LISON 57
Ke ku bu dibi di fasi si bu fasi un pekadu gravi?
Mesmu manera ku bu ama Jeova ciu, i bu ta fasi manga di sforsu pa ivita kualker kusa ku na pul i sinti mal, i na ten mumentus ku bu na yara. Ma i ten pekadus mas gravi di ki utrus. (1 Koríntius 6:9, 10) Si bu fasi un pekadu gravi, lembra di kuma Jeova ka na disa di amau, i sta pruntu pa judau i purdau.
1. Ke ku no dibi di fasi pa risibi purdon di Jeova?
Kilis ku ama Jeova ta sta tristi dimas ora ke nota di kuma e fasi un pekadu gravi. Ma e ta sinti animadu ku promesa ku Jeova fasi pa si povu: “Mesmu ku bo pekadu i suma nodu kargadu na bos, i na torna branku fandan”. (Isaias 1:18) Si no ripindi di bardadi, Jeova na purda tudu no pekadu. Kuma ku no ta mostra di kuma no ripindi? No ta sinti tristi dimas pa ke ku no fasi i no ta para fasi ke ki mau, i no ta pidi Jeova pa i purdanu. Dipus no ta fasi sforsu garandi pa muda no manera di pensa, o kusas ku no kustuma fasi ku lebanu na fasi pekadu, i no ta fasi sforsu pa vivi sugundu normas puru di Jeova. — Lei Isaias 55:6, 7.
2. Kuma ku Jeova ta usa ansions pa judanu ora ku no fasi pekadu?
Si no fasi un pekadu gravi, Jeova falanu pa no “coma garandis di igreẑa”. (Lei Tiagu 5:14, 15.) Es ansions ama Jeova, e ama tambi kilis ku ta sirbi Jeova. E sinadu kuma ke pudi judanu pa no pudi tene mas un bon relason ku Jeova. — Gálatas 6:1.
Kuma ku ansions ta judanu ora ku no fasi un pekadu gravi? Dus o tris ansions na usa konsijus di Biblia pa pudi kuriẑinu. E na danu tambi suẑestons pratiku ku konsijus, ku na judanu ivita fasi mas pekadu. Pa proteẑi kongregason di mau influensia, ansions ta tira di kongregason kualker algin ku fasi pekadu gravi i ku ka ripindi.
APRINDI MAS
Ntindi minjor kuma ku Jeova ta judanu ora ku no fasi pekadu gravi i gardisil pa kila.
3. Konfesa ta judanu rekupera no amizadi ku Jeova
Kualker pekadu ku no fasi ta pui Jeova fika tristi, pa kila i bon kontal el. Lei Salmu 32:1-5, dipus bo kombersa aserka des purgunta:
Ke ku manda i bon konfesa no pekadus pa Jeova en ves di tenta sukundi elis?
Alen di konfesa no pekadus pa Jeova, no ta sinti mas minjor si no buska tambi ajuda di ansions. Mostra VIDEO, dipus bo kombersa aserka des purgunta:
Na video, ke ku ansions fasi pa juda Canon riba pa Jeova?
No pirsisa di konta ansions tudu ku pasa i sedu onestu ku elis, e sta la pa judanu. Lei Tiagu 5:16, dipus bo kombersa aserka des purgunta:
Kuma ku sedu onestu ku ansions ta torna mas fasil pa e judanu?
Konfesa bu pekadu, sedu onestu ku ansions, i seta ajuda ku Jeova ta da ku tudu amor.
4. Jeova ta mostra miserikordia pa kilis ku peka
Ora ku un algin fasi un pekadu gravi, i nega sigi normas di Jeova, i ta tiradu di kongregason i no ka ta pasa tempu ku el. Lei 1 Koríntius 5:6, 11 dipus bo kombersa aserka des purgunta:
Suma ku fermentu ta lantanda masa, kuma ku ndianti ku un algin ku fasi pekadu i ku ka ripindi ta afeta kongregason?
Pa kopia miserikordia ku Jeova ta mostra pa kilis ku fasi pekadu, ansions ta sforsa pa juda kilis ku tiradu di kongregason. Manga di jintis riba pa kongregason, pabia mesmu si e sinti dur pabia di disiplina, kila juda elis da konta di kuma ke ke fasi i mau. — Salmu 141:5.
Kuma ku manera ku Jeova ta lida ku kilis ku fasi pekadu, ta mostra di kuma i ka ta pidi pa no fasi ke ku no ka pudi fasi, i ta mostra miserikordia tambi i amanu?
5. Jeova ta purdanu ora ku no ripindi
Jesus usa un komparason pa judanu ntindi kuma ku Jeova ta sinti ora ku un algin ripindi. Lei Lukas 15:1-7, dipus bo kombersa aserka des purgunta:
Ke ku es ta sinau aserka di Jeova?
Lei Ezekiel 33:11, dipus bo kombersa aserka des purgunta:
Ke ki i bon fasi pa mostra di kuma no ripindi di bardadi?
Suma un bakiadur, Jeova ta kuida ben di si karnel.
ALGUNS JINTIS TA FALA: “N tene medu di kuma si N konta ansions pekadu ku N fasi, e na tiran di kongregason.”
Ke ku bu na fala un algin ku pensa des manera?
RUSUMU
Si bu fasi un pekadu gravi, ma bu ripindi di bardadi i bu disidi para fasi ke ki i mau, Jeova na purdau.
Rekapitulason
Ke ku manda i bon pa no konfesa no pekadus pa Jeova?
Ke ku no pirsisa di fasi pa Jeova purda no pekadu?
Si no fasi un pekadu gravi, ke ku manda no dibi di buska ajuda na mon di ansions?
TENE MAS INFORMASON
Kuma ku ansions ta sforsa pa juda kilis ku fasi un pekadu gravi?
Jubi kuma ku amor ku miserikordia ta mostradu pa kilis ku ka ripindi.
“Kuma ku ansions pudi juda kilis ku tiradu di kongregason” (Sintinela di Agustu di 2024)
Na storia “N pirsisa di riba pa Jeova,” aprindi ke ku manda un omi ku afasta di bardadi sinti di kuma Jeova ribantal mas.
“Biblia ta muda vida di jintis” (Sintinela di 1 di abril di 2012)