STUDU 36
KANTIKU 103 Os Anciãos São Um Presente de Jeová
Papia ku ansions ora ku bu pirsisa di ajuda
“Utru sta duenti na bo metadi? Pa i coma garandis di igreẑa”. — TIAGU 5:14.
KE KU NO NA BIN APRINDI
No na oja pabia ki importanti pidi ajuda di ansions ora ku no pirsisa.
1. Kuma ku Jeova mostra di kuma si servus tene balur pa rel?
JEOVA ama tudu kilis ku na sirbil, i ta kuida delis suma ku pastor ta kuida di si karnelis. I da vida di si Fiju ki gosta ciu del pa relis, tambi i pui pa ansions kuida delis. (At 20:28) Jeova misti pa ansions trata si servus ku amor. I kuji Jesus pa i sedu ŝef di kongregason. Ansions ta sigi orientason di Jesus i juda karnel kontinua tene amisadi ku Jeova. — Isa 32:1, 2.
2. Di akordu ku Ezekiel 34:15, 16, ba kin ku Jeova mas ta kuida del?
2 Jeova ta kuida di tudu si karnelis, ma i mas ta kuida di kilis ku sta fraku na sintidu spiritual. Alguns pudi sta fraku pabia e fasi pekadu, i Jeova ta usa ansions pa juda elis. (Lei Ezekiel 34:15, 16.) Ma i misti tambi pa no buska se ajuda ora ku no pirsisa. Alen di pidi ajuda di Jeova na orason, no pudi pidi tambi ajuda di ansions ku sedu “pastoris ku pursoris” na kongregason. — Ef 4:11, 12.
3. Kuma ku anos tudu no pudi benefisia ora ku no rikuñisi tarbaju di ansions?
3 Nes studu, no na bin aprindi kuma ku Jeova ta usa ansions pa juda kilis ku fraku na sintidu spiritual. Es studu na bin ruspundi es purguntas: Na kal mumentu ku no dibi di pidi ajuda di ansions? Pabia ku no dibi di fasi kila? Kuma ke pudi judanu? Mesmu si nes mumentu no ka sta na pasa difikuldadi, resposta pa es purguntas na aumenta no gardisimentu pa manera ku Jeova ta usa ansions, i es na judanu sibi ke ku no dibi di fasi ora ku no pirsisa di se ajuda.
NA KAL MUMENTU KU NO DIBI DI PAPIA KU ANSIONS?
4. Pabia ku no pudi fala di kuma Tiagu 5:14-16, 19, 20 na fala di duensa spiritual? (Jubi tambi fotos.)
4 Disipulu Tiagu splika kuma ku Jeova ta usa ansions pa judanu. I skirbi asin: “Utru sta duenti na bo metadi? Pa i coma garandis di igreẑa”. (Lei Tiagu 5:14-16, 19, 20.) Kontestu mostra di kuma, Tiagu staba na fala di duensa na sintidu spiritual. Pur isemplu, i ka fala kuma kin ku sta duenti dibi di coma mediku, ma i fala kuma i dibi di coma garandis, ku sedu ansions. Tiagu splika tambi di kuma ki algin duenti na kuradu ora ku si pekadu purdadu. Kusas ku algin ta fasi pa kuradu na sintidu spiritual, pudi parsi ku kusas ku algin ta fasi pa pudi kuradu na sintidu fisiku. Ora ku no sta duenti, no ta bai nunde mediku, no ta kontal kuma ku no na sinti i no ta sigi si orientason. Di mesmu manera, ora ku no sta duenti na sintidu spiritual, no dibi di papia ku un ansion, no kontal no situason i no aplika konsiju di Biblia ku no risibi.
Ora ku no sta duenti no ta bai nunde mediku, ora ku no sta duenti na sintidu spiritual no dibi di papia ku ansions. (Jubi paragrafu 4)
