Kuma ku bu pudi minjoria bu orasons

1-2. (a) Ora ku no na ora, ke ku pudi tujinu konta Jeova ke na bardadi ku no sta na sinti? (b) Kuma ku no sibi di kuma Jeova ta sukuta diritu no orasons?

SERA ki bu ta nota di kuma utrora bu ta papia di mesmu kusas na orason, o manga di bias bu ka ta konta Jeova ke ku bu sta na sinti? Si sedu asin, abo i ka uniku. Pabia di manga di kusas ku no ten ku fasi, utrora no ta fasi orason rapidu. O talves bu ta nota di kuma i difisil konta Jeova ke na bardadi ku bu sta na sinti, pabia bu pensa di kuma bu ka mersi papia ku el.

² Biblia nsinanu di kuma ke ki importanti pa Jeova i ka kuma ku no ta spresa ora ku no na ora, ma i pa no ora di tudu korson. I ta obi “diseẑus di jintis mansu.” (Sal 10:17) I ta sukuta diritu tudu ke ku no ta fala, pabia na bardadi i ta preokupa ku nos. — Sal 139:​1-3.

3. Kal purguntas ku no na fala del nes studu?

³ Talves no pudi punta: Pabia ku no ka tene motivu di tene medu di konta Jeova ke propi ku no sta na sinti ora ku no na ora? Kuma ku no pudi ora di un manera ku na pertusinu mas di Jeova? Ke ku no pudi aprindi di orason di servus di Jeova ku faladu del na Biblia, i kuma ke pudi minjoria no orasons? Ke ku no pudi fasi si no sta preokupadu dimas i no ka sibi ke ku no na fala Jeova na orason? No na oja respostas des purguntas.

KA BU TENE MEDU DI ORA JEOVA

4. Ke ku pudi judanu ora Jeova ku konfiansa? (Salmu 119:145)

⁴ Ora ku no ntindi di kuma Jeova i un amigu fiel, ku misti ke ki ben pa nos, no na sta avontadi pa kontal ke ku no sta na pensa i sinti. Skirbidur di Salmu 119 ta tenta oja Jeova des manera ora ki na ora. I teneba purblemas na vida. I ten kilis ku ta kontaba mintida kontra el. (Sal 119:​23, 69, 78) Utrora i ta sintiba disanimadu pabia di si erus. (Sal 119:67) Ma mesmu asin, i ka teneba medu di yabri si korson pa Jeova. — Lei Salmu 119:145.

5. Pabia ku no ka dibi di disa pa sentimentus negativu tujinu ora? Bu pudi da un isemplu.

⁵ Jeova misti pa te mesmu kilis ku fasi pekadus gravi fasi orason. (Isa 55:​6, 7) Pa kila, no ka dibi di disa sentimentus negativu tujinu ora. Pur isemplu, un algin ku pirdi na matu o ku ka rapada kamiñu di riba, pudi pidi ajuda, asin kilis ku sta pertu pudi judal. Sera ki i dibi di medi pidi ajuda, pabia i burguñu pa manera ki pirdi o pa eru ki fasi? Nau! Di mesmu manera, si utrora no ka sibi ke ku no na fasi o no fasi un pekadu, no pudi ora Jeova ku konfiansa. — Sal 119:​25, 176.

KUMA KU BU PUDI ORA DI UN MANERA KU NA PERTUSIU MAS DI JEOVA

6-7. Ke ku pudi judanu konta Jeova ke propi ku no sta na sinti? Bu pudi da un isemplu. (Jubi tambi nota bas di paẑina.)

⁶ Ora ku no konta Jeova ke propi ku no sta na pensa i sinti, no ta pertusi mas del. Pa kila, ke ku no pudi fasi pa minjoria no orason?

