Ajuda Umanitariu ku Dadu na 2022 — Ermons Mostra Amor

Biblia kontaba ja di kuma i na ten geras, tirmidura di con, duensas ku utru “kusas meduñu” na no tempu. (Luk 21:10, 11) Es palabras profetiku kontinua tene si kumprimentu duranti anu di sirvisu di 2022.a Pur isemplu, gera na Ukrania kontinua tambi i afeta vida di milyons di jintis. Na manga di parti di mundu jintis kontinua inda na rekupera di COVID-19. Alen di kila, manga di jintis afetadu pa disastris natural, suma tirmidura di con na Aiti ku cuba ku bentu forti na Amerika Sentral, na Filipinas ku na sudesti di Afrika. Kuma ku Tustumuñas di Jeova juda kilis ku afetadu?

Duranti anu di sirvisu di 2022, no organizason da ajuda umanitariu pa kilis ku afetadu pa kuas 200 disastris! Na total, i gastadu kuas 12 milyon di dolar (mas o menus 7 bilyon i 389 milyon di FCFA) pa da ajuda.b Jubi kuma ku ofertas ku dadu usadu pa juda kilis ku afetadu na dus disastris ku kontisi.

Tirmidura di con na Aiti

Na dia 14 di Agustu di 2021, un tirmidura di con di tamañu di 7,2 atinẑi sul di Aiti. Infilismenti tris Tustumuñas di Jeova muri, dus irma ku un ermon. Kilis ku salva dibi di lida ku danus fisiku ku emosional ku tirmidura di con tisi. Un ermon comadu Stephane fala sin: “Na tudu sidadi manga di jintis muri, i ta ten manga di nteru kada semana, es ojadu pa mas di dus mis.” Utru ermon comadu Éliézer, fala: “Manga di Tustumuñas di Jeova ka tene kau di mora, ropas, sapatus ku utrus kusas basiku. Pa misis manga delis vivi ku medu pabia di tirmidura di con ku ta bin dipus.”

No organizason sedu rapidu na da ajuda. Filial di Aiti da serka di 53 tonelada di kusas di kume, tendas, lonas, spumas ku karegadoris solar pa telemovel. Alen di kila, duranti anu di sirvisu di 2022, serka di 100 kasa kumpudu o reparadu. No gasta mas di un milyon di dolar (mas o menus 615 milyon di FCFA) na da es ajuda.

No ermons ku irmas gardisi ciu pa es ajuda. Lorette fala sin: “Tirmidura di con dana no kasa tudu tambi i dana no nogos. No ka teneba nada di kume. Ma organizason di Jeova judanu, e danu tudu ku no pirsisa del.” Micheline fala sin: “Tirmidura di con dana kasa nunde ku N moraba nel ku ña dus fiju. Nka sibiba ke ku N na fasi, si ka so ora pa pidi ajuda, i Jeova ruspundi ña orason atraves di si organizason. Gosi no mora na un bon kasa. N sta disididu pa fasi tudu ku N pudi pa mostra ña gardisimentu pa Jeova.”

Otridadi lokal nota sforsu ku no fasi pa da ajuda. Administradur di sidadi di Asile fala sin: “Bo sta di parabens pa manera ku bo aẑi rapidu pa da ajuda. N ta adimira bos, pabia bo mostra rispitu garandi pa otridadis. N sta kontenta di sibi di kuma i ka diñeru ku nteresa bos. En ves di kila bo sta nteresadu na juda jintis. Bo aẑi pabia di amor.”

Cuba ku bentu forti comadu Ana atinẑi Malaui ku Mosambiki

Na dia 24 di Janeru di 2022, cuba ku bentu forti comadu Ana atinẑi Mosambiki i dipus i bai pa zona oesti di Malaui. Es bentu forti ku cuba ku bin di mar ciga un vulusidadi di 100 kilometru pur ora. I dana postus di lus ku puntus, i tisi manga di inundason.

Es disastri afeta mas di 30.000 Tustumuñas di Jeova na Malaui ku Mosambiki. Un ermon comadu Charles ku apoia tarbaju di ajuda umanitariu fala sin: “Ora ku N oja sufrimentu ku ermons sta na pasa i manga di kusas ke pirdi, N ta sinti mal dimas N ta sta sin forsa.” Situason staba mal di mas, pabia yagu leba se kumida ku kusas ke labra. Manga delis pirdi se kasa. Infilismenti, minjer di un ermon ku si dus fiju femia pikininu muri, oca ku boti ku bai salva elis rabida.

Kil bentu ku cuba forti seduba meduñu. Oca ki sta 1 ora di mandrugada na Nchalo na Malaui, familia Sengeredo obi baruju forti di yagu. Dus riu inci! Ermon Sengeredo disidi di kuma e dibi di sai di kasa. I seduba un bon disison, pabia nin i ka tarda yagu toma konta di kasa. Yagu rasta kusas ke tene i leba i utrus dana. E disidi bai pa Salon di Renu, normalmenti pa sai di se kasa pa la a pe i ta leba 30 minutu. Ma na ki dia e leba dus ora di tempu pa ciga Salon. E ciga tudu mojadu i kansadu, ma e ciga suguru.

Filial di Malaui ku di Mosambiki aẑi kinti-kinti pa da ajuda. E orienta superintendentis di sirkuitu ku ansions pa e jubi nesesidadis di ermons ku irmas ku afetadu, i pa e da elis ajuda spiritual ku emosional. Manga di Kumison di Ajuda Umanitariu disignadu pa supervisiona tarbaju di ajuda umanitariu. Es kumisons kumsa ku juda no ermons kinti-kinti pa e tene kumida ku utrus kusas ke pirsisa del. I gastadu mas di 33.000 dolar (mas o menus 20 milyon i 262 mil FCFA) pa da ajuda umanitariu, tambi mas di 300.000 dolar (mas o menus 184 milyon i 200 mil FCFA) pa repara i kumpu kasas.

Kumison di Ajuda Umanitariu usa fundu ku jiresa, es seduba importanti di mas pabia di aumentu garandi ku ten na merkadu. Pur isemplu, na purmeru seti mis di tarbaju di ajuda umanitariu, pres di fariña di miju ku sedu kumida prinsipal na Malui subi serka di 70 pursentu. Pres di kombustivel subi tambi. Pa pudi popa fundu, ermons kumpra kusas di kume ku materialis di konstruson na un kuantidadi garandi, e kumpra e kusas tudu la propi. E rapati elis pres, tambi e evita gasta diñeru ciu na transporti.

Tarbaju di ajuda umanitariu toka koson di povu di Jeova. Un ermon na Mosambiki comadu Felisberto fala sin: “Nunka N oja un organizason ku da manga di materialis di konstruson, transporti, konstrutoris, kusas di kume i ku da orientason ku amor. Es ajuda sedu isemplu garandi di amor di ermondadi kriston ku Jesus fala del na Jon 13:34, 35.” Un viuva na Malaui comadu Ester ku si kasa dana fala sin: “N ka sibi ke ku N na fasi, pabia diñeru ku N tene ka ciga pa kumpu utru kasa. Pa kila oca ku ermons ciga e kumpu un kasa pa mi, N sinti suma si kontra N sta ja na paraisu.”

Nkuantu no na pertusi di nobu mundu ku Jeova purmiti, no na spera oja manga di disastri. (Mateus 24:7, 8) Ma pabia di ofertas ku bo ta da di tudu korson, no tene konfiansa di kuma povu di Jeova na kontinua risibi ajuda ke pirsisa del. Manera di fasi oferta splikadu na donate.jw.org. Obrigadu pa oferta ku bo ta da di tudu korson.