Mostra di kuma bu da balur pa omis ku Jeova ku Jesus ta usa na kongregason

1. Kal ki alguns prendas ku Jesus danu?

I KA ten pekadur ku sedu mas ẑenerosu di ki Jesus. Oca i staba na Tera, i usa si puder di fasi milagri pa juda utrus. (Luk 9:​12-17) Prenda mas garandi ki danu i oca ki muri pa nos. (Jon 15:13) Mesmu dipus ki lantandadu di mortu, Jesus kontinua sedu ẑenerosu. Suma ki purmiti, i pidi Jeova pa i darma si spiritu santu pa nsinanu i pa konsolanu. (Jon 14:​16, 17; 16:13) Tambi, atraves di no runions di kongregason, Jesus kontinua danu ke ku no pirsisa del pa fasi disipulus na mundu ntidu. — Mat 28:​18-20.

2. Ba kin ki “dons pa omis” ku faladu del na Efésius 4:​7, 8?

² No fala gosi di utru prenda ku Jesus danu. Apostolu Paulu skirbi di kuma, dipus ku Jesus bai pa seu “i da dons pa omis.” (Lei Efésius 4:​7, 8.) Paulu splika di kuma Jesus da es prenda pa pudi juda kongregason di manga di maneras. (Ef 1:​22, 23; 4:​11-13) Aos, es “dons pa omis” nklui servus ministerial, ansions na kongregason ku superintendentis di sirkuitu.a I bardadi di kuma es omis i jintis imperfeitus, e ta yara. (Tiagu 3:2) Ma no Siñor Jesus Kristu ta usa elis pa judanu, e sedu un prenda pa nos.

3. Da isemplu di kuma ku anos tudu no pudi apoia “dons pa omis.”

³ Jesus disigna es “dons pa omis” pa pudi fortifika kongregason. (Ef 4:12) Ma anos tudu no pudi juda elis kuida des responsabilidadi importanti ke dadu. No pudi kompara es ku konstruson di un Salon di Renu. Alguns ta tarbaja na konstruson. Utrus ta apoia tarbaju manera ke ta tisi kumida, juda na transporti ku utrus tarbajus. Di mesmu manera, no pudi apoia servus ministerial, ansions na kongregason ku superintendenti di sirkuitu atraves di ke ku no ta papia i ke ku no ta fasi. No jubi kuma ku se tarbaju duru ta benefisianu, i kuma ku no pudi mostra elis i mostra Jesus ku danu es “dons pa omis” di kuma, no da balur pa ke ke ta fasi.

SERVUS MINISTERIAL TA “JUDA UTRUS”

4. Kal ki alguns manera ku servus ministerial “juda utrus” na purmeru sekulu?

⁴ Na purmeru sekulu, alguns ermons disignadu suma servus ministerial. (1 Tim 3:8) Parsi di kuma i elis ku “juda utrus”, suma ku apostolu Paulu fala. (1 Kor 12:28) Pa kila, i pudi sedu ki servus ministerial ta kuidaba di asuntus ki pirsis, es ta pirmiti ansions konsentra na tarbaju di nsina ku fasi visitas di pastoreiu. Pur isemplu, talves servus ministerial ta fasiba kopia di testus di Skrituras o kumpra materialis ki pirsis pa fasi kopia.

5. Kal ki alguns tarbajus importanti ku servus ministerial ta fasi aos?

⁵ No jubi alguns tarbajus importanti ku servus ministerial ta fasi na kongregason. (1 Ped 4:10) E pudi disignadu pa kuida di kontas o tiritorius di kongregason, nkomenda publikasons i da ermons el, tarbaja na ekipamentu di audio ku video, sedu indikadur o juda na manutenson di Salon di Renu. I pirsis tudu es tarbajus pa kongregason pudi funsiona diritu. (1 Kor 14:40) Alen di kila, alguns servus ministerial ta tene partis na Runion Vida ku Ministeriu i fasi diskursus publiku. Un servu ministerial pudi tambi disignadu suma ajudanti di superintendenti di grupu. Utrora servus ministerial kualifikadu ta bai fasi visitas di pastoreiu juntu ku ansions.

