Lembra ora pa utrus

1. Kuma ku no sibi di kuma no orasons i importanti pa Jeova?

ORASON i un prenda bonitu dimas. Pensa so nes: Jeova da anjus sertus tarbajus. (Sal 91:11) I da tambi si Fiju un tarbaju importanti dimas. (Mat 28:18) Ma sera ki i kuji un algin pa ba ta sukuta no orasons? Nau, i un kusa ku Jeova disa so pa rel. Jeova “ta obi orason”, i disidi ba ta sukuta no orason el propi. — Sal 65:2.

2. Di kal manera ku apostolu Paulu sedu un bon isemplu di algin ku ta ora pa utrus?

² No pudi konta Jeova na orason kusas ku na preokupanu, ma tambi no dibi di ora pa utrus. I es ku apostolu Paulu fasi. Pur isemplu, i ora pa kongregason na Éfesu, i fala elis: “N na lembra di bos na ña orason”. (Ef 1:16) Paulu ora tambi pa utrus. Pur isemplu, i fala Timótiu: “N ta fala Deus obrigadu, . . . ora ku N na coma bu nomi na orason di noti ku di dia.” (2 Tim 1:3) Paulu tene si propi purblema ki pudi ora aserka del. (2 Kor 11:23; 12:​7, 8) Ma mesmu asin, i ta tira tempu pa ora pa utrus.

3. Pabia ku utrora no ta diskisi ora pa utrus?

³ Utrora no pudi diskisi ora pa utrus. Pabia? Un irma comadu Sabrinaa fala di un di kusa ku pudi punu diskisi. I fala sin: “Vida nes mundu ta pui no sta okupadu dimas. No pudi pensa so na no purblemas, i ora so pa kusas ku no pirsisa del.” Sera ki bu nota di kuma es ta kontisi ku bo? Si asin, es studu pudi judau. I na splika (1) pabia ki importanti ora pa utrus, i (2) i na da ideias di kuma ku no pudi fasil.

PABIA KU NO DIBI DI ORA PA UTRUS?

4-5. Kuma ku ora pa utrus ‘tene puder, i ta da bon rusultadu’? (Tiagu 5:16)

⁴ Ora pa utrus ‘tene puder, i ta da bon rusultadu.’ (Lei Tiagu 5:16.) Sera ki orason na bardadi pudi juda na muda situason di un algin? Sin i pudi. Jesus sibiba di kuma apostolu Pedru na negal. I fala: “N ora pa bo, pa ka bu pirdi fe.” (Luk 22:32) Paulu tambi sibiba di kuma orason pudi juda na muda situason di un algin. Oca ki prindidu di manera injustu na Roma, i skirbi pa Filemon: “N spera kuma Deus na ruspundi bo orason, i na mandan pa bos.” (Filem 22) I es propi ku kontisi, i ka tarda Paulu libertadu di prison, i kontinua si tarbaju di pregason.

⁵ I klaru di kuma, no orasons ka na obriga Jeova pa i fasi sempri ke ku no pidil. Jeova ta nota di kuma, ke ku si servus ta pidil i un kusa ku ta preokupa elis, i utrora i ta disidi fasi ke ke pidil. Sibi des pudi judanu yabri no korson, i konta Jeova no situason na orason, i ku konfiansa disa asuntu na si mon. — Sal 37:5; jubi 2 Koríntius 1:11 ku nota di studu.

6. Kuma ku ora pa utrus ta afeta ke ku no ta sinti pa relis? (1 Pedru 3:8)

⁶ Ora pa utrus pudi judanu “sedu bondosu” o sinti pena. (Lei 1 Pedru 3:8.) Un algin ku ta sinti pena ta nota sufrimentu di utrus, tambi i ta misti fasi algun kusa pa judal. (Mar 1:​40, 41) Un ansion comadu Michael fala sin: “Ora ku N ora pa utrus aserka di se nesesidadi, N mas ta ntindi purblemas ke sta na pasa i ña amor pa relis ta aumenta. N mas ta pertusi delis mesmu si e ka nota kila.” Un ansion comadu Richard fala di utru benefisiu. I fala sin: “Ora ku no ora pa un algin, no mas ta sinti motivadu pa fasi un kusa pa judal. Ora ku no juda un algin ku no ora pa rel, i ta sta suma si no juda pa ruspundi orason ku no fasi pa rel.”

