1925 — Sen anus atras

POVU DI DEUS TENBA DI KONTINUA PERA

Manga di Studantis di Biblia pensaba di kuma, Tera na bin sedu paraísu na 1925. Ermon Albert Schroeder ku mas tardi bin sirbi suma membru di Korpu Guvernanti, fala sin aserka des: “No fiaba di kuma, na 1925 unjidus na bai pa seu, i kilis ku seduba fiel suma Abraon, Davi ku utrus na lantandadu, pa toma lideransa na Tera.” Ma kontra kila ka kontisi, alguns ermons ku irmas fikaba disanimadu. — Dit 13:12.

Mesmu manera ku Studantis di Biblia staba disanimadu, maioria delis kontinua prega. E kumsa nota di kuma prega aserka di Jeova seduba kusa mas importanti ke dibi di fasi. No jubi kuma ke usa radiu pa prega manga di jintis.

ERMONS KUMPU UTRUS STASONS DI RADIU

Na 1924, manga di jintis ta sukutaba stason di radiu WBBR. Ma na 1925, Studantis di Biblia kumpu utru stason di radiu garandi, pertu di Chicago, Illinois. Nomi des radiu i WORD. Un ermon comadu Ralph Leffler, ku juda na kumpu radiu fala di kuma na tempu di friu di noti, jintis na manga di lugaris ku sta lunju ta obiba es radiu. Pur isemplu, un familia ku moraba mas di 5.000 kilometru, na sidadi di Pilot, na Alaska, obiba purmeru imison di radiu. Dipus ke obi programa, e skirbi un karta pa gardisi kilis ku ta tarbaja na radiu pa manera ke purpara programa pa nkoraẑa elis i juda elis kunsi mas Deus ku Biblia.

Sintinela di 1 di Dizembru di 1925, splika pabia ku manga di jintis ta konsigiba obi programa. Es Sintinela fala sin: “WORD i un di radius mas garandi di Stadus Unidu. Jintis pudi obil na zona Lesti ku Oesti di Stadus Unidu, Kuba ku partis mas lunju na norti di Alaska. Manga di jintis ku nunka obi faladu di bon noba, misti aprindi mas, pabia e ta obiba es radiu.”

Na mesmu tempu, Studantis di Biblia misti tambi usa radiu pa prega bon noba na Kanada. Na 1924, Studantis di Biblia kumpu stason di radiu CHUC na Saskatoon, Saskatchewan. I seduba un di purmerus radiu riliẑiosu na Kanada. Na 1925 i pirsisaduba di un lugar mas garandi pa radiu. Pa kila, organizason muda si studiu pa prediu Regent, un antigu salon di filmi ke kumpra i e renova na Saskatoon.

Pabia des radiu, manga di jintis ku mora na tabankas pikininu di Saskatchewan, obi bon noba pa purmeru bias. Pur isemplu, na un tabanka lunju, un minjer comadu Graham, pidi publikasons basiadu na Biblia, dipus ki obi programa di radiu. Ermon George Naish fala di kuma i sta suma si Graham sta na fasi pididu ku urẑensia, pa kila no manda logu tudu volumi di livru Estudos das Escrituras. Puku tempu dipus, Graham kumsa ku prega mensaẑen di Renu te mesmu na zonas lunju.

NO APRINDI UN BARDADI IMPORTANTI

Sintinela di 1 di Marsu di 1925 tene un artigu importanti ku na fala di nasimentu di nason. Pabia ku ki artigu seduba importanti dimas? Studantis di Biblia, sibiba di kuma Satanas sta na manda riba di dimonius, riliẑions falsu, guvernus ku sistema komersial di mundu. Ma, atraves des artigu “servu jiru, di fiansa” juda ermons ku irmas ntindi di kuma Jeova tambi tene un organizason. Es organizason diferenti ciu ku organizason di Satanas, tambi i sta kontra Satanas ku kilis ku ta sigil. (Mat 24:45) Servu jiru di fiansa splika tambi di kuma, Renu di Deus kumsa ku manda na 1914. E splika tambi di kuma pabia di ‘gera ku rebenta na seu’, Satanas ku si dimonius serkadu di seu i gosi e sta li na Tera i e tujidu riba pa seu. — Apok 12:​7-9.

Alguns Studantis di Biblia ka konkordaba ku nobu ntindimentu. Pa kila, artigu di ki Sintinela da elis es konsiju: “Si kin ku na lei es Sintinela ka konkorda ku nobu ntindimentu, i dibi di sedu pasenseru, konfia na Jeova i kontinua sirbil ku fidelidadi.”

