Liberdadi di Riliẑion Difindidu na Kumunidadis Nativu

Entri manga di jintis ku ta vivi na Amerika Latina, milyons delis tene se propi linguas i se kustumus nativu. Manga des jintis nativu, i no ermons ku no irmas spiritual ku gosta di se kultura. Pa juda jintis na sintidu spiritual, e ta traduzi i distribui publikasons di Tustumuñas di Jeova na mas di 130 linguas nativu di Amerika Latina.a Mesmu asin, alguns delis sufri opusison pabia e disidi sirbi Jeova i e nega partisipa na kustumus ku ka basia na Biblia ku ta ojadu na se kumunidadi. Kuma ku bo ofertas ta usadu pa juda elis?

E judadu riba pa se kasa

Na Meŝiku, no ermons ku irmas di kumunidadi huichol, na montaña di Stadu Jalisku, ku rispitu nega partisipa na atividadi riliẑiosu ku ta viola se konsiensia.b Ma kila pui alguns jintis na kumunidadi paña raiba. Na dia 4 di dizembru di 2017, multidon di jintis ku staba ku raiba ataka un grupu di Tustumuñas di Jeova ku utrus jintis ku staba ku elis. E multidon di jintis serka elis di kumunidadi i e dana tudu se bens, i e ameasa mata kin ku tenta riba.

Tustumuñas di Jeova ku mora pertu kuida logu di nesesidadis di no ermons ku irmas. Ke ku pudiba fasidu pa e riba se kasa? Un ermon comadu Agustín fala: “No ka tene diñeru pa pudi paga un advogadu, i no ka sibi nunde ku no na bai buska konsiju aserka des asuntu.”

Suma liberdadi di adorason di no ermons sta na atakadu, filial di Amerika Sentral toma logu mididas. Purmeru, e pidi otridadis lokal pa e nvestiga es krimi. Dipus e risibi aprovason di Kumison di Kordenaduris di Korpu Guvernanti di Tustumuñas di Jeova pa tarbaja ku Dipartamentu Juridiku ku sta na sedi mundial pa pui keŝa pa juda no ermons ku irmas di huichol. I kasu ciga na Supremu Tribunal di Meŝiku.

Un ekipa internasional di advogadus purpara un argumentu klaru nunde ku e splika di kuma suma ku utrus rispita kultura di kumunidadi nativu, kumunidadi nativu tambi dibi di rispita i proteẑi liberdadi di tudu se membrus. Tudu jintis tene diritu i ka mporta nunde ke na vivi.

Na dia 8 di juliu di 2020, tudu juisis di Supremu Tribunal di Justisa disidi kuma Tustumuñas di Jeova tene roson. E da ordi di kuma tudu kilis ku serkadu dibi di disadu pa e riba pa se kumunidadi. Agustín ku faladuba del tras, konta kal ki si sentimentu ku di utrus nes palabras: “No sta kontenti i no na gardisi ermons pa tudu ke ke fasi pa nos. Si e ka judanuba no ka na pudiba fasi nada.”

Jeova fasi “manga di kusas pa puku jintis”

Na mesmu tempu, no ermons na San Juan di Ilumán, na un tabanka di Ekuador nunde ku manga di jintis nativu di Vali Otavalo mora nel, pasa tambi mesmu opusison. Na 2014, oca ke risibi tudu dukumentus ki pirsis, e kumsa ku kumpu Salon di Renu. Ma un ŝef riliẑiosu junta un multidon di mas di 100 jintis e bai para konstruson aforsa. Kumunidadi da ordi pa Tustumuñas di Jeova para fasi se runions.

Dipartamentu juridiku di filial di Ekuador juntu ku di sedi mundial, tarbaja juntu pa difindi kongregason des violason di se liberdadi di adorason. No ermons leba asuntu pa tribunal. I es pui kumunidadi pa e para pirsigi ermons i disa kongregason kumsa mas se runions i kabanta kumpu Salon di Renu. Pa proteẑi diritu di no ermons na futuru, no advogadus pidi supremu tribunal pa e toma disisons aserka des purgunta importanti: Sera ki kumunidadi nativu dibi di rispita lei internasional di diritu di pekadur o nau?

Na 16 di juliu di 2020, Tribunal Konstituisional di Ekuador, ku sedu tribunal mas garandi di pais, sukuta kasu. Ermons ku sedu advogadu na Ekuador representa kongregason. Alen delis, kuatru ermons ku tene spiriensia na advogasia internasional junta ku elis pa difindi ermons na tribunal. E staba na diferentis tera, i pabia di restrisons di COVID-19 e fasi runion atraves di videokonferensia. Es i purmeru bias ku un tribunal pirmiti pa un grupu juridiku ku ta representa Tustumuñas di Jeova na tudu mundu difindi se kasu des manera.c Suma prova, ekipa konta ke ku alguns otridadis juridiku internasional fala ku ta mostra di kuma povu nativu ka ta disisti di se diritu so pabia di kuma e fasi parti di kumunidadi nativu.

No ermons di Vali Otavalo sta ku presa di obi disison di Tribunal Konstituisional. Nkuantu e na pera resposta e fika tokadu ku ajuda ke risibi. César ku ta sirbi suma ansion na Kongregason di Ilumán Quichua fala sin: “I so Jeova ku pudi fasi manga di kusas pa puku jintis atraves di si organizason.”

Tudu advogadus ku staba nvolvidu nes kasu i Tustumuñas di Jeova, e kontenti di usa se spiriensia juridiku, sin kobra nada. Mesmu asin, skirbi es kasus, purpara elis, i difindi elis na tribunal ta kusta tempu ku diñeru. No advogadus ku utrus ermons gasta 380 ora pa purpara argumentus legal i 240 ora pa traduzi dukumentus pa kilis ku na bai obi kasu na Meŝiku. Kuas 40 advogadus di mundu ntidu gasta manga di oras na kasu ku nvolvi no ermons di Ekuador. Kuma ku no konsigi kuida di tudu es dispesas ku sta ligadu ku difindi no ermons na tribunal? I atraves di ofertas ku bo ta fasi na donate.jw.org. Obrigadu pa ofertas ku bo ta da.