LISON 17

Kal tipu di algin ku Jesus sedu?

Edison mprimidu

Ora ku no na aprindi kusas ku Jesus fala i fasi ocal na Tera, no na diskubri si bon maneras di sedu ku na pertusinu mas del i di si Pape Jeova. Kal ki alguns di bon maneras di sedu di Jesus? Kuma ku no pudi kopia Jesus na no vida?

1. Di kal manera ku Jesus parsi ku si Pape?

Ocal na seu, Jesus ta jubiba kuma ku si Pape ta fasi kusas ku tudu amor i aprindi del pa bilions di anu. Pabia di kila, i ta pensa, i ta sinti, i ta aẑi suma si Pape. (Lei Jon 5:19.) Jesus kopia diritu maneras di sedu di si Pape, e ku manda i fala: “Kin ku ojan, i oja ña Pape.” (Jon 14:9) Ora ku bu na aprindi maneras di sedu di Jesus, bu na kunsi Jeova mas minjor. Pur izemplu, preokupason ku Jesus tene pa jintis ta mostra kuma ku Jeova ta preokupa ku bo.

2. Kuma ku Jesus mostra kuma i ama Jeova?

Jesus fala: “Pa jintis di mundu sibi kuma N ama ña Pape, tambi N ta fasi kil ki mandan.” (Jon 14:31) Ocal na Tera, Jesus mostra si amor garandi pa si Pape pa manera ki obdisil mesmu oca ki difisilba fasi kila. Jesus gosta ciu di papia di si Pape i juda jintis tene amizadi ku el. — Jon 14:23.

3. Kuma ku Jesus mostra di kuma i ama jintis?

Biblia fala, Jesus staba ‘kontenti ku jinti ku staba na mundu.’ (Ditus 8:31) I mostra es amor pa manera ki nkoraẑa jintis, i juda elis sin pensa so na si kabesa. Milagris ki fasi ka ta mostra so si puder, ma tambi pena ki ta sinti pa jintis. (Markus 1:40-42) I trata jintis ku bondadi, sin fasi skuju. Si palabras ta da konsolu ku speransa pa tudu kilis ku tene bon korson i ku ta sukutal. Jesus staba dispostu pa sufri i muri pabia di amor ki teneba pa tudu jintis. Ma, i mas amaba kilis ku ta sigi si nsinus. — Lei Jon 15:13, 14.

APRINDI MAS

Aprindi mas aserka di maneras di sedu di Jesus. I jubi kuma ku bu pudi mostra amor, tambi gosta di pati utrus suma el.

4. Jesus ama si Pape

Izemplu di Jesus ta sinanu, kuma ku no pudi mostra no amor pa Deus. Lei Lukas 6:12 ku Jon 15:10; 17:26. Dipus di lei kada testu, bo kombersa aserka des purgunta:

Suma Jesus, kuma ku no pudi mostra kuma no ama Jeova?

Jesus na ora. — Jesus ama si Pape ku sta na seu i ta papia ku el sempri na orason.

5. Jesus ta preokupa ku jintis ku pirsisa di ajuda

Jesus mas ta preokupa ku utrus jintis di ki si propi kabesa. Mesmu ora ki kansa, i ta usa si tempu ku si forsa pa juda utrus. Lei Markus 6:30-44, dipus bo kombersa aserka des purguntas:

Nes relatu, kal ki alguns manera ku Jesus mostra si preokupason pa utrus? — Jubi versikulu 31, 34, 41 ku 42.
Ke ku leba Jesus na juda utrus? — Jubi versikulu 34.
Suma Jesus kopia maneras di sedu di Jeova, ke ku es ta sinau aserka di Jeova?
Di kal maneras ku no pudi kopia preokupason ku Jesus tene pa utrus?

Jesus fasi un milagri nunde ki da manga di jintis di kume so ku sinku pon ku dus pis. Disipulus sta na da kumida pa omis, minjeris ku mininus.

6. Jesus gosta di pati

Jesus ka tene manga di kusas, ma i gostaba di pati utrus ke ki tene, i falanu kuma pa no ba ta pati. Lei Atus 20:35, dipus bo kombersa aserka des purgunta:

Di akordu ku Jesus, ke ki mas minjor fasi?

Mostra VIDEO, dipus bo kombersa aserka des purgunta:

VIDEO: “I Ten Mas Kontentamentu na Da” — So un parti (4:00)

Di kal manera ku no pudi pati, mesmu si no ka tene manga di kusa?

Sera ki bu sibiba kuma?

Biblia sinanu, pa no ora pa Jeova na nomi di Jesus. (Lei Jon 16:23, 24.) Ora ku no ora des manera, no ta mostra kuma no rukuñisi ke ku Jesus fasi pa judanu sedu amigu di Jeova.

ALGUNS JINTIS TA FALA: “Deus ta punu sufri pa pudi testanu.”