Ermons, sera ki bo sta na sforsa pa sedu servu ministerial?

1. Kuma ku apostolu Paulu ta nkara servus ministerial?

SERVUS ministerial ta fasi tarbaju importanti na kongregasons. Apostolu Paulu daba es omis fiel balur. Pur isemplu, oca ki na skirbi pa kristons na Filipus, i manda manteña pa servus ministerial ku ansions. — Fil 1:1.

2. Kuma ku un ermon comadu Luis sinti, manera ki disignadu servu ministerial?

² Manga di ermons batisadu ta kontenti dimas di sedu servus ministerial, i ka mporta kal idadi ke tene. Pur isemplu, Devan disignadu servu ministerial oca ki teneba 18 anu. Pa utru ladu, un ermon comadu Luis disignadu servu ministerial dipus di 50 anu. Kuma ki i sinti manera ki sedu servu ministerial? I fala sin: “N kontenti ciu di sirbi ermons ku irmas des manera na kongregason. E mostra di kuma e aman ciu, gosi N pudi mostra di kuma N ama elis.” Manga di servus ministerial ta sinti di mesmu manera.

3. Kal purguntas ku no na bin ruspundi?

³ Si abo i un ermon batisadu ku ka sedu inda servu ministerial, sera ki es pudi sedu bu objetivu? Ke ku pudi lebau na fasil? Pa sedu servu ministerial, kal maneras di sedu ku Biblia fala bu pirsisa di tene? Nes studu, no na bin ruspundi es purguntas. Ma purmeru, no na jubi ke ku un servu ministerial ta fasi.

KE KU UN SERVU MINISTERIAL TA FASI?

4. Ke ku un servu ministerial ta fasi? (Jubi tambi fotos.)

⁴ Servu ministerial i un ermon batisadu ku kujidu pa spiritu santu, pa juda ansions kuida di manga di kusas importanti na kongregason. Alguns servus ministerial ta jubi si kontra publikaduris tene tiritoriu ku publikasons ke pirsisa del pa pregason. Utrus ta juda na limpesa ku manutenson di Salon di Renu. Servus ministerial tambi ta sirbi suma indikaduris, e ta kuida di ekipamentu di son ku video na runions di kongregason. Mas importanti di tudu, servus ministerial i omis ku ama Jeova i ku ta vivi di un manera ku ta kontental. Tambi e ama ciu se ermons ku irmas na fe. (Mat 22:​37-39) Kuma ku un ermon batisadu pudi sforsa pa sedu servu ministerial?

5. Kuma ku un ermon pudi sforsa pa sedu servu ministerial?

⁵ Biblia kontanu kal maneras di sedu ku un ermon pirsisa di tene, pa pudi sedu servu ministerial. (1 Tim 3:​8-10, 12, 13) Si bu misti sedu servu ministerial, bu pirsisa di studa es maneras di sedu i sforsa pa tene elis. Ma purmeru, bu pirsisa di pensa diritu na motivu ku pui bu misti sedu servu ministerial.

PABIA KU BU MISTI SEDU SERVU MINISTERIAL?

6. Ke ku dibi di lebau na misti juda bu ermons ku irmas? (Mateus 20:28; jubi tambi diseñu .)

⁶ Pensa na minjor isemplu ku no tene, ku sedu Jesus Kristu. Tudu ke ki ta fasiba i pabia di amor pa si Pape i pa jintis. Es amor ku lebal na tarbaja duru i fasi kusas ku utrus ta dispresa. (Lei Mateus 20:28; Jon 13:​5, 14, 15) Si kontra i amor ku pui bu misti sedu servu ministerial, Jeova na bensuau i judau yangasa bu objetivu. — 1 Kor 16:14; 1 Ped 5:5.

