Lisons ku no pudi aprindi di profesia di Jakó — Parti 2

1. Ke ku no na fala del nes studu?

FIJUS di Jakó sinta pertu del, e na sukuta diritu oca ku se pape di idadi sta na bensua kada un delis. Na studu ku pasa, no aprindi di kuma talves Ruben, Simeon, Levi ku Judá ka speraba obi ke ku Jakó fala elis. Pa kila, e dibi di staba na pensa na ke ku Jakó na fala pa ki utrus oitu fiju. No jubi lisons ku no pudi aprindi di ke ki fala pa Zebulon, Isakar, Dan, Gadi, Aser, Naftali, José ku Benjamin.a

ZEBULON

2. Ke ku Jakó fala Zebulon i kuma ku si palabras kumpri? (Kumsada 49:13) (Jubi tambi kuadru.)

² Lei Kumsada 49:13. Jakó fala di kuma jorson di Zebulon na mora pertu di mar, na norti di Tera di Purmesa. Mas di 200 anu dipus, jorson di Zebulon yarda tera ku staba entri Mar di Galileia ku Mar Mediteraneu. Jorson di Zebulon teneba motivu di kontenti, si e staba pertu di kualker un di ki mar. Pabia di ke? Mesmu si e ka tene frontera diretu ku mar, e teneba fasilidadi di fasi komersiu, pabia e staba entri dus maris. Es pudi sedu motivu ku pui Moisés fala sin: “Na bu saidas, ba ta kontenti, Zebulon.” — Lei 33:18.

3. Ke ku pudi judanu kontenti ku ke ku no tene?

³ Ke ku no pudi aprindi? No tene sempri motivus di kontenti, i ka mporta nunde ku no mora o kal situason ku no sta nel. Pa kontinua tene kontentamentu, no dibi di kontenti ku ke ku no tene. (Sal 16:6; 24:5) Utrora i pudi sedu mas fasil konsentra na kusas ku no ka tene, di ki konsentra na bon kusas ku no tene. Pa kila, tenta lembra di bon kusas ku bu tene i ku ta pui pa bu sedu filis na vida. — Gal 6:4.

ISAKAR

4. Ke ku Jakó fala Isakar i kuma ku si palabras kumpri? (Kumsada 49:​14, 15) (Jubi tambi kuadru.)

⁴ Lei Kumsada 49:​14, 15. Jakó ngaba Isakar pa manera ki ta tarbaja duru. I fala di kuma Isakar i suma un buru forti, ku ta karga kargus pisadu. Tambi Jakó fala di kuma, Isakar na tene un bon kau. Konformi palabras di Jakó, jorson di Isakar ribisi un tera ku ta pruduzi ciu ku bai te na Riu Jordon. (Jos 19:22) Jorson di Isakar tarbaja ciu pa kuida di se tera, tambi e tarbaja ciu pa juda utrus. (1 Re 4:​7, 17) Pur isemplu, oca juis Baraki ku Debora ku sedu profeta pidi israelitas pa e juda na geria kontra Sísera, jorson di Isakar seduba un di jorsons ku juda. Tambi e staba dispostu pa geria na utrus mumentu. — Ŝef 5:15.

5. Pabia ku no dibi di tarbaja duru?

⁵ Ke ku no pudi aprindi? Jeova ta da balur pa tarbaju duru ku no ta fasi na si sirvisu, suma ki daba balur pa tarbaju duru di jorson di Isakar. (Ekl 2:24) Jubi isemplu di ansions ku ta tarbaja duru pa kuida di kongregason. (1 Tim 3:1) Es ermons ka ta bai gera, ma e ta tarbaja duru pa proteẑi ermons ku irmas kontra kusas ku pudi dana se amisadi ku Jeova. (1 Kor 5:​1, 5; Jud 17-23) Tambi e ta tarbaja duru pa purpara i fasi diskursus ku na nkoraẑa kongregason. — 1 Tim 5:17.

