Videos di programa di kongresu reẑional di 2020 “Bo kontenti sempri”!

Videos di no kongresus reẑional, ta toka no korson tambi i ta judanu ntindi diritu nsinus di Biblia. Kongresu reẑional di 2020 “Bo kontenti sempri”! tene 114 videos, nkluindu 43 diskursus ku fasidu pa membrus di Korpu Guvernanti ku se ajudantis. Sera ki bu ciga ja di punta, kal ki kuantidadi di tarbaju ku diñeru ku gastadu pa fasi es videos?

Kuas 900 irmons ku irmas di mundu ntidu, da di se tempu ku abilidadi pa juda na produzi es programa. Na mas di dus anu, e gasta kuas 100.000 oras nes proẑetu. Es nklui 70.000 oras ki pirsis pa fasi video di 76 minutu ku basiadu na Biblia, Neemias: Alegria di Jeova i bo forsa.

Suma ku bo pudi imaẑina, i gastadu manga di diñeru pa kuida di vuluntarius ku fasi sakrifisiu pa es tarbaju, suma pur izemplu, da elis apoiu tekniku, material ku kau ki pirsis pa fasi es tarbaju.

Kumison di Nsinu di Korpu Guvernanti, gosta ciu di mostra kulturas ku lugaris diferenti na no videos. Jared Gossman, ku ta tarbaja na Sirvisu di Audiu/Video fala sin: “Es i pabia anos i un ermondadi internasional i no misti pa no videos mostra kila. Pa atinẑi es objetivu, 24 ekipas di 11 teras tarbaja juntu nes proẑetu. Es ta iziẑi manga di diñeru, fasi planu i kordena tarbaju pa irmons na mundu ntidu pudi tarbaja juntu.”

Pa pudi fasi manga di no videos, i pirsis sertu tipu di material ku kau di fasil. Pur izemplu, montaẑen di video Neemias: Alegria di Jeova i bo forsa, fasidu dentru di studiu di Monti Ebo pertu di Patterson, na Nova York, EUA. Pa pudi fasi bon usu di diñeru ku irmons kontribui, i na mesmu tempu, fasi pa video sedu izatu suma ki akontisi na tempu bibliku, irmons usa material lebi, pa kumpu muras ku parsi ku di antigu Jerusalen. Kada strutura di kontraplakadu tene seis metru di altura, i foradu ku spuma dipus i pintadu pa parsi ku pedra. Es “muras” pudi tiradu i usadu pa fasi diferentis senas, es ta rapati kuantidadi di material ku pirsisadu del. Mesmu asin, kuas 100.000 dolar (mas o menus 55.000.000 FCFA) pirsisaduba del pa kumpu kusas pa montaẑen so des video.a

Gosi ku no sibi un bokadu kuma kes programa fasidu, es omenta mas no apresu pa kongresu reẑional des anu. No tene serteza di kuma, sforsu ku fasidu pa fasi programa di kongresu des anu, na kontribui pa nomi di Jeova ngabadu na mundu ntidu. Obrigadu pa bo ofertas ku bo fasi di tudu korson atraves di donate.jw.org o atraves di utru meius pa apoia obra mundial.