6. Kal ki alguns motivu ku pui no dibi di da balur pa tarbaju duru di servus ministerial?

⁶ Kal tarbaju ku servus ministerial ta fasi pa juda kongregason? Un irma na Bolivia comadu Beberlyb fala sin: “N na gardisi no servus ministerial pabia N ta konsigi apruveita ben di runions. Pabia di se tarbaju N pudi kanta, sukuta diskursu, aprindi di videos ku fotos. E ta kuida di suguransa i di kilis ku ta mati runions atraves di videokonferensia. Dipus di runions e ta toma diantera na limpesa, e ta kuida di kontas, tambi e ta sertifika di kuma no tene publikasons ku no pirsisa del. Leslie ku mora na Kolombia ku si omi na sirbi suma ansion fala sin: “N na gardisi elis! Ña omi pirsisa di ajuda di servus ministerial pa kuida di manga di disignason. Sin elis, i na staba okupadu dimas, N na gardisi elis pa manera ke ta sta animadu i dispostu pa juda.” Sin duvida, no konkorda ku ke ki fala. — 1 Tim 3:13.

7. Kuma ku no pudi mostra di kuma no da balur pa tarbaju di servus ministerial? (Jubi tambi foto.)

⁷ Dentru di nos no pudi kontenti pa ke ku servus ministerial ta fasi, ma Biblia nsentivanu pa konta elis el. (Kol 3:15) Un ansion na Finlandia comadu Cristóvão, ta mostra si kontentamentu des manera: “N ta manda un karta o mensaẑen nunde ku N ta skirbi un testu di Biblia, N ta konta un di manera ku ki servu ministerial nkoraẑan o pabia ku N kontenti ku si tarbaju.” Pascal ku Jael, ku mora na Nova Kaledonia, ta ora di manera spesifiku pa servus ministerial. Pascal fala sin: “E tempus, no ta ora ciu pa no servus ministerial, no ta gardisi Jeova pa relis, no ta pidil pa i sta ku elis i pa i juda elis.” Jeova obi es orasons i tudu kongregason sta na benefisia. — 2 Kor 1:11.

ANSIONS NA KONGREGASON TA TARBAJA DURU NA BO METADI

8. Pabia ku Paulu skirbi di kuma ansions di purmeru sekulu ta tarbaja duru? (1 Tesalonisensis 5:​12, 13)

⁸ Ansions di purmeru sekulu ta tarbaja duru na kongregason. (Lei 1 Tesalonisensis 5:​12, 13; 1 Tim 5:17) E ta “diriẑi” kongregason atraves di diriẑi runions i toma disison suma korpu di ansion. E ta “nsina” se ermons ku irmas ora ke na da konsiju spesifiku, ma ku amor pa proteẑi kongregason. (1 Tes 2:​11, 12; 2 Tim 4:2) Sin duvida, es omis ta tarbaja tambi duru pa kuida di se familia i manti se propi fe ku se amisadi ku Jeova forti. — 1 Tim 3:​2, 4; Titu 1:​6-9.

9. Kal ki alguns responsabilidadis ku ansions di no tempu tene?

⁹ Ansions di no tempu sedu omis okupadu. E ta prega bon noba. (2 Tim 4:5) E ta pega tesu na toma diantera na pregason, e ta organiza tarbaju di pregason na tiritoriu lokal, i e ta trenanu pa no pudi prega i nsina utrus diritu. E ta tarbaja tambi suma juisis ku ta mostra miserikordia i ku ka ta fasi skuju. Ora ku un algin na kongregason fasi un pekadu gravi, ansions ta fasi sforsu pa judal rekupera si amisadi ku Jeova. Na mesmu tempu, e ta toma kuidadu pa manti kongregason limpu. (1 Kor 5:​12, 13; Gal 6:1) Ansions i pastoris, es i se tarbaju prinsipal. (1 Ped 5:​1-3) E ta fasi diskursus ben purparadu basiadu na Biblia, e ta sforsa pa kunsi tudu jintis na kongregason i e ta fasi visitas di pastoreiu. Alguns ansions tambi ta juda na konstruson ku manutenson di Salon di Renu, na organiza kongresus i tarbaja na Kumisons di Ligason ku Ospital i na Grupus ku ta Visita Duentis, fora di utrus disignason ke ta tene. Ansions ta tarbaja duru pa nos!

