LISON 13
Kuma ku riliẑions falsu lunjusi jintis di Deus
Si Deus i amor, pabia di ke ku manda manga di riliẑions ku ta fala kuma e ta represental ta fasi kusas ku ka bali? Es riliẑions i falsu; ke ke ta fala i fasi ta leba jintis na fia na mintida aserka di Deus. Kuma ke ta lunjusi jintis di Deus? Kuma ku Deus ta sinti aserka di kila? I ke ku Deus na fasi?
1. Kuma ku nsinus di riliẑions falsu ta lunjusi jintis di Deus?
Riliẑions falsu “torkia bardadi di Deus pa mintida”. (Romanus 1:25) Pur izemplu, manga di riliẑions ka ta sina se sigiduris nomi di Deus. Ma, Biblia fala di kuma nomi di Deus dibi di usadu. (Romanus 10:13, 14) Alguns ŝefis riliẑiosu ta fala kuma, ora ku un kusa di mal akontisi i vontadi di Deus. Ma es i mintida. Kusas ku ka bali nunka bin Deus. (Lei Tiagu 1:13.) Infilismenti, es mintida ku riliẑions ta nsina lunjusi jintis di Deus.
2. Kuma ku asons di riliẑions falsu ta lunjusi jintis di Deus?
Riliẑions falsu ka ta trata jintis suma ku Jeova ta trata jintis. Biblia fala, pekadu di riliẑions falsu “junta tok i ciga seu.” (Apokalipsi 18:5) Pa manga di anu, riliẑions falsu miti na pulitika e apoia geras i e pui pa manga di jinti matadu. Alguns ŝefis riliẑiosu ta misti sedu riku i e ta pidi se sigiduris diñeru. Se asons ta mostra kuma e ka kunsi Deus, tambi e ka pudi represental. — Lei 1 Jon 4:8.
3. Kuma ku Deus ta sinti aserka di riliẑions falsu?
Si kusas ku ta fasidu pa riliẑions falsu ta pou fika ku raiba, kuma gora ku bu pensa Jeova ta sinti? Jeova ama jintis, ma i ta paña raiba di ŝefis riliẑiosu ku ta lunjusi jintis del i ku ta trata se sigiduris mal. I purmiti kuma riliẑions falsu na bin kabadu kel “nunka mas i ka na ojadu.” (Apokalipsi 18:21) I ka na tarda, Deus na bin kaba ku tudu riliẑions falsu. — Apokalipsi 18:8.
APRINDI MAS
Diskubri mas, kuma ku Deus ta sinti aserka di riliẑions falsu. Aprindi mas aserka di ke ki fasi, tambi pabia di ke ku manda asons di riliẑions falsu, ka dibi di tujiu kunsi Jeova.
4. Deus ka ta seta tudu riliẑions
Manga di jintis ta fia kuma, riliẑions i suma diferentis kamiñu i tudu ta leba pa Deus. Ma sera ki i bardadi? Lei Mateus 7:13, 14, dipus bo kombersa aserka des purgunta:
Ke ku Biblia fala aserka di kamiñu ku ta leba pa vida?
Mostra VIDEO, dipus bo kombersa aserka des purgunta:
Sera ki Biblia fala kuma i ten manga di riliẑions ku ta kontenta Deus?
5. Riliẑions falsu ka ta kopia amor di Deus
Riliẑions falsu lunjusi jintis di Deus di manga di manera. Un di mau kusas ke fasi i di apoia geras. Pa oja un izemplu di kila, mostra VIDEO. Dipus bo kombersa aserka des purguntas:
Duranti Sugundu Gera Mundial ke ku manga di riliẑions fasi?
Ke ku bu pensa aserka di ke ke fasi?
Lei Jon 13:34, 35 ku 17:16. Dipus bo kombersa aserka des purguntas:
Kuma ku Jeova ta sinti ora ku riliẑions apoia gera?
Riliẑions falsu i kulpadu pa manga di mau kusas. I di kal utru manera ku bu oja riliẑions falsu falia na kopia amor di Deus?
Riliẑions falsu ka ta kopia amor di Deus.
6. Deus misti juda jintis sai di riliẑions falsu
Lei Apokalipsi 18:4,a dipus bo kombersa aserka des purgunta:
Kuma ku bu ta sinti, pa manera ku bu sibi kuma Deus misti salba jintis ku nganadu pa riliẑions falsu?
7. Kontinua aprindi aserka di Deus di bardadi
Sera ki kusas ku riliẑions falsu ta fala i fasi dibi di afeta bu manera di oja Deus? Imaẑina un fiju ku nega sukuta bon orientasons ku si pape dal. Es fiju sai di kasa i entra na mau vida. Pape ka konkorda ku komportamentu di fiju. Pabia di ke ku manda, i ka justu kulpa pape pa manera ku fiju rebela i sai di kasa?
Sera ki i justu kulpa Jeova i para aprindi aserka del, pabia di asons di riliẑions falsu?
ALGUNS JINTIS TA FALA: “Tudu riliẑions i mesmu, pabia e ta nsina bon kusas.”
Sera ki i asin ku bu ta pensa tambi?
Nin si kontra manga di riliẑions ta fala e ta sina bon kusas, ke ku manda Deus ka ta seta elis tudu?
RUSUMU
Riliẑions falsu lunjusi jintis di Deus, atraves di se nsinus falsu i mau kusas ke ta fasi. Deus na kaba ku riliẑions falsu.
Rekapitulason
Kuma ku bu ta sinti aserka di kusas ku riliẑions falsu sina i ku se asons?
Kuma ku Jeova ta sinti aserka di riliẑions falsu?
Ke ku Deus na bin fasi ku riliẑions falsu?
TENE MAS INFORMASON
Aprindi di kal dus maneras, ku manga di riliẑions ka ta kontenta Deus.
“Sera ki Tudu Riliẑions i Mesmu? Sera ki Elis Tudu e ta Leba pa Deus?” (Artigu na internet)
Pabia ku Jeova misti pa no adoral juntu ku utrus?
“Sera ki i Pirsis Fasi Parti di un Organizason Riliẑiosu?” (Artigu na internet)
Pa manga di anus, riliẑions sina jintis mintida aserka di Deus, e pui jintis fia di kuma Deus ka ta preokupa ku nos, tambi i un mau algin. Aprindi bardadi aserka di tris des mintida ke sina.
“Mintidas ku Pui Jintis Fia di Kuma Deus ka Amanu” (Sintinela di 1 di novembru di 2013)