⁷ Pensa na maneras di sedu di Jeova.a Mas no pensa na maneras di sedu di Jeova, mas no na konsigi kontal ke ku no sta na pensa i sinti. (Sal 145:​8, 9, 18) Jubi isemplu di Kristine, un irma ku si pape seduba violentu. I fala sin: “Papia ku Jeova na orason suma un Pape ka seduba fasil pa mi. N pensaba di kuma pabia di ña erus i na bandonan.” Kal maneras di sedu di Jeova ku judal? I fala sin: “Amor fiel di Jeova fasin sinti suguru. N sibi di kuma i na sta sempri ku mi. Mesmu si N fasi erus, i na kontinua aman i judan. Es judan pa N kontal tudu kusas ku ta pun sinti filis i ku ta preokupan.”

8-9. Kal ki alguns benefisius ku bu ta tene, ora ku bu pensa na ke ku bu misti fala antis di ora? Bu pudi da un isemplu.

⁸ Pensa na ke ku bu misti fala. Antis di ora, bu pudi fasi alguns purguntas pa bu kabesa. Pur isemplu: ‘Kal purblemas ku N sta na pasa gosi? I ten un algin ku N pirsisa di purda? Sera ki pabia di algun mudansa na ña vida pui pa N pirsisa di ajuda di Jeova?’ (2 Re 19:​15-19) No pudi tambi sigi ke ku Jesus nsinanu fala na orason, ora ku no pensa na ke ku no pudi pidi Jeova aserka di si nomi, si Renu ku si vontadi. — Mat 6:​9, 10.

⁹ Oca ku un irma comadu Aliska sibi di kuma si omi teneba un kankru na kabesa, i ta seduba difisil pa i ora. I fala sin: “N ta staba preokupadu dimas, i ta difisil konsentra na ke ku N na fala na orason.” Ke ku judal? I fala sin: “Antis di N ora N ta pensa na ke ku N na fala Jeova, asin N ka ta konsentra na ña kabesa o na duensa di ña omi. Ora ku N fasi es N ta sta mas kalmu, i N ta konsigi ora Jeova aserka di diferentis kusas.”

10. Pabia ku no dibi di toma tempu ora ku no na ora? (Jubi tambi fotos.)

¹⁰ Toma tempu ora ku bu na ora. I bardadi di kuma orasons kurtu pudi pertusinu di Jeova, ma ora ku no toma tempu pa ora di kumpridu, i na mas fasil konta Jeova ke ku no sta na sinti.b Omi di Aliska comadu Elijah, fala sin: “N ta tenta ora manga di bias na un dia, ma N ta sinti mas pertu di Jeova ora ku N toma tempu pa fasi orason kumpridu. Jeova i pasenseru, i ka ta ten dipresa pa N kaba orason, pa kila, N ta toma tempu na orason.” Tenta fasi es: Kuji ora ku kau nunde ku bu pudi fasi orason sin ntrumpidu, i nunde ku bu pudi fasi orasons kumpridu, talves na vos altu, dipus sforsa fasi es sempri.

APRINDI DI ORASONS DI SERVUS DI JEOVA KU FALADU DEL NA BIBLIA

11. Kuma ku no ta judadu, ora ku no pensa fundu na orasons di servus di Jeova ku faladu del na Biblia? (Jubi tambi kuadru “Sera ki bu ta sinti suma elis?”)

¹¹ Pensa na orasons ku kantigas ku servus di Jeova ku faladu del na Biblia fasi pa ngaba Jeova pudi judanu. Ora ku bu oja kuma ku servus di Jeova ta fala di se pensamentus ku se sentimentus fundu, kila pudi judau pa bu yabri bu korson pa Jeova. Se orasons pudi judau pa bu oja nobu palabras ku bu pudi usa na bu orasons. Talves bu na diskubri orasons nunde ku servus di Jeova fala di mesmu kusas ku bu ta sinti, i pidi mesmu kusas ku bu misti pidi.