7. Pabia ki mal misti sedu servu ministerial so pa utrus pudi ngabanu?

⁷ Jintis na mundu manga di bias ta dimira kilis ku ta mostra di kuma e sedu importanti. Ma povu di Jeova ka sedu suma elis. Un ermon ku ama utrus suma Jesus, ka ta misti manda riba di utrus o ojadu suma un algin importanti. Si un algin ku misti pa jintis ojal suma mas importanti di ki utrus disignadu na kongregason, i pudi nega fasi tarbajus simplis ki pirsis fasi pa pudi kuida di karnelis di Jeova ku tene balur. I pudi pensa di kuma el i importanti dimas pa fasi alguns tarbaju. (Jon 10:12) Jeova ka na bensua sforsu di kin ku ta fasi kusas pa utrus pudi ngabal. — 1 Kor 10:​24, 33; 13:​4, 5.

8. Kal konsiju ku Jesus da si apostolus?

⁸ Utrora te mesmu amigus intimu di Jesus, ta mistiba tene sertus responsabilidadis, ma ku mau motivason. Pensa na ke ku apostolu Tiagu ku Jon fasi. E pidi pa Jesus da elis un pusison importanti na si Renu. Jesus ka ngaba elis pa se pididu. En ves di kila, i fala tudu 12 apostolus asin: “Kil ku misti sedu garandi na bos, el i na sedu bo kriadu. Kil ku misti sedu purmeru na bos, i dibi di sedu katibu di tudu.” (Mar 10:​35-37, 43, 44) Ermons ku tene bon motivason, ku sedu, tene diseẑu di sirbi utrus, na juda kongregason di manga di maneras. — 1 Tes 2:8.

KE KU PUDI JUDAU PA BU MISTI SIRBI BU ERMONS?

9. Ke ku pudi judau pa bu misti sirbi bu ermons?

⁹ Sin duvida, bu ama Jeova i bu misti sirbi utrus. Ma, bu pudi ka tene diseẑu di fasi tarbaju ku un servu ministerial ta fasi. Ke ku pudi judau pa bu misti fasi es tarbaju? Pabia ku bu ka na pensa na kontentamentu ku bu na tene di sirbi bu ermons ku irmas? Jesus fala sin: “I mas minjor da di ki bo risibi.” (At 20:35) Jesus ka fala so es palabras, ma tambi i fasil. I kontentiba ciu di sirbi utrus, i abo tambi bu pudi tene es kontentamentu.

10. Kuma ku Jesus mostra di kuma i teneba kontentamentu di sirbi utrus? (Markus 6:​31-34)

¹⁰ Jubi un isemplu di kuma ku Jesus mostra di kuma i teneba kontentamentu di sirbi utrus. (Lei Markus 6:​31-34.) Un bias, Jesus ku si apostolus staba kansadu. E bai pa un kau susegadu pa pudi diskansa. Ma un grupu di jintis bai se dianti, e mistiba pa Jesus nsina elis. I pudiba nega, pabia el ku si apostolus e “ka tenba tempu pa kume.” O Jesus pudiba fala jintis pa e bai, dipus di nsina elis un bokadiñu. Ma pabia di amor ki tene pa relis ‘i kumsa na nsina elis manga di kusa.’ I kontinua nsina elis te oca ki “staba ja tardi.” (Mar 6:35) I ka fasil pabia di obrigason, ma i fasil pabia “i sinti pena delis.” I mistiba nsina elis, pabia i ama elis. Sirbi utrus daba Jesus kontentamentu garandi.

11. Kuma ku Jesus juda jintis ku ke ke pirsisa del? (Jubi tambi diseñu ku foto.)

¹¹ Jesus juda jintis manera ki nsina elis aserka di Deus, tambi i da elis ke ke pirsisa del. I fasi milagri pa da elis kumida, dipus i fala si disipulus pa e rapatil pa jintis. (Mar 6:41) Oca i fasi es, i nsina si disipulus kuma ke pudi sirbi utrus. Tambi i mostra elis di kuma, es tipu di tarbaju, ku parsi ku kil ku servus ministerial ta fasi, i un tarbaju importanti. Imaẑina alegria ku apostolus teneba di tarbaja juntu ku Jesus na da kumida, tok “tudu jinti kume, e farta”! (Mar 6:42) Na bardadi, es i ka purmeru bias ku Jesus pui interesi di utrus dianti di si propi interesi. I fasiba es duranti tudu si vida na Tera. (Mat 4:23; 8:16) Jesus ta kontentiba di nsina utrus i juda elis ku ke ke pirsisa del. Abo tambi bu na kontenti ciu, si bu sta dispostu pa sirbi utrus suma servu ministerial.

