Sera ki Deus Ten?

Resposta di Biblia

Sin, Biblia da provas klaru ku ta mostra di kuma Deus ten. I nsentivanu tene fe na Deus, i ka so fia na ke ku riliẑions ta fala, ma pa no “proba tudu” i usa no “ntindimentu”. (1 Tesalonisensis 5:21; 1 Jon 5:20) Jubi splikason aserka des ku bin di Biblia:

• Ordi ku ta ojadu na seu ku Tera ta mostra kuma i ten kin ku kumpu elis. Biblia fala: “Kada kasa ten kin ku kumpul, ma kin ku kumpu tudu kusa i Deus.” (Ebreus 3:4) Apesar di ke ku faladu li i simplis, manga di jinti instruidu ta ojal suma un kusa ku tene forsa.a

• Suma pekaduris, no kumpudu ku diseẑu di ntindi signifikadu di vida ku si objetivu, i un tipu di fomi ku no ta kontinua tene, mesmu dipus di no kume. El ku manda Biblia fala di un tipu di fomi ki ka fisiku, ma spiritual, i es nklui nesesidadi di kunsi Deus i adoral. (Mateus 4:4; Apokalipsi 4:11) Es nesesidadi spiritual ka ta danu prova so di kuma Deus ten, ma tambi i ta mostra kuma i un Kriadur ku amanu i ku misti pa no satisfasi es nesesidadi.

• Biblia tene profesias ku skirbidu manga di anus atras, e kumpri tin-tin pa tin-tin. Es ta mostra di kuma, e ka bin di pekaduris. — 2 Pedru 1:21.

• 

  Skirbiduris di Biblia teneba kunsimentu di kusas sientifiku, ku jintis di se tempu ka ntindi. Pur isemplu, na tempu antigu, manga di jintis ta fiaba di kuma Tera sta riba di limaria, suma lifanti, purku di matu, o baka. Ma, Biblia fala kuma, Deus “pindra mundu riba di nada.” (Jo 26:7) Biblia fala tambi kuma, Tera i “globu”. (Isaias 40:22) Manga di jintis ta fala kuma, es ntindimentu ku skirbiduris di Biblia tene, ki diferenti di jintis di se tempu, ta mostra kuma e risibi kil informason di Deus.

• Biblia tene resposta pa manga di purguntas difisil. Ora ke ka ruspundidu i pudi leba algin ka fia na Deus. Pur isemplu: Si Deus i amor, i tene tudu puder, ke ku manda i ten sufrimentu ku maldadi na mundu? Pabia di ke ku manda, manga di bias riliẑion ta leba algin na fasi ke ki i mau, en ves di fasi ke ki i bon? — Titu 1:16.