5. Kuma ku no pudi sibi si no amisadi ku Jeova sta na torna fraku?
5 Na Tiagu kapitulu 5 no nkoraẑadu papia ku ansions ora ku no nota di kuma no amisadi ku Jeova sta na torna fraku. Si no fasi kila, no na mostra di kuma no sedu jiru, pabia no na buska ajuda antis di pirdi aprovason di Jeova! No dibi di sedu sinseru ku no kabesa. Biblia avisanu di kuma si no ka toma kuidadu, no pudi pensa di kuma no tene aprovason di Jeova, ma na bardadi no ka tenel. (Tiagu 1:22) Kristons na Sardu fasi es eru, i Jesus avisa elis aserka di se kondison spiritual. (Apok 3:1, 2) Un di manera ku no pudi analisa no saudi spiritual, i ora ku no kompara kontentamentu ku no tene aos na adora Jeova, ku kil ku no teneba antis. (Apok 2:4, 5) No pudi punta no kabesa: ‘Sera ki ña alegria pa lei Biblia i pensa fundu nel rapati? Sera ki N ta bai tudu runion i N ta purpara so alguns partis? Sera ki ña animu na pregason rapati? Sera ki N ta pensa so na divirtimentu ku kusas ku N tene, i e ta toma tudu ña tempu?’ Si resposta di un des purguntas sedu sin, es ta mostra di kuma no tene un frakesa, i si kontra i ka kuriẑidu i pudi bin piora. Si anos propi no ka konsigi kaba ku no frakesa, o si es frakesa lebanu ja na viola normas di Deus, no dibi di buska ajuda di ansions.
6. Ke ku kilis ku fasi un pekadu gravi dibi di fasi?
6 I klaru di kuma, kilis ku fasi pekadu gravi, pekadu ku pudi pui un algin tiradu di kongregason dibi di buska ajuda di un ansion. (1 Kor 5:11-13) Kualker algin ku fasi un pekadu gravi pirsisa di ajuda pa rekupera si amisadi ku Jeova. Pa pudi tene purdon di Jeova atraves di resgati, no dibi di ‘yanda na manera ku ta mostra ripindimentu.’ (At 26:20) Un di manera ku no pudi fasi kila i ora ku no pertusi di un ansion i no kontal di kuma no fasi un pekadu gravi.
7. Ba kin mas ku pirsisa di ajuda di ansions?
7 Ansions ka ta juda so kilis ku fasi pekadu gravi, ma tambi e ta juda kilis ku sta fraku na sintidu spiritual. (At 20:35) Pur isemplu, bu pudi sinti di kuma bu ka tene forsa di luta kontra diseẑus ku ka bali. I pudi sedu inda mas difisil, si kontra antis di bu kunsi bardadi bu teneba visiu di drogas, bu ta jubiba pornografia o bu ta lebaba un vida imoral. Ka bu burguñu pidi ajuda. Bu pudi papia ku un ansion ku bu pensa di kuma i na sukutau diritu, ku na splikau mudansas ku bu pirsisa di fasi, pa bu pudi kontinua luta kontra diseẑus ku ka bali. (Ekl 4:12) Si bu sta disanimadu pabia bu kontinua tene diseẑus ku ka bali, ansions na lembratau di kuma talves kila i sinal di kuma, bu amisadi ku Jeova un kusa seriu pa bo, bu sedu umildi i bu misti kontental. — 1 Kor 10:12.
8. Sera ki no pirsisa di papia ku ansions aserka di kada eru ku no fasi?
8 No ka pirsisa di papia ku ansions aserka di kada eru ku no fasi. Pur isemplu, imaẑina di kuma bu papia mal ku un ermon o irma, talves bu sai fora ku el. En ves di bai papia ku ansion bo pudi sigi konsiju di Jesus, i bai fasi pas ku bu ermon o irma. (Mat 5:23, 24) Bu pudi tambi fasi piskisa aserka di mansesa, pasensa i kontrola bu kabesa, i kila pudi judau tene bon maneras di sedu na futuru. I klaru di kuma si bu ka purdi risolvi bu purblema bu pudi pidi ajuda di ansions, oca ku Evódia ku Síntiki ka konsigi risolvi se purblema Paulu pidi un ermon di kongregason pa e juda elis, un ansion di bu kongregason pudi judau tambi. — Fil 4:2, 3.
PABIA KU NO DIBI DI PAPIA KU ANSIONS?