12. Pabia ku no ka dibi di pensa di kuma, no ka tene nin un kapasidadi ku no pudi usa pa juda na kongregason?

¹² Si bu pensa di kuma bu ka tene nin un kapasidadi, ka bu disanima. Na bardadi, bu tene maneras di sedu ku bu pudi usa pa juda na kongregason. Pensa na ke ku Paulu fala na 1 Koríntius 12:​12-30, dipus pidi Jeova pa i judau oja kuma kes ta aplika na bu situason. Palabras di Paulu mostra klaru di kuma, suma utrus servus di Jeova, bu pirsisadu del, tambi bu tene balur na kongregason. Si nes mumentu bu ka pudi sirbi suma servu ministerial, pabia bu pirsisa inda di tene alguns maneras di sedu, ka bu disisti. Ma en ves di kila, fasi tudu ku bu pudi pa sirbi Jeova i juda bu ermons. Bu pudi tene sertesa di kuma, ansions na pensa na bo i e na dau tarbaju ku bu pudi fasi. — Rom 12:​4-8.

13. Sera ki i difisil dimas pa un algin sedu servu ministerial?

¹³ Pensa tambi nes: Maioria di maneras di sedu ku Biblia fala servus ministerial dibi di tene, i maneras di sedu ku tudu kristons dibi di tene. Tudu kristons dibi di pertusi di Jeova, tene kontentamentu di pati utrus i vivi di un manera ku ta kontenta Deus. Pa kila, talves bu tene ja maioria di maneras di sedu ki pirsis pa sedu servu ministerial. Ma, ke mas ku un ermon pirsisa di fasi pa sedu servu ministerial?

KUMA KU BU PUDI SFORSA PA SEDU SERVU MINISTERIAL

14. Ke ku signifika “sedu retu”? (1 Timótiu 3:​8-10, 12)

¹⁴ Gosi no na jubi alguns maneras di sedu ku faladu del na 1 Timótiu 3:​8-10, 12. (Lei.) Un servu ministerial dibi di ‘sedu retu.’ Es palabra pudi traduzidu tambi pa “seriu”, “responsavel”, o “komporta di un manera ku jintis na rispitau”. Es ka signifika di kuma bu ka dibi di ri, o fasi kusas ku na pui utrus garasa. (Ekl 3:​1, 4) Ma i signifika di kuma, bu dibi di sforsa ciu pa kumpri tudu responsabilidadis ku bu dadu. Si bu ta kaba sempri tarbaju ku bu dadu i bu ta fasil diritu, ermons ku irmas na sibi di kuma e pudi konfia na bo, i e na rispitau.

15. Ke ku signifika ‘ka tene dus fala’, ku ‘ka faima pa diñeru’?

¹⁵ ‘Ka tene dus fala’ signifika di kuma bu sedu sinseru, onestu i di konfiansa. Bu ta fasi ke ku bu fala bu na fasi, i bu ka ta konta mintida. (Dit 17:20) ‘Ka faima pa diñeru’ signifika di kuma bu sedu onestu na bu nogos ku utrus, i bu ta kuida ben di diñeru ku bu ntregadu. Bu ka na apruveita di bon amisadi ku bu tene ku ermons ku irmas na kongregason pa tene mas klientis na bu nogos.

16. (a) Ke ku signifika ‘pa ka bibi biñu ciu’? (b) Ke ku signifika tene un “konsiensia puru”?

¹⁶ ‘Pa ka bibi biñu ciu’ signifika pa ka pasanta mon na bibi, o pa ka kunsidu suma algin ku ta bibi ciu. Tene un ‘konsiensia puru’ signifika di kuma, bu ta vivi di akordu ku normas di Jeova. Mesmu manera ku bu ka sedu perfeitu, bu tene bon amisadi ku Jeova, i kila pui pa bu tene sintidu susegadu.

