Minjor manera di lida ku injustisa

1-2. Kuma ku manga di jintis ta reaẑi ora ke tratadu ku injustisa o e oja utrus tratadu ku injustisa? I ke ku no na bin oja?

NO STA na vivi na un mundu di injustisa. Manga di jintis ta tratadu ku injustisa, pabia e sedu pobri, pabia di se rasa, pabia di ke ke gosta del o utrus rason. Manga delis ta sufri pabia di alguns komersiantis riku o guvernantis ku ta preokupa so ku tene diñeru pa se kabesa. Es ku utrus injustisa ta afetanu tudu, di manera diretu o indiretu.

² No ka ta fika surprendidu manera ku manga di jintis ta paña raiba, pabia di injustisa ke ta oja na mundu aos. Anos tudu no misti vivi na un mundu nunde ku no na sinti suguru i sedu tratadu ku justisa. Alguns ta tenta risolvi purblemas ke ta oja na mundu o na se pais. E ta protesta kontra guvernantis ku leis, o e ta vota pa lideris pulitiku ku purmiti kaba ku injustisa. Ma, suma kristons, no nsinadu pa ka fasi parti “di mundu” i pa no pera pa Renu di Deus bin kaba ku tudu injustisa. (Jon 17:16) Ma mesmu asin, no ta sinti mal, i utrora ku raiba, ora ku no ta oja jintis tratadu di manera injustu. No pudi punta no kabesa: ‘Kuma ku N dibi di reaẑi diante di injustisa? Sera ki i ten algun kusa ku N pudi fasi gosi-gosi?’ Pa ruspundi es purguntas, no na oja kuma ku Jeova ku Jesus ta sinti ora ku jintis na tratadu ku injustisa.

JEOVA KU JESUS ODIA INJUSTISA

3. Pabia ki normal pa no sinti raiba kontra injustisa? (Isaias 5:7)

³ Biblia splikanu pabia ki normal pa no sinti raiba kontra injustisa. I sedu asin, pabia Jeova kumpunu pa no parsil, i el i “ama bardadi ku justisa.” (Sal 33:5; Kum 1:26) El nunka i aẑi ku injustisa, tambi i ka misti pa ningin aẑi des manera! (Lei 32:​3, 4; Mik 6:8; Zak 7:9) Pur isemplu, na tempu di profeta Isaias, Jeova obi “gritus” di manga di israelitas ku maltratadu pa se kumpañeris israelitas. (Lei Isaias 5:7.) Jeova kastiga kilis ku kontinua disobdisi si leis i trata utrus ku injustisa. — Isa 5:​5, 13.

4. Kuma ku Jesus sinti oca ki oja un algin sufri injustisa? (Jubi tambi diseñu.)

⁴ Suma Jeova, Jesus ama justisa i odia injustisa. Un bias ocalba na Tera, Jesus oja un omi difisienti ku si mon paralisa. Jesus sinti pena di omi i kural. Ma oca ku ŝefis riliẑiosu oja kila, e paña raiba. E fala kuma Jesus staba na viola lei di sabadu, e ka preokupa ku omi ku kaba di kuradu. Kuma ku Jesus sinti ku se reason? Jesus fikaba ku “tristesa, manera ke risu korson.” — Mar 3:​1-6.

5. Pabia ku no ka dibi di kontinua paña raiba pabia di un injustisa?

⁵ Jeova ku Jesus paña raiba pabia di injustisa, es ta mostra di kuma i ka mal si anos tambi no paña raiba pabia di injustisa. (Ef 4:26 ku nota di studu “Fiquem irados”) Ma no dibi di lembra di kuma kualker raiba ku no pudi sinti, mesmu si no tene rason di paña raiba no ka pudi risolvi purblema di injustisa. Na bardadi, si no kontinua ku raiba pa manga di tempu, no pudi duensi o paña depreson. (Sal 37:​1, 8; Tiagu 1:20) Pa kila, kuma ku no dibi di reaẑi ora ku anos o utrus sufri injustisa? No pudi aprindi ku isemplu di Jesus.

KUMA KU JESUS LIDA KU INJUSTISA

6. Oca Jesus staba na Tera, kal injustisas ku mas ta ojaduba? (Jubi tambi diseñu.)

⁶ Jesus ojaba manga di injustisa ocalba na Tera. I ojaba ŝefis riliẑiosu pui manga di regras ku ta kansaba povu. (Mat 23:​2-4) I sibiba kuma otridadi romanu ta trataba povu di manera duru. Manga di judeus mistiba sedu indipendenti di Roma. Te mesmu alguns forma grupus pa luta kontra romanus. Mesmu asin, Jesus ka kria nin i ka apoia un grupu pa tisi mudansa. Oca ku Jesus sibi di kuma jintis tene planu di fasil rei, i kuri delis. — Jon 6:15.

