Notisias di Konfiansa i ku Ta Fortalisi Fe

Tustumuñas di Jeova ta preokupa ciu ku se ermons na fe. (1 Pedru 2:17) Manga di nos ta sinti suma un irma na Kenia comadu Tannis. I fala: “N gosta di sibi ke ku na pasa ku ña kiridus ermons ku irmas na mundu ntidu.” Kuma ku Tannis ku milyons di utrus Tustumuñas di Jeova, ta sibi ke ku sta na pasa? I atraves di parti Notisias di no site jw.org ku no kumsa fasi desdi 2013.

Notisias tene informasons di konfiansa aserka di Tustumuñas di Jeova, na asuntus suma, lansamentus di Biblia, tarbaju di ajuda umanitariu, projetus di konstruson ku utrus iventus importanti. I ta danu informasons aserka di no ermons ku irmas ku pudu na prison pabia di se fe. Parti Notisias tene tambi spiriensias nkoraẑanti aserka di kampañas di pregason ku Komemorason di mortu di Jesus. Ba-kin ku ta piskisa es notisias i kuma ki ta purparadu?

Notisias ta buskadu i skirbidu

Skritoriu di Informason pa Publiku ku ta kuida di Notisias (SIP). Es Dipartamentu sta na sedi mundial, i ta tarbaja bas di orientason di Kumison di Kordenaduris di Korpu Guvernanti. Skritoriu di Informason pa Publiku formadu pa mas di 100 ermons ku irmas, i manga delis ta tarbaja fora di Betel suma voluntarius. Entri elis i sta kilis ku ta skirbi, kilis ku ta fasi piskisa, kilis ku ta diseña, fasi video, tira foto ku tradutoris. Utrus ta tene kontaktu ku funsionarius di guvernu, ku pursoris i ku jornalistas. Mas di 80 Dipartamentus di Informason pa Publiku (DIP) di filialis na mundu ntidu ta juda Skritoriu di Informason pa Publiku.

Pa purpara notisias ku na bin sai, Skritoriu di Informason pa Publiku, ta tarbaja juntu ku Dipartamentus di Informason pa Publiku. Ora ku no ermons nota di kuma un spiriensia bon pa konta, e ta fasi piskisa aserka di ki asuntu, i e ta junta informasons di konfiansa. Es pudi nklui fasi intrivistas i papia ku jintis ku kunsi informason diritu. Ora ku provas juntadu, notisias ta skirbidu, i ta jubidu mas, i kuriẑidu, i pudu fotos pa da isemplu, i dipus i ta mandadu pa Kumison di Kordenaduris aprova.

Palabras di gardisimentu

Kuma ku no ermons na fe ta sinti aserka di Notisias? Cheryl, un irma na Filipinas fala sin: “N gosta ciu di kumsa ña dia ku lei notisias aserka di organizason di Jeova ku si povu.”

Manga di leitoris fala di diferensa ke ta oja entri Notisias di jw.org ku utrus notisias. Tatiana di Kazakiston fala sin: “N sta kontenti, pabia N pudi konfia na notisias di jw.org. I di konfiansa, i kusas ku kontisi.” Un irma na Meŝiku comadu Alma fala sin: “Komparadu ku mau kusas ku no ta obi na utrus notisias, Notisias di jw.org i nkoraẑanti dimas.”

Es Notisias ka sedu so di konfiansa, ma tambi e ta fortalisi fe. Bernard di Kenia, fala: “Notisias ta judan oja ña ermons ku irmas di mundu ntidu suma ña familia, i ka mporta nunde ke sta. Na ña orason N ta konsigi coma se nomi i fala di ke propi ke sta na pasa.” Tambi, un irma di Kenia comadu Bybron fala sin: “Sempri N ta kontenti dimas ora ku un Biblia lansadu na un lingua diferenti! Es notisias ta lembrantan di kuma Jeova ka ta fasi skuju.”

Mesmu notisias di no ermons ku sta na pirsigidu pudi nkoraẑanu. Un irma di Kenia comadu Jackline fala sin: “Pensa na se koraẑen fortalisi ña fe. Sempri N ta tenta aprindi ke ku juda elis nguenta. N aprindi kuma, kusas ku jintis ta pensa kuma i simplis, suma fasi orason, lei Biblia, te mesmu kanta, i kusas importanti ku manti no ermons forti.”

Un irma na Kosta Rika comadu Beatriz gardisi pa notisias aserka di disastris natural. I fala sin: “Notisias ta pirmitin oja kuma ku no organizason ta da ajuda pa no ermons di manera rapidu, ben organizadu i ku amor. Es konvensin di kuma es i organizason di Jeova.”

No na gardisi ciu manera ku no ta risibi notisias atualizadu di no ermons na mundu ntidu! Es ka na pudiba fasidu sin bo ofertas ku bo ta da pa obra mundial. Manga delis ta fasidu atraves di donate.jw.org. Obrigadu pa bu ofertas ku bu ta da di tudu korson.