STUDU 47
KANTIKU 103 Os Anciãos São Um Presente de Jeová
Ermons, sera ki bo sta na sforsa pa sirbi suma ansion?
“Si un omi ten vontadi di sedu presbiteru, i dija bon tarbaju.” — 1 TIM 3:1.
KE KU NO NA BIN APRINDI
Nes studu, no na fala di maneras di sedu ku Biblia fala un ermon pirsisa di tene, pa pudi sedu ansion.
1-2. Kal “bon tarbaju” ku un ansion ta fasi?
SI BU sta na sirbi suma servu ministerial, talves bu sforsa ciu pa tene manga di maneras di sedu ku bu pirsisa del, pa pudi sedu ansion. Sera ki bu misti fasi “bon tarbaju” ku ansions ta fasi? — 1 Tim 3:1.
2 Kal tarbaju ku un ansion ta fasi? I ta pega tesu na pregason, i ta tarbaja duru pa pastoria i nsina kongregason. Tambi i ta juda ermons ku irmas pa e torna se fe forti, atraves di ke ki ta papia i ke ki ta fasi. I pa bon motivu ku Biblia coma ansions ku ta tarbaja duru di “dons pa omis.” — Ef 4:8.
3. Kuma ku un ermon pudi sedu ansion? (1 Timótiu 3:1-7; Titu 1:5-9)
3 Kuma ku bu pudi sedu ansion? I ka so ora ku un algin tene kapasidadi ku ta pui pa i sedu ansion. Manga di bias, pa tene un tarbaju bu pirsisa so di sibi fasi kusas ku patron sta na buska. Ma pa sedu ansion, bu pirsisa mas di ki so sibi prega i nsina diritu. Tambi, bu pirsisa di tene maneras di sedu ku faladu del na 1 Timótiu 3:1-7 ku Titu 1:5-9. (Lei.) Nes studu, no na fala di alguns maneras di sedu ku faladu del nes versikulus. No na oja kuma ku un ermon pudi tene bon nomi dentru ku fora di kongregason, kuma ki pudi sedu un bon isemplu suma ŝef di familia, i sta dispostu pa sirbi kongregason.
TENE UN BON NOMI
4. Ke ku “sedu sin kulpa” signifika?
4 Pa sirbi suma un ansion, bu dibi di ‘sedu sin kulpa’ ku signifika, bu dibi di tene un bon nomi na kongregason i ningin ka na tene motivu di akusau di mau komportamentu. Tambi bu dibi di sedu ‘algin ku jinti di fora ta rispita.’ Jintis di fora pudi kritikau pa ke ku bu fia nel, ma e ka dibi di tene motivu di duvida di kuma bu sedu onestu i bu sedu un bon algin. (Dan 6:4, 5) Punta bu kabesa: ‘Sera ki N tene bon nomi tantu dentru suma fora di kongregason?’
5. Kuma ku bu pudi mostra di kuma, bu sedu “amigu di kil ki bon”?
5 Si bu sedu ‘amigu di kil ki bon,’ bu na oja bon maneras di sedu na utrus, i bu na ngaba elis pa kila. Bu na kontenti tambi di fasi bon kusas pa utrus, te mesmu kusas ku bu ka tene obrigason di fasi. (1 Tes 2:8) Pabia ki importanti pa ansions tene es manera di sedu? Pabia e ta usa ciu se tempu na kuida di ermons ku irmas di kongregason i kuida di tarbajus ke dadu. (1 Ped 5:1-3) Ma kontentamentu ke ta tene di sirbi utrus, i mas garandi di ki kualker sakrifisiu ke ta fasi. — At 20:35.
6. Ke ku signifika sedu “gasijadur”? (Ebreus 13:2, 16; jubi tambi foto.)
6 Bu pudi mostra di kuma bu sedu ‘gasijadur’ ora ku bu ta fasi bon kusas pa utrus, nkluindu kilis ku ka fasi parti di bu amigus. (1 Ped 4:9) Un disionariu di Biblia fala di kuma un omi ku sedu gasijadur, ta mostra bondadi te mesmu pa jintis ki ka kunsi, i ta kontenti di kumbida elis si kasa. Punta bu kabesa: ‘Sera ki N kunsidu suma un algin ku ta mostra bondadi pa kilis ku ta visita no kongregason?’ (Lei Ebreus 13:2, 16.) Un algin ku sedu gasijadur ta mostra bondadi pa tudu tipu di visitantis. Pur isemplu, i ta mostra bondadi pa kilis ku sedu koitadi, kilis ku ta tarbaja duru, suma superintendentis di sirkuitu ku oradoris visitanti. — Kum 18:2-8; Dit 3:27; Luk 14:13, 14; At 16:15; Rom 12:13.