9. Pabia ku no ka dibi di disa pa borgoña tujinu papia ku ansions? (Ditus 28:13)
9 No pirsisa di fe ku koraẑen pa pidi ajuda di ansions ora ku no fasi un pekadu gravi o ora ku no sinti di kuma no ka pudi kontinua luta kontra diseẑus ku ka bali. No ka dibi di burguñu papia ku ansions. Pabia di ke? Jeova ku fasi aranẑu pa ansions judanu kontinua tene un amisadi forti ku el. Ora ku no papia ku ansions, no ta mostra di kuma no konfia na Jeova, i no sedu obdienti. No sibi di kuma no pirsisa di ajuda pa kontinua fasi ke i sertu. (Sal 94:18) Si no fasi pekadu, no na risibi miserikordia di Deus si no konfesa i no disa ki pekadu. — Lei Ditus 28:13.
10. Ke ku pudi kontisi si no tenta sugundi no pekadu?
10 Ora ku no konta ansions un pekadu ku no fasi, Jeova pudi purdanu, i no pudi tene mas bon amisadi ku el, ma si no ka konta ansions no na mas sufri. Oca Rei Davi tenta sugundi si pekadu, i sufri na sintidu spiritual, emosional i te mesmu na sintidu fisiku. (Sal 32:3-5) Ora ku no sta duenti o no molostra, mas no tarda pa trata, duensa mas ta piora. Di mesmu manera, si no fasi un pekadu gravi i no tarda pa pidi ajuda di ansions, no na mas sufri. Jeova ka misti pa es kontisi ku nos, e ku manda i falanu pa no papia ku ansions ki ta usa pa judanu rekupera no amisadi ku el. — Isa 1:5, 6, 18.
11. Si no sugundi un pekadu gravi, kuma ku kila pudi afeta utrus?
11 Si no sugundi un pekadu gravi, kila pudi afeta utrus. No pudi pui pa Jeova ka da si spiritu santu pa kongregason, i no pudi dana pas di no ermons ku irmas na kongregason. (Ef 4:30) Tambi, si no sibi di kuma un algin na kongregason fasi un pekadu gravi, no dibi di falal pa i bai konta ansions.a Si ka fasil no dibi di konta ansions, si no ka konta no na sedu tambi kulpadu. (Sir 5:1) No amor pa Jeova, dibi di motivanu konta bardadi. Si no fasi kila, no na juda pa kongregason kontinua limpu, i no na juda ki algin ku yara pa i torna tene mas amisadi ku Jeova.
KUMA KU ANSIONS TA JUDANU?
12. Kuma ku ansions ta juda kilis ku sta fraku na sintidu spiritual?
12 Biblia fala pa ansions juda kilis ku pirsisa di rekupera se amisadi ku Jeova. (1 Tes 5:14) Si bu fasi un eru, ansions pudi fasiu purguntas pa pudi ntindi bu manera di pensa ku bu sentimentus. (Dit 20:5) Bu pudi juda elis ora ku bu splika di manera klaru ke ku kontisi, mesmu si difisil pabia di bu kultura, bu manera di sedu o bu burguñu papia di ke ku kontisi. Ka bu preokupa di kuma bu pudi bin yara na ke ku bu na fala. (Jo 6:3) Ansions ka na lestu ku julgau pa ke ku bu fala, en ves di kila, e na sukutau diritu pa sibi tudu kusa, antis di dau konsiju basiadu na Biblia. (Dit 18:13) Ansions sibi di kuma i ta toma tempu pa juda un algin, utrora i pirsisa di papia ku ki algin mas di ki un bias, pa pudi judal.
13. Kuma ku ansions pudi judanu atraves di se orasons ku orientason basidu na Biblia? (Jubi tambi fotos.)
13 Ora ku no coma ansions, e ta sforsa pa ka burinu sentimentu di kulpa. Ma e ta ora pa nos. Bu na kontenti di oja “puder” ku se orason tene. Se ajuda nklui tambi ‘untau azeiti na nomi di Jeova.’ (Tiagu 5:14-16) Es “azeiti” nklui bardadi ku sta na Palabra di Deus. Ansions na usa Biblia pa konsolau i pa judau rekupera bu amisadi ku Jeova. (Isa 57:18) Testus di Biblia ke na usa pudi dau forsa di kontinua fasi ke ki bon. Atraves delis bu pudi obi vos di Jeova ku na falau: ‘Es ki kamiñu, yanda nel.’ — Isa 30:21.