7. Kuma ku ora pa utrus ta judanu pa ka pensa so na no purblemas? (Filipensis 2:​3, 4) (Jubi tambi fotos.)

⁷ Ora pa utrus ta juda pa ka no konsentra ciu na no purblemas. (Lei Filipensis 2:​3, 4.) Kada un di nos tene purblema, pabia no sta na vivi na un mundu kotroladu pa Diabu. (1 Jon 5:19; Apok 12:12) Ora ku no ta ora sempri pa utrus, kila ta lembrantadu di kuma no ermons sta “na pasa mesmu sufrimentu na tudu mundu.” (1 Ped 5:9) Un pioneru comadu Katherine fala sin: “Ora pa utrus ta lembrantan di kuma utrus tambi tene purblemas. Lembra des ta judan para pensa ciu na ña propi purblemas.”

E PIRSISA DI NO ORASONS

8. Bu pudi da isemplus di jintis ku no pudi ora pa relis.

⁸ Ba kin ku no pudi ora pa relis? No pudi ora pa un grupu di jintis suma kilis ku sta duenti, jovens ku ta gozadu, o ku se kolegas di skola ta tenta pa fasi mau kusas, o pa kilis ku sta na sufri pabia di idadi. Manga di no ermons ku irmas ta pasa pirsigison di se familia o di guvernu. (Mat 10:​18, 36; At 12:5) Alguns di no ermons ta disa se kasa pabia di purblemas pulitiku. Utrus ta sufri pabia di disastris natural. No pudi ka kunsi es ermons ku irmas. Ma no pudi ora pa relis. Asin no na mostra di kuma no sta na sigi mandamentu di Jesus di “ama n̈utru.” — Jon 13:34.

9. Pabia ku no dibi di ora pa kilis ku ta toma diantera na organizason di Jeova, i pa se minjeris tambi?

⁹ No pudi tambi ora pa kilis ku ta toma diantera na organizason di Jeova. Es nklui Korpu Guvernanti, se ajudantis, Kumisons di Filial, kilis ku sedu responsavel na Betel, superintendentis di sirkuitu, ansions na kongregason ku servus ministerial. Manga des ermons ta tene se propi purblemas, ma mesmu asin e ta tarbaja duru pa judanu. (2 Kor 12:15) Pur isemplu, un superintendenti di sirkuitu comadu Mark fala sin: “Un di kusas mas difisil pa mi, i sta lunju di ña papes ku tene idadi. Elis tudu e tene purblemas di saudi. Mesmu manera ku ña irma ku si omi ta kuida ben delis, N ta fika tristi pa manera ku N ka pudi sta la pa juda elis suma ku N mistiba.” No pudi ka kunsi tudu purblemas kes ermons ku ta tarbaja duru ta pasa, ma no dibi di lembra ba ta ora pa relis. (1 Tes 5:​12, 13) No pudi tambi ora pa minjeris des ermons, pabia e ta apoia se omis pa e kontinua tarbaja pa kongregason.

10-11. Sera ki Jeova ta kontenti ku no orasons, mesmu si no ka coma nomi di un ermon o irma? Bu pudi splika.

¹⁰ Suma ku no oja, manga di bias no pudi ora pa un grupu di ermons ku irmas. Pur isemplu, si no ka lembra di un algin, no pudi pidi Jeova pa i juda kilis ku sta na prison o pa konsola kilis ku tene cur. Un ansion comadu Donald fala sin: “No tene manga di ermons ku irmas ku tene purblemas, i utrora no pudi fasi un orason ẑeral pa nklui tudu kilis ku sta na sufri.”

¹¹ Sera ki es orasons ta kontenta Jeova? Sin duvida i ta kontental! No ka sibi ke propi ku kada ermon o irma pirsisa del. Pa kila, i bon pa no fasi orason ẑeral pa grupu di ermons ku irmas. (Jon 17:20; Ef 6:18) Es orasons ta mostra di kuma no tene ‘amor pa ermons na mundu ntidu.’ — 1 Ped 2:17.

ORA KU NO NA ORA PA UN ALGIN

12. Kuma ku jubi diritu no ermons ku irmas pudi judanu, ora pa kusas kelis propi e pirsisa del?

¹² Jubi bu ermons ku irmas diritu. Alen di ora pa un grupu di ermons ku irmas, no dibi di ora tambi pa kada un delis. Sera ki i ten algin na bo kongregason ku tene duensa ku tarda? Sera ki i ten joven na bo kongregason ku sta disanimadu pabia kolegas di skola ta tental fasi mau kusas? Sera ki i ten un pape o mame ku sta na sforsa pa kria se fiju na ‘disiplina ku nsinamentu di Jeova’? (Ef 6:4) Ora ku bu ta jubi diritu bu ermons ku irmas, bu amor ku pena ku bu ta sinti pa relis ta aumenta, i kila na pui pa bu ora pa relis.b — Rom. 12:15.