Un kasal kriston sta na gasija un superintendenti viaẑanti ku si minjer. (Jubi paragrafu 6)
7. Kuma ku un ansion ta mostra di kuma, i “ka dibi di ba ta faima pa diñeru”?
7 ‘Ka dibi di ba ta faima pa diñeru.’ Es signifika di kuma diñeru ku kusas ku bu tene, i ka kusas mas importanti pa bo. Nin si bu sedu riku o koitadi, sirbi Jeova i kusa mas importanti na bu vida. (Mat 6:33) Bu pudi usa bu tempu, inerẑia ku kusas ku bu tene pa adora Jeova, kuida di bu familia i sirbi na kongregason. (Mat 6:24; 1 Jon 2:15-17) Punta bu kabesa: ‘Kuma ku N ta oja diñeru? Sera ki N ta kontenti ku kusas ku N pirsisa del pa vivi? O sera ki N ta misti tene mas diñeru ku kusas material?’ — 1 Tim 6:6, 17-19.
8. Kal ki alguns maneras ku bu pudi mostra di kuma, bu ‘sibi domina bu cabeça’?
8 Si bu ‘sibi domina bu cabeça, bu na sedu ekilibradu na tudu arias di bu vida. (NOBO TESTAMENTO NA CRIOL.) Es signifika ivita pasanta mon na kume, na bibi, na bu manera di bisti ku stilu di bu kabelu i na jumbai. Bu ka ta kopia manera di vivi di jintis ku ka ta sirbi Jeova. (Luk 21:34; Tiagu 4:4) Bu ta kontinua manti kalmu nin si utrus tratau mal. Bu ‘ka dibi di ba ta bibi biñu ciu’, ku sedu bibi tok bu cami, nin jintis ka dibi di kunsiu suma algin ku ta bibi ciu, nin si bu ka ta cami. Punta bu kabesa: ‘Sera ki ña manera di vivi ta mostra di kuma, N sibi kontrola i domina ña kabesa?’
9. Ke ku signifika ‘sibi guberna bu kabesa’ ku “ten ordi”?
9 Si bu sedu un algin ku ‘sibi guberna si kabesa’, bu na pensa na ke ku Biblia fala aserka di diferenti situasons na bu vida. Pensa fundu na kuma ku konsijus di Biblia ta aplika na ki situason, na judau ntindi asuntu diritu i toma bon disisons. Ka bu turmenta na toma disisons. Ma jubi si kontra bu tene tudu informasons ku bu pirsisa del. (Dit 18:13) Asin, bu na toma bon disison ku na sta di akordu ku manera di pensa di Jeova. Si bu sedu un algin ku ‘ten ordi,’ bu na sedu organizadu i ku ta rispita ora. Bu na kunsidu suma un algin di konfiansa i ku ta sigi orientasons. Es maneras di sedu na judau pa bu tene un bon nomi. Gosi, no na fala di maneras di sedu ku Biblia fala un ansion dibi di tene, pa sedu un bon isemplu suma ŝef di familia.
SEDU UN BON ISEMPLU SUMA ŜEF DI FAMILIA
10. Kuma ku un omi ta “guberna si kasa diritu”?
10 Si bu sedu omi i bu misti sedu ansion, bu familia pirsisa tambi di sedu un bon isemplu pa utrus. Bu pirsisa di ‘sibi guberna bu kasa diritu’. Es signifika di kuma, bu pirsisa di kuida di bu familia ku amor i toma bon disisons pa familia. Bu ta diriẑi adorason na familia, bu ta fasi tudu pa bu familia mati runions di kongregason i juda elis da se minjor na pregason. Pabia kes i importanti dimas? Apostolu Paulu punta: “Si algin ka sibi guberna si familia propi, kuma ki pudi toma konta di igreẑa di Deus?” — 1 Tim 3:5.
11-12. Pabia ku komportamentu di fijus di un ermon i importanti dimas, si i misti sedu ansion? (Jubi tambi fotos.)
11 Si bu sedu pape, bu fijus ku tene menus di 18 anu i ku sta bas di bu kuidadu, dibi di ‘obdisiu ku tudu rispitu.’ Bu pirsisa di nsina elis i kria elis ku amor. Na bardadi, bu misti pa e sedu filis, ri i brinka suma tudu utrus mininus. Ma, bu pirsisa tambi di nsina elis pa e obdisiu, rispita utrus i komporta diritu. Tambi bu dibi di fasi bu minjor pa juda bu fijus tene amisadi ku Jeova, aplika ke ku Biblia fala i sforsa pa yangasa objetivu di batisa.
