PARTI 1
Buska ajuda di Deus pa tene un kasamenti filis
“Na kumsada, Kriadur kumpu elis macu ku femia”. — Mateus 19:4
Jeovaa Deus ku fasi purmeru kasamenti. Biblia falanu kuma dipus ki kumpu purmeru minjer, i “lebal pa Adon.” Adon kontenti dimas tok i fala: “Es gosi i os di ña os, karni di ña karni.” (Kumsada 2:22, 23) Te gosi Jeova misti inda pa kasadus sedu filis.
Ora ku bu kasa, talves bu pudi pensa kuma tudu kusa na kuri diritu. Ma bardadi i utru. Mesmu ki omi ku minjer ama n̈utru ciu, e pudi tene purblemas. (1 Koríntius 7:28) Nes livru, bu na oja konsijus di Biblia ki, si i aplikadu, i pudi fasi bu kasamenti ku bu familia sedu filis. — Salmu 19:8-11.
1 SETA PAPEL KU JEOVA DAU
ES KI BIBLIA FALA: Omi i kabesa di familia. — Efésius 5:23.
Si abo i omi, Jeova misti pa bu kuida di bu minjer diritu. (1 Pedru 3:7) I kumpul pa i sedu bu kumpañer, i misti pa bu tratal ku rispitu i ku amor. (Kumsada 2:18) Bu dibi di ama bu minjer te na puntu di pui si interes riba di bu interes. — Efésius 5:25-29.
Si abo i minjer, Jeova misti pa bu rispita bu omi ciu, i pa bu judal na kumpri si papel. (1 Koríntius 11:3; Efésius 5:33) Apoia si disison, i judal ku tudu bu korson. (Kolosensis 3:18) Si bu fasi asin, bu na tene balur dianti di Jeova i dianti di bu omi. — 1 Pedru 3:1-6.
KE KU BU PUDI FASI:
Punta bu parseru kuma ku bu pudi sedu bon omi o bon minjer. Sukuta diritu ke ki i na falau, i fasi ke ki i pirsis pa minjoria.
Sedu pasienti. I pirsis tempu pa bo aprindi manera di kontenta n̈utru.
2 PREOKUPA KU SINTIMENTU DI BU PARSERU
ES KI BIBLIA FALA: I bon jubi pa interes di bu parseru na kasamenti. (Filipensis 2:3, 4) Trata bu parseru suma un kusa di balur, i lembra kuma Jeova misti pa si servus sedu “bon ku tudu jinti”. (2 Timótiu 2:24) “I ten utrus ku tene palabra suma ponta di spada, ma palabras di jiru ta da saudi.” Asin, kuji diritu palabras ku bu na papia. (Ditus 12:18) Spiritu di Jeova pudi judau papia ku bondadi i ku amor. — Gálatas 5:22, 23; Kolosensis 4:6.
KE KU BU PUDI FASI:
Antis di bu kumsa papia un asuntu seriu ku bu parseru, ora bu pidi ajuda pa pudi manti kalmu i sedu abertu.
Pensa diritu na ke ku bu na fala i na kuma ku bu na falal.
3 BO PUI NA UN SON
ES KI BIBLIA FALA: Ora ku bu kasa, bu ta pasa sedu “un kurpu son” ku bu parseru. (Mateus 19:5) Ma mesmu asin, bo sedu inda dus jinti ku talves pudi tene diferentis manera di oja kusas. Pa kila, na tudu ku bo na fasi, bo pirsisa di pui na un son. (Filipensis 2:2) Union i un kusa importanti na ora di toma disison. Biblia fala: “KU konsiju bu planu pudi bai dianti”. (Ditus 20:18) Bo disa Biblia orienta bos ora ku bo na toma disisons importanti. — Ditus 8:32, 33.
KE KU BU PUDI FASI:
Ka bu konta bu parseru so ke ku bu sibi, ma kontal tambi bu sintimentus.
Antis di bu entra na komprimisu, obi inda bu parseru.
a Jeova i nomi di Deus na Biblia.