12. Kal purguntas ku no pudi fasi no kabesa, ora ku no lei orasons ku sta na Biblia?

¹² Ora ku bu na lei un orason ku sta na Biblia, bu pudi punta bu kabesa: ‘Kin ku fasi es orason, kuma ku si vida seduba i pabia ki ora des manera? Sera ki palabras des orason fala di mesmu kusa ku N ta sinti? Kal lisons ku N pudi aprindi des orason?’ Talves bu na pirsisa di fasi mas piskisa pa ruspundi es purguntas, ma es sforsus bali pena. No na fala di kuatru isemplus di orasons.

13. Kal lisons ku no pudi aprindi ku orason di Ana? (1 Samuel 1:​10, 11) (Jubi tambi diseñu.)

¹³ Lei 1 Samuel 1:​10, 11. Oca Ana fasi es orason, i teneba dus purblema garandi. I ka konsigiba tene fiju i si kumbosa ta kansalba. (1 Sam 1:​4-7) Si bu tene tambi un purblema ku ta kansau, ke ku bu pudi aprindi di orason di Ana? I toma tempu pa konta Jeova tudu si preokupasons, dipus i sinti minjor. (1 Sam 1:​4-7) Anos tambi no pudi sinti ben ora ku no ‘pui no fadiga riba di Jeova’ ku sedu, konta Jeova tudu ke ku ta preokupanu i kuma ku kila ta fasinu sinti. — Sal 55:22.

14. (a) Kal utru kusa ku no pudi aprindi di isemplu di Ana? (b) Kuma ku no pudi minjoria no orasons ora ku no pensa fundu na ke ku no lei na Palabra di Deus? (Jubi nota bas di paẑina.)

¹⁴ Puku anus dipus ku si fiju padidu, ku sedu Samuel, Ana lebal nunde Ŝef di saserdotis Eli. (1 Sam 1:​24-28) Na orason ki fasi di fundu di korson, i gardisi Jeova pa manera ki ta kuida i proteẑi si servus fiel.c (1 Sam 2:​1, 8, 9) I kontinua tene purblemas na vida, ma en ves di pensa so na si purblemas, i konsentra na kuma ku Jeova bensual. Kal ki lison pa nos? No na konsigi nguenta purblemas na vida, si no konsentra na kuma ku Jeova judanu te nes mumentu.

15. Ke ku no pudi aprindi di orason di Jeremias ora ku no na pasa injustisa? (Jeremias 12:1)

¹⁵ Lei Jeremias 12:1. Jeremias staba disanimadu, pabia i oja jintis ku ta fasi mau kusas parsi suma si e ka tene purblemas na vida. Tambi i staba disanimadu pabia utrus israelitas ta gozalba. (Jer 20:​7, 8) Anos tambi no pudi ntindi kuma ki ta sinti ora ku no oja jintis ku ta fasi mau kusas parsi di kuma e ka tene purblemas na vida i ora ke na gozanu. Tambi si konfiansa na Palabra di Jeova dibi di tornaba mas forti oca i oja kuma ku Jeova kuriẑi si povu. (Jer 32:19) Anos tambi no pudi konta Jeova kuma ku no ta sinti ora ku jintis na tratanu mal, na mesmu tempu no dibi di mostra no konfiansa di kuma Jeova na fasi algun kusa kontra injustisa na bon mumentu.

16. Ke ku no pudi aprindi di orason di un Levita? (Salmu 42:​1-4) (Jubi tambi diseñu ku foto.)

¹⁶ Lei Salmu 42:​1-4. Es kantiga skirbiduba pa un Levita ku ka pudiba adora Jeova na templu juntu ku si kumpañeris israelita. Es salmu mostra kuma ki staba na sinti. Talves no pudi sinti suma el, ora ku no ka konsigi sai di kasa pabia di duensa, o no prindidu pabia no sta na adora Jeova. Un ora no pudi sinti ben, i utrora no pudi sinti disanimadu, ma i ka mporta kuma ku no sta na sinti, i bon pa no papia ku Jeova aserka des sentimentu. Es na judanu ntindi no sentimentus minjor i lembrantanu ke ki mas minjor. Pur isemplu, Levita nota di kuma i na tene utru oportunidadi di ngaba Jeova. (Sal 42:5) Tambi i pensa na kuma ku Jeova staba na kuida del. (Sal 42:8) Ora Jeova di fundu di korson ta judanu ntindi minjor pabia ku no sta na sinti di un sertu manera, i ta judanu manti kalmu i tene forsa pa nguenta.