12 ‘Tene fijus krenti ku ka ta faladu kuma e ten falta di ordi, nin e ka ta obi.’ Si un ermon disignadu tene un fiju batisadu o ku sta na sforsa pa batisa, i ki fiju fasi un pekadu gravi, kuma ku kila na afeta si pape? Si pape ka nsina i disiplina si fiju, i pudi ka kualifika pa sedu ansion. — Jubi Sintinela di 15 di Otubru di 1996, paẑina 21, paragrafu 6 ku 7.
Ŝefis di familia ta nsina se fijus fasi kusas pa Jeova i pa kongregason. (Jubi paragrafu 11)
SIRBI KONGREGASON
13. Kuma ku bu pudi mostra di kuma bu sedu “di pasensa” i bu ka “sedu kunfiadu”?
13 Ermons ku tene bon maneras di sedu di un kriston, ta sedu di ajuda garandi pa kongregason. Un omi ‘di pasensa’ ta sforsa ciu pa tene pas ku utrus i juda utrus tene pas ku n̈utru. Si bu misti kunsidu suma un algin di pasensa, sukuta utrus i tenta ntindi se manera di pensa. Imaẑina kuma bu sedu ja ansion. Na un runion di korpu di ansions, sera ki bu na sta dispostu pa apoia disison di maioria, si ka sta kontra un lei o prinsipiu di Biblia? ‘Ka dibi di sedu kunfiadu’ signifika di kuma, bu ka ta nsisti pa utrus fasi kusas di bu manera. Bu sibi di kuma i importanti obi opinion di utrus. (Kum 13:8, 9; Dit 15:22) Bu sedu un algin ku ‘ka gosta di jus’ o ‘ku ta lestu di paña raiba.’ Es signifika di kuma bu ka ta mostra falta di rispitu pa utrus o jusia ku elis. Ma bu ta sedu bon ku elis. Suma bu sedu un algin ku ta buska pas, bu ta sforsa ciu pa fasi pas ku utrus, mesmu na situasons difisil. (Tiagu 3:17, 18) Bu bon palabras pudi kalma utrus, te mesmu kilis ku sta kontra ke ku bu ta fia nel. — Ŝef 8:1-3; Dit 20:3; 25:15; Mat 5:23, 24.
14. Ke ku signifika “sedu algin maduru na fe” i “puru”?
14 Un ermon ku na sirbi suma ansion i un ‘algin maduru na fe.’ Bu ka pirsisa di batisa pa manga di anus, ma bu pirsisa di tempu pa sedu un kriston maduru. Antis di sedu ansion, bu dibi di mostra di kuma bu sedu umildi suma Jesus, i sta kontenti di pera pa Jeova dau responsabilidadi na kongregason. (Mat 20:23; Fil 2:5-8) Bu pudi mostra di kuma bu sedu ‘puru’, o fiel ora ku bu kontinua sirbi Jeova, sigi si normas justu i sigi orientason di si organizason. — 1 Tim 4:15.
15. Sera ki un ansion dibi di sedu un algin ku ta fasi bon diskursus? Bu pudi splika.
15 Biblia mostra di manera klaru di kuma, ansions dibi di ‘ten jitu pa nsina.’ Sera ki es signifika di kuma bu dibi di sedu un algin ku ta fasi bon diskursus? Nau. I ka tudu ansions ku sibi fasi bon diskursu. Ma ora ke na prega i fasi visitas di pastoreiu, e sibi usa Biblia diritu pa nsina i nkoraẑa ermons ku irmas. (1 Timótiu 3:2a; komparal ku 1 Koríntius 12:28, 29 ku Efésius 4:11.) Mesmu si bu ka sibi fasi bon diskursus, bu pirsisa di kontinua sforsa pa minjoria bu manera di nsina. Kuma ku bu pudi fasil?
