Ajuda ku Dadu na Tudu Mundu Duranti es Duensa ku Laga na Tudu Mundu

Na Marsu di 2020, oca ku Organisason Mundial di Saudi fala di kuma, COVID-19 i un duensa ku laga, manga di jintis ka pensaba kuma es virus na kontinua na mundu pa mas di un anu. Milyons di jintis nkluindu alguns Tustumuñas di Jeova, sufri na sintidu fisiku, emosional, i e afetadu finanseramenti pabia des duensa. Kuma ku Tustumuñas di Jeova organisa i leba ajuda umanitariu duranti es krisi?

Ajuda umanitariu pa kilis ku pirsisa

Bas di orientason di Kumison di Kordenaduris di Korpu Guvernanti di Tustumuñas di Jeova, mas di 950 Kumison di Ajuda Umanitariu (KAU) formadu na mundu ntidu pa juda na COVID-19. I ten kasus, nunde ke ta pidi ermons ku irmas pa juda, i na utrus kasus, Tustumuñas di Jeova ta benefisia di ajuda di guvernu. Kumison di Ajuda Umanitariu organisa tambi un ajuda mas garandi.

Pur isemplu, jubi situason na Paraguai. Un jornal fala di kuma suma es duensa afeta ekonomia, “manga di jintis na Paraguai ka na tene kusas sufisienti di kume.” Ma Kumison di Ajuda Umanitariu na Paraguai kumsaba ja ku distribui kaŝas ku tene kusas ku na da pa dus semana: Kumida sufisienti, material di limpesa ku kusas pa iẑeni pesual pa un familia di kuatru jintis. Kada kaŝa kusta kuas, 30 dolar amerikanu (mas o menus 16.400 FCFA).

Kuma ku kilis ku ta tarbaja pa da ajuda ta proteẑi se kabesa ku utrus pa ka paña COVID-19? E ta pui maskra i e manti distansia. Tambi e ta verifika pa impresas ku na da kumida purparal na kau limpu, i e ta toma mididas rigorozu di suguransa. Es nklui verifika, pa tudu kilis ku na lambu kaŝas bisti ropa di proteson, pa limpa i disinfeta se meius di transporti, i pui kaŝas na lugaris disinfetadu. Pa fin, kilis ku ta leba kaŝas, ta manti distansia fisiku di ermons ku na risibi elis.

Ofertas usadu ku jiresa

Te Janeru di 2021, Kumison di Kordenaduris aprova pa mas di 25 milyon di dolar amerikanu (mas o menus 13.700.000.000 FCFA), usadu pa ajuda umanitariu duranti COVID-19. Filialis ku Kumisons di Ajuda Umanitariu ta usa diritu fundu di ofertas, i e ta tarbaja duru pa konsigi minjor pres di kusas ki pirsis. Pur isemplu, na Ŝili, ermons ku organisa tarbaju di ajuda umanitariu, mistiba kumpra 750 kilu di lentilia. Ma so na un mis, pres di lentilias aumenta dus bias mas ciu! Dus ora dipus ke konkorda na kumpra lentilias na un pres altu, bindidur fala elis di kuma, utru algin ku bin kumpra, ribanta si nkomenda di lentilias. Pa kila, en ves di pui elis paga pres altu ku e konkordaba ku el, bindidur disidi bindi ermons lentilias ke ribanta na pres di mis pasadu!

Ma oca ku ermons bai buska lentilias, bindidur misti maina i akusa elis di distribui kumida di mau manera, suma ku utrus organisason ta fasi. Un ermon fasi orason rapidu na sintidu, dipus i konta bindidur di kuma kada kongregason verifikaba ja kilis ku na bardadi pirsisa di ajuda. Ermons splika di kuma pabia di kultura diferenti di kilis ku na risibi ajuda, kada kaŝa na tene kusas ku na da i ku na sedu mas pratiku pa kada familia ku na risibi ajuda. Pa fin, e garanti bindidur di kuma, tudu oferta di diñeru ku tudu tarbaju ku Tustumuñas di Jeova ta fasi i di livri vontadi. I fika dimiradu. Bindidur ka konkorda so na rapati pres, ma tambi i pati ermons 400 kilu di lentilia na utru nkomenda ke fasi.

“Prova di amor di bardadi”

Lusu, un minjer garandi viuva na Liberia, ta vivi ku sinku membru di si familia. Un dia parmaña oca ke na mata-bica i fasi testu di dia, si netu di seti anu nota di kuma e ka tene ja mas kumida na kasa. I punta: “Ke ku no na kume?” Lusu falal di kuma i oraba ja pa pidi ajuda, i tene konfiansa di kuma Jeova na juda elis. Ki di tardi, Lusu risibi ŝamada di ansions di si kongregason, e falal pa i bai toma si kumida. I fala: “Ña netu fala gosi i sibi di kuma Jeova ta obi tambi i ta ruspundi orason, pabia Jeova ruspundi ña orason.”

Un minjer di Republika Demokratiku di Kongu mora pertu di un familia Tustumuña di Jeova. Oca ki oja familia risibi kumida di se ermons na fe, i fala: “Dipus de duensa no na sedu Tustumuñas di Jeova, pabia e preokupa ku se ermons ku irmas duranti es tempu difisil.” Si omi puntal: “Bu na sedu Tustumuña di Jeova so pabia di un saku di arus?” I ruspundi: “Nau, ma e saku di arus i prova di amor di bardadi.”

Tustumuñas di Jeova konsigi aẑi rapidu pa nesesidadis di no ermons ku irmas duranti es duensa pabia di bu ofertas di tudu korson. Obrigadu pa ofertas ku bu fasi atraves di metudus ku faladu del na donate.jw.org.