Ajuda Umanitariu na 2021 — No ka Bandona No Ermons ku Irmas

Duranti anu di sirvisu di 2021,a mundu kontinua na sufri pabia di duensa di COVID-19. Suma ki splikadu na artigu “Ajuda ku Dadu na Tudu Mundu Duranti es Duensa ku Laga na Tudu Mundu,” no gasta milyons di dolarb pa juda jintis ku sufri pabia di COVID-19. Tambi i formadu mas di 950 Kumisons di Ajuda Umanitariu.

Na bardadi, nkuantu es duensa pui manga di jintis na sufri, utrus disastris natural ku kilis ku ta kausadu pa omis, afeta no ermons ku irmas na mundu ntidu. Pa pudi juda nes mas di 200 disastris natural, Kumison di Kordenaduris di Korpu Guvernanti aprova pa i usadu 8 milyons di dolar (mas di 4.600.000.000 FCFA). Es buridu riba di diñeru ku dadu pa ajuda umanitariu duranti COVID-19. Jubi kuma ku bu ofertas usadu pa juda kilis ku sufri di dus disastris ku kumsa pasa.

Monti Nyiragongo spludi

Na 22 di Maiu di 2021, Monti Nyiragongo, un vulkon na Republika Demokratiku di Kongu kumsa ku sai fugu. Fugu ku ria, dana kasas, skolas ku reservas di yagu. Ma, fugu ka sedu so uniku kusa ku dana kau. Duranti dias dipus di monti spludi, puera pirigosu di vulkon toma konta di sidadi di Goma, tambi i ojadu manga di tirmiduras di con. Mas di metadi di jintis na sidadi tenba di sai di se kasa. Manga di jintis sai, alguns kamba frontera e bai pa Ruanda.

Entri kilis ku sai, i tenba serka di 5 mil Tustumuñas di Jeova. Alguns pirdi se kasas dipus ku monti spludi, na utrus kasas, jintis furta la dipus di ermons sai. Kumison di Ajuda Umanitariu di Ruanda ku di Republika Demokratiku di Kongu tarbaja juntu pa da ajuda. Filial di Kongu (Kinŝasa) fala sin aserka di un kumison di ajuda umanitariu: “Mesmu oca i ten konfuson na sidadi, te mesmu antis di dadu ordi pa jintis sai, kumison kumsa ku da jintis kumida, yagu, lensol, manta ku ropas.” Na un sidadi nunde ku mas di 2 mil di no ermons junta, un kumison di ajuda umanitariu monta tendas, da elis maskras i splika elis kuma ke pudi rapati risku di paña COVID-19 ku kolera.

Dentru di tris mis di disastri, no ermons ntrega mas di 6 tonolada di arus, 6 tonolada di foriña di miju, mas di 8 mil litru di azeiti ku mas di 8 mil litru di yagu. Pa popa diñeru, filial fasi aranẑu pa kumpra manga di kuantidadi di kumida na pais, en ves di manda kumpra kumida fora di pais, ku na sedu mas karu.

Un irma ku si nobu kasa dana pabia di monti ku spludi, fala sin: “No staba disanimadu dimas, tristi.” Ma dipus, si familia risibi ajuda material ku nkoraẑamentu pa e manti fiel. Gosi es irma fala sin: “Ku ajuda di Jeova, no kontinua tene ke ku no pirsisa del. No oja kuma ku Jeova ta lambu no kargu, tambi i ta tornal fasil pa no nguenta.”

Krisi ekonomiku na Venezuela

Venezuela sufri di purblemas ekonomiku garandi pa manga di anus. No ermons ku sta la, nguenta kondisons di vida difisil, falta di kumida ku aumentu di krimi. Ma, organizason di Jeova ka bandona elis.

Duranti anu di sirvisu ku pasa, i gastadu mas di 1.500.000 dolar (mas di 867.000.000 FCFA) pa kumpra i transporta kumida ku sabon pa familias ku pirsisa di ajuda. Filial di Venezuela fala sin: “I ka fasil pa transporta 130 tonolada di kumida na tudu kantu di pais kada mis, i dipus cigantal na mon di no ermons ku pirsisa del.” Pa ka kumida dana, manga di bias, ermons ta manda kumida ku na fika pa manga di tempu. Filial kontinua fala sin: “No ta tenta kumpra manga di kumida na tempu ki ten, pabia i na ki tempu ki mas ta baratu. Dipus no ta usa transportis mas baratu pa leba elis.”

Leonel, un membru di kumison di ajuda umanitariu na Venezuela, gosta di si tarbaju. I fala sin: “Es tarbaju di ajuda umanitariu i spesial. Na bardadi, es tarbaju spesial nkoraẑan ciu disna ku ña minjer ku N gosta ciu del muri pabia di COVID-19. N kontinua sta okupadu. N sinti di kuma, N sta na fasi kusa ku sta na juda ña ermons ku pirsisa di ajuda. N oja ku ña uju kuma ku Jeova kumpri si purmesa di ka bandona di povu.”

Un ermon ku risibi ajuda i ku ta sirbiba na kumison di ajuda umanitariu, fala sin: “Gosi i ami ku pirsisa di ajuda. No ka risibi so ajuda material. Ma tambi, ermons judan ami ku ña minjer pa no manti kalmu. E kuida di nos, e konsolanu i e nkoraẑanu.”

Alguns disastris ku ta kontisi ta da puku sinal o nin un sinal. Ma, manga di bias, organizason di Jeova ta konsigi risibi i da ajuda umanitariu rapidu. Tudu ta konsigidu pabia di ofertas ku bu ta da pa obra mundial. Alguns maneras di da es ofertas faladu del na donate.jw.org. No na gardisi pa ofertas ku bu da di tudu korson.