papia di kusas importanti ku na kontisi ku elis i ku se familias na futuru. Pa kila, palabras di Jakó pa si fijus seduba un profesia.

4. Ke ku no na bin fala del nes studu? (Jubi tambi kuadru “Familia di Jakó.”)

⁴ Nes studu, no na fala di ke ku Jakó fala pa si kuatru fiju: Ruben, Simeon, Levi ku Judá. Na studu ku na bin, no na fala di palabras di Jakó pa si utrus oitu fiju. Suma ku no na oja, Jakó ka papia so di ke ku na kontisi ku si fijus, ma tambi i papia di ke ku na bin kontisi ku se jorsons. Ku tempu, se jorsons bin torna antigu nason di Israel. Ora ku no jubi ke ku kontisi ku nason di Israel na pasadu, no ta nota di kuma ke ku Jakó fala bin kumpri. Tambi ora ku no studa si palabras, no na aprindi lisons importanti ku na judanu kontenta no Pape ku sta na seu, ku sedu Jeova.

RUBEN

5. Ke ku Ruben na speraba risibi di si pape?

⁵ Purmeru, Jakó papia pa Ruben. I falal: “Abo i ña purmeru fiju”. (Kum 49:3) Ruben na speraba risibi di si pape yardansa mas garandi di ki si ermons, pabia i seduba purmeru fiju. Talves i staba na spera sedu ŝef di familia ora ku si pape muri, i pa un algin di si jorson sedu sempri ŝef di tudu familia.

6. Pabia ku Ruben ka risibi yardansa di purmeru fiju? (Kumsada 49:​3, 4)

⁶ Ma, Ruben ka risibi yardansa di purmeru fiju. (1 Kron 5:1) Pabia di ke? Pabia, algun tempu dipus ku Rakel muri, Ruben teneba relason seksual ku Bila, tarbajadur di Rakel. Rakel daba Bila pa i sedu minjer di Jakó. (Kum 35:​19, 22) Pabia ku Ruben teneba relason seksual ku Bila? I seduba fiju di Leia, irma di Rakel. Pa kila, talves i teneba relason seksual ku Bila pa Jakó pudi dispresal i pa i pasa ama mas si mame. O talves Ruben atraidu pa Bila, i ka kontrola si diseẑu seksual. I ka mporta kal ki motivu, ke ki fasi pui pa Jeova ku si pape fika mal dimas. — Lei Kumsada 49:​3, 4.

7. Ke ku kontisi ku Ruben ku si jorson? (Jubi tambi kuadru “Profesia di Jakó antis di muri.”)

⁷ Jakó fala Ruben: “Bu ka na sedu kil mas importanti”. Es palabras bin kumpri. Biblia ka fala di nin un algin ku bin di jorson di Ruben ku sedu rei, saserdoti o profeta. Ma Jakó da Ruben yardansa, i familia di Ruben bin torna un jorson garandi na Israel. (Jos 12:6) Ruben mostra bon maneras di sedu na utrus situasons, tambi i parsi di kuma i ka torna fasi mas pekadu seksual. — Kum 37:​20-22; 42:37.

8. Kal lisons ku no pudi aprindi di isemplu di Ruben?

⁸ Ke ku no pudi aprindi? No pirsisa di sforsa ciu pa kontrola no kabesa i ivita pekadu seksual. Ora ku no tentadu pa fasi un pekadu, no dibi di para i pensa na kuma ku no asons na pui pa Jeova, no familia ku utrus fika mal. No dibi di lembra tambi di kuma “kil ku omi sumia, i el ki na kebra tambi.” (Gal 6:7) Pa utru ladu, ke ku kontisi ku Ruben ta lembrantanu di kuma Jeova ta purdanu. I bardadi di kuma Jeova ka na livranu di mau rusultadu di no erus, ma i na bensua no sforsu ora ku no fasi ke ki sertu.

