LISON 10
Kuma ku runions di Tustumuñas di Jeova pudi judau?
Bu ciga ja di kumbidadu pa un runion di Tustumuñas di Jeova? Si bu ka ciga di mati, talves bu pudi ka sta avontadi di matil pa purmeru bias. Talves bu pudi punta: ‘Ke ku ta akontisi nes runions? Pabia ke runions i importanti? Pabia ku N dibi di matil?’ Nes lison, bu na aprindi kuma ku mati runions, pudi pertusiu di Deus i judau pesualmenti.
1. Pabia di ke ku manda Tustumuñas di Jeova ta fasi runion?
Nota kuma ku un skirbidur di Biblia mostra rason prinsipal ku pui no ta fasi runion: “N na ngaba SIÑOR na juntamentu.” (Salmu 26:12) Di mesmu manera, Tustumuñas di Jeova ta tene kontentamentu garandi di junta na runions. Na mundu ntidu e ta junta kada semana pa ngaba Deus, pa kanta, i pa ora. Kada anu, e ta fasi tambi alguns runions mas garandi pa adora Deus.
2. Ke ku bu na aprindi na no runions?
Na no runions no ta konsentra na Palabra di Deus, atraves di ‘colona i splika si sintidu’. (Lei Neemias 8:8.) Si bu ta mati no runions bu na aprindi aserka di Jeova ku si maneras di sedu. Mas bu na aprindi aserka di amor ki tene pa bo, mas bu na pertusi del. Bu na diskubri tambi, kuma i pudi judau tene un vida filis. — Isaias 48:17, 18.
3. Kuma ku jintis ku bu na oja na no runions pudi judau?
Jeova falanu pa no “pensa na n̈utru, pa disperta n̈utru pa mostra amor, pa fasi bon tarbaju. Ka no disa kustumu di junta”. (Ebreus 10:24, 25) Na no runions bu na oja jintis ku na bardadi ta preokupa ku n̈utru, i ku misti aprindi mas aserka di Deus suma bo. Bu na pudi papia ku utrus, obi diskursus ku kumentarius nkoraẑanti basiadu na Biblia. (Lei Romanus 1:11, 12.) Bu na pudi tambi papia ku utrus ku sai ben na lida ku se purblemas na vida, tantu solterus suma kasadus. Esis i so alguns rasons ku pui Jeova misti pa no ba ta mati sempri runions!
APRINDI MAS
Diskubri kuma ku runions di Tustumuñas di Jeova ta sedu, i pabia ki bali pena fasi sforsu pa mati es runions.
4. Runions di Tustumuñas di Jeova
Na purmeru sekulu, kristons ta juntaba sempri pa adora Jeova. (Romanus 16:3-5) Lei Kolosensis 3:16, dipus bo kombersa aserka des purgunta:
Kuma ku kristons di purmeru sekulu ta adoraba Jeova?
Aos, Tustumuñas di Jeova ta fasi tambi runions sempri na se lugaris di adorason. Pa oja kuma ku se ruinons ta sedu, mostra VIDEO. Dipus jubi foto di runion di kongregason, i bo kombersa aserka des purguntas:
Kal kusas ku bu oja na video, ku parsi ku ke ku bu kaba di lei na Kolosensis 3:16?
Na video o na foto, sera ki bu nota di algun kusa mas, aserka di no runion ku tokau?
Lei 2 Koríntius 9:7, dipus bo kombersa aserka des purgunta:
Pabia ku Tustumuñas di Jeova ka ta pidi diñeru na se runions?
Juntu ku kin ku ta studa Biblia ku bo, jubi alguns kusas ku na bin faladu del, na un di runions des semana.
Kal parti di runion ku bu aŝa kuma i na sedu mas interesanti o pratiku pa bo?
Sera ki bu sibiba kuma?
Na jw.org, bu pudi oja ora ku lokal ku runions ta fasidu na mundu ntidu.
No runions ta nklui diskursus, videos, ku trenamentu pa pregason ku nsinu. Tudu runions ta kumsa i kaba ku kantiku i orason.
Na alguns parti di runion asistensia ta kumbidadu pa da kumentariu.
Tudu jintis sta kumbidadu — familias, solterus, jintis garandi, ku mininus.
Na no runions entrada i livri. Tustumuñas di Jeova ka ta pidi diñeru.
5. I pirsis sforsu pa mati runions
Jubi izemplu di familia di Jesus. Di Nazaré pa Jerusalen, e tenba ku yanda serka di tris dia, pa mati un runion mas garandi ku ta fasidu kada anu, na se bias e ta pasaba pa zonas ku tene montaña. Lei Lukas 2:39-42, dipus bo kombersa aserka des purguntas:
Bu pensa kuma i pirsis sforsu pa fasi es bias pa Jerusalen?
Pabia di ke ku manda bu dibi di fasi sforsu pa mati runions?
Bu pensa kuma i bali pena fasi kila? Pabia ki bali pena?
Biblia fala kuma, junta ku utrus pa adora Jeova i muitu importanti. Lei Ebreus 10:24, 25, dipus bo kombersa aserka des purgunta:
Ke ku manda no dibi di mati runions sempri?
ALGUNS JINTIS TA FALA: “Bu ka pirsisa di junta ku utrus. Basta so bu studa Biblia na kasa.”
Kal testu o izemplu di Biblia ku ta mostra ke ku Jeova misti?
RUSUMU
Mati runions na judau aprindi mas aserka di Jeova, fortalisi bu amizadi kel i adoral juntu ku utrus.
Rekapitulason
Pabia ku Jeova nsentivanu mati runions juntu ku utrus?
Ke ku bu na aprindi na runions di Tustumuñas di Jeova?
Di kal utru manera ku mati runions pudi judau?
TENE MAS INFORMASON
Ke gora si bu ka sta avontadi pa mati un runion? Jubi kuma ku un omi ku ta sintiba asin, pasa na gosta di runions.
Jubi kuma ku un joven gosta di runions, i ke ki fasi pa kontinua mati runions.
Diskubri ke ku utrus fala aserka di mati runions.
“Pabia ki Bon Mati Runions na Salon di Renu?” (Artigu na internet)