Ansions ta usa Biblia pa nkoraẑa i konsola kilis ku sta duenti na sintidu spiritual. (Jubi paragrafu 13 ku 14)
14. Di akordu ku Gálatas 6:1, kuma ku ansions ta juda un algin ku “kai di repenti na un kulpa”? (Jubi tambi fotos.)
14 Lei Gálatas 6:1. Un ermon o un irma ku “kai di repenti na un kulpa” ka sta na sigi normas justu di Deus. I pudi sedu ki i toma un mau disison o i fasi un pekadu gravi. Pabia di amor ku ansions tene pa ki ermon o irma e na tenta “ndirital ku mansesa.” Palabra gregu ku traduzidu pa ‘ndirita’ pudi rifiri tambi torna un os na si lugar pa ka algin bin fika ku dur pa sempri. Un bon mediku ta toma kuidadu ora ki na torna os na si lugar, pa ka aumenta dur di algin. Di mesmu manera, ora ku ansions na kuriẑi un algin ku kai di repenti na un kulpa, e ka ta misti aumenta dur di ki ermon, en ves di kila e ta tenta kuriẑil ku bondadi. Biblia fala pa ansions “jubi [se kabesa].” Ora ke na juda un algin aplika konsiju di Biblia, ansions ta lembra sempri di kuma elis tambi e ta yara. E ka ta pensa di kuma e mas justu di ki algin ke sta na juda, ma e ta sedu umildi i sinti pena. — 1 Ped 3:8.
15. Ke ku no dibi di fasi ora ku no tene un purblema?
15 No pudi konfia na ansions di kongregason. E risibi trenamentu pa ka konta utrus no asuntus konfidensial, pa basia se kunsiju na Biblia, en ves di basia na se propi opinion i pa judanu karga no propi kargu. (Dit 11:13; Gal 6:2) Ansions tene diferentis manera di sedu i utrus tene mas spiriensia di ki utrus, ma no dibi di sinti avontadi pa papia ku kualker ansion ora ku no tene un purblema. I bon lembra di kuma, no ka dibi di kontinua pidi diferentis ansions konsiju ku speransa di kuma un delis na kontanu ke ku no misti obi. Si no fasi kila, i na sedu suma si no tene kilis ku na kontanu kusas ku na ‘kosanu oreja’, en ves di no aprindi “bon nsinamentu” di Palabra di Deus. (2 Tim 4:3) Ora ku no bai papia ku un ansion aserka di un purblema, i pudi puntanu si no papiaba ja ku utrus ansion, i kal konsiju ke danu. Suma i rikuñisi si limiti, purmeru i na papia inda ku utru ansion. — Dit 13:10.
RESPONSABILIDADI KU KADA UN DI NOS TENE
16. Kal responsabilidadi ku no tene?
16 I bardadi di kuma, ansions ta bisianu suma karnelis di Deus, ma e ka ta kontanu ke ku no dibi di fasi. Kada un di nos tene responsabilidadi di vivi di un manera ku na kontenta Deus. Kada un di nos na presta konta dianti di Deus pa ke ki fala ku ke ki fasi. Ku si ajuda no pudi toma bon disisons i kontinua fiel. (Rom 14:12) En ves di ansions kontanu ke ku no dibi di fasi, e ta judanu ntindi manera di pensa di Jeova suma ki sta na si palabra. Ora ku no pensa na konsiju ke danu basiadu na Biblia i no pul na pratika, no na pudi aprindi manera di pensa di Jeova i toma bon disisons. — Eb 5:14.
17. Ke ku Jeova misti pa no fasi?
17 No kontenti manera ku Jeova ta kuida di nos diritu, suma ku un bon bakiadur ta kuida di si karnel! Jeova manda Jesus ku sedu “bon bakiadur” pa pudi paga resgati pa nos, pa no tene oportunidadi di tene vida ku ka ta kaba. (Jon 10:11) Jeova danu tambi ansions pa kuida di nos na kongregason suma ki purmiti: “N na da bos ŝefis konformi ña korson ku na toma konta di bos ku kunsimentu ku jiresa.” (Jer 3:15) Ora ku no sta fraku o duenti na sintidu spiritual, no ka dibi di burguñu papia ku ansions. Si no papia ku ansions, no na oja kuma ku Jeova ta usa elis pa judanu.
KANTIKU 31 Anda Sempre com Jeová
a Dipus di da algin ku fasi pekadu tempu sufisienti pa i konta ansions, si ka fasil, bu fidelidadi pa Jeova na lebau konta ansions ke ku bu sibi.