Kuma di rosolvi purblemas?

Ora ku bu kumsa vivi juntu ku bu parseru, spera kuma purblema na ten. Es pudi sedu pabia bo tene diferenti manera di pensa, di sinti i di vivi. O talves purblemas pudi bin di fora o di kusas ku bo ka spera.

Talves bu pudi misti kuri di purblema, ma Biblia konsijanu pa nfrenta purblemas. (Mateus 5:​23, 24) Aplika konsijus di Biblia na judau oja minjor suluson pa bu purblemas.

1 BO PAPIA ASERKA DI PURBLEMA

ES KI BIBLIA FALA: “I ten . . . tempu di papia”. (Eklesiastis 3:​1, 7) I bon pa bo ranja tempu pa papia di purblema. Sedu sinseru ku bu parseru, kontal ke ku bu na sinti i ke ku bu pensa aserka di asuntu. Sempri “fala bardadi” ku bu parseru. (Efésius 4:25) Mesmu si bu paña raiba, ivita pa ka raiba lebau na purblema. Un rasposta kalmu ta ivita pa ka un simplis kombersa bin kaba na gera. — Ditus 15:4; 26:⁠20.

Mesmu si bu ka konkorda ku bu parseru, manti kalmu, nunka ka bu diskisi mostra amor ku rispitu pa bu parseru. (Kolosensis 4:⁠6) Tenta rosolvi purblema mas sedu pusivel, i ka bo disa di papia ku n̈utru. — Efésius 4:⁠26.

KE KU BU PUDI FASI:

• Ranja un bon mumentu pa papia di purblema.

• Ora ku bu parseru na papia, ka bu ntrumpil. Pera bu mumentu di papia.

2 SIBI SUKUTA I SIBI NTINDI

ES KI BIBLIA FALA: “Bo ama n̈utru di tudu bo korson, suma ermons. Bo da n̈utru purmeru lugar ku rispitu.” (Romanus 12:10) Bu manera di sukuta i importanti dimas. Tenta ntindi ke ku bu parseru misti fala. Biblia fala: “Bo dibi di sinti di mesmu manera; . . . bo baŝa pa n̈utru.” (1 Pedru 3:8; Tiagu 1:19) Ka bu finji so sukuta. Si pusivel disa ke ku bu na fasi i presta tudu atenson pa bu parseru, o puntal si bo pudi bin papia di kila mas tardi. Ka bu nkara bu parseru suma bu inimigu, ma suma bu kolega di ekipa, kila na judau pa ka ‘lestu di paña raiba’. — Eklesiastis 7:⁠9.

KE KU BU PUDI FASI:

• Kontinua sukuta, i obi opinion di bu parseru, mesmu si bu ka kontenti ku ke ku bu sta na obi.

• Sibi ntindi ke ku sta tras di palabras. Ntindi ke ku ton di vos di bu parseru ku si atitudi misti fala.

3 APLIKA KE KU BO DISIDI

ES KI BIBLIA FALA: “Si algin ta tarbaja, i ten purbitu, ma si i sinta i na papia son, i ta bai pa koitadesa.” (Ditus 14:23) Ciga akordu na un kusa i bon, ma i ka sufisienti. Bo pirsisa di aplika ke ku bo disidi. Es talves pudi sedu difisil, ma i bali pena. (Ditus 10:⁠4) Si bo tarbaja juntu suma un ekipa, bo tarbaju na “mas rindi.” — Eklesiastis 4:⁠9.

KE KU BU PUDI FASI:

• Disidi ku bu parseru ke ku bo na fasi pa rosolvi purblema.

• Di un tempu pa utru bo jubi si bo sta na aplika ke ku bo disidi.