Kuma ku bu pudi aprindi bardadi aserka di Deus?

1, 2. Kal isemplu ku ta mostra ki i pirsis un kusa ki na judanu sibi si un riliẑion sta sertu?

KUMA ku no pudi kunsi Deus? Sera ki i pirsis jubi nsinamentu di manga di riliẑions? Kila ka na sedu pusivel. Mesmu ki pusivel, kuma ku no pudi sibi kal nsinamentu ki sertu?

² Na bardadi, na diferenti opinion aserka di Deus, no pirsisa di nkontra un manera di sibi ke ki bardadi, un kusa ki jintis pudi seta. Pa da isemplu: Imaẑina i ten un diskuson na fera aserka di kumprimentu di un panu. Komersianti fala panu i tris metru, ma kumpradur fala i ka ciga kila. Kuma kes purbulema pudi resolvidu? So ora ki panu mididu ku fita metru.

3. Pabia di ke ki Biblia skirbidu?

³ Sera ki i ten un kusa suma fita metru, ki pudi judanu sibi si un riliẑion sta sertu? Sin, i ten, i Biblia. Deus manda pa Biblia skirbidu pa jintis di tudu lugar pudi aprindi bardadi aserka del. Milyons di Biblia mprimidu ja. I traduzidu kompletu o so un parti, na mas di 2.400 linguas. Kuas tudu jintis pudi aprindi bardadi aserka di Deus na se propi lingua.

4. Kal nformason ki Biblia tene?

⁴ Biblia i un prenda di balur ki bin di Deus. I splika kusas ki nunka no ka ­pudiba sibi. I papia aserka di jintis ku ta vivi na seu. I kontanu pensamentus di Deus, kuma kel i sedu, i ke ki i misti. I falanu di kuma ku Deus trata jintis na tempu pasadu. I papia di kusas ki na bin akontisi na futuru. Tambi i mostranu kuma ki no pudi nkontra kamiñu pa vida ku ka ta kaba.

Ke ku manda bu dibi di fia na Biblia

5. Kal isemplu ki ta mostra ki Biblia sta di akordu ku siensia?

⁵ I ten manga di rasons ki ta lebanu na fia ki na bardadi Biblia i Palabra di Deus. Un rason i di ki Biblia sta di akordu ku siensia. Manga di tempu atras jintis ta pensaba ki tera sta riba di un kusa. Suma isemplu, na Afrika Osidental, jintis ta pensaba ki tera suguradu pa un kobra ki rodia si kabesa, 3.500 bias riba di tera i bas di tera. Asin, di akordu ku siensia, un skirbidur di Biblia skirbiba ja, mas di 3.500 anus atras, di ki Deus “pindra mundu riba di nada.” — Jo 26:7.

6. Kal ki prova mas garandi ki ta mostra di kuma Biblia bin di Deus?

⁶ Prova garandi di ki na bardadi Biblia bin di Deus i si manera izatu di fala di futuru. Diferenti ku jambakus o muru, so Deus ki kunsi futuru; tudu kusas ki i fala na Biblia sempri ta akontisi.

7. Kal kusas ki Biblia falaba del ki kumpri na pasadu?

⁷ Manga di kusas ki Biblia fala del kumpri na tempus pasadu. Suma isemplu, 700 anus antis, Biblia kontaba ja ki Jesus na bin padidu na sidadi di Belen, i kila bin akontisi. (Mikeias 5:2; Mateus 2:3-9) Alen di manga di kusas ki faladu aserka di Jesus, Biblia fala tambi di ki i na bin padidu pa un minjer ku ka kunsi omi, i na bin traiudu pa 30 muedas di prata. Tudu es kusas ki faladu kumpri. Na bardadi, nin un pekadur ka pudi konta kusas suma esis! — Isaias 7:14; Zakarias 11:12, 13; Mateus 1:22, 23; 27:3-5.

8. Kuma ki manga di kusas ki Biblia fala del sta na kumpri aos, i ke ki kila ta mostra?

⁸ Manga di kusas ki Biblia fala del, sta na kumpri na no tempu. Ali alguns delis:

•  “Nason na lanta kontra utru nason [pa gera], renu kontra utru renu. Na manga di lugar con na tirmi ku forsa, fomi na ten, duensa na laga.” — Lukas 21:10, 11.

• “Pekadu na kirsi.” — Mateus 24:12.

• “Na fin de tempu li . . . jintis na ama se kabesa, e ta sedu faimadu . . . ku ka ta obi se pape ku se mame . . . brabu, salvás, ku ka ten amor pa kil ki bon . . . orgulyosu. Te pa e ama Deus, e na ama sabura de mundu.” — 2 Timótiu 3:1-5.

Bu ka konkorda kuma es kusas sta na akontisi aos? Manera ku es kusas ku faladuba ja sta na akontisi, ta mostra ki Biblia i ka kualker livru. I Palabra ku bin di Deus! — 2 Timótiu 3:16.

Sera ki Biblia mudadu?

9, 10. Ke ki ta mostra di kuma Deus ka disa jintis muda Biblia?

⁹ Imaẑina ki abo i dunu di un fabrika i bu pui na kuadru un lista di regras pa bu tarbajaduris. Si un inimigu muda ke ki bu skirbi, ke ku bu na fasi? Sera ki bu ka na kuriẑi ke ki mudadu? Di mesmu manera, Deus ka disa pa jintis muda bardadi ki sta na si Palabra, Biblia.

¹⁰ Kilis ku tenta muda nsinus di Palabra di Deus e ka konsigi. Ora ku no kompara Biblia ku no tene aos ku kopias antigu di Biblia, e ta sedu mesmu. Kila ta mostra ki Bilbia ka mudadu disna ki i skirbidu.