SIMEON KU LEVI

9. Pabia ku Jakó ka kontentiba ku Simeon ku Levi? (Kumsada 49:​5-7)

⁹ Lei Kumsada 49:​5-7. Dipus, oca Jakó na papia ku Simeon ku Levi, i usa palabras ku mostra di kuma i ka kontentiba ku elis. Anus atras, Dina, fiju femia di Jakó, violadu pa un omi kananeu comadu Siken. I normal pa manera ku tudu fijus di Jakó fikaba mal ku ke ku kontisi ku se irma. Fijus di Jakó ngana Siken ku si povu, e fala elis di kuma, e na fasi pas ku elis si e seta botadu fanadu. Omis seta pa e botadu fanadu. Oca e staba inda ku dur suma e botadu fanadu, Simeon ku Levi “toma kada kin si spada, e yentra na prasa, nin jinti ka spera, e mata tudu macu.” — Kum 34:​25-29.

10. Kuma ku profesia di Jakó aserka di Simeon ku Levi kumpri? (Jubi tambi kuadru “Profesia di Jakó antis di muri.”)

¹⁰ Jakó fikaba mal dimas manera ku si dus fiju mata manga di jintis. I fala elis di kuma e na spalia na diferentis parti di Israel. Es profesia kumpri mas di 200 anu dipus, oca nason di Israel yentra na Tera di Purmesa. Jorson di Simeon risibi se yardansa dentru di tiritoriu di Judá. (Jos 19:1) Jorson di Levi yarda 48 sidadis na Israel. — Jos 21:41.

11. Kal bon kusas ku jorsons di Simeon ku Levi fasiba?

¹¹ Jorsons di Simeon ku Levi ka ripiti mesmu erus ku se papes fasiba. Jorson di Levi mostra fidelidadi garandi pa adorason puru. Oca Moisés subi na Monti Sinai pa risibi Lei na mon di Jeova, manga di israelitas adoraba bakasiñu di uru. Ma, levitas negaba adora es deus falsu. Mas tardi, e juda Moisés pa kaba ku tudu kilis ku adoraba bakasiñu di uru. (Sai 32:​26-29) Jeova kuji omis di jorson di Levi pa e sedu saserdotis na Israel. (Sai 40:​12-15; Num 3:​11, 12) Dipus, jorson di Simeon juda jorson di Judá pa geria kontra kananeus pa toma se tiritoriu na Tera di Purmesa. Es disison kontenta Jeova. — Ŝef 1:​3, 17.

12. Kal lisons ku no pudi aprindi di isemplus di Simeon ku Levi?

¹² Ke ku no pudi aprindi? No ka dibi di disa nunka pa raiba kontrola no disisons ku asons. I normal pa bu fika mal, si abo o algin ku bu ama tratadu mal. (Sal 4:4) Ma, no dibi di lembra di kuma, Jeova ka na kontenti ku nos, si no papia o fasi un kusa ku na firi kilis ku tratanu mal. (Tiagu 1:20) Ora ku un algin tratanu mal, mesmu si i ta sirbi Jeova o nau, no na reaẑi di un manera ku na kontenta Jeova. Es ta judanu ivita papia o fasi un kusa ku na pui utrus fika mal. (Rom 12:​17, 19; 1 Ped 3:9) Utru lison ku no pudi aprindi i di kuma, nin si bu pape o bu mame sta na fasi kusas ku ka ta kontenta Jeova, lembra di kuma bu ka obrigadu sigi se isemplu. Ka bu pensa di kuma bu ka pudi kontenta Jeova. Jeova na judau, tambi i na bensua bu sforsu di fasi ke ki sertu.

JUDÁ

13. Pabia ku Judá dibi di staba preokupadu oca ki ciga ora pa si Pape papia del?

¹³ Dipus, Jakó papia di si fiju Judá. Dipus di obi palabras di Jakó pa si ermons garandi, talves Judá staba preokupadu. El tambi i fasi erus gravi. Oca Simeon ku Levi mata omis di Siken, Judá bai juntu ku si ermons pa sidadi, i e toma tudu kusas di ki povu. (Kum 34:27) I junta ku si ermons na bindi José i ngana se pape aserka di ke ku kontisi. (Kum 37:​31-33) Mas tardi, i tene relason seksual ku Tamar, minjer di si fiju, pabia i pensaba di kuma Tamar i minjer di mau vida. — Kum 38:​15-18.