10. Kal ki alguns motivus ku no tene di kontenti ku tarbaju duru di ansions?

¹⁰ Jeova falaba ja di kuma ansions na kuida ben di nos, i di kuma ‘nunka mas no ka na ten medu, nin no ka na panta’. (Jer 23:4) Johanna, un irma na Finlandia, oja di kuma es palabras i bardadi oca ku si mame duensi risu. I fala sin: “Ami i ka un algin ku ta konta utrus ña sentimentu, mesmu asin un ansion ku N ka kunsi diritu mostra pasensa ku mi, i ora ku mi i garantin di kuma Jeova gosta di mi. N ka lembra izatamenti ke ki falan, ma N lembra di kuma N ka sta mas preokupadu. N pensa kuma Jeova ku mandal pa i bin judan na ora sertu.” Kuma ku ansions na bu kongregason judau?

11. Kuma ku no pudi mostra di kuma no da balur pa ke ku ansions ta fasi? (Jubi tambi foto.)

¹¹ Jeova misti pa no mostra di kuma no da balur pa ansions “pabia di se tarbaju.” (1 Tes 5:​12, 13) Henrietta ku mora na Finlandia fala sin: “Di livri vontadi ansions ta juda utrus, ma es ka signifika di kuma e tene mas tempu ku inerẑia o e ka tene purblemas na vida. Utrora N ta fala elis: ‘Abo i un bon ansion. N mistiba so pa bu sibi kila.’” Un irma na Turkia comadu Sera fala sin: “Ansions pirsisa di nkoraẑamentu pa pudi kontinua tarbaja. Pa kila, N ta skirbi elis karta, N kumbida elis pa kume o N ta sai pregason ku elis.” Sera ki i ten un ansion ku bu misti gardisi pa sforsu ki ta fasi? Buska maneras ku bu pudi gardisil. — 1 Kor 16:18.

SUPERINTENDENTIS DI SIRKUITU TA NKORAẐANU

12. Kal grupu di omis ku Jesus kuji pa nkoraẑa kongregasons na purmeru sekulu? (1 Tesalonisensis 2:​7, 8)

¹² Jesus Kristu kuji alguns omis pa juda kongregasons di utru manera. Bas di orientason di Jesus, ansions na Jerusalen manda Paulu, Barnabé ku utrus suma superintendentis viaẑanti. (At 11:22) Pabia di ke? Pa mesmu motivu ku pui servus ministerial ku ansions kujidu, ku sedu, pa nkoraẑa kongregasons. (At 15:​40, 41) Es omis fasi manga di sakrifisius, te mesmu e pui se vida na pirigu pa pudi nsina i nkoraẑa utrus. — Lei 1 Tesalonisensis 2:​7, 8.

13. Kal ki alguns responsabilidadis ku superintendentis di sirkuitu tene?

¹³ Superintendentis di sirkuitu ta viaẑa sempri. Alguns ta fasi bias lunju pa visita kongregasons. Kada semana, superintendenti di sirkuitu ta fasi manga di diskursus, visitas di pastoreiu, runion ku pionerus, runion ku ansions ku runions pa saidas di pregason. I ta purpara diskursus, organiza asembleias di sirkuitu ku kongresus. I ta nsina na skolas di pioneru, i ta organiza runions spesial ku pionerus na si sirkuitu, tambi i ta kuida di utrus asuntus importanti ku filial ta dal, ku utrora i ta sedu urẑenti.