16. Kuma ku bu pudi minjoria bu manera di nsina? (Jubi tambi fotos.)
16 ‘Pega na palabra sertu di nsinamentu.’ Pa minjoria bu manera di nsina, basia sempri na Biblia, ora ku bu na nsina i konsija bu ermons ku irmas. Sedu bon studanti di Biblia ku di no publikasons. (Dit 15:28; 16:23; Titu 1:9)b Ora ku bu na studa, presta atenson na kuma ku no publikasons ta splika versikulus di Biblia, pa bu pudi aplika elis diritu. Ora ku bu na nsina, tenta toka korson di kilis ku na obiu. Bu pudi minjoria bu manera di nsina, si bu pidi ideias di ansions ku tene spiriensia i aplika elis. (1 Tim 5:17) Ansions pirsisa di ‘konsija’ o nkoraẑa, se ermons ku irmas, ma utrora e dibi di ‘mostra elis se eru.’ Na tudu es dus situason, ansions dibi di fasil sempri ku bondadi. Si bu sedu bon, bu ta mostra amor i basia bu nsinu na Palabra di Deus, bu na minjoria bu manera di nsina, pabia ku na kopia Jesus, Nsinadur Garandi. — Mat 11:28-30; 2 Tim 2:24.
Un servu ministerial apruveita di un oportunidadi di usa Biblia pa nkoraẑa utrus, oca ki sta ku un ansion ku tene spiriensia. Tambi servu ministerial sta na nsaia si diskursu dianti di un speliu. (Jubi paragrafu 16)
KONTINUA SFORSA
17. (a) Ke ku pudi juda servus ministerial kontinua sforsa pa sedu ansion? (b) Ke ku ansions dibi di lembra del ora ke na jubi si un ermon dibi di sedu ansion? (Jubi kuadru “Ka bu sedu duru dimas ora ku bu na avalia utrus.”)
17 Dipus di jubi maneras di sedu ki pirsis pa sedu ansion, alguns servus ministerial pudi pensa di kuma, nunka e ka na pudi sedu ansion. Ma lembra di kuma, nin Jeova, nin si organizason, ka na spera pa bu mostra es maneras di sedu di manera perfeitu. (1 Ped 2:21) Tambi i spiritu di Jeova ku tene puder, ku pudi judau tene es maneras di sedu. (Fil 2:13) Sera ki i ten un manera di sedu ku bu misti minjoria? Ora Jeova aserka di kila. Piskisa aserka di ki manera di sedu, i pidi un ansion pa i dau ideias di kuma ku bu pudi minjoria.
18. Ke ku tudu servus ministerial nkoraẑadu pa fasi?
18 Pa tudu ermons, nkluindu kilis ku sta ja na sirbi suma ansions, pa e kontinua mostra maneras di sedu ku faladu del nes studu. (Fil 3:16) Sera ki abo i un servu ministerial? Kontinua sforsa! Pidi Jeova pa i formau pa bu pudi sirbil inda mas i sirbi kongregason. (Isa 64:8) Pa Jeova bensuau ciu pa sforsu ku bu sta na fasi pa tene maneras di sedu, pa pudi sirbi suma ansion.
KANTIKU 101 Servimos a Jeová em União
a Ten jitu pa nsina: Un ansion dibi di sibi nsina diritu, konsigi splika bardadis di Biblia ku prinsipius aserka di komportamentu pa si ermons na fe. Na karta ku Paulu skirbi pa Titu, i fala di kuma un ansion pirsisa di “pega na palabra sertu di nsinamentu” pa pudi nkoraẑa, konsija i raprindi. (Titu 1:5, 7, 9) Paulu usa tambi palabras “bon pursor” na sugundu karta pa Timótiu. La i fala di kuma “servu di Siñor” pirsisa di kontrola si kabesa i nsina di manera “mansu pa raprindi kilis ku sta kontra”. (2 Tim 2:24, 25) Pa kila, un ansion dibi di sibi usa Skrituras pa konvensi algin, da bon konsiju i toka korson di kilis ku na sukutal. I pirsisa di sedu un bon studanti di Palabra di Deus, pa pudi nsina utrus ku sedu tambi studantis di Biblia.
b Pega na palabra sertu di nsinamentu: Un ansion ta pega na Palabra di Deus, na manera ki ta nsina i na manera ki ta vivi. Ora ki na nsina dianti di kongregason, i ka ta konfia na si ideias, spriensia o kapasidadi di nsina, ma na “palabra sertu di nsinamentu” o na ‘mensaẑen di konfiansa’ ku sta na Skrituras. (1 Kor 4:6) Des manera, i ta toka korson di kilis ku na sukutal, pa e ama i sirbi Jeova. (Eb 4:12) Tambi, suma i ta vivi di akordu ku prinsipius di Skrituras ki ta nsina, i ta ivita kualker sinal di finjimentu. Un ansion ku ta pega es norma, ta juda kongregason kontinua sta unidu, tambi i ta sedu suma “kuluna ku firkija di bardadi”. — 1 Tim 3:2, 15.