Ma Tom Eyre, un kolpotor (ku gosi ta comadu pioneru) di Gran-Bretaña konta kuma ku maioria di Studantis di Biblia sinti ku ki artigu: “Ermons gosta ciu di splikason di Apokalipsi 12. Oca ku no ntindi di kuma Renu di Deus sta ja na manda na seu, no kontenti dimas di konta es bon noba pa utrus. Kila fasinu misti prega mas, tambi i judanu oja di kuma Jeova na bin fasi kusas garandi na futuru.”

PREGA ASERKA DI JEOVA

Aos, Tustumuñas di Jeova ta papia ciu di Isaias 43:10 ku fala sin: “SIÑOR fala: ‘Abos bo sedu ña tustumuñas, bo sedu ña servu ku N kuji’.” Ma, antis di 1925, es testu ka ta faladuba ciu del na no publikasons. Es bin muda. Na 1925, Sintinela fala di Isaias 43:10 ku 12 na 11 diferentis Sintinelas!

Na fin di Agustu di 1925, Studantis di Biblia mati kongresu na Indianapolis, Indiana. I skirbidu un mensaẑen di ben-vindu di Joseph F. Rutherford na programa di kongresu, ku fala sin: ‘No bin nes kongresu pa risibi forsa di Siñor, pa ora ku no riba no na tene forsa di prega ku mas animu.’ Na tudu es oitu dia di kongresu, tudu kilis ku mati nkoraẑaduba pa prega aserka di Jeova na kada oportunidadi.

Na sabadu 29 di Agustu, ermon Rutherford fasi un diskursu ku na fala di importansia di prega. I fala sin: “Jeova fala si povu . . . : ‘Abos i ña tustumuñas, Ami i Deus.’ Dipus i da elis ordi ku vos forti: ‘Bo lantanda un sinal pa nasons.’ Uniku jintis na Tera ku pudi da tustumuñu aserka di Jeova i kilis ku Jeova ta gia ku si spiritu, pabia e sedu si povu.” — Isa 43:12; 62:10.

Dipus ku ermon Rutherford kaba fasi diskursu, i lei un dukumentu ku tene tema “Mensagem de Esperança”. Tudu kilis ku mati es kongresu konkorda ku es mensaẑen ku fala di kuma, Renu di Deus i uniku speransa pa risibi “benson di pas, prosperidadi, saudi, vida, liberdadi ku filisidadi pa sempri.” Es dukumentu bin traduzidu na manga di lingua i imprimidu suma tratadu. Serka di 40 milyon des tratadu dadu pa jintis.

Pa manga di anus, Studantis di Biblia ka muda se nomi pa Tustumuñas di Jeova. Ma e kumsa ku ntindi pabia ki i importanti da tustumuñu aserka di Jeova.

STUDANTIS DI BIBLIA KUMSA KU REVISITA KILIS KU MOSTRA INTERESI

Suma numeru di Studantis di Biblia sta na aumenta na mundu ntidu, organizason nkoraẑa ermons pa e ka disa so publikasons, ma tambi pa e riba i visita kilis ku mostra interesi na bon noba. Dipus di kampaña Mensagem de Esperança, Bulitina da es instruson: “Bo riba pa visita jintis nunde ki disaduba tratadu Mensagem de Esperança.”

Bulitin di Janeru di 1925 tene relatoriu di un Studanti di Biblia na sidadi di Plano, Texas. I fala sin: ‘No fika dimiradu manera ku tiritoriu ku no prega manga di bias ta tene sempri minjor rusultadu di ki kilis ku no kumsa ku prega. Un sidadi pikininu na no tiritoriu pregadu sinku bias na ultimu 10 anu. I ka tarda, irma Hendrix ku ña mame riba la i e disa manga di livrus ku nunka e cigaba di disa antis.’

Tambi na Panama, un kolpotor fala sin: “Manga di jintis ku negaba obin pa purmeru bias ku N visita elis, muda oca ku N riba sugundu o terseru bias pa visita elis. Es anu, N pasa mas tempu na visita kilis ku N visitaba antis, i N tene manga di bon spiriensias ku alguns delis.”

PROJETUS PA FUTURU

Na fin di 1925, ermon Rutherford skirbi karta pa pionerus, i fala elis di ke ku fasidu na pregason na ki anu, i ke ku dibi di fasidu na anu ku na bin. I fala sin: ‘Na anu ku pasa bo teneba privileẑiu di nkoraẑa manga di jintis ku staba disanimadu pa manera ku bo prega bon noba. Es tarbaju da bos alegria na korson. Na 1926, bo na tene manga di oportunidadi di papia aserka di Deus ku si Renu i mostra ba kin na bardadi ku sedu si servus. Pa anos tudu juntu no kontinua usa no vos pa ngaba no Deus ku no Rei.’

Na fin di 1925, ermons fasi planu pa pui pa Betel di Brooklyn torna mas garandi. Anu 1926 kumsa ku projetu di konstruson mas garandi ku organizason nunka ka ciga di fasi.