14. Kal ki alguns motivu ku pui no ta kontenti ku tarbaju duru di superintendentis di sirkuitu?

¹⁴ Kuma ku kongregasons ta benefisia di bon tarbajus di superintendentis di sirkuitu? Un ermon na Turkia fala sin aserka di visitas di superintendentis di sirkuitu: “Kada un di se visitas ta motivan pa N pasa mas tempu na juda ña ermons ku irmas. N kunsi manga di superintendentis di sirkuitu, ma nin un son delis ka fasin sinti di kuma e ka misti papia ku mi o e sta okupadu dimas.” Johanna ku faladuba del na kumsada, staba na prega ku un superintendenti di sirkuitu, ma e ka ojaba ningin na kasa. I fala sin: “I ka tarda ku ña dus irmas munda, i N dijaba elis ciu. Superintendenti di sirkuitu nkoraẑan ciu, i judan oja di kuma gosi no pudi ka konsigi vivi juntu ku no familia ku amigus, ma na nobu mundu no na bin tene manga di oportunidadi di pasa tempu juntu. N ka na diskisi nunka di ki dia na pregason.” Manga di nos tene tambi bon lembransa di manera ku superintendenti di sirkuitu judanu. — At 20:37–21:1.

15. (a) Di akordu ku 3 Jon 5-8, kuma ku no pudi da balur pa superintendentis di sirkuitu? (Jubi tambi foto) (b) Pabia ku no dibi di mostra di kuma, no da balur pa minjeris di ermons ku ta tarbaja duru na kongregason, i kuma ku no pudi fasil? (Jubi kuadru “Lembra di se minjeris.”)

¹⁵ Apostolu Jon fala Gaius pa i risibi ben ermons ku bin nkoraẑa kongregason i pidil pa i “juda elis na bias na manera ku Deus ta kontenti”. (Lei 3 Jon 5-8.) Un di manera ku no pudi fasil, i ora ku no kumbida superintendenti di sirkuitu pa i kume ku nos. Un utru manera ku no pudi fasil i ora ku no ta mati runions di pregason na semana di visita. Leslie, ku faladu ba del na kumsada gardisi di utru manera tambi. I fala sin “N ta ora pa Jeova da elis ke ke pirsisa del. Ami ku ña omi no ta skirbi tambi elis kartas, i konta elis kuma ku se visitas judanu.” Lembra di kuma superintendentis di sirkuitu ta pasa mesmu purblemas suma nos. Utrora e ta tene purblema di saudi, kudadi garandi ku disanimu. Talves bu bon palabras o un simplis prenda pudi sedu resposta di orason ku superintendenti di sirkuitu fasi! — Dit 12:25.

NO PIRSISA DI “DONS PA OMIS”

16. Di akordu ku Ditus 3:​27, kal purguntas ku ermons pudi fasi se kabesa?

¹⁶ No pirsisa di manga di ermons pa sirbi suma “dons pa omis” na mundu ntidu. Si abo i un ermon batisadu, sera ki ‘bu ten manera di juda’? (Lei Ditus 3:27.) Sera ki bu sta dispostu pa sforsa pa yanga objetivu di sedu servu ministerial? Si bu sedu ja servu ministerial, sera ki bu sta dispostu pa sforsa pa yanga objetivu di sirbi bu ermons suma ansion?c Sera ki bu na konsigi fasi mudansas na bu vida pa pudi prenŝi pitison pa Skola pa Ivanjilizaduris di Renu? Es skola na formau i judau pa bu usadu di minjor manera pa Jesus. Si bu pensa kuma bu ka na pudi fasi es kusas, fasi orason pa Jeova. Pidil pa i judau ku si spiritu santu pa bu pudi sai ben na kualker disignason ku bu risibi. — Luk 11:13; At 20:28.

17. Ke ku “dons pa omis” ta mostra aserka di Jesus Kristu, no Rei?

¹⁷ Ermons ku Jesus kuji pa sirbi suma “dons pa omis” ta mostra di kuma Jesus sta na toma diantera nes tempu di fin. (Mat 28:20) Sera ki bu ka kontenti manera ku no tene un Rei ku amanu, ku gosta di pati, ku sibi ke ku no pirsisa del i ku danu ermons ku pudi judanu? Pa kila, buska oportunidadis pa gardisi es omis ku ta tarbaja duru. Tambi ka bu diskisi gardisi Jeova, pabia el ku danu “tudu bon pursenti ku tudu kusa diritu ku no patidu”. — Tiagu 1:17.