Kanal di Sateliti JW Ciga na Partis Nunde ku Internet ka Ten

Kada mis, no ta sta ku presa di jubi programas ku videos ku sai na JW Broadcasting. Ma manga di no ermons na Afrika, ka pudi baŝa es programas na internet. Pabia?

Manga di partis di Afrika tene difikuldadis di tene internet. I na kaus ki ten nel, manga di bias i ta sedu karu i redi ta sedu lentu. Pur isemplu, un superintendenti di sirkuitu na Madagaskar baŝa Broadcasting ku ta sai kada mis na un siber kafe. Kila kustal 16 dolar, (kuas 9.000 FCFA) diñeru ku alguns ka ta konsigi gaña na un semana!a

Apesar des difikuldadis, gosi manga di jintis na Afrika, pudi jubi Broadcasting mesmu se ka tene internet. Kuma ku kila i pusivel?

Disna di 2017, manga di no ermons ku ta vivi na teras ku sta na sul di disertu di Sara, pudi jubi Broadcasting atraves di un kanal di televison sateliti. Es kanal pudi jubidu sin paga nada, 24 ora kada dia, 7 dia kada semana, na 16 lingua.

Pa konsigi es, Tustumuñas di Jeova kontrata un kanal di televison pa ba ta transmiti se programas atraves di sateliti. Sateliti ku ta usadu ta atinẑi 35 teras ku sta na sul di disertu di Sara na Afrika. Kustu di es tudu i 12.000 dolar kada mis (mas di 6.000.000 FCFA). Ma ora ku no tene un iventu pa transmiti ao vivo, kustu ta omenta, pabia no pirsisa di paga utru kanal. Es ta pirmiti manga delis benefisia di kongresus ku programas spesial, suma pur isemplu visita di representantis di sedi mundial.

Manga di jintis, nkluindu kilis ki ka Tustumuñas di Jeova, ta jubi kanal di sateliti JW na se kasa. Ma, manga di no ermons ka tene meius di kumpra ekipamentus ki pirsis pa jubi kanal di sateliti. Pa juda elis, mas di 3.670 Salons di Renu ekipadu ku antenas parabolika pa ermons ku irmas pudi jubi Broadcasting la. Tudu ekipamentus ki pirsis nkluindu dispaŝu, kusta kuas 70 dolar (mas o menus 39.000 FCFA) si Salon di Renu tene ja televison o projetor. Se ka tene televison o projetor, kustu pudi bai te 530 dolar (mas o menus 295.000 FCFA).

No ermons ku no irmas apresia ciu es kanal. Un ansion na Kamerun fala sin: “Pa no familia i suma maná na disertu.” Odebode, un irmon na Niẑeria, fala sin: “Ami ku ña familia no ta jubi kanal tris bias kada semana. Ña fijus sempri ta ten dipresa pa jubil. Te mesmu e pidin pa no buri dias di jubil.” Rose, ku sta tambi na Niẑeria, fala sin: “N kontenti manera ku N tene gosi kanal di sateliti JW, pabia i toma lugar di visiu ku N teneba di jubi notisias na utrus kanal. Ora ku N na jubi notisias N ta lestu ku paña raiba pa ke ku N sta na oja, i ña tenson ta subi. Ma JW Broadcasting ta dan forsa i kalma! I kanal ku N mas gosta del. I un benson garandi ku bin di Jeova.”

Un superintendenti di sirkuitu na Mosambiki fala kuma na si sirkuitu, Salons di Renu ekipadu ku ekipamentus pa kapta kanal di sateliti JW. Ermons nes kongregasons ta ciga un ora antis di runion kumsa pa pudi jubi JW Broadcasting via sateliti.

Na kongresu internasional di 2019 ku fasidu na Juanisburgu, Afrika di Sul, i usadu es kanal pa transmiti diskursus prinsipal nkluindu kilis ku fasidu pa membrus di Korpu Guvernanti. Es programa transmitidu pa novi kaus. Sphumelele, un ermon ku ta tarbaja na Dipartamentu Lokal di Broadcasting na filial di Afrika di Sul, fala sin: “Antis no kustumaba transmiti diskursus atraves di internet. Ma pa fasi kila i pirsisba tene bon konekson di internet, tambi i karu dimas. Transmiti es diskursus atraves di kanal di sateliti JW sedu mas baratu i mas suguru.”

Gosi manga di no ermons ku irmas na Afrika pudi jubi JW Broadcasting atraves di sateliti, pabia di ofertas ku bo fasi pa obra mundial. No apresia ciu ofertas ku bo fasi atraves di diferentis metudus ku sta na donate.jw.org.