DAN

6. Kal tarbaju ku jorson di Dan risibi? (Kumsada 49:​17, 18) (Jubi tambi kuadru.)

⁶ Lei Kumsada 49:​17, 18. Jakó fala di kuma Dan parsi ku un kobra ku ta murdi limarias mas garandi, suma pur isemplu, un kabalu ku ta usadu na gera. Jorson di Dan seduba koraẑosu i e staba pruntu pa ataka inimigus di nason di Israel. Oca e na yanda pa Tera di Purmesa, jorson di Dan fikaba suma “guarda di tras” pa pudi proteẑi nason di Israel. (Num 10:25) Utrus jorson ka pudiba oja tudu ke ku jorson di Dan staba na fasi, ma se tarbaju seduba importanti dimas.

7. Ke ku no dibi di lembra del, ora ku no na kuida di kualker responsabilidadi na organizason?

⁷ Ke ku no pudi aprindi? Sera ki bu ciga di kuida di un responsabilidadi i bu pensa di kuma, utrus ka nota di ke ku bu fasi? Talves bu juda na limpa i fasi manutenson di Salon di Renu, bu sedu vuluntariu na asembleia o kongresu, o bu juda na utru tarbaju. I bon manera ku bu juda des manera! Lembra sempri di kuma Jeova ta nota i da balur, pa tudu ke ku bu ta fasi pa rel. Tambi i ta kontenti dimas ora ku bu sirbil pabia bu misti mostra bu amor pa rel, i ka pabia bu misti pa utrus ngabau. — Mat 6:​1-4.

GADI

8. Pabia ki seduba fasil pa inimigus di Israel ataka jorson di Gadi? (Kumsada 49:19) (Jubi tambi kuadru.)

⁸ Lei Kumsada 49:19. Jakó falaba di kuma Gadi na atakadu pa ladrons. Serka di 200 anus mas tardi, jorson di Gadi yarda tera pertu di Riu Jordon, ku tene frontera ku inimigus di Israel. Pa kila, i fasilba pa es inimigus ataka elis. Ma, jorson di Gadi mistiba vivi na ki tera, pabia i teneba manga di matu ku se limarias na pudiba apruveita del. (Num 32:​1, 5) Jorson di Gadi seduba jintis koraẑosu. Alen di kila, e konfiaba di kuma Jeova na juda elis ataka se inimigus i difindi tera ki da elis. Pa manga di anus e manda tambi se tropas pa juda utrus jorson toma se tera na utru ladu di Jordon. (Num 32:​16-19) E konfia di kuma Jeova na proteẑi se minjeris ku se fijus, ora ku se omis ka sta. Jeova bensua se koraẑen i pa ajuda ke da utrus, mesmu oca ki ka seduba fasil. — Jos 22:​1-4.

9. Si no konfia na Jeova, kal disisons ku no na toma?

⁹ Ke ku no pudi aprindi? Pa pudi kontinua sirbi Jeova ora ku no tene purblemas, no dibi di kontinua konfia nel. (Sal 37:3) Manga di jintis aos ta mostra se konfiansa na Jeova, ora ke na tarbaja duru na projetus di konstruson di organizason, sirbi nunde ki ten mas nesesidadi o juda organizason di utru manera. E ta fasil pabia e konfia di kuma, Jeova sempri na kuida delis. — Sal 23:1.

ASER

10. Kuma ku profesia aserka di benson di Aser kumpri? Ma ke ku jorson di Aser ka fasi? (Kumsada 49:20) (Jubi tambi kuadru.)

