Ke ku ta Akontisi Ora ku no Muri?

Resposta di Biblia

Biblia fala: “Jintis bibu sibi kuma e na muri, ma kilis ku muri ja e ka sibi nada”. (Eklesiastis 9:5; Salmu 146:4) Asin, ora ku no muri, no ta disa di izisti. Kilis ku muri ka ta pensa, e ka ta aẑi o sinti algun kusa.

“Bu na torna sedu reia”

Oca ku Deus papia ku purmeru omi, Adon, i splika ke ku ta akontisi ora ku no muri. Suma Adon disobdisi, Deus falal: “Bu kumpudu di reia; bu na torna sedu reia.” (Kumsada 3:19) Antis di Deus kumpu Adon “ku reia di con”, Adon ka izistiba. (Kumsada 2:7) Di mesmu manera, oca ku Adon muri, i riba pa reia i disa di izisti.

Mesmu kusa ku ta akontisi ku kilis ku muri. Biblia fala sin aserka di omis ku limarias: “Tudu elis i reia, e na riba pa reia.” — Eklesiastis 3:19, 20.

Mortu ka signifika fin di tudu

Manga di bias Biblia ta kompara mortu ku sonu. (Salmu 13:3; Jon 11:11-14; Atus 7:60) Ora ku un algin sta na un sonu profundu i ka ta sibi ke ku na pasa na si volta. Di mesmu manera, mortus ka sibi nada. Ma Biblia ta sina di kuma Deus pudi korda kilis ku muri suma si na korda elis di sonu, i da mas elis vida. (Jo 14:13-15) Pa kilis ku Deus na resusita, mortu i ka fin di tudu.