13. Kuma ku no pudi ora pa kilis ku no ka kunsi?

¹³ Usa nomi di utrus na bu orason. Bu pudi fasil mesmu si bu ka kunsi elis. Pur isemplu, pensa na ermons ku irmas ku prindidu, suma kilis ku sta na Krimeia, Eritreia, Rusia ku Singapura. Na jw.org, bu pudi oja nomis di kilis ku sta na prison.c Un superintendenti di sirkuitu comadu Brian fala sin: “Ora ku N skirbi nomi di un ermon o irma ku prindidu i coma es nomi na vos altu, i ta sedu mas fasil lembra del ora ku N na ora.”

14-15. Kal kusas izatu ku no pudi ora pa rel?

¹⁴ Ora pa kusas izatu. Michael ku faladuba del na kumsada fala sin: “Ora ku N lei notisias na jw.org aserka di ermons ku prindidu, N ta tenta imaẑina kuma ku N na sinti si N staba na se situason. N sibi di kuma N na staba preokupadu ku ña minjer, i N na mistiba tene sertesa di kuma i tene tudu ke ki i pirsisa del. Kila ta judan pa N sibi ke propi ku N pudi fala na ña orason, ora ku N na ora pa ña ermons ku prindidu i ku kasa.” — Eb 13:3.

¹⁵ Ora ku no tenta imaẑina kuma ku vida dibi di sedu pa no ermons ku irmas na prison, kila pudi judanu pensa na utrus kusas ku no pudi ora pa rel. Pur isemplu, no pudi ora pa guardas di prison mostra bondadi pa no ermons ku irmas i disa elis adora Jeova na prison, suma tene Biblia, prega utrus i asin pa dianti. (1 Tim 2:​1, 2) No pudi ora pa kongregason nkoraẑadu pa isemplu di ermons ku irmas fiel ku prindidu. Tambi no pudi ora pa kilis ku ka sedu Tustumuñas di Jeova, pa e pudi nota bon komportamentu di no ermons ku irmas na prison i pa e obi no mensaẑen. (1 Ped 2:12) No pudi fasi mesmu kusa, ora ku no na ora pa no ermons ku irmas ku sta na pasa pa utru tipu di purblemas. Ora ku no jubi no ermons ku irmas, usa se nomi na orason i pidi kusas izatu ke pirsisa del, no pudi mostra di kuma no “amor” pa relis torna forti. — 1 Tes 3:12.

NO OJA NO ORASONS DI MANERA EKILIBRADU

16. Kuma ku no pudi kontinua oja no orasons di un manera ekilibradu? (Mateus 6:8)

¹⁶ Suma ku no oja, ora ku no ora pa un algin, kila pudi juda pa si situason muda. Ma, no pirsisa di oja orason di un manera ekilibradu. No dibi di lembra di kuma, ora ku no na ora, no ka ta sta na konta Jeova kusa ku el i ka sibi. Tambi Jeova ka pirsisa di no konsiju na kuma ki na kuida di un situason. Jeova sibi ke ku si servus pirsisa del, mesmu antis de sibil o di no sibil. (Lei Mateus 6:8.) Ke ku manda gora no dibi di ora pa utrus? Alen di motivus ku faladu del nes studu, orason i un manera di mostra di kuma no ta preokupa ciu ku utrus. Amor ta lebanu ora pa n̈utru. Tambi Jeova ta kontenti di oja di servus na kopia si amor.

17-18. Kuma ku no pudi kompara orasons ku no ta fasi pa no ermons ku irmas?

¹⁷ Mesmu si no orasons parsi di kuma i ka muda un situason, e ta mostra di kuma no ama no ermons ku irmas, i Jeova ta nota di kila. No pudi komparal des manera: Imaẑina un familia ku tene un fiju macu ku un fiju femia. Rapasiñu sta duenti. Bajudasiñu pidi si pape, i falal: “Ten pasensa, fasi un kusa pa ña ermon. I duensi risu!” Pape sta ja na kuida di situason. I ama si fiju, tambi i sta na kuida ben del. Ma, pape ta kontenti dimas di oja si fiju femia preokupa ciu ku si ermon, tok i na pidil pa i judal.

¹⁸ Di mesmu manera, Jeova ta nkoraẑanu pa no preokupa ku n̈utru i ora pa n̈utru. Ora ku no fasil, no ta mostra di kuma no ka ta preokupa so ku no kabesa, ma tambi no ama no ermons ku irmas. Tambi Jeova ta nota di kila. (2 Tes 1:3; Eb 6:10) Suma ku no oja nes studu, alguns orasons pudi te mesmu juda na muda situason di un algin. Pa kila, no lembra ora pa n̈utru.