¹⁰ Lei Kumsada 49:20. Jakó kontaba ja di kuma jorson di Aser na sedu riku, i kila propi ku bin sedu. Jorson di Aser yarda tera ku seduba riku dimas. (Lei 33:24) Se tera pertuba Mar Mediteraneu, tambi purtu riku di Sidon fasiba parti del. Ma, jorson di Aser ka tira kananeus di tera ke yarda. (Ŝef 1:​31, 32) Talves pabia di se rikesa ku mau influensia di kananeus, pui pa jorson di Aser kumsa ku pirdi animu na fasi vontadi di Jeova. Pur isemplu, oca juis Baraki pidi israelitas pa e judal geria kontra kananeus, jorson di Aser ka fasil. Pa kila, e ka oja kusas bonitu ku Jeova fasi pa juda israelitas ngaña gera “lungu di riu di Mejidu”. (Ŝef 5:​19-21) Talves jorson di Aser burguñu oca ke obi Baraki ku Debora na kanta asin: “Aser sinta na praia”. — Ŝef 5:17.

11. Pabia ku no dibi di ivita pui diñeru suma kusa mas importanti na no vida?

¹¹ Ke ku no pudi aprindi? No misti da no minjor pa Jeova. Pa fasi es, no pirsisa di kuida pa ka sedu suma jintis di mundu ku ta pensa di kuma, diñeru ku kusas ku diñeru pudi kumpra i mas importanti na vida. (Dit 18:11) No pirsisa di diñeru, ma no ka dibi di pensa di kuma, tene manga di diñeru i mas importanti di ki sirbi Jeova. (Ekl 7:12; Eb 13:5) No ka ta gasta tempu ku enerẑia na tenta buska kusas ku na bardadi no ka pirsisa del. En ves di kila, no ta fasi tudu ku no pudi pa Jeova. No sibi di kuma, si no kontinua sedu fiel, Jeova na danu un bon vida na futuru. — Sal 4:8.

NAFTALI

12. Kuma ku talves palabras di Jakó pa Naftali kumpri? (Kumsada 49:21) (Jubi tambi kuadru.)

¹² Lei Kumsada 49:21 ku nota bas di paẑina. Jakó fala di kuma Naftali na papia “palabras bonitu.” Talves i na trata di manera ku Jesus ta papia ora ki na prega. Jesus pasaba manga di tempu na sidadi di Kafarnaun, ku seduba tiritoriu di Naftali. E ku manda Kafarnaun comadu di “si propi prasa.” (Mat 4:13; 9:1; Jon 7:46) Tambi Isaias falaba ja di kuma, Jesus na sedu suma un “garandi lus” pa jintis di Zebulon ku Naftali. (Isa 9:​1, 2) Jesus ‘seduba lus di bardadi pa numia tudu jinti’ atraves di si nsinu. — Jon 1:9.

13. Kuma ku no pudi tene sertesa di kuma no palabras na kontenta Jeova?

¹³ Ke ku no pudi aprindi? Jeova ta interesa ku ke ku no ta papia i kuma ku no ta papial. Kuma ku no pudi papia “palabras bonitu” ku ta kontenta Jeova? Purmeru, no dibi di papia bardadi. (Sal 15:​1, 2) No ta papia kusas ku na nkoraẑa utrus, pur isemplu, no ta ngaba elis ora ke fasi bon kusas. Tambi no ta sforsa pa ka papia di falias di utrus o kritika elis. (Ef 4:29) No pudi tambi minjoria manera di kumsa kombersa ku jintis, pa pudi papia ku elis aserka di Jeova.

JOSÉ

14. Kuma ku profesia aserka di José bin kumpri? (Kumsada 49:​22, 26) (Jubi tambi kuadru.)

¹⁴ Lei Kumsada 49:22b, 26. Jakó kontentiba ciu ku si fiju José. Jeova kujilba na metadi “di si ermons”, i usal di un manera spesial. Jakó comal di “ramu di arvuri ku ta da fruta”. Jakó seduba arvuri, i si fiju José seduba suma ramu di ki arvuri. José seduba purmeru fiju ku Jakó tene ku minjer ki gosta ciu del, ku sedu Rakel. Jakó falaba ja di kuma, José ku na risibi yardansa di purmeru fiju en ves di Ruben, ku sedu purmeru fiju di Leia. (Kum 48:​5, 6; 1 Kron 5:​1, 2) Es parti di profesia kumpri oca ku dus fiju di José, ku sedu Efrain ku Manasés, torna dus jorson di Israel i kada un delis risibi si propi tera. — Kum 49:25; Jos 14:4.

15. Kuma ku José reaẑi oca ki sufri injustisa?

¹⁵ Jakó fala tambi di kuma, inimigus na manda fleŝas kontra José i e na kontinua “pirsigil.” (Kum 49:23) Es na trata di si ermons ku nveẑal, ku tratal mal i ku pul sufri ciu. Ma José ka odia si ermons o kulpa Jeova pa ke ku pasa ku el. Suma ku Jakó fala: ‘Mansasa di José fika firmi; si mon fika disimbaransadu’. (Kum 49:24) Na utrus palabra, i ngaña odiu di si ermons ku fleŝas di purdon ku amor. José konfia na Jeova oca ki staba na pasa situasons difisil. I ka purda so si ermons, ma tambi i trata elis ku bondadi. (Kum 47:​11, 12) José disa pa situason difisil ki pasa pul pa i sedu un algin mas minjor. (Sal 105:​17-19) Pabia des, Jeova usal pa i fasi manga di kusas importanti.

16. Kuma ku no pudi kopia isemplu di José, ora ku no sta na pasa pa purblemas?

¹⁶ Ke ku no pudi aprindi? Ora ku bu sta na pasa pa purblemas, ka bu lunjusi di Jeova i nin ka bu lunjusi di bu ermons ku irmas. Lembra di kuma, Jeova pudi formanu ora ku no kontinua sirbil na tempus difisil. (Eb 12:7) Es formason pudi judanu kopia mas minjor maneras di sedu di Jeova, suma sinti pena i purda. (Eb 12:11) No pudi tene sertesa di kuma, suma ku Jeova bensua José i na bensuanu tambi.

BENJAMIN

17. Kuma ku profesia aserka di Benjamin bin kumpri? (Kumsada 49:27) (Jubi tambi kuadru.)

¹⁷ Lei Kumsada 49:27. Jakó fala di kuma, jorson di Benjamin na sedu suma lubu ku sibi geria. (Ŝef 20:​15, 16; 1 Kron 12:2) I seduba na “parmaña” di renu di Israel, ku purmeru rei di Israel, Saul, bin di jorson di Benjamin. Tambi Saul geria ku koraẑen kontra filisteus. (1 Sam 9:​15-17, 21) “Di tardi”, ku sedu manga di anus mas tardi, raiña Ester ku Mordikai ku bin di jorson di Benjamin, juda pa israelitas ka matadu. — Est 2:​5-7; 8:3; 10:3.

18. Kuma ku no pudi kopia fidelidadi di jorson di Benjamin?

¹⁸ Ke ku no pudi aprindi? I pudi sedu di kuma tudu jorson di Benjamin kontentiba dimas, oca ku Saul sedu rei. Ma, oca ku Jeova muda renansa pa Davi di jorson di Judá, jorson di Benjamin bin kaba pa apoia Davi. (2 Sam 3:​17-19) Anus mas tardi, oca ku 10 jorson rebela kontra jorson di Judá, jorson di Benjamin kontinua sedu fiel pa jorson di Judá ku rei ku bin di familia di Davi. (1 Re 11:​31, 32; 12:​19, 21) Suma jorson di Benjamin, no pudi kontinua sedu fiel pa Deus, ora ku no kontinua sedu fiel pa kilis ku Jeova kuji pa diriẑi si povu aos. — 1 Tes 5:12.

19. Kuma ku profesia ku Jakó fasi antis di muri pudi judanu?

¹⁹ Profesia ku Jakó fasi antis di muri pudi judanu. Ke ku no aprindi aserka di profesia di Jakó i kuma ki kumpri, ta danu mas sertesa di kuma, utrus profesias ku sta na Palabra di Jeova na bin kumpri. Tambi oja kuma ku fijus di Jakó bensuadu, ta judanu ntindi minjor kuma ku no pudi kontenta Jeova.