Kontinua sedu fiel pa Jeova

Kristons di bardadi ta disidi pa ka pirmiti nada o ningin tuji elis adora Jeova. Sin duvida, i des manera ku bu ta sinti. Jeova ta da balur pa bu fidelidadi. (Lei 1 Kronikas 28:9.) Kal situasons ku pudi torna difisil pa bu kontinua sedu fiel pa rel i ke ku pudi judau?

1. Kuma ku utrus pudi testa no fidelidadi pa Jeova?

Alguns jintis na tenta tujinu sirbi Jeova. Ba kin ku na tenta fasi es? Alguns jintis para sirbi Jeova i gosi e ta konta mintida kontra si organizason pabia e misti kaba ku no fe. E jintis ta comadu apostatas. Tambi, alguns ŝefis riliẑiosu ta spalia informasons falsu aserka di nos, pabia e misti pa kilis ku ka nota di pirigu para sirbi Jeova. I pirigosu papia ku kualker un des jintis ku sta kontra nos, lei se livrus, visita se paẑinas na internet o jubi se videos. Aserka di kilis ku ta tenta disanima utrus di sirbi Jeova ku fidelidadi, Jesus fala: “Bo disa elis; e sedu gias segu. Ora ku un segu gia utru segu, tudu dus ta kai na koba.” — Mateus 15:14.

2. Kuma ku disisons ku no ta toma pudi testa no fidelidadi pa Jeova?

Amor pa Jeova na lebanu ka toka na nada ku sta ligadu ku riliẑions falsu. Nin no tarbaju o organizason ku no pertensi o kualker utru atividadi ku no na partisipa nel ka dibi di sta ligadu ku riliẑions falsu. Jeova avisanu: “Ña pobu, bo sai [di Garandi Babilonia]”. — Apokalipsi 18:2, 4.

APRINDI MAS

3. Toma kuidadu ku falsus nsinaduris

Kuma ku no dibi di reaẑi si no obi kusas negativu aserka di organizason di Jeova? Lei Ditus 14:15, dipus bo kombersa aserka des purgunta:

• Ke ku manda no dibi di kuida pa ka fia na kualker kusa ku no obi?

Lei 2 Jon 9-11, dipus bo kombersa aserka des purguntas:

• Kuma ku no dibi di trata apostatas?

• Mesmu si no ka na tene kontaktu diretu ku apostatas, kuma ku no pudi tene kontaktu ku se nsinus?

• Kuma ku bu pensa Jeova na sinti ora ku no na sukuta kombersas negativu aserka del o si organizason?

4. Kontinua sedu fiel pa Deus ora ku un ermon fasi pekadu

Si no sibi kuma un algin na kongregason fasi un pekadu gravi, ke ku no dibi di fasi? Jubi un prinsipiu ku sta na lei di Deus pa antigu nason di Israel. Lei Sirmonias 5:1.

Di akordu ku es prinsipiu, si no sibi kuma algin fasi un pekadu gravi no dibi di konta ansions ke ku no sibi. Ma antis di no fasi kila, i na sedu bon pa no falal pa el propi i bai konta ansions si pekadu. Si i ka seta fasil, no fidelidadi pa Jeova na lebanu konta ansions ke ku no sibi. Kuma ku fasi kila ta mostra no amor fiel pa . . .

• Jeova Deus?

• ki algin ku fasi pekadu?

• utrus na kongregason?

5. Sai di Garandi Babilonia

VIDEO: Sai di Garandi Babilonia! (5:06)

Lei Lukas 4:8 ku Apokalipsi 18:4, 5, dipus ruspundi es purguntas:

• Sera ki ña nomi sta inda na lista di membrus di riliẑion falsu?

• Sera ki N fasi parti di un organizason ku tene ligason ku utru riliẑion?

• Sera ki ña tarbaju ta apoia riliẑion falsu di un manera o utru?

• Sera ki i ten utru aria na ña vida ku N pirsisa di separa di riliẑion falsu?

• Si N ruspundi sin pa un des purguntas kal mudansas ku N dibi di fasi?

Na tudu es situasons toma disisons ku na disau ku un konsiensia limpu i ku na mostra bu fidelidadi pa Jeova.

RUSUMU

Pa kontinua fiel pa Jeova, no pirsisa di para ndianta ku kilis ku ta tenta disvianu.

Rekapitulason

• Ke ku manda no ka dibi di sukuta ke ku apostatas ta fala?

• Ke ku no dibi di fasi, si no sibi di kuma un ermon fasi un pekadu gravi?

• Kuma ku no pudi obdisi avisu di sai di riliẑion falsu?

TENE MAS INFORMASON

Aprindi kuma ku bu pudi reaẑi ora ku utrus na spalia informasons falsu aserka di Tustumuñas di Jeova.

“Sera ki bu tene provas?” (Sintinela di agustu di 2018)

Kuma ku bu pudi sibi kal organizason o atividadis ku ta apoia Garandi Babilonia?

“Manti okupadu duranti fin di ‘fin de tempu’” (Sintinela di otubru di 2019, paragrafus 16-18)

Ke ku alguns jintis ku sta kontra nos ta tenta fasi pa torna no fe fraku?

Toma Kuidadu pa Bu ka Nganadu (9:32)