14. Kal bon kusas ku Judá fasiba? (Kumsada 49:​8, 9)

¹⁴ Jakó ngaba so Judá, tambi i purmiti di kuma bon kusas na kontisi ku el ku si familia. (Lei Kumsada 49:​8, 9.) Judá mostra di kuma i preokupa ciu ku si pape ku teneba ja idadi. Tambi i amaba ciu si ermonsiñu Benjamin, tok i staba dispostu pa sedu skravu na si lugar. — Kum 44:​18, 30-34.

15. Di kal maneras ku Judá bensuadu?

¹⁵ Jakó fala di kuma Judá na bin sedu ŝef di si ermons. Ma, i pasa serka di 200 anu antis des profesia kumsa ku kumpri. Dipus di israelitas sai di Ejitu i e na yanda na disertu pa Tera di Purmesa, jorson di Judá ku bai purmeru, dipus ki utrus jorsons sigi elis. (Num 10:14) Anus dipus, Jeova kuji Judá pa bai geria kontra kananeus i toma Tera di Purmesa. (Ŝef 1:​1, 2) Tambi Davi seduba purmeru entri manga di reis ku binba di jorson di Judá. Ma i ten utru maneras kes profesia aserka di Judá kumpri.

16. Kuma ku profesia ku sta na Kumsada 49:10 kumpri? (Jubi tambi kuadru “Profesia di Jakó antis di muri.”)

¹⁶ Jakó fala di kuma, Guvernanti di tudu pekaduris na bin di jorson di Judá, tambi i na rena pa sempri. (Lei Kumsada 49:10.) Es Guvernanti i Jesus Kristu, ku Jakó coma di Siló. Un anju fala asin aserka di Jesus: “Siñor Deus na dal renu di Davi, si pape di antigu.” (Luk 1:​32, 33) Jesus comadu tambi di “Lion di jorson di Judá.” — Apok 5:5.

17. Kuma ku no pudi kopia Jeova na manera ku no ta oja utrus?

¹⁷ Ke ku no pudi aprindi? Jeova bensua Judá mesmu manera ki fasiba alguns erus gravi. Ma talves ermons di Judá pudi punta ke di bon ku Jeova oja nel. No ka sibi ke ke staba na pensa, ma no sibi di kuma Jeova ojaba bon kusa na Judá, i bensual pabia di kila. Kuma ku no pudi kopia isemplu di Jeova? Ora ku un ermon o irma risibi un responsabilidadi importanti, no pudi ka ntindi pabia ki dadu el si no kunsi si falias. Ma no dibi di lembra di kuma, Jeova ta kontenti ku bon maneras di sedu di ki ermon o irma. Jeova ta buska bon kusas na si servus. No sforsa pa fasi mesmu kusa.

18. Kuma ku no pudi kopia jorson di Judá?

¹⁸ Utru lison ku no pudi aprindi di ke ku pasa ku Judá, i nesesidadi di sedu pasenseru. Jeova sempri ta kumpri si purmesas, ma i ka ta fasi sempri kusas na manera o na tempu ku no spera. Jorson di Judá ka kumsa logu manda na metadi di povu di Deus. Ma e apoia di tudu korson kilis ku Jeova kuji pa manda na metadi di si povu, suma Moisés di jorson di Levi, Josué di jorson di Efrain ku rei Saul di jorson di Benjamin. Tambi no dibi di apoia kualker algin ku Jeova kuji pa toma diantera na no metadi aos. — Eb 6:12.

19. Ke ku no aprindi aserka di Jeova na profesia ku Jakó fasi antis di muri?

¹⁹ Ke ku no aprindi di ultimus palabras di Jakó pa si purmerus kuatru fiju? I klaru di kuma Jeova “ka ta jubi manera ku omi ta jubi”. (1 Sam 16:7) Jeova i pasenseru dimas, tambi i ta purda. Jeova ka ta kontenti ora ku no fasi mau kusas, ma tambi i ka ta spera pa no sedu perfeitu. Te mesmu i pudi bensua kilis ku fasi erus gravi na pasadu, si kontra e ripindi di tudu korson i e kumsa fasi ke ki bon. Na studu ku na bin, no na bin oja ke ku Jakó fala pa si utrus oitu fiju.