17. (a) Ke ku no pudi aprindi di orason di profeta Jonas? (Jonas 2:​1, 2) (b) Ora ku no tene purblemas, pabia ki bon lembra di palabras di Salmu? (Jubi nota bas di paẑina.)

¹⁷ Lei Jonas 2:​1, 2. Profeta Jonas fasi es orason oca ki staba na bariga di un pis garandi. Mesmu manera ki disobdisi Jeova, Jonas teneba konfiansa di kuma Deus na obi si orason. Na si orason, Jonas usa manga di bias palabras ku sta na Salmus.d I dibi di kunsiba es Salmus diritu. Pa kila, lembra des Salmus i pensa nelis, judal tene sertesa di kuma Jeova na judal. Di mesmu manera, si no tenta nkorna versikulus di Biblia, no na pudi lembra delis i e na animanu ora ku no ora Jeova na tempus difisil.

KONTINUA PERTUSI DI JEOVA NA ORASON

18-19. Si utrora no ka sibi ke ku no na fala Jeova na orason, kal nkoraẑamentu ku Romanus 8:​26, 27 danu? Bu pudi da un isemplu.

¹⁸ Lei Romanus 8:​26, 27. Utrora no ta sta preokupadu dimas tok no ka ta sibi ke ku no na konta Jeova. Ma no ka sta sin ajuda. Nes tipu di situason, spiritu santu di Deus ta “pidi” pa nos. Kuma ki ta fasi kila? Jeova usa si spiritu pa pui skirbiduris di Biblia pa e skirbi manga di orasons. Ora ku no ka sibi ke ku no na fala Jeova, Jeova pudi seta palabras ku skirbidu nes orasons suma pididu ku no misti fasi pa rel, tambi i pudi ruspundi es orasons.

¹⁹ I es propi ku juda un irma na Rusian comadu Yelena. I prindiduba pabia i ta ora i lei Biblia. Yelena teneba manga di kudadi, pa kila i ta difisil pa i ora. I fala sin: “Dipus N lembra di kuma, ora ku N staba preokupadu dimas i N ka sibi ke ku N ta fala na orason pa Jeova, Jeova na usa orasons di si servus di pasadu suma pididu ku N misti fasi pa rel. Es seduba nkoraẑanti pa mi nes tempu difisil.”

20. Kuma ku no pudi purpara antis di ora, ora ku no sta preokupadu dimas?

²⁰ Ora ku no sta preokupadu dimas, i pudi sedu difisil konsentra na orason. Pa purpara antis di ora, no pudi lei alguns versikulus di Salmus. No pudi tambi tenta skirbi no sentimentus suma ku rei Davi fasi. (Jubi Salmu 18, 34, 142 ku se kabesaliu.) Na bardadi, i ka ten regra di kuma ku bu dibi di purpara antis di orason. (Sal 141:2) Fasi ke ki minjor pa bo.

21. Pabia ku no pudi ora di tudu no korson?

²¹ I nkoraẑanti sibi di kuma Jeova ta ntindi no pensamentus mesmu antis di no fala kualker kusa. (Sal 139:4) Ma, i misti pa no kontal kuma ku no sta na sinti i mostra di kuma no konfia nel. Pa kila, ka bu medi ora pa bu Pape ku sta na seu. Usa palabras di orasons ku sta na Biblia. Ora di tudu bu korson. Fasil pa i sibi ke ku ta pui pa bu sta filis i ke ku ta pui pa bu sta tristi. Jeova sempri na judau suma un amigu di bardadi!