7-8. Pabia ku Jesus ka tenta kaba ku injustisa ocal na Tera? (Jon 18:36)

⁷ Ocal na Tera, Jesus ka yentra na pulitika pa kaba ku injustisa. Pabia di ke? I sibiba di kuma pekaduris ka tene diritu nin kapasidadi di guverna se kabesa. (Sal 146:3; Jer 10:23) E ka pudi tambi kaba ku kusa prinsipal ku pui injustisa ten. Satanas ku na guverna es mundu. El i malvadu i manga di jintis ta kopial. (Jon 8:44; Ef 2:2) Pabia di imperfeison mesmu pekaduris ku tene un bon ntenson ka ta aẑi sempri di manera justu. — Ekl 7:20.

⁸ Jesus sibiba di kuma, so Renu di Deus ku na bin kaba ku kusa prinsipal ku pui injustisa ten. I kila ku pui, i usa si tempu ku inerẑia pa “konta Bon Noba di renu di Deus.” (Luk 8:1) Des manera, i konsola tudu kilis ku misti oja fin di tudu injustisa ku maldadi. (Mat 5:6 ku nota di studu; Luk 18:​7, 8) Nin un guvernu di pekadur ka pudi fasi es mudansas, so Renu di Deus ku pudi fasil, i Renu di Deus i “ka de mundu”. — Lei Jon 18:36.

KOPIA ISEMPLU DI JESUS ORA KU BU NA LIDA KU INJUSTISA

9. Ke ku konvensiu di kuma so Renu di Deus ku na bin kaba ku tudu injustisa?

⁹ Injustisa ku no ta oja aos, i mas ciu di kil ku Jesus oja ocal na Tera. Ma motivu prinsipal di injustisa nes tempu di fin, kontinua sedu Satanas ku pekaduris imperfeitu ki ta influensia. (2 Tim 3:​1-5, 13; Apok 12:12) Suma Jesus, no sibi di kuma so Renu di Deus ku na bin kaba ku kusa prinsipal ku pui injustisa ten. Suma no ta apoia Renu di Deus no ka ta partisipa na marŝas des mundu, protestus ku utrus sforsus pa kaba ku injustisa. Jubi isemplu di un irma comadu Stacy.a Antis di kunsi bardadi, Stacy mati manga di bias na marŝas kontra injustisa. Ma i kumsa ku tene duvida aserka di ke ki staba na fasi. I fala sin: “Ora ku N bai manifestasons N ta punta ña kabesa, si na bardadi N sta na ladu sertu. Ma gosi ku N ta apoia Renu di Deus, N sibi kuma N sta na ladu sertu. N sibi di kuma Jeova ku na kaba ku tudu sufrimentu, kusa ku N ka pudi fasi.” — Sal 72:​1, 4.

10. Di akordu ku Mateus 5:​43-48, pabia ku no ka ta tenta muda leis ku guvernus? (Jubi tambi foto.)

¹⁰ Aos manga di jintis ta junta ku grupus ku ta tenta muda guvernus, ma e jintis manga di bias ta paña raiba dimas, e ta disobdisi leis i fasi utrus mal. I ka es ku Jesus nsinanu pa no fasi. (Ef 4:31) Un ermon comadu Jeffrey fala sin: “N sibi di kuma ora ku jintis junta pa manifestason, i ka ta tarda e pudi kumsa ku paña raiba, dana kusas, furta i te mesmu molostra n̈utru.” Ma Jesus nsinanu pa no trata tudu jintis ku amor, mesmu kilis ku ka sta di akordu ku nos o ku ta pirsiginu. (Lei Mateus 5:​43-48.) Suma kristons no ta fasi tudu ku no pudi pa ivita fasi kualker kusa ku ka sta di akordu ku ke ku Jesus nsinanu.

11. Pabia ku utrora i ta sedu difisil kopia isemplu di Jesus?

¹¹ No sibi di kuma Renu di Deus ku na bin ku injustisa di un bias pa sempri, ma mesmu asin no pudi oja di kuma i difisil kopia isemplu di Jesus ora ku no tratadu ku injustisa. Jubi ke ku kontisi ku Janiya, ku tratadu mal pabia di si kor di peli. I fala sin: “N paña raiba mal. Tambi N mistiba pa ki jintis kastigadu pa ke ke fasi. Dipus N staba na pensa apoia un muvimentu o grupu ku ta protesta kontra rasismu ku diskriminason. N oja di kuma fasi es i minjor manera di kalma ña raiba.” Ma ku tempu, Janiya oja di kuma i pirsisa di muda si manera di pensa. I fala sin: “N nota di kuma, en ves di N konfia na Jeova, N kumsa ku fia na ke ku jintis ta fala, i N konfia nelis. N disidi korta tudu kontaktu ku es grupu.” No dibi di toma kuidadu pa ka disa pa kualker raiba ku no pudi sinti pabia di injustisa, lebanu na fasi parti des mundu. — Jon 15:19.