17. Ke ku signifika sedu “probadu purmeru”? (1 Timótiu 3:10; Jubi tambi foto.)

¹⁷ ‘Probadu purmeru’ signifika di kuma, ansions nota di kuma bu ta kuida ben di bu responsabilidadis, i e pudi konfia na bo. Pa kila, ora ku ansions dau un tarbaju, sigi diritu instrusons ku orientasons ku organizason ta da. Tene sertesa di kuma bu ntindi diritu tarbaju ku bu dadu pa fasi, i kal tempu ki dibi di kaba. Ora ku bu ta fasi bu tarbaju diritu i ku animu, utrus na kongregason na nota di kuma, bu sta na kirsi ben na sintidu spiritual. Ansions, bo fasi tudu pa trena ermons batisadu. (Lei 1 Timótiu 3:10.) Sera ki i ten ermons batisadu na bo kongregason ku tene entri 10 ku 14 anu o ku mas nobu inda? Sera ki e kustuma fasi studu pesual, i purpara ben pa runions? Sera ki e ta kumenta na runions i prega sempri? Si sedu asin, da elis tarbaju ke pudi fasi di akordu ku se idadi. Asin es ermons jovens pudi “probadu purmeru.” Ku tempu ora ke tene entri 17 ku 19 anu, e pudi sedu servus ministerial.

18. Ke ku signifika “i ka ten nada kontra el”?

¹⁸ ‘I ka ten nada kontra el’ signifika di kuma, ningin ka pudi fala ku sertesa di kuma i ta fasi un kusa di mal. Sin duvida, kristons pudi akusadu di manera falsu. Jesus akusadu di manera falsu, i fala di kuma si sigiduris na akusadu tambi. (Jon 15:20) Ma, si bu kontinua tene bon komportamentu suma Jesus, bu na tene bon nomi na kongregason. — Mat 11:19.

19. Ke ku signifika sedu “maridu di un minjer son”?

¹⁹ ‘Maridu di un minjer son’. Si bu kasa, bu dibi di sigi norma di Jeova aserka di kasamenti. Jeova fala kasamenti dibi di sedu entri un omi ku un minjer. (Mat 19:​3-9) Un omi kriston nunka ka dibi di fasi pekadu seksual. (Eb 13:4) Ma i ten utru kusas ki pirsis fasi. Tambi, i dibi di sedu sempri fiel pa si minjer. Pa kila, i ka dibi di mostra nunka interesi romantiku pa utru minjeris. — Jo 31:1.

20. Kuma ku un ermon ta kuida di si familia “diritu”?

²⁰ ‘I dibi di sibi guberna si kasa ku si fijus diritu.’ Si abo i ŝef di familia, bu dibi di kuida di bu responsabilidadis ku seredadi. Fasi adorason na familia kada semana. Prega ku bu minjer i ku bu fijus sempri ki pusivel. Juda bu fijus pa e tene un amisadi forti ku Jeova. (Ef 6:4) Un omi ku ta kuida di si familia diritu, ta mostra di kuma i pudi kuida di kongregason. — Komparal ku 1 Timótiu 3:5.

21. Si bu ka sedu inda servu ministerial, ke ku bu pudi fasi?

²¹ Ermons, si bo ka sedu inda servus ministerial, di fabur bo studa es artigu diritu, i bo ora Jeova aserka des asuntu. Bo studa maneras di sedu ku un servu ministerial dibi di tene, i bo sforsa ciu pa tene es maneras di sedu. Bo pensa na bo amor pa Jeova i pa bo ermons ku irmas. Bo aumenta bo diseẑu di sirbi elis. (1 Ped 4:​8, 10) Sforsa pa sedu servu ministerial i bu na tene alegria garandi, ora ku bu na sirbi bu ermons ku irmas na kongregason. Pa Jeova bensua ciu bu sforsu di sirbi suma servu ministerial! — Fil 2:13.