12. Pabia ku no dibi di toma kuidadu ku informasons ku no ta lei, ku no ta jubi o obi?

¹² Ke ku pudi judanu kontrola no raiba kontra injustisa? Manga delis oja di kuma i bon toma kuidadu ku informasons ku no ta lei, ku no ta obi i jubi. Alguns storias ku ta kontadu na internet ta fasidu ku objetivu di pui jintis paña raiba i reklama kontra guvernu. Manga di bias jornalistas ta sta so na konta se opinion, i ka ke ku na bardadi kontisi. Mesmu si un informason i bardadi, kontinua lei ki informason ka na risolvi purblema. Na bardadi, si no pasa manga di tempu na lei o sukuta es tipu di informason, kila pudi fasinu fika mas preokupadu, tristi i ku raiba. (Dit 24:10) Pior inda, i pudi fasinu diskisi di kuma uniku suluson pa tudu injustisa i Renu di Deus.

13. Kuma ku lei Biblia kada dia pudi judanu ora ku no oja injustisa?

¹³ Lei Biblia kada dia i pensa fundu nel pudi judanu lida ku injustisa. Un irma comadu Alia, fikaba mal dimas oca ki oja alguns jintis na maltratadu. I fikaba mal, pabia kilis ku na maltrata utrus ka staba na kastigadu. I fala sin: “N para N punta ña kabesa: ‘Sera ki na bardadi N fia di kuma Jeova na risolvi es purblema?’ Duranti ki tempu N lei Jo 34:​22-29. Es versikulus lembrantan di kuma ningin ka pudi sugundi di Jeova. El i uniku ku sibi kuma ki na julga jintis, i uniku ku na bin risolvi tudu purblemas.” Nkuantu no na pera pa Renu di Deus tisi justisa di bardadi, no pirsisa di sibi kuma di lida ku injustisa gosi. Kuma ku no pudi fasil?

KE KU NO PUDI FASI GOSI PA LIDA KU INJUSTISA

14. Ke ku no pudi fasi gosi pa ka kontribui pa i ten injustisa nes mundu? (Kolosensis 3:​10, 11)

¹⁴ No ka pudi kontrola kusas injustu ku utrus ta fasi, ma no pudi kontrola ke ku no ta fasi. Suma ku no ojaba, no ta kopia isemplu di Jesus ora ku no mostra amor. Es amor pudi lebanu na trata utrus ku rispitu, mesmu kilis ku fasinu injustisa. (Mat 7:12; Rom 12:17) Jeova ta kontenti ora ku no trata tudu jintis ku bondadi i di manera justu. — Lei Kolosensis 3:​10, 11.

15. Kuma ku no ta juda jintis ora ku no na konta elis ke ku Biblia fala aserka di injustisa?

¹⁵ Minjor manera di juda jintis i konta elis ke ku Biblia fala. Pabia ku no pudi fala es? Pabia ‘kuñisimentu di Jeova’ pudi fasi pa un algin ku seduba agresivu i violentu pasa sedu un algin bondosu i ku ama pas. (Isa 11:​6, 7, 9) Antis di kunsi bardadi, un omi comadu Jemal junta ku un grupu ku na lutaba pa muda guvernu na se tera, pabia i pensaba di kuma ki guvernu ka bali. I fala sin: “Bu ka pudi pui jintis muda aforsa. Ningin ka pun muda aforsa, ma N muda pabia di bardadi di Biblia ku N aprindi.” Ke ku Jemal aprindi motival pa i para ki luta. Pa kila, ora ku no nsina jintis bardadi ku sta na Biblia, no ta juda elis pa para fasi utrus mal.

16. Pabia ku bu misti konta utrus ke ku Renu di Deus na bin fasi?

¹⁶ Suma Jesus, no ta konta jintis di kuma so Renu di Deus ku na bin kaba ku injustisa di un bias pa sempri. Es speransa pudi anima kilis ku na maltratadu. (Jer 29:11) Stacy ku faladuba del, fala sin: “Kunsi bardadi judan lida ku injustisas ku N oja ku kilis ku N pasa. Jeova ta usa mensaẑen di Biblia pa da konsolu.” No pirsisa di sta purparadu pa konsola utrus ku purmesas ku sta na Biblia. Si no konvensi no kabesa di bardadis di Biblia ku faladu del nes studu, no na sta mas purparadu pa papia des asuntu ku rispitu, si faladu del na skola o na kau di tarbaju.b

17. Kuma ku Jeova ta judanu lida ku injustisas ku no ta oja aos?

¹⁷ No sibi di kuma, no na kontinua oja injustisa nkuantu Satanas kontinua sedu “ŝef de mundu”. Ma no sibi di kuma kusas na bin minjoria pabia Jeova purmiti judanu gosi, tambi i na bin kaba ku Satanas ku tudu maldadi. (Jon 12:31) Atraves di Skrituras, Jeova ka kontanu so pabia ki ten manga di injustisa, ma i kontanu tambi di kuma i ta preokupa ku kilis ku ta sufri maltratu. (Sal 34:​17-19) Atraves di si Fiju, Jeova nsinanu kuma ku no dibi di reaẑi ora ku no sufri injustisa o no oja utrus na sufri injustisa, i nsinanu tambi di kuma i ka na tarda si Renu na bin kaba ku injustisa di un bias pa sempri. (2 Ped 3:13) No kontinua fasi tudu ku no pudi pa prega bon noba aserka des Renu i kontinua pera tempu ku Tera na inci di “justisa ku